ସୋନପୁର ଜିଲ୍ଲାର ରକ୍ସା ପଞ୍ଚାୟତ ଅନ୍ତର୍ଗତ ହିଙ୍ଗମା ଗ୍ରାମରେ ବୃଦ୍ଧବୃଦ୍ଧାମାନେ ଗତ ଦୁଇ ମାସ ହେବ ଭତ୍ତା ପାଇବାରୁ ବଞ୍ଚିତ ହୋଇଛନ୍ତି। ଏହି ସମସ୍ୟା ସହିତ ଗ୍ରାମର ଅନ୍ୟାନ୍ୟ ପ୍ରସଙ୍ଗକୁ ନେଇ ଜିଲ୍ଲାପାଳ ଡ଼ ନୃପରାଜ ସାହୁ କ'ଣ କହୁଛନ୍ତି, ତାହା ଶୁଣିବା ପାଇଁ ଆହ୍ୱାନ କରାଯାଇଛି।

ସୁବର୍ଣ୍ଣପୁର ଜିଲ୍ଲା ସଦର ବ୍ଲକ ଅନ୍ତର୍ଗତ ଖାରି ଗ୍ରାମ ପଞ୍ଚାୟତର ତରାଇକେଲା ଗ୍ରାମରେ ବାସ କରୁଥିବା ନାରାୟଣ ସାହୁଙ୍କ ବୃଦ୍ଧ ପରିବାର ପାଇଁ ଆବାସ ଯୋଜନା ଏବେ ବି ଏକ ସାତ ସପନ ହୋଇ ରହିଛି।

ମେ ୩୧ ତାରିଖରେ ବିଶ୍ୱ ତମାଖୁ ନିଷେଧ ଦିବସ ଅବସରରେ ଟାଇଟଲାଗଡ଼ରେ ଏକ ବ୍ୟାପକ ଜନ-ଜାଗରଣ ଅଭିଯାନ ଆୟୋଜିତ ହୋଇଥିଲା। ଏହି ବିଶେଷ ଅବସରରେ ସ୍ଥାନୀୟ ଅନୁଷ୍ଠାନ ଏବଂ ଗାୟତ୍ରୀ ଶକ୍ତିପୀଠ, ଟାଇଟଲାଗଡ଼ର ମିଳିତ ଆନୁକୂଲ୍ୟରେ ଏକ ବିରାଟ ଜାଗରଣ ରାଲିର ଆୟୋଜନ କରାଯାଇଥିଲା। ଏହି ରାଲିର ମୁଖ୍ୟ ଉଦ୍ଦେଶ୍ୟ ଥିଲା ସମାଜକୁ “ବ୍ୟସନ ମୁକ୍ତ” (ନିଶାମୁକ୍ତ) କରିବା ପାଇଁ ବାର୍ତ୍ତା ଦେବା। ଏହି ରାଲିରେ ବହୁ ସଂଖ୍ୟାରେ ସ୍ଥାନୀୟ ନାଗରିକ, ମହିଳା ଏବଂ ଗାୟତ୍ରୀ ପରିବାରର ସଦସ୍ୟମାନେ ଅଂଶଗ୍ରହଣ କରିଥିଲେ। ଲୋକମାନେ ହଳଦିଆ ଓ ପାରମ୍ପରିକ ପୋଷାକ ପିନ୍ଧି ହାତରେ ବ୍ୟାନର ଓ ପ୍ଲାକାର୍ଡ ଧରି ରାସ୍ତାକୁ ଓହ୍ଲାଇଥିଲେ। ରାଲିର ଅଗ୍ରଭାଗରେ ଥିବା ଏକ ବଡ଼ ମୁଖ୍ୟ ବ୍ୟାନରରେ “ବ୍ୟସନ ମୁକ୍ତ ଭାରତ ଅଭିଯାନ – ବିଶ୍ୱ ତମାଖୁ ନିଷେଧ ଦିବସ” ଏବଂ “ଗାୟତ୍ରୀ ଶକ୍ତିପୀଠ, ଟାଇଟଲାଗଡ଼” ଲେଖାଥିଲା। ଅଂଶଗ୍ରହଣକାରୀମାନେ ତମାଖୁର କୁପ୍ରଭାବ ଏବଂ ନିଶାମୁକ୍ତି ସମ୍ବନ୍ଧୀୟ ପ୍ରେରଣାଦାୟକ ନାରା ଲେଖାଥିବା ପ୍ଲାକାର୍ଡ ଧରିଥିଲେ। ଏହି ରାଲି ଟାଇଟଲାଗଡ଼ର ମୁଖ୍ୟ ରାସ୍ତା ଦେଇ ଗତି କରିଥିଲା। ରାଲି ସମୟରେ ଆୟୋଜକମାନେ ଲୋକଙ୍କୁ ତମାଖୁ, ବିଡ଼ି, ସିଗାରେଟ୍ ଏବଂ ଗୁଟଖା ଭଳି ଜୀବନନାଶକ ଜିନିଷରୁ ଦୂରେଇ ରହିବାକୁ ଅନୁରୋଧ କରିଥିଲେ। ବକ୍ତାମାନେ କହିଥିଲେ ଯେ ତମାଖୁ କେବଳ ମଣିଷର ଫୁସ୍‌ଫୁସ୍ ଓ ସ୍ୱାସ୍ଥ୍ୟକୁ ନଷ୍ଟ କରେ ନାହିଁ, ବରଂ ସମଗ୍ର ପରିବାରକୁ ଆର୍ଥିକ ଓ ମାନସିକ ଭାବେ ଭାଙ୍ଗିଦିଏ। ଏହି ରାଲିକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ବହୁତ ଉତ୍ସାହ ଥିଲା ଏବଂ ବାଟରେ ଯାଉଥିବା ଲୋକମାନେ ମଧ୍ୟ ଅଟକି ଏହି ବାର୍ତ୍ତାକୁ ଦେଖି ଓ ବୁଝିଥିଲେ। ଏହି ପ୍ରଶଂସନୀୟ ପ୍ରୟାସ ପାଇଁ ସମଗ୍ର ଅଞ୍ଚଳରେ ପ୍ରଶଂସା କରାଯାଉଛି।

ବରଗଡ଼ ଜିଲ୍ଲାର ବରପାଲି ବ୍ଲକ ଅନ୍ତର୍ଗତ ଲୋକକଳା ଗାଁ କୁମ୍ଭାରୀରେ ଯୁଗ ନିର୍ମାଣ ଗାୟତ୍ରୀ ପରିବାର ପକ୍ଷରୁ ବିଶ୍ୱ ତମାଖୁ ଦିବସ ପାଳନ କରାଯାଇଛି। ଏହି ଅବସରରେ ପାନ, ବିଡ଼ି, ସିଗାରେଟ, ଗଞ୍ଜେଇ, ମଦ ଓ ଅଫିମ ଆଦି ନିଶା ନିବାରଣ ପାଇଁ ବିଭିନ୍ନ ସ୍ଲୋଗାନ ଦିଆଯାଇଥିଲା। ନିଶା ନିବାରଣ ସମ୍ବନ୍ଧୀୟ ସ୍ଲୋଗାନ ଦେଇ ଗାୟତ୍ରୀ ପୀଠରୁ ଏକ ଶୋଭାଯାତ୍ରା ବାହାରି ଶ୍ରୀରାମ ନଗର ଦେଇ ଲକ୍ଷ୍ମୀ ନଗରରେ ପହଞ୍ଚିଥିଲା। ସେଠାରୁ ଯାମପଡ଼ା, କୃଷ୍ଣଗୁରୁ ପଡ଼ା, ଜଗନ୍ନାଥ ମନ୍ଦିର ଦେଇ ସହରାପଡ଼ାକୁ ଯାଇଥିଲେ। ପୁଣି ସହରାପଡ଼ାରୁ ଆକାଶ ପତି ଛକ, ଉପ୍ରା ସ୍କୁଲ ସମ୍ମୁଖ, ଶାସ୍ତ୍ରୀ ପଡ଼ା, ମଳିପଡ଼ା, ବନ୍ଧପଡ଼ା, ବାଗପଡ଼ା ଦେଇ କାଳେଶ୍ୱର ମନ୍ଦିର ସମ୍ମୁଖରୁ ଶୋଭାଯାତ୍ରା ନିଜ ପୀଠକୁ ପ୍ରତ୍ୟାବର୍ତ୍ତନ କରିଥିଲା। ଏହି କାର୍ଯ୍ୟକ୍ରମରେ ଗାୟତ୍ରୀ ପୀଠ ପୁରୋଧା ପ୍ରଶାନ୍ତ ସେଠ ନେତୃତ୍ୱ ନେଇଥିବା ବେଳେ, ଗାୟତ୍ରୀ ପରିବାର ବରଗଡ଼ ଜିଲ୍ଲା ସଂଯୋଜକ ଅଶ୍ୱିନୀ କୁମାର ସାହୁ, ଅବସରପ୍ରାପ୍ତ ଶିକ୍ଷକ ରାମଜୀ ପଧାନ, ପ୍ରଭାତ ଦୀପ, ବେହେରା ଗାୟତ୍ରୀ ପରିବାର ଚୈତନ୍ୟ ସାହୁ, ଗଣେଶ ପଟେଲ, ସମିତି ସଭ୍ୟା ମୌନା ସେଠ, ମିତମ୍ବିନୀ ପଧାନ, ଅଳକା ପଧାନ, କଳ୍ପନା, ମନ, ନବାଦ, ଜୟନ୍ତୀ, ଅଷ୍ଟମୀ, ଜନତ ଓ ପ୍ରେମଶିଳା ଆଦି ଅନେକ ମହିଳା ଓ ପୁରୁଷ ସାମିଲ ହୋଇ ଜନସଚେତନତା ସୃଷ୍ଟି କରିଥିଲେ।

ମନ୍ତ୍ରୀ ରବିନାରାୟଣ ନାଏକ ଫାଶିମାଲ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଉପୁଜିଥିବା ସମସ୍ୟାଗୁଡ଼ିକୁ ଅନୁଧ୍ୟାନ କରିଛନ୍ତି। ଏହି ଅନୁଧ୍ୟାନ ପରେ ସୂଚନା ମିଳିଛି ଯେ ଆଗାମୀ ୨ ମାସ ମଧ୍ୟରେ ଉକ୍ତ ସ୍ୱାସ୍ଥ୍ୟ କେନ୍ଦ୍ରରେ ନୂତନ ଡାକ୍ତର ନିଯୁକ୍ତ କରାଯିବ।

ବାମରା ବ୍ଲକର ସଗରା ପଞ୍ଚାୟତ ଅନ୍ତର୍ଗତ ଫଟାଟାଙ୍ଗର ଗ୍ରାମରେ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଯୁକ୍ତି ଗ୍ୟାରେଣ୍ଟି ଯୋଜନା (MGNREGA) ଅଧୀନରେ ନାଳ ନିର୍ମାଣ କାର୍ଯ୍ୟରେ ଗୁରୁତର ଅନିୟମିତତା ଅଭିଯୋଗ କରି ଗ୍ରାମବାସୀମାନେ ପ୍ରଶ୍ନ ଉଠାଇଛନ୍ତି। ଗ୍ରାମବାସୀଙ୍କ କହିବାନୁଯାୟୀ, ନାଳ ନିର୍ମାଣ ପାଇଁ ଅନୁମୋଦିତ ଦୁଇଟି ପୃଥକ କାର୍ଯ୍ୟରେ ପ୍ରାୟ ୨୦ ଲକ୍ଷ ଟଙ୍କା ଖର୍ଚ୍ଚ ହୋଇଥିବା ଦର୍ଶାଯାଇଛି, କିନ୍ତୁ କାର୍ଯ୍ୟସ୍ଥଳରେ ବାସ୍ତବ କାର୍ଯ୍ୟ ଅପେକ୍ଷାକୃତ କମ୍ ଦୃଶ୍ୟମାନ ହେଉଛି। ସ୍ଥାନୀୟ ଲୋକଙ୍କ ଅନୁସାରେ, ନିର୍ମାଣ କାର୍ଯ୍ୟ ନାମରେ କେବଳ ସୀମିତ ଦୂରତା ପର୍ଯ୍ୟନ୍ତ ଖନନ କରାଯାଇଛି ଏବଂ କାର୍ଯ୍ୟର ବାସ୍ତବ ଗୁଣବତ୍ତା ଓ ମୂଲ୍ୟକୁ ନେଇ ସନ୍ଦେହ ରହିଛି। ଗ୍ରାମବାସୀମାନେ ଅଭିଯୋଗ କରିଛନ୍ତି ଯେ ଏହି ଯୋଜନାର କାର୍ଯ୍ୟକାରିତାରେ ସମ୍ପୃକ୍ତ ଅଧିକାରୀ ଏବଂ ଦାୟିତ୍ୱବାନ ବ୍ୟକ୍ତିମାନଙ୍କ ଭୂମିକାର ନିରପେକ୍ଷ ତଦନ୍ତ ହେବା ଉଚିତ। ସେମାନେ ଦାବି କରିଛନ୍ତି ଯେ ଜିଲ୍ଲା ପ୍ରଶାସନ ଏବଂ ସମ୍ପୃକ୍ତ ବିଭାଗ ଏହି ମାମଲାର ବୈଷୟିକ ତଥା ଆର୍ଥିକ ତଦନ୍ତ କରନ୍ତୁ, ଯାହାଦ୍ୱାରା ଅନୁମୋଦିତ ରାଶି ଅନୁଯାୟୀ କାର୍ଯ୍ୟ ହୋଇଛି କି ନାହିଁ ତାହା ସ୍ପଷ୍ଟ ହୋଇପାରିବ। ତେବେ ଏହି ମାମଲାରେ ସମ୍ପୃକ୍ତ ଅଧିକାରୀଙ୍କ ପକ୍ଷ ସାମ୍ନାକୁ ଆସିନାହିଁ ଏବଂ ତଦନ୍ତ ପରେ ହିଁ ଅଭିଯୋଗଗୁଡ଼ିକର ସତ୍ୟତା ପୁଷ୍ଟି ହୋଇପାରିବ। P24 NEWS EXPRESS ମଧ୍ୟ ଦାବି କରିଛି ଯେ କାର୍ଯ୍ୟସ୍ଥଳର ସ୍ୱାଧୀନ ନିରୀକ୍ଷଣ କରାଯାଉ, ବୈଷୟିକ ରିପୋର୍ଟ ସାର୍ବଜନୀନ କରାଯାଉ, ଖର୍ଚ୍ଚ ହୋଇଥିବା ରାଶି ଏବଂ ବାସ୍ତବ କାର୍ଯ୍ୟର ମେଳ କରାଯାଉ, ଏବଂ ଦୋଷୀ ସାବ୍ୟସ୍ତ ହେଲେ ଦାୟିତ୍ୱବାନ ଲୋକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ।

ରାୟଗଡା ଜିଲ୍ଲା କାଶୀପୁର ବ୍ଲକ ଅନ୍ତର୍ଗତ ଅଣ୍ଡିରାକୋଞ୍ଚ ପୋଲିସ ଥାନା କ୍ଷେତ୍ରରେ ଏକ ଅଭାବନୀୟ ବାଇକ ଦୁର୍ଘଟଣାରେ ୨୦ ବର୍ଷୀୟ ଦିଗାମ୍ବର ନାଏକଙ୍କ ମୃତ୍ୟୁ ଘଟିଛି। ଏହି ଘଟଣାକୁ ନେଇ ମୃତକଙ୍କ ପରିବାର ଲୋକେ କ୍ଷତିପୂରଣ ଦାବିରେ ଅଣ୍ଡିରାକୋଞ୍ଚ ଥାନା ସମ୍ମୁଖରେ ଶବ ରଖି ରାଜରାସ୍ତାରେ ଅଟଳ ରହିଛନ୍ତି। ପୋଲିସର ସହଯୋଗ ଅଭାବକୁ ନେଇ ଅଞ୍ଚଳବାସୀଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି। ମୃତ ଯୁବକ ଦିଗାମ୍ବର ନାଏକ କଳାହାଣ୍ଡି ଜିଲ୍ଲା ଥୁଆମୂଳ ରାମପୁରର ଦୁରଖାଲ ଗ୍ରାମର ଜଲଧର ନାଏକଙ୍କ ପୁଅ ବୋଲି ଜଣାପଡିଛି। ମାଇକଞ୍ଚ ଗ୍ରାମପଞ୍ଚାୟତର ଅଣ୍ଡିରାକୋଞ୍ଚ ଥାନା ଅଧୀନସ୍ଥ କୁପାଖାଳ ନିକଟରେ ଦୁଇଟି ବାଇକ ମୁହାଁମୁହିଁ ଧକ୍କା ହୋଇଥିଲା, ଯେଉଁଥିରେ ଜଣେ ଯୁବକ ଘଟଣାସ୍ଥଳରେ ଗୁରୁତର ଆହତ ହୋଇ ପଡିରହିଥିଲେ। ମୃତକଙ୍କ ପରିଜନ ଅଭିଯୋଗ କରିଛନ୍ତି ଯେ, ଅନ୍ୟ ଜଣେ ଡ଼ଙ୍ଗାସିଲର ବ୍ୟକ୍ତିଙ୍କୁ ଅଣ୍ଡିରାକୋଞ୍ଚ ପୋଲିସ ଏକ ବାଇକ ସହ ଥାନାରେ ଅଟକ ରଖିଥିଲେ ମଧ୍ୟ ପରେ ତାଙ୍କୁ ଛାଡି ଦିଆଯାଇଛି। ଦୁର୍ଘଟଣା ପରେ ଗୁରୁତର ଯୁବକଙ୍କୁ ପ୍ରଥମେ କାଶୀପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର, ପରେ ରାୟଗଡା ଜିଲ୍ଲା ମୁଖ୍ୟ ଚିକିତ୍ସାଳୟକୁ ନିଆଯାଇଥିଲା। ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ ବ୍ରହ୍ମପୁର ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଉଥିବା ବେଳେ ବାଟରେ ତାଙ୍କର ମୃତ୍ୟୁ ଘଟିଥିଲା। ମୃତ୍ୟୁ ପରେ ପରିବାର ଲୋକେ ଅଣ୍ଡିରାକୋଞ୍ଚ ଥାନା ଅଧିକାରୀଙ୍କ ସହ ଯୋଗାଯୋଗ କରିଥିଲେ। ପୋଲିସ ନିର୍ଦ୍ଦେଶ ଦେଇଥିଲା ଯେ କ୍ଷତିପୂରଣ ଓ ଶବ ବ୍ୟବଛେଦ କାଶୀପୁରରେ କରାଯିବ। କିନ୍ତୁ, ପରିବାର ଲୋକେ ଅଧରାତିରୁ କାଶୀପୁରରେ ପହଞ୍ଚିବା ପରେ ଅଣ୍ଡିରାକୋଞ୍ଚ ଥାନା ଅଧିକାରୀ ସମସ୍ତ ଯୋଗାଯୋଗ ବନ୍ଦ କରିଦେଇଥିବା ଅସହାୟ ପରିବାର ଅଭିଯୋଗ କରି ପୋଲିସର ସହଯୋଗକୁ ନିନ୍ଦା କରିଛନ୍ତି। ପରିବାର ଲୋକେ ଦାବି କରିଛନ୍ତି ଯେ ଏହି ଘଟଣାରେ ନ୍ୟାୟ ମିଳୁ ଏବଂ କ୍ଷତିପୂରଣ ପ୍ରଦାନ କରାଯାଉ। ସେମାନେ ନିଜ ଦାବିରେ ଅଟଳ ରହି ଶବକୁ କାଶୀପୁରରୁ ଆଣି ଅଣ୍ଡିରାକୋଞ୍ଚ ଥାନା ଆଗରେ ରଖି ପ୍ରତିବାଦ କରୁଛନ୍ତି।

ଜମନକିରା ବ୍ଲକ ଅଧୀନସ୍ଥ ଫାଶିମାଲ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଦୀର୍ଘଦିନ ଧରି ଲାଗି ରହିଥିବା ବିଭିନ୍ନ ସମସ୍ୟାର ସମାଧାନ ପାଇଁ ସ୍ୱାସ୍ଥ୍ୟ କେନ୍ଦ୍ର ସଭାଗୃହରେ ଏକ ଗୁରୁତ୍ୱପୂର୍ଣ୍ଣ ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି। ଏହି ବୈଠକରେ ମାନ୍ୟବର ଗ୍ରାମ୍ୟ ଉନ୍ନୟନ, ପଞ୍ଚାୟତିରାଜ ଓ ପାନୀୟ ଜଳ ଯୋଗାଣ ମନ୍ତ୍ରୀ ଶ୍ରୀ ରବିନାରାୟଣ ନାଏକ, ସମ୍ବଲପୁର ଜିଲ୍ଲାପାଳ ସିଦ୍ଧେଶ୍ୱର ବଳିରାମ ବୋନ୍ଦର ଏବଂ କୁଚିଣ୍ଡା ଉପଜିଲ୍ଲାପାଳ ସି. ସର୍ବନନ ପ୍ରମୁଖ ଉପସ୍ଥିତ ରହି ସ୍ଥାନୀୟ ଜନସାଧାରଣଙ୍କ ସମସ୍ୟା ଓ ଅଭିଯୋଗ ଶୁଣିଥିଲେ। ଲୋକଙ୍କ ପକ୍ଷରୁ ପ୍ରମୁଖ ଦାବିଗୁଡ଼ିକ ମଧ୍ୟରେ ଡାକ୍ତର ଅଭାବ ଦୂର କରିବା ଏବଂ ଡେପୁଟେସନରେ ଯାଇଥିବା ଡାକ୍ତରଙ୍କୁ ଫେରସ୍ତ ଆଣିବା ନେଇ ଆଲୋଚନା ହୋଇଥିଲା। ଏଥିସହ, ଏକ୍ସ-ରେ ମେସିନ ପାଇଁ ଟେକ୍ନିସିଆନ ନିଯୁକ୍ତି ଦେବା ସହ ଇସିଜି, ଡାଏଲିସିସ ଓ କ୍ୟୁବିସି ପରୀକ୍ଷଣ ଉପକରଣକୁ କାର୍ଯ୍ୟକ୍ଷମ କରିବାକୁ ଦାବି କରାଯାଇଥିଲା। ସମସ୍ୟାର ସ୍ଥାୟୀ ସମାଧାନ ନିମନ୍ତେ ପ୍ରତି ତିନି ମାସରେ ଆର୍.କେ.ଏସ୍. (RKS) ବୈଠକ ଆୟୋଜନ କରିବାକୁ ମଧ୍ୟ ପ୍ରସ୍ତାବ ଦିଆଯାଇଥିଲା। ରୋଗୀ ସେବାକୁ ସର୍ବାଧିକ ଗୁରୁତ୍ୱ ଦେଇ ଆସନ୍ତା ଦୁଇ ମାସ ମଧ୍ୟରେ ଆବଶ୍ୟକ ଡାକ୍ତର ନିଯୁକ୍ତି କରାଯିବ ବୋଲି ମନ୍ତ୍ରୀ ଓ ଜିଲ୍ଲାପାଳ ପ୍ରତିଶ୍ରୁତି ଦେଇଛନ୍ତି। ଏହି ବୈଠକରେ ଜମନକିରା ବିଡିଓ ରବୀନ୍ଦ୍ର ସେଠୀ, ତହସିଲଦାର ପ୍ରବୀଣା ବିଲୁଙ୍ଗ, ସ୍ୱାସ୍ଥ୍ୟ ବିଶେଷଜ୍ଞ ଏବଂ ଡାକ୍ତରଖାନା ସୁରକ୍ଷା କମିଟିର ସଦସ୍ୟ ପ୍ରମୁଖ ଉପସ୍ଥିତ ଥିଲେ।

ପାରାଦୀପ ବନ୍ଦରର ନିଷିଦ୍ଧାଞ୍ଚଳରେ ଥିବା CQ-1 ବର୍ଥରେ ଏକ ବଡ଼ ଦୁର୍ଘଟଣା ଘଟିଛି, ଯେଉଁଥିରେ ଜାହାଜରେ ଆଇରନ ଲୋଡିଂ ସମୟରେ ଜଣେ ହାଇୱା ଡ୍ରାଇଭରଙ୍କ ମୃତ୍ୟୁ ହୋଇଛି। ସୂଚନା ଅନୁଯାୟୀ, ‘ଜିନ ହାଇ ହେ’ ନାମକ ଜାହାଜରେ ଆଇରନ ଓଭରଲୋଡ କରାଯାଉଥିବା ସମୟରେ ଏହି ଅଘଟଣ ଘଟିଥିଲା। ଗତକାଲି ବର୍ଷା ଯୋଗୁଁ ଆଇରନ ଗୁଣ୍ଡ କାଦୁଅ ଅବସ୍ଥାରେ ଥିଲା। କ୍ରେନ ସାହାଯ୍ୟରେ ଆଇରନ ଲୋଡ୍ କରାଯାଉଥିବା ବେଳେ ହଠାତ୍ କ୍ରେନର ଗ୍ରାଫ୍ ଖୋଲିଯିବାରୁ ତଳେ ଥିବା ହାଇୱା ଉପରେ ଆଇରନ ଖସିପଡ଼ିଥିଲା। ଘଟଣାସ୍ଥଳରେ ହିଁ ହାଇୱା ଚାଳକ ସରୋଜ ଖିଲାରଙ୍କ ମୃତ୍ୟୁ ଘଟିଥିଲା। ମୃତ ଡ୍ରାଇଭର ସରୋଜ ଖିଲାର ଢେଙ୍କାନାଳ ଜିଲ୍ଲା ଅନ୍ତର୍ଗତ ପରଜଙ୍ଗ ଥାନା ଅଞ୍ଚଳର ବୋଲି ଜଣାପଡ଼ିଛି। ଏହି ଖବର ପ୍ରଚାରିତ ହେବା ପରେ ସାଥି ଡ୍ରାଇଭରମାନେ ଘଟଣାସ୍ଥଳରେ ପହଞ୍ଚିବା ପରେ ଉତ୍ତେଜନା ଦେଖାଦେଇଛି। ସାଥି ଡ୍ରାଇଭରମାନେ କାର୍ଯ୍ୟ ବନ୍ଦ କରି ଧାରଣାରେ ବସିରହିବା ଯୋଗୁଁ ସମସ୍ତ କାର୍ଯ୍ୟ ବନ୍ଦ ରହିଥିବା ସୂଚନା ମିଳିଛି।