நாமக்கல் மாவட்டம் ராசிபுரம் வட்டம் அத்தனூர் கிராமத்தில் கடந்த சில நாட்களாக வெயிலின் தாக்கம் மிக அதிகமாக இருந்தது. இந்த நிலையில், இன்று மாலை நேரத்தில் யாரும் எதிர்பாராத வகையில் திடீரென மழை பெய்தது. இந்த திடீர் மழையினால் வெயிலின் தாக்கம் குறைந்து, அப்பகுதி மக்கள் மிகுந்த மகிழ்ச்சி அடைந்தனர். மழையில் நனைந்து சிறு குழந்தைகள் விளையாடி மகிழ்ந்தனர்.

திருச்சி மாவட்டம் தொட்டியம் வட்டாட்சியர் அலுவலகத்தில் உள்ள இ-சேவை மையத்தில் ஏற்பட்டுள்ள ஆட்கள் பற்றாக்குறை காரணமாகப் பொதுமக்கள் கடும் வேதனை அடைந்துள்ளனர். இந்த மையத்தில் வாரத்தில் இரண்டு நாட்கள் மட்டுமே ஆதார் பதிவு மற்றும் திருத்தப் பணிகள் மேற்கொள்ளப்படுவதால், பொதுமக்கள் தங்களது ஆதார் அட்டைகளில் திருத்தங்களைச் செய்ய முடியாமல் பெரும் தாமதம் ஏற்படுகிறது. இதனால், தொட்டியம் காட்டுப்புத்தூர் பேரூராட்சி மற்றும் அதனைச் சுற்றியுள்ள 26 ஊராட்சிகளைச் சேர்ந்த பொதுமக்கள் கடும் சிரமத்திற்கு ஆளாகியுள்ளனர். ஆட்கள் குறைப்பு காரணமாகப் பணிகள் பாதிக்கப்பட்டுள்ளதால், இந்த ஆதார் மையத்தில் உள்ள ஆட்கள் பற்றாக்குறையை உடனடியாக நிரப்ப வேண்டும் என்று பொதுமக்கள் கோரிக்கை விடுத்துள்ளனர்.

தருமபுரி மாவட்டம், காரிமங்கலம் தாலுகா, இருமத்தூர் கிராமத்தில் மக்கள் தொடர்பு திட்ட முகாம் நடைபெற்றது. இந்த முகாமிற்கு மாவட்ட ஆட்சியர் சரவணன் தலைமை தாங்கினார். முகாமின் போது, பொதுமக்களிடமிருந்து கோரிக்கை மனுக்களைப் பெற்றுக்கொண்ட ஆட்சியர், அவற்றின் மீது உரிய நடவடிக்கை எடுக்குமாறு சம்பந்தப்பட்ட துறை அலுவலர்களுக்கு உத்தரவிட்டார். அரூர் சட்டமன்ற உறுப்பினர் சம்பத்குமார் இந்த நிகழ்வில் முன்னிலை வகித்தார். இந்த முகாமில் பல்வேறு துறைகளின் சார்பில் மொத்தம் 114 பயனாளிகளுக்கு 37 லட்சத்து 78 ஆயிரம் ரூபாய் மதிப்பிலான நலத்திட்ட உதவிகளை ஆட்சியர் வழங்கினார். இதில் வருவாய் துறை சார்பில் 41 பேருக்கு 4 லட்சம் ரூபாய் மதிப்பிலான இலவச வீட்டுமனை பட்டாக்களும், சமூக பாதுகாப்பு திட்டம் மூலம் 5 பேருக்கு இயற்கை மரணம் மற்றும் ஈமச் சடங்கு உதவித்தொகையாக 1.82 லட்சம் ரூபாயும் வழங்கப்பட்டது. மேலும், உணவுப் பொருள் வழங்கல் துறையின் சார்பில் 47 பேருக்கு 7.56 லட்சம் ரூபாய் மதிப்பிலான மின்னணு குடும்ப அட்டைகளும், தொழிலாளர் நலன் மற்றும் திறன் மேம்பாட்டு துறையின் சார்பில் 4 பேருக்கு 16 லட்சம் ரூபாய் மதிப்பிலான வீட்டு வசதி திட்ட உதவிகளும் வழங்கப்பட்டன. இந்த நிகழ்ச்சியில் அரூர் உதவி ஆட்சியர் கோவிந்தன், சமூக பாதுகாப்பு திட்ட தனித்துணை ஆட்சியர் செல்வி, மாவட்ட மாற்றுத்திறனாளிகள் நல அலுவலர் சரவணன், கால்நடை பராமரிப்பு துறை மண்டல இணை இயக்குனர் முருக லட்சுமி, தாசில்தார் சிவக்குமார் மற்றும் அரசு அலுவலர்கள் உட்பட பலர் கலந்து கொண்டனர்.

