പാലക്കാട് ജില്ലയിലെ ശ്രീകൃഷ്ണപുരം ഹൈസ്കൂളിലെയും ഹയർ സെക്കൻഡറി സ്കൂളിലെയും സ്കൗട്ട് വിദ്യാർത്ഥികൾ ലഹരി വിരുദ്ധ ദിനാഘോഷത്തോട് അനുബന്ധിച്ച് ഫ്ലാഷ് മോബ് അവതരിപ്പിച്ചു. ചന്തപ്പുര സെന്ററിലും സ്കൂളിലുമായിരുന്നു ഈ ഫ്ലാഷ് മോബ് നടന്നത്. പരിപാടി പിടിഎ വൈസ് പ്രസിഡന്റ് രാധാകൃഷ്ണൻ ഉദ്ഘാടനം ചെയ്തു. പ്രധാനാധ്യാപകൻ എം കെ മനോജ് അധ്യക്ഷ സ്ഥാനം വഹിച്ച ഈ ദിനാഘോഷത്തിൽ സ്കൗട്ട് അധ്യാപിക ശ്രീജ കെ പി സ്വാഗതം പറഞ്ഞു. സ്കൗട്ട് അധ്യാപകരായ പ്രചോദ് കെ ആർ, അശ്വതി ആർ, അതുല്യ മോഹൻ, സിബിമോൾ, വിബിൻനാഥ് എന്നിവരും ചടങ്ങിൽ പങ്കെടുത്തു.

കൂവപ്പള്ളിയിലെ സ്വീറ്റ് ബ്രദേഴ്‌സ് സംഘടിപ്പിക്കുന്ന ലോകകപ്പ് പ്രവചന മത്സരത്തിന്റെ കൂപ്പണുകൾ പ്രകാശനം ചെയ്തു. മുതിർന്ന ഫുട്ബോൾ പ്രേമിയും ആരാധകനും, മുൻ റിസർവ് ബാങ്ക് ഉദ്യോഗസ്ഥനും ഡാനിയേൽ ബുക്ക്‌ ഷോപ്പ് ഉടമയുമായ ശ്രീ ജോസ് ടി. ഡാനിയലാണ് കൂപ്പണുകളുടെ പ്രകാശനം നിർവഹിച്ചത്. വേൾഡ് കപ്പ് ജേതാക്കളെ പ്രവചിക്കാനുള്ള കൂപ്പൺ സ്ക്രീനിംഗ് കമ്മിറ്റി ചെയർമാൻ ജോസ് പി. ജേക്കബ് ഏറ്റുവാങ്ങി. സംഘാടകസമിതി കൺവീനർ അനീഷ് ഐസക്, ഭാരവാഹികളായ അജു ജോസ്, ആൽബി സെബാസ്റ്റ്യൻ എന്നിവർ ഗോൾഡൻ ബൂട്ട്, ഗോൾഡൻ ഗ്ലൗ, ഗോൾഡൻ ബോൾ എന്നിവ നേടുന്ന താരങ്ങളുടെ പേര് പ്രവചിക്കാനുള്ള കൂപ്പണുകൾ സ്വീകരിച്ചു. പ്രോഗ്രാം കോ-ഓർഡിനേറ്റർ തോമസ് കിഴക്കേൽ മത്സരത്തിൽ പങ്കെടുക്കാനുള്ള ആദ്യ കൂപ്പൺ ജോസ് ടി. ഡാനിയലിന് കൈമാറി. സംഘാടകസമിതി അംഗങ്ങൾ ഉൾപ്പെടെ ചടങ്ങിൽ പങ്കെടുത്ത എല്ലാവരും ജോസ് ടി. ഡാനിയലിന്റെ പക്കൽ നിന്ന് കൂപ്പണുകൾ ഏറ്റുവാങ്ങി. കൺവീനർ അനീഷ് ഐസക്, പ്രോഗ്രാം കോ-ഓർഡിനേറ്റർ തോമസ് കിഴക്കേൽ, ട്രഷറർ ആൻസൺ ജേക്കബ്, ജോയിൻ കൺവീനർ ജെറിഷ് പി.