लातूरच्या चाकूर तालुक्यातील नळेगाव येथे सुरू असलेल्या आंदोलनाचा आज ५५ वा दिवस आहे. १ मे २०२६ पासून सुरू असलेल्या या आंदोलनाला माननीय बालाजी पाटील चाकूरकर यांनी प्रत्यक्ष भेट दिली. यावेळी त्यांनी संबंधित अधिकाऱ्यांना भेटून या आंदोलनावर लवकरच तोडगा काढण्याचा शब्द दिला असून, आंदोलनकर्त्यांना सर्व प्रकारची मदत करण्याचे आश्वासनही दिले आहे. या आंदोलनासंदर्भात अधिक माहितीसाठी ८२०८१५६६१४ या क्रमांकावर संपर्क साधण्याचे सांगण्यात आले आहे.

महेश बिडगर मारहाण प्रकरणी परभणीच्या गंगाखेड शहरात सकल धनगर समाजाकडून मोर्चा काढण्यात आला आहे. महेश बिडगर यांच्यावर झालेल्या मारहाणीच्या निषेधार्थ सकल धनगर समाजाने एकत्र येत हा मोर्चा आयोजित केला.

परभणी महानगरपालिकेच्या नगराध्यक्षांवर प्राणघातक हल्ला झाल्याची घटना समोर आली आहे. नगराध्यक्षांवर झालेल्या या जीवघेण्या हल्ल्यामुळे मोठी खळबळ उडाली आहे.

नांदेडमधील SGGS समोरील पूल कोसळल्याच्या दुर्घटनेनंतर शिवसेनेचे आमदार आनंदराव पाटील बोंढारकर अत्यंत आक्रमक झाले आहेत. आमदार बोंढारकर यांनी थेट कोसळलेल्या पुलाच्या घटनास्थळी जाऊन प्रत्यक्ष पाहणी केली. पाहणीदरम्यान त्यांनी आक्रमक पवित्रा घेत संबंधित अधिकाऱ्याला जाब विचारला आणि त्याला चांगलेच धारेवर धरले. या संपूर्ण घटनेची सखोल चौकशी करून यात जो कोणी दोषी आढळेल, त्याच्यावर अत्यंत कठोर कारवाई करण्यात यावी अशी मागणी आमदार बोंढारकर यांनी केली आहे. अशा दुर्घटना भविष्यात पुन्हा घडू नयेत यासाठी सर्वच पुलांचे ऑडिट करण्यात यावे, अशी मागणी त्यांनी केली. तसेच, या कामाशी संबंधित असणाऱ्या कंपनीला थेट काळ्या यादीत टाकण्याची मागणी करणार असल्याचेही बोंढारकर यांनी स्पष्ट केले।

सोलापूर जिल्ह्यातील अक्कलकोट आणि दक्षिण सोलापूरमधील ग्रामीण भागातील नागरिक व शेतकऱ्यांना मूलभूत सुविधा मिळत नसल्याने तीव्र असंतोष निर्माण झाला आहे. मूलभूत हक्क संघर्ष समितीचे अध्यक्ष श्री. महांतेश लक्ष्मण हत्तूरे (मु. आळगे, ता. अक्कलकोट) यांनी या समस्येकडे शासनाचे लक्ष वेधले आहे. शासनाकडून मूलभूत सुविधा पुरवण्यात सतत अपयश येत असल्याचा आरोप करत, महाजन आयोगाच्या शिफारशींनुसार अक्कलकोट व दक्षिण सोलापूरमधील काही भागाचा कर्नाटकात समावेश करण्याचा विचार करावा, अशी भूमिका त्यांनी मांडली आहे. या मागणीसाठी आता ग्रामसभांमधून रीतसर ठराव मंजूर करून ते थेट मुख्यमंत्र्यांकडे पाठवले जाणार असल्याचे महांतेश हत्तूरे यांनी प्रसिद्धीस दिलेल्या निवेदनात स्पष्ट केले आहे. शेतकरी आणि ग्रामीण जनतेच्या मूलभूत हक्कांसाठी संघर्ष सुरूच राहणार असून, सर्व सुविधा मिळेपर्यंत आंदोलनाची ही भूमिका कायम ठेवली जाईल, असा निर्धार त्यांनी व्यक्त केला आहे.

जालना जिल्ह्यातील बदनापूर येथे लाईट ऑफ लाईफ ट्रस्टतर्फे एकूण १०३ विद्यार्थ्यांना शैक्षणिक साहित्याचे वाटप करण्यात आले आहे.

हिंगोली जिल्ह्यातील घोटा देवी येथे धनगर समाज युवा मल्हार सेनेचे मराठवाडा अध्यक्ष आणि सामाजिक कार्यकर्ते वैजनाथ पावडे यांनी मेंढपाळांच्या मुलांमध्ये शिक्षणाची गोडी लागावी आणि आत्मविश्वास निर्माण व्हावा यासाठी स्वतः मुलांसोबत बसून अभ्यास करण्याचा एक प्रेरणादायी उपक्रम सुरू केला आहे. केवळ शिक्षणाचे महत्त्व न सांगता, स्वतः विद्यार्थ्यांमध्ये बसून अभ्यास करत त्यांनी कृतीतून एक नवा आदर्श समाजापुढे ठेवला आहे. "मेंढपाळांच्या हातातील काठीसोबत त्यांच्या हातात पुस्तक आणि पेनही असले पाहिजे" या ध्येयाने प्रेरित होऊन वैजनाथ पावडे यांनी आपल्या निवासस्थानी या मुलांसाठी मोफत शिक्षण, मार्गदर्शन आणि आवश्यक सुविधा उपलब्ध करून दिल्या आहेत. त्यांच्या या उपक्रमामुळे मेंढपाळांच्या मुलांमध्ये शिक्षणाविषयी मोठा उत्साह निर्माण झाला असून पालकांमध्येही सकारात्मक वातावरण तयार झाले आहे. वंचित मुलांचे उज्ज्वल भविष्य घडविण्याच्या या प्रयत्नांचे सर्व स्तरांतून कौतुक होत असून, यामुळे धनगर समाजातील मुलांना शिक्षणाची नवी दिशा मिळत असल्याची भावना नागरिकांकडून व्यक्त होत आहे.

महाराष्ट्र राज्यातील परभणी महानगरपालिका नगराध्यक्षांवर प्राणघातक हल्ला करण्यात आला आहे. या जीवघेण्या हल्ल्यामुळे मोठी खळबळ उडाली आहे।

नांदेड जिल्ह्यातील अर्धापूर पोलीस स्टेशन तक्रार दाखल करून घेत नसल्याचा गंभीर आरोप एका आमरण उपोषणकर्त्याने केला आहे. पोलीस स्टेशनकडून तक्रारीची योग्य दखल घेतली जात नसल्याबद्दल उपोषणकर्त्याकडून तीव्र संताप व्यक्त केला जात आहे.

जालना जिल्ह्यातील मंठा तालुक्यातील वझर सरकटे, अंभोडा कदम, हेलस, माहोरा आणि माळेगावनंतर आता केहाळ वडगाव येथील महिलांनीही अवैध दारूविक्रीविरोधात जोरदार एल्गार पुकारला आहे. येथील जयरामनगर तांड्यावरील महिलांनी शनिवारी सकाळी ११ वाजता तांड्यात रॅली काढून अवैध दारूविक्री तातडीने बंद करण्याची तीव्र मागणी केली. विशेष म्हणजे, घरात दारू पिऊन आल्यावर ज्या आवजाराने मारहाण केली जाते, तेच आवजार हातात घेऊन महिलांनी या रॅलीमध्ये सहभाग घेतला आणि अवैध दारूविक्रीविरोधात आवाज उठवला. गावात, तांड्यात, फाट्यावर तसेच नायगाव टोल नाका ते जयपूर रोड परिसरात अवैध दारूविक्री सर्रास सुरू असल्याचे महिलांचे म्हणणे आहे. या सहज उपलब्ध होणाऱ्या दारूमुळे अनेक कुटुंबे आर्थिक आणि सामाजिक संकटात सापडली असून संसार उद्ध्वस्त होत आहेत, घरातील शांतता हरवली आहे आणि मुलांवरचे संस्कार बिघडत आहेत, अशी आर्त हाक महिलांनी पोलीस प्रशासनाला दिली आहे. या आंदोलनाचा एक व्हिडिओही समोर आला असून, त्यात महिलांनी आपल्या वेदना मांडत पोलिसांकडे कठोर कारवाईची मागणी केली आहे. गावोगावी महिलांना अशा प्रकारे रस्त्यावर उतरावे लागत असल्याने मंठा तालुक्यात अवैध दारूविक्रीचे जाळे किती खोलवर पसरले आहे, असा गंभीर प्रश्न निर्माण झाला आहे. आता या आक्रोशानंतर पोलीस प्रशासन ठोस कारवाई करणार की महिलांचा हा आवाज आश्वासनांच्या गर्दीत हरवून जाणार, याकडे संपूर्ण तालुक्याचे लक्ष लागले आहे.