కామారెడ్డి మున్సిపాల్ పరిధిలోని 13 వ వార్డుకు చెందిన టేక్రియల్ గ్రామం నివాసి క్యాతం హేమంత్ కుమార్, శనివారం వెలువడిన ట్రిపుల్ ఐటీ బాసర ప్రవేశ పరీక్ష ఫలితాల్లో ఉత్తీర్ణత సాధించి ఎంపికయ్యారు. హేమంత్