എൽ. എന്നിവർ പ്രസംഗിച്ചു. കൂവപ്പള്ളി ടൗണിലെ വ്യാപാര സ്ഥാപനങ്ങളിലും പൊതുജനങ്ങൾക്കും സംഘാടകസമിതി അംഗങ്ങൾ കൂപ്പണുകൾ വിതരണം ചെയ്തു. ഈ പ്രവചന മത്സരത്തിൽ പങ്കെടുക്കാനുള്ള കൂപ്പണുകൾ ഡ്രീംസ് ബേക്കറിയിൽ നിന്നും സംഘാടകസമിതി അംഗങ്ങളിൽ നിന്നും സൗജന്യമായി ലഭിക്കും. മത്സരത്തിൽ വിവിധ കാറ്റഗറികളിലായി ക്യാഷ് പ്രൈസുകൾ ഉൾപ്പെടെ 7 സമ്മാനങ്ങളാണ് സംഘാടകർ ഒരുക്കിയിരിക്കുന്നത്. കൂപ്പണുകൾ പൂരിപ്പിച്ച് കൂവപ്പള്ളി ടൗണിൽ ഒരുക്കിയിരിക്കുന്ന ബോക്സിൽ നിക്ഷേപിക്കാനുള്ള അവസാന തീയതി ജൂലൈ 3 ആണ്.

സംസ്ഥാന സർക്കാരിന്റെ 'തൂഫാൻ' പദ്ധതിക്ക് പിന്തുണ പ്രഖ്യാപിച്ച് പതാരം എൻ.എസ്.എൻ.എസ്.പി.എം.യു.പി.എസിലെ കുട്ടികൾ അന്താരാഷ്ട്ര ലഹരി വിരുദ്ധ ദിനത്തോടനുബന്ധിച്ച് ഒരു കുട്ടി ചങ്ങല തീർത്തു. ഇതിന് മുന്നോടിയായി, അധ്യാപകരുടെയും വിദ്യാർത്ഥികളുടെയും നേതൃത്വത്തിൽ പതാരം ജംഗ്ഷനിൽ ഒരു ലഹരി വിരുദ്ധ റാലിയും സംഘടിപ്പിക്കുകയുണ്ടായി. തുടർന്ന് സ്കൂളിൽ നടന്ന ചടങ്ങിൽ കുട്ടികൾ ലഹരി വിരുദ്ധ പ്രതിജ്ഞ ചൊല്ലുകയും ലഹരി വിരുദ്ധ പോസ്റ്റർ രചന മത്സരം, ബോധവൽക്കരണ ക്ലാസ് എന്നിവ നടത്തുകയും ചെയ്തു. കുന്നത്തൂർ എക്സൈസ് പ്രിവന്റീവ് ഓഫീസർ ജിനു തങ്കച്ചനാണ് ബോധവൽക്കരണ ക്ലാസിന് നേതൃത്വം നൽകിയത്. ഈ ക്ലാസിൽ സ്കൂൾ പിടിഎ പ്രസിഡണ്ട് കെ. ദിലീപ് കുമാർ അധ്യക്ഷനാവുകയും സ്കൂൾ എച്ച്.എം. രാജകുമാരി സ്വാഗതം ആശംസിക്കുകയും ചെയ്തു. അധ്യാപകരായ ശ്രീകല കെ, അഞ്ജന കെ.വി, ജ്യോതിലക്ഷ്മി, ലക്ഷ്മി ബി, ഗാർഗി എന്നിവർ പരിപാടികൾക്ക് നേതൃത്വം നൽകിയപ്പോൾ സ്റ്റാഫ് സെക്രട്ടറി അജയകുമാർ വി.എസ് നന്ദി അറിയിച്ചു.