আজি অসম বিধানসভাত অসমৰ মুখ্যমন্ত্ৰী হিমন্ত বিশ্ব শৰ্মাই মুছলমান সমাজক গৰু কোৰবানি বৰ্জন কৰাৰ বাবে ধন্যবাদ জ্ঞাপন কৰে।

কামৰূপ জিলাৰ বনগাঁৱৰ পাৰুগাঁৱত আই ভগৱতী পূজাৰ পৱিত্ৰ উপলক্ষ্যত এক সমূহীয়া শৰাইৰ আয়োজন কৰা হৈছে। এই অনুষ্ঠানত আবাল, বৃদ্ধ, বনিতা নিৰ্বিশেষে সকলোৱে মিলি ভক্তি সহকাৰে শৰাই আগবঢ়াইছে।

মৰিগাঁৱত সদৌ অসম ছাত্ৰ সন্থাৰ (আছু) সদস্যসকলে কেন্দ্ৰীয় পেট্ৰ'লিয়াম মন্ত্ৰী হৰদীপ সিং পুৰিৰ পুত্তলিকা দাহ কৰি তীব্ৰ প্ৰতিবাদ সাব্যস্ত কৰে। পেট্ৰ'ল আৰু ডিজেলৰ বৰ্দ্ধিত মূল্য হ্ৰাস কৰাৰ দাবীত এই প্ৰতিবাদ কাৰ্যসূচী গ্ৰহণ কৰা হৈছিল। পুত্তলিকা দাহ কাৰ্যসূচীৰ সময়ত সদৌ অসম ছাত্ৰ সন্থাৰ সাংগঠনিক সম্পাদক ৰূপজ্যোতি মেধিয়ে চৰকাৰক তীব্ৰ ভাষাৰে কটাক্ষ কৰি কয় যে জনসাধাৰণে বিশ্বাসত লৈ চৰকাৰখনক শাসনৰ গাদীত বহুৱাইছিল, কিন্তু এতিয়া সেই চৰকাৰেই জনসাধাৰণক মিতব্যয়ী হ'বলৈ আহ্বান জনাইছে। তেওঁ লগতে আটাইতকৈ দুৰ্ভাগ্যজনক বুলি উল্লেখ কৰে যে যোগান বিভাগ নামৰ বিভাগটো এতিয়া জীয়াই আছে নে মৰিছে, সেই বিষয়ে ৰাইজে পাহৰি গৈছে।

মৰিগাঁও জিলাৰ লাহৰীঘাটৰ ভূৰাগাঁও অঞ্চলত বৃহৎ পৰিমাণৰ গাঞ্জা জব্দ কৰা হৈছে। এই ঘটনাৰ সৈতে জড়িত থকাৰ অভিযোগত মুনিয়া চৌহান নামৰ এগৰাকী মহিলা সৰবৰাহকাৰীক গ্ৰেপ্তাৰ কৰা হয়।

ভাৰত চৰকাৰৰ জনজাতীয় পৰিক্ৰমা মন্ত্ৰালয়ৰ অধীনত বৰপেটা জিলাত ১৫ মে'ৰ পৰা দেশজুৰি চলি থকা "জন ভাগিদাৰী অভিযান – সবচে দূৰ, সবচে পেহলে" কাৰ্যসূচীৰ আজি সামৰণি পৰে। বৰপেটা জিলাৰ শুহা গাঁৱৰ বড়ো জনজাতি বসতিপূৰ্ণ এলেকাত এই অভিযানৰ বিভিন্ন কাৰ্যসূচী সফলভাৱে ৰূপায়ণ কৰা হয়। সৰুক্ষেত্ৰী উন্নয়ন খণ্ডৰ অন্তৰ্গত জনজাতি অধ্যুষিত শুহা গাঁৱত জিলা আয়ুক্ত ৰোহন কুমাৰ ঝাই এই অভিযানৰ শুভাৰম্ভ কৰিছিল আৰু অনুষ্ঠানত বিভিন্ন বিভাগৰ বিষয়া-কৰ্মচাৰীসকল উপস্থিত আছিল। এই জন ভাগিদাৰী অভিযানৰ অংশ হিচাপে বিভিন্ন বিভাগে বড়ো জনজাতি অধ্যুষিত এলেকাসমূহত বিশেষ শিবিৰ অনুষ্ঠিত কৰে। বিশেষকৈ স্বাস্থ্য শিবিৰ, আই টি ডি পি, মীন বিভাগ, সামাজিক বনায়ন, পশু চিকিৎসা বিভাগ আদিৰ জৰিয়তে বিভিন্ন সজাগতা আৰু সেৱামূলক কাৰ্যসূচী সম্পন্ন কৰা হয়। অঞ্চলটোৰ বড়ো জনসাধাৰণৰ সক্ৰিয় অংশগ্ৰহণেৰে এই সপ্তাহজোৰা কাৰ্যসূচীসমূহ সফলভাৱে সম্পন্ন হয়। অভিযানৰ মূল উদ্দেশ্য আছিল পিছপৰা জনজাতীয় সম্প্ৰদায়ৰ লোকসকলৰ ঘৰে ঘৰে চৰকাৰী সুবিধা দুৱাৰদলিলৈ লৈ যোৱা, যাতে কোনো যোগ্য হিতাধিকাৰী চৰকাৰী সুবিধাৰ পৰা বঞ্চিত নহয়। এই অভিযানৰ জৰিয়তে আধাৰ আপডেটকৰণৰ লগতে জনসাধাৰণৰ অভিযোগ গ্ৰহণ আৰু নিষ্পত্তিও এক গুৰুত্বপূৰ্ণ কাৰ্যসূচী হিচাপে ৰূপায়ণ কৰা হয়। বৰপেটা জিলা আৱৰ্ত ভৱনত অনুষ্ঠিত হোৱা এক সংবাদমেল যোগে বৰপেটা জিলা উন্নয়ন আয়ুক্ত গীতালী দুৱৰাই সদৰী কৰে যে এই অভিযানৰ জৰিয়তে মুঠ ২১০টা অভিযোগ সমাধান কৰা হৈছে আৰু ৫২৮টা অভিযোগ সমাধানৰ বাবে গ্ৰহণ কৰা হৈছে। বৰপেটা জিলাৰ মৰিগাঁও, হতাপাৰা, শুভা, দক্ষিণ বুঢ়ীখাৰ, কমাৰগাঁও, বৰঘোপা, গহিয়া আদি ৭খন গাঁৱৰ প্ৰায় বিশ হাজাৰ লোকক এই অভিযানে সামৰি লয়। আজিৰ অন্তিম দিনত বিভিন্ন খেল-ধেমালিৰ কাৰ্যসূচীৰে এই সপ্তাহজোৰা অভিযানৰ সফল সামৰণি পৰে।

কলগাছিয়াত স্থানীয় ৰাইজে এক অভিনৱ প্ৰতিবাদ সাব্যস্ত কৰিছে। কে কে পাঠক উচ্চতৰ মাধ্যমিক বিদ্যালয়ৰ সন্মুখৰ ৰাজপথত স্থানীয় ৰাইজে জালেৰে মাছ ধৰি তেওঁলোকৰ ক্ষোভ ব্যক্ত কৰে। এই প্ৰতিবাদৰ মূল কাৰণ হ'ল যে এজাক বৰষুণ দিলেই কলগাছিয়া ষ্টেট বেংকৰ সন্মুখৰ ৰাজপথ সাগৰ সদৃশ হৈ পৰে, যাৰ ফলত সাধাৰণ ৰাইজৰ যাতায়াতত তীব্ৰ অসুবিধা হয়।

৫৫ নং ধিং বিধানসভা সমষ্টিৰ নৱ-নিৰ্বাচিত ৰাইজৰ দলৰ বিধায়ক মেহেবুব মুক্তাৰে "কথাৰে নহয়, কামেৰে পৰিচয়" এই কথাষাৰকেই যেন বাস্তৱ ৰূপ দিছে। উন্নয়নৰ প্ৰতিশ্ৰুতিৰে জনসমৰ্থন লাভ কৰা বিধায়কগৰাকীয়ে শপত গ্ৰহণ কৰাৰ পাছতেই ধিং সমষ্টিত উন্নয়নৰ গতি তীব্ৰ কৰাৰ লক্ষ্যৰে একেৰাহে বিভিন্ন পদক্ষেপ গ্ৰহণ কৰিছে। ইয়াৰ অংশ হিচাপে আজি দ্বিতীয় দিনৰ বাবে ধিং সমষ্টিত মুঠ ৬ খনকৈ পথ নিৰ্মাণ কাৰ্যৰ আধাৰশিলা স্থাপন কৰা হয়। বিগত প্ৰায় বিশ বছৰে ধিং সমষ্টিবাসীয়ে উন্নয়নৰ মুখ নেদেখাৰ অভিযোগ উত্থাপন হৈ আহিছিল, বিশেষকৈ জৰাজীৰ্ণ পথ-ঘাটৰ সমস্যাই ৰাইজক দীৰ্ঘদিন ধৰি জুৰুলা কৰিছিল। সদ্য সমাপ্ত বিধানসভা নিৰ্বাচনত উন্নয়নৰ আশাত ধিংবাসীয়ে মেহেবুব মুক্তাৰক ৭১ হাজাৰতকৈ অধিক ভোটৰ ব্যৱধানত বিজয়ী কৰাইছিল। সাংবাদিকতা জীৱনৰ পৰা ৰাজনীতি ক্ষেত্ৰলৈ অহা বিধায়কগৰাকীয়ে নিৰ্বাচনী প্ৰচাৰৰ সময়ত দিয়া প্ৰতিশ্ৰুতিসমূহ আখৰে আখৰে পালন কৰাৰ দিশে অগ্ৰসৰ হোৱা দেখা গৈছে। বিধায়ক হিচাপে শপত গ্ৰহণ কৰাৰ পাছতেই তেওঁ ধিং সমষ্টিৰ জ্বলন্ত সমস্যা জৰাজীৰ্ণ পথসমূহৰ উন্নয়নৰ কাম আৰম্ভ কৰিছে। আজি দুপৰীয়া প্ৰায় ১২ বজাত SOPD-G আঁচনিৰ অধীনত ধিং সমষ্টিৰ মৈৰাধ্বজ গাঁও পঞ্চায়তৰ অন্তৰ্গত শালমাৰাবড়ী-বানেবিহাৰ পথৰ নিৰ্মাণ কাৰ্যৰো বিধায়ক মেহেবুব মুক্তাৰে শুভাৰম্ভ কৰে। স্থানীয় ৰাইজে আশা ব্যক্ত কৰিছে যে, নতুন বিধায়কৰ নেতৃত্বত ধিং সমষ্টিয়ে আগন্তুক দিনত উন্নয়নৰ এক নতুন দিশ লাভ কৰিব।

মৰিগাঁও জিলাৰ শ'লমাৰী অঞ্চলত এগৰাকী তিনি সন্তানৰ মাতৃ কেইবাদিন ধৰি নিখোজ হৈ আছে। এই ঘটনাই তেওঁৰ স্বামী, তিনি সন্তানকে ধৰি আত্মীয়-স্বজনক গভীৰ চিন্তাত পেলাইছে।

মৰিগাঁও জিলাৰ শ’লমাৰী অঞ্চলত কেইবাদিন ধৰি এগৰাকী তিনি সন্তানৰ মাতৃ নিখোজ হৈ আছে, যাৰ ফলত সমগ্ৰ অঞ্চলটোতে গভীৰ উদ্বেগৰ সৃষ্টি হৈছে। মহিলাগৰাকীৰ তিনিটি সন্তান, স্বামী আৰু আত্মীয়-স্বজনে তেওঁৰ কোনো সন্ধান নোপোৱাত গভীৰ চিন্তাত দিন পাৰ কৰিছে। পৰিয়ালৰ লোকে আৰক্ষীৰ কাষ চাপি ঘটনাটোৰ ওপৰত তাৎক্ষণিকভাৱে তদন্ত আৰম্ভ কৰাৰ দাবী জনাইছে। ইয়াৰ লগতে, নিখোজ মহিলাগৰাকীৰ সন্ধান পালে ওচৰৰ থানাত যোগাযোগ কৰিবলৈ ৰাইজক আহ্বান জনোৱা হৈছে।

কোৰৱাণী ঈদৰ আগমুহূৰ্তত আমছু নেতাগৰাকীয়ে সংবাদ মাধ্যমৰ আগত কিছু মন্তব্য কৰে। এই উপলক্ষে তেওঁ সংবাদ মাধ্যমৰ সৈতে বাৰ্তালাপ কৰে।