தர்மபுரி மாவட்டம் பாலக்கோட்டில் 20-க்கும் மேற்பட்ட அரசு மதுபானக் கடைகள் செயல்பட்டு வரும் நிலையில், டாஸ்மாக் ஊழியர்கள் இன்று கடையை மூடி போராட்டத்தில் ஈடுபட்டு வருகின்றனர். பாட்டிலுக்கு 10 ரூபாய் கூடுதல் விலை வசூலிக்கப்படுவதால் மதுப்பிரியர்களிடையே பிரச்சனை எழுவதாகவும், இதனால் ஊழியர்கள் பல்வேறு இன்னல்களுக்கு ஆளாவதாகவும் போராட்டக்காரர்கள் தெரிவித்துள்ளனர். ஊழியர்களின் சம்பளத்தை 25 சதவீதம் உயர்த்தியும் அறிவித்த நிலையில், தங்களது செலவுகளை ஈடு செய்ய நிர்வாகம் உரிய நடவடிக்கை எடுக்க வேண்டும் என வலியுறுத்தி இந்த ஆர்ப்பாட்டம் நடைபெறுகிறது. தனியார் மதுக்கடைகளில் அரசு மதுக்கடையை விட பாட்டிலுக்கு 20 முதல் 30 ரூபாய் வரை கூடுதல் விலைக்கு மது விற்பனை செய்யப்படுவதாகவும், கள்ளச்சந்தையில் விற்பனை செய்வதற்காக மொத்தமாக பாட்டில்களை வாங்கிச் செல்வதாகவும் குற்றச்சாட்டுகள் எழுந்துள்ளன. இதனால் மதுப்பிரியர்கள் ஒரு மணி நேரத்திற்கும் மேலாக நீண்ட வரிசையில் காத்திருக்க வேண்டிய சூழல் ஏற்பட்டுள்ளது. மேலும், அரசு கடைகளில் வாங்கப்படும் பாட்டில்களை 10 ரூபாய்க்கு திரும்பப் பெறும் திட்டம் நடைமுறையில் உள்ள நிலையில், தனியார் கடைகள் பாட்டில்களைத் திரும்பப் பெறுவதில்லை என்பதால் மது பாட்டில்கள் ஆங்காங்கே வீசப்படுகின்றன. தமிழக அரசு மதுக்கடைகளைத் தனியாருக்குத் தாரை வார்த்து வருவதாகவும், பொய்யான வாக்குறுதிகளை அளித்து வெற்றி பெற்ற அரசு தொடர்ந்து மக்கள் விரோதத் திட்டங்களைச் செயல்படுத்தி வருவதாகவும் பொதுமக்கள் கடும் அதிருப்தி தெரிவித்துள்ளனர்.

திருச்சி மாவட்டம் மணப்பாறையை அடுத்த மேட்டுக்கடை பகுதியில் அமைந்துள்ள அரசு டாஸ்மாக் கடையை அகற்றக்கோரி பொதுமக்கள் மற்றும் பெண்கள் பூட்டு போட்டு போராட்டத்தில் ஈடுபட்டுள்ளனர். மணப்பாறை - கோவில்பட்டி பிரதான சாலையோரம் அமைந்துள்ள இந்த மதுக்கடையால் பள்ளி மாணவ-மாணவிகள் மற்றும் பொதுமக்கள் கடும் சிரமங்களை சந்தித்து வருகின்றனர். இந்த டாஸ்மாக் கடையை அகற்ற வேண்டும் என்று அதிகாரிகளிடம் பொதுமக்கள் பலமுறை வலியுறுத்தியும், பலகட்ட போராட்டங்கள் நடத்தியும் கடை மூடப்படவில்லை. இதனால் ஆத்திரமடைந்த அப்பகுதி பொதுமக்கள் மற்றும் ஏராளமான பெண்கள் இன்று அந்த டாஸ்மாக் கடைக்கு அதிரடியாக பூட்டு போட்டு, அதன் முன்பாக அமர்ந்து தீவிர போராட்டத்தில் ஈடுபட்டனர். இதுகுறித்து தகவலறிந்து வந்த மணப்பாறை போலீசார் போராட்டக்காரர்களுடன் பேச்சுவார்த்தை நடத்தினர். இருப்பினும், இந்த மதுக்கடையை நிரந்தரமாக மூடினால் மட்டுமே போராட்டத்தை கைவிடுவோம் என்று கூறி பெண்கள் தொடர்ந்து போராட்டத்தில் ஈடுபட்டு வருகின்றனர். இதனால் அப்பகுதியில் பெரும் பரபரப்பு ஏற்பட்டுள்ளது.

தர்மபுரி மாவட்டம் பென்னாகரம் தாலுக்கா அச்சனஅள்ளி கிராமத்தைச் சேர்ந்த சக்திவேல் என்பவரின் மகள் நர்மதா (19) மற்றும் அதே பகுதியைச் சேர்ந்த குமாரின் மகன் பெருமாள் (21) ஆகிய இருவரும் கடந்த 4 ஆண்டுகளாகக் காதலித்து வந்துள்ளனர். டிப்ளமோ படித்துள்ள நர்மதாவும், பட்டதாரியான பெருமாளும், பெற்றோர்களின் எதிர்ப்பையும் மீறி இன்று காலை பாலக்கோடு அருகே உள்ள மணியாகரன் கொட்டாய் சிவன் கோயிலில் திருமணம் செய்து கொண்டனர். பெற்றோர்களுக்குப் பயந்து பாதுகாப்பு கோரி இருவரும் பாலக்கோடு காவல் நிலையத்தில் தஞ்சம் அடைந்தனர். காவல்துறையினர் இருவரின் பெற்றோர்களுக்கும் தகவல் தெரிவித்ததையடுத்து, காவல் நிலையம் வந்த பெண்ணின் பெற்றோர் இந்தத் திருமணத்திற்கு எதிர்ப்பு தெரிவித்தனர். இருப்பினும், காதலனுடன்தான் செல்வேன் என்று நர்மதா உறுதியாகக் கூறியதால், காவல்துறையினர் அவரை காதலனுடன் அனுப்பி வைத்தனர். இந்தச் சம்பவம் அப்பகுதியில் பெரும் பரபரப்பை ஏற்படுத்தியுள்ளது.

தமிழகத்தில் கடந்த 2021-ம் ஆண்டு திமுக ஆட்சி பொறுப்பேற்ற பிறகு, நகரப் பேருந்துகளில் பெண்கள் இலவசமாகப் பயணம் செய்வதற்காக 'மகளிர் விடியல் பயணம்' என்ற திட்டம் அறிமுகப்படுத்தப்பட்டது. கடந்த ஐந்தாண்டுகளாகச் செயல்படுத்தப்பட்டு வந்த இந்தத் திட்டத்தில் தற்போது மாற்றம் செய்யப்பட்டுள்ளது. இந்தத் திட்டத்தின் பெயரிலிருந்து 'விடியல்' என்ற வார்த்தை நீக்கப்பட்டு, இனி 'மகளிர் பயணம்' என்று பெயர் மாற்றம் செய்யப்பட்டுள்ளது. இந்த மாற்றத்துடன் திருச்சியில் பேருந்துகள் இயக்கப்பட்டு வருகின்றன.

திருப்பூர் மாவட்டம் தாராபுரம் பொள்ளாச்சி சாலையில் உள்ள தனியார் தங்கும் விடுதியில் நேற்றிரவு தங்கியிருந்த ஜெபகுமார் (35) மற்றும் சக்கரவர்த்தி (34) ஆகிய இருவரும் மது அருந்திய நிலையில் முதல் மாடியில் நின்று பேசிக்கொண்டிருந்தனர். அப்போது எதிர்பாராதவிதமாக ஜெபகுமார் முதல் மாடியிலிருந்து கீழே விழுந்ததில் தலையில் பலத்த காயமடைந்து சம்பவ இடத்திலேயே உயிரிழந்தார். விடுதி மேலாளர் அளித்த தகவலின் பேரில், தனியார் ஆம்புலன்ஸ் மூலம் மீட்கப்பட்டு அரசு மருத்துவமனைக்குக் கொண்டு செல்லப்பட்ட ஜெபகுமாரை பரிசோதித்த மருத்துவர்கள், அவர் வரும் வழியிலேயே உயிரிழந்துவிட்டதாகத் தெரிவித்தனர். இச்சம்பவம் குறித்து வழக்கு பதிவு செய்துள்ள தாராபுரம் போலீசார், விடுதி மேலாளரிடம் விசாரணை நடத்தி வருகின்றனர். மேலும், ஜெபகுமார் மது போதையில் தற்செயலாகக் கீழே விழுந்தாரா அல்லது அவரது நண்பர் தள்ளிவிட்டாரா என்ற கோணத்திலும் போலீசார் தீவிர விசாரணை மேற்கொண்டு வருகின்றனர். விடுதியில் தங்கியிருந்த வாலிபர் மாடியிலிருந்து விழுந்து உயிரிழந்த இச்சம்பவம் அப்பகுதியில் பெரும் பரபரப்பை ஏற்படுத்தியுள்ளது.

ஈரோடு மாவட்டம் சத்தியமங்கலம் நகரின் வடக்குப்பேட்டை பகுதியில் குரங்குகளின் நடமாட்டம் அதிகரித்துள்ளதால் பொதுமக்கள் கடும் அச்சத்தில் உள்ளனர். புலிகள் காப்பக வனப்பகுதி சத்தியமங்கலத்திற்கு அருகே சுமார் 10 கிலோமீட்டர் தொலைவில் அமைந்துள்ள நிலையில், அங்கிருந்து உணவு தேடி வரும் குரங்குகள் வடக்குப்பேட்டை பகுதியில் உள்ள பிஎஸ்என்எல் அலுவலக மரத்தில் முகாமிட்டுள்ளன. இந்தக் குரங்குகள் காலை வேளைகளில் அப்பகுதியில் உள்ள வீடுகள், கடைகள், ஹோட்டல்கள் மற்றும் மருத்துவமனை வளாகங்களுக்குள் புகுந்து பொதுமக்களுக்குத் தொல்லை கொடுத்து வருகின்றன. குறிப்பாக, கடைகளில் இருக்கும் பொருட்களைத் தூக்கிச் செல்லும் குரங்குகள், மக்களை அச்சுறுத்தும் வகையிலும் செயல்படுகின்றன. மாலை நேரங்களில் மீண்டும் அந்த மரத்திற்கே திரும்பிச் சென்று தங்கும் இந்த குரங்குகளின் அட்டகாசத்தால், மக்கள் வீட்டின் கதவுகளைத் திறக்கவே அச்சப்படும் சூழல் ஏற்பட்டுள்ளது. குரங்குகளின் இந்தத் தொல்லையிலிருந்து விடுபட, வனத்துறையினர் உடனடியாகக் கூண்டு வைத்து அவற்றைப் பிடித்து மீண்டும் வனப்பகுதிக்குள் விட வேண்டும் என இப்பகுதி பொதுமக்கள் கோரிக்கை விடுத்துள்ளனர்.

திருச்சியில் கே.கே.நகர் பேருந்து நிலையத்தில் அரசு பேருந்து ஓட்டுநர் சிவகுமார் தாக்கப்பட்ட சம்பவம் தொடர்பாக வீடியோ ஒன்று சமூக வலைதளங்களில் வைரலாகி வருகிறது. தமிழ்நாடு அரசு போக்குவரத்து கழகத்தின் கும்பகோணம் கோட்டம், திருச்சி மண்டலம், தீரன் நகர் கிளையைச் சேர்ந்த 88p பேருந்தை ஓட்டுநர் சிவகுமார் கே.கே.நகர் வழித்தடத்தில் இயக்கி வந்துள்ளார். இன்று காலை பேருந்து நிலையம் வந்தபோது, அங்கு தனியார் நிறுவனத்திற்குச் (MRF) சொந்தமான பேருந்து நிலையத்தின் நடுவே நிறுத்தப்பட்டிருந்தது. தனியார் பேருந்தை நகர்த்தி விடுமாறு ஓட்டுநர் சிவகுமார் கேட்டுக்கொண்ட போது, தனியார் நிறுவன பேருந்து ஓட்டுநர் மற்றும் அவரது மகன் ஆகிய இருவரும் சேர்ந்து அவரை கண்மூடித்தனமாகத் தாக்கியுள்ளனர். இந்த மோதலின் போது, பின்னால் வந்த மற்றொரு அரசு பேருந்தின் ஓட்டுநர் சதீஷ்குமார் மற்றும் நடத்துனர் பரமானந்தம் ஆகியோர் தடுக்க முயன்றனர். அப்போது, அந்த தனியார் நிறுவன ஓட்டுநர் அவர்களையும் தாக்க முயற்சி செய்ததுடன் கொலை மிரட்டலும் விடுத்துள்ளார். இந்த சம்பவம் குறித்து ஓட்டுநர் சிவகுமார் கே.கே.நகர் காவல் நிலையத்தில் புகார் அளித்துள்ளார். புகாரின் அடிப்படையில், சம்பந்தப்பட்ட தனியார் நிறுவன பேருந்தைக் கைப்பற்றியுள்ள காவல்துறை, தனியார் பேருந்து ஓட்டுநர் மற்றும் அவரது மகன் மீது விசாரணை மேற்கொண்டு வருகின்றனர்.