పల్నాడు జిల్లాలోని రెంటచింతల మండలంలో ఓటరు జాబితా సమగ్ర సవరణ ప్రక్రియను ఎన్నికల సంఘం నిబంధనల మేరకు పారదర్శకంగా నిర్వహించాలని తహశీల్దార్ మర్రి దీప్తి ఆదేశించారు. సోమవారం ఆమె మండలంలోని మల్లవరం, జెట్టి పాలెం గ్రామాల్లో పర్యటించారు. ఈ సందర్భంగా బీఎల్‌వోలకు పలు సూచనలు చేయడంతో పాటు వారి సందేహాలను నివృత్తి చేశారు. బీఎల్‌వోలు ఇంటింటికి వెళ్లి సేకరించే వివరాల్లో ఎలాంటి తప్పులు దొర్లడానికి వీల్లేదని తహశీల్దార్ స్పష్టం చేశారు. అలాగే, పంపిణీ చేసిన ఓటర్ల వివరాల ధృవీకరణ అంశాలను ఆమె అడిగి తెలుసుకున్నారు.

మైలవరం నియోజకవర్గంలోని జి. కొండూరు మండలం, శేగిరెడ్డిపాడు, వెలగలేరు గ్రామాల పరిధిలో జరుగుతున్న అక్రమ గ్రావెల్ తవ్వకాలపై మాజీ మంత్రివర్యులు, మైలవరం నియోజకవర్గ సమన్వయకర్త జోగి రమేష్ మరియు పార్టీ నాయకులు ఎన్టీఆర్ జిల్లా కలెక్టర్ లక్ష్మిషాకు ఫిర్యాదు చేశారు. అక్కడ జరుగుతున్న దోపిడీని 'కేజీఎఫ్ సినిమా' తరహాలో జరుగుతోందని పేర్కొంటూ, జోగి రమేష్ ఆధారాలతో సహా కలెక్టర్‌కు వినతిపత్రం అందజేశారు.

గుంటూరు నగరంలోని బ్రాడీపేట 2/7లో ఉన్న గుర్రం జాషువా విజ్ఞాన కేంద్రంలో ఆదివారం, 21వ తేదీ సాయంత్రం 6 గంటలకు ఆవాజ్ కమిటీ మరియు వివిధ స్వచ్ఛంద సేవా సంస్థల ఆధ్వర్యంలో 'ఎస్ఐఆర్ (SIR) అవగాహన సదస్సు' నిర్వహించారు. ఈ కార్యక్రమానికి ఆవాజ్ రాష్ట్ర ప్రధాన కార్యదర్శి ఎంఏ చిస్తి అధ్యక్షత వహించగా, ఇప్పటివరకు భారతదేశంలో ప్రజలు ప్రభుత్వాలను ఎన్నుకునేవారని, అయితే ఈసారి ఎస్ఐఆర్ ప్రక్రియ ద్వారా ప్రభుత్వాలే ప్రజలను ఎన్నుకునే ప్రక్రియ జరుగుతోందని ఆయన ఆందోళన వ్యక్తం చేశారు. ముఖ్యఅతిథిగా విచ్చేసిన ప్రముఖ రాజకీయ విశ్లేషకులు డాక్టర్ పరకాల ప్రభాకర్ మాట్లాడుతూ, దేశంలో ఎస్ఐఆర్ ప్రక్రియను ఒక పథకం ప్రకారం, కుట్రపూరితంగా నిర్వహిస్తున్నారని ఆరోపించారు. ఓటు ఉన్న భారతదేశం, ఓటు లేని భారతదేశం అంటూ దేశాన్ని రెండు రకాలుగా విభజించే ప్రయత్నం జరుగుతోందని, ముఖ్యంగా మైనారిటీలు, దళితులు, ఆదివాసీలను లక్ష్యంగా చేసుకుని సెక్యులర్ ఓట్లను తొలగించే ప్రయత్నం జరుగుతోందని ఆయన తీవ్రంగా మండిపడ్డారు. ఈ నేపథ్యంలో ఓటర్లందరూ అప్రమత్తంగా ఉండాలని ఆయన గట్టిగా సూచించారు. మరొక అతిథి, బ్రైట్ హారిజన్స్ ఫౌండేషన్ చైర్మన్ ఎం కే ఎస్ మొహియుద్దీన్, పవర్ పాయింట్ ప్రజెంటేషన్ ద్వారా ఓటు నమోదు చేసుకునే ప్రక్రియపై ఓటర్లకు అవగాహన కల్పించారు. ఈ సదస్సులో మేల్కో ఆంధ్రప్రదేశ్ నాయకులు రమేష్ పట్నాయక్, ముస్లిం సమైక్యవేదిక నాయకులు హాజీ అబ్దుల్ కలాం, అంబేద్కర్ యువజన సంఘం నాయకులు నీలాంబరం, ఆవాజ్ కమిటీ రాష్ట్ర అధ్యక్షులు ఎస్ ఏ సుభాన్, రాష్ట్ర కమిటీ సభ్యులు ఎండి సలీం, కిద్మత్ బ్యాంక్ నిర్వాహకులు బషీర్, గుంటూరు జిల్లా కార్యదర్శి ఎస్ కే భాష తదితరులు పాల్గొన్నారు.

చింతకాని మండలంలోని మత్కేపల్లి – జగన్నాధపురం ఎక్స్ రోడ్డు వద్ద ఈ నెల 30న నిర్వహించనున్న ముఖ్యమంత్రి సభకు అధికారికంగా 'రైతు ఆశీర్వాద సభ'గా నామకరణం చేసినట్లు ఉప ముఖ్యమంత్రి భట్టి విక్రమార్క ప్రకటించారు. ఈ సభ వేదికగా రైతు సంక్షేమ కార్యక్రమాలకు సంబంధించిన కీలక ప్రకటనలు వెలువడే అవకాశం ఉందని పార్టీ వర్గాలు తెలిపాయి. ప్రస్తుతం, ఈ సభ ఏర్పాట్లను అధికారులు, ప్రజాప్రతినిధులు దగ్గరుండి పర్యవేక్షిస్తున్నారు.

ఖమ్మం రూరల్ మండలంలో సోమవారం మధ్యాహ్నం వాతావరణం ఒక్కసారిగా మారిపోయింది. ఆకాశం మేఘావృతమై, తీర్థాల, కామంచికల్, పడమటితండా, జాన్ బాద్ తండా, దారేడు తదితర గ్రామాల్లో భారీ వర్షం కురిసింది. ఈ వర్షం కారణంగా అన్ని రోడ్లు వరద నీటితో నిండిపోయాయి. ఉదయం నుంచి భానుడి తీవ్రమైన ఉక్కపోతతో అల్లాడిన ప్రజలకు ఈ చల్లని వాతావరణం గొప్ప ఉపశమనాన్ని ఇచ్చింది. అంతేకాకుండా, వర్షం రాకతో రైతులు సైతం తమ ఆనందాన్ని వ్యక్తం చేశారు.

ఈనెల 30న జరగనున్న ముఖ్యమంత్రి జిల్లా పర్యటనకు సంబంధించి, డిప్యూటీ సీఎం మల్లు భట్టి విక్రమార్క చింతకాని మండలంలో పర్యటించారు. ఈ పర్యటనలో ఆయన జిల్లా కలెక్టర్ దివాకర టిఎస్, పోలీస్ కమీషనర్ సునీల్ దత్ లతో కలిసి సీఎం సభ కోసం అనువైన ప్రాంతాలను మరియు సభా స్థలిని పరిశీలించారు.

రేపల్లె 8వ వార్డుకు చెందిన రెల్లి కులస్తులు, రేపల్లె మున్సిపాలిటీలో పారిశుద్ధ్య కార్మికులుగా పనిచేస్తున్న కొంతమంది ఉద్యోగులు, అధిక వడ్డీల పేరుతో వేధింపులకు పాల్పడుతున్న సయ్యద్ భాషా, అతని భార్య మీరాభి, వారి కుమారులపై చర్యలు తీసుకోవాలని కోరుతూ రేపల్లె పట్టణ పోలీస్ స్టేషన్‌లో ఫిర్యాదు చేశారు. ఈ ఫిర్యాదు ప్రకారం, రేపల్లె మున్సిపాలిటీలో పర్మినెంట్ మరియు కాంట్రాక్టు ఉద్యోగులుగా ఉన్న 14 మంది కార్మికులు సయ్యద్ భాషా వద్ద అప్పులు తీసుకున్నారు. భాషా ఈ అప్పులకు ₹10 నుండి ₹20 వరకు అధిక వడ్డీలను వసూలు చేస్తున్నాడని, అంతేకాకుండా ఈ వడ్డీలు తీసుకున్నప్పటికీ, వారి వద్ద తీసుకున్న ఖాళీ నోట్లను ఉపయోగించి లక్షలాది రూపాయలు చెల్లించాలని డిమాండ్ చేస్తూ కోర్టులో కేసులు వేసి ఇబ్బందులకు గురిచేస్తున్నాడని ఫిర్యాదుదారులు పేర్కొన్నారు. అధిక వడ్డీలు వసూలు చేస్తూ తమను వేధిస్తున్న భాషా కుటుంబం నుండి రక్షించాలని కోరిన ఫిర్యాదుదారులు, అధిక వడ్డీలు వసూలు చేసే వారిపై తక్షణమే చర్యలు తీసుకోవాలని రేపల్లె పట్టణ పోలీస్ స్టేషన్‌ను అభ్యర్థించారు.

ఏలూరు జిల్లాలోని పోలవరం మండలం నూతన గూడెంలో విషాద ఘటన చోటుచేసుకుంది. బండి మునేశ్వర రావు ఇంట్లోని బావిలో పూడిక తీయడానికి వెళ్లిన ఇద్దరు కూలీలు ఊపిరాడక మృతి చెందారు. ఈ ఘటనలో గణేష్ నగర్‌కు చెందిన రాజుతో పాటు పైడిపాక పునరావాస కాలనీకి చెందిన బండి వీర వెంకటరావు అలియాస్ చిట్టిబాబు ప్రాణాలు కోల్పోయారు. తొలుత చిట్టిబాబు బావిలోకి దిగి ఊపిరాడటం లేదని కేకలు వేయగా, అతడిని రక్షించేందుకు వీర వెంకటరావు కూడా బావిలోకి దిగాడు. ఇద్దరూ లోపల చిక్కుకుని కేకలు వేయడంతో స్థానికులు తాడు సాయంతో వారిని పైకి లాగేందుకు చేసిన ప్రయత్నం విఫలమైంది. సమాచారం అందిన వెంటనే పోలవరం సీఐ కృష్ణకుమార్, ఎస్సై అప్పారావు, అగ్నిమాపక సిబ్బంది సంఘటనా స్థలానికి చేరుకుని ఇద్దరి మృతదేహాలను వెలికితీశారు.

ఎన్టీఆర్ జిల్లాలోని ఇబ్రహీంపట్నం, రింగ్ సర్కిల్ వద్ద మైలవరం వెళ్లే జాతీయ రహదారి, పోలీస్ స్టేషన్ కు కొద్ది దూరంలో చిన్నపాటి వర్షానికే చెరువును తలపించేలా పూర్తిగా జలమయం అయింది. జాతీయ రహదారుల అధికారుల నిర్లక్ష్యం వల్లే రోడ్లపై ఇలాంటి పరిస్థితి ఏర్పడుతోందని తెలుస్తోంది. ఈ పరిణామంపై వాహనదారులు తీవ్ర ఆగ్రహం వ్యక్తం చేస్తున్నారు. తక్షణమే సంబంధిత అధికారులు స్పందించి, చిన్నపాటి వర్షానికి కూడా మునిగిపోతున్న రహదారులపై జాగ్రత్తలు చేపట్టాలని వారు డిమాండ్ చేస్తున్నారు.