बोगस जात प्रमाणपत्र सादर केल्याप्रकरणी नवाब मलिक यांच्या पुतणीचे नगरसेवक पद रद्द करण्यात आले आहे. या कारवाईमुळे राजकीय वर्तुळात खळबळ उडाली आहे.

दुबई येथे आयोजित एका जागतिक व्यासपीठावर भारतीय शिक्षिका रुबल नेगी यांना प्रतिष्ठित जागतिक पुरस्काराने सन्मानित करण्यात आले आहे. तब्बल १३९ देशांतील स्पर्धकांमधून रुबल नेगी यांची या जागतिक पुरस्कारासाठी निवड झाली असून, त्यांना एक मिलियन डॉलरची पुरस्कार राशी देऊन गौरवण्यात आले आहे.

महेश बिडगर मारहाण प्रकरणी परभणीच्या गंगाखेड शहरात सकल धनगर समाजाकडून मोर्चा काढण्यात आला आहे. महेश बिडगर यांच्यावर झालेल्या मारहाणीच्या निषेधार्थ सकल धनगर समाजाने एकत्र येत हा मोर्चा आयोजित केला.

परभणीचे महापौर सय्यद इकबाल यांच्यावर प्राणघातक हल्ल्याचा प्रयत्न झाल्याची घटना समोर आली आहे. या घटनेनंतर महापालिकेतील कर्मचाऱ्यांनी संतप्त होऊन काम बंद आंदोलन पुकारले आहे. या हल्ल्याच्या प्रयत्नामुळे परिसरात खळबळ उडाली असून, कर्मचाऱ्यांनी आपल्या कामातून पूर्णपणे माघार घेतली आहे. घटनेचा निषेध करत कर्मचाऱ्यांनी हे आंदोलन सुरू केले आहे.

नांदेड जिल्ह्यातील देगलूर शहरातील डॉ. बाबासाहेब आंबेडकर यांच्या स्मारकासमोर देगलूर नगर परिषदेचे काँग्रेस नगरसेवक शत्रुघ्न वाघमारे यांच्या वाढदिवसानिमित्त त्यांचा सत्कार करण्यात आला. हा सत्कार रिपब्लिकन पार्टी ऑफ इंडिया (आठवले गट) चे मराठवाडा उपाध्यक्ष चंद्रकांत दादा ठाणेकर यांच्या वतीने करण्यात आला आहे. या कार्यक्रमाला प्रा. डॉ. भिमराव माळगे सर, रिपाइंचे युवा नांदेड जिल्हाध्यक्ष अ‌ॅड. प्रकाश चंद्रकांत ठाणेकर, प्रा. अभिनंदन सिताफुले सर, बहुजन सेना तालुकाध्यक्ष रमेश भायेगावकर, भिमशक्ती सामाजिक संघटना तालुकाध्यक्ष किशोर आडेकर, भिमशक्ती सामाजिक संघटना तालुका उपाध्यक्ष भिमराव भुतनरे, मोहनराव भुताळे, आनंदा दिंडे आणि अशोक कांबळे आदी मान्यवर उपस्थित होते.

बीड जिल्ह्यातील जिल्हा परिषदेच्या शाळांमध्ये दररोज सकाळी जगाच्या कल्याणासाठी आणि मानवतेसाठी संत ज्ञानेश्वरांची विश्वात्मक प्रार्थना "पसायदान" म्हटली जाते. मात्र, या विद्यार्थ्यांना शिक्षणासाठी मूलभूत सुविधा, सुरक्षित शाळा इमारत, पिण्याचे स्वच्छ पाणी आणि स्वच्छतागृहे मिळतील काय, असा सवाल सामाजिक कार्यकर्ते डॉ. गणेश ढवळे लिंबागणेशकर यांनी विचारला आहे. तसेच, या विद्यार्थ्यांना सरकारी अधिकाऱ्यांकडून निधीचे "दान" मिळेल काय, असे विचारत त्यांनी प्रशासनाला धारेवर धरले आहे।

लातूरच्या प्रभाग क्रमांक १८ मधील सार्वजनिक बोर गेल्या दोन वर्षांपासून बंद असल्याने परिसरातील नागरिकांना पिण्याच्या पाण्यासाठी मोठ्या अडचणींचा सामना करावा लागत होता. स्थानिक नागरिकांनी या समस्येबाबत प्रभागातील नगरसेवकांकडे तक्रार केली होती. या तक्रारीची दखल घेत नगरसेवकांनी संबंधित विभागाच्या कर्मचाऱ्यांना त्वरित सूचना दिल्या. त्यांच्या अथक पाठपुराव्यामुळे बंद पडलेल्या बोरची तातडीने तपासणी करून दुरुस्ती करण्यात आली आणि नवीन पाईप लाईनचे कामही पूर्ण करण्यात आले. यामुळे दोन वर्षांच्या प्रतीक्षेनंतर अखेर बोर पुन्हा सुरू झाला आहे. यावेळी प्रभागातील आजी आणि माजी नगरसेविकांसह माधव जाधव, रंजना शिंदे, रेखा बिराजदार, शहाजी सुर्यवंशी, सोनाली सुर्यवंशी, बाळु शिंदे, तानाजी शिंदे, गुरूराज पाटील आणि परिसरातील नागरिक मोठ्या संख्येने उपस्थित होते.

लातूर जिल्ह्यातील खंडापूर येथे पार पडलेल्या पादुका सोहळा आणि संतांच्या कुंभमेळा म्हणून ओळखल्या जाणाऱ्या वारकरी संमेलनादरम्यान पैशाचा अपहार झाल्याचा प्रकार समोर आला आहे. या प्रकरणात 'पिस्तुल्या' म्हणून ओळखला जाणारा किशोर महाराज शिवणीकर याला स्थानिक गुन्हे शाखेने अटक केली आहे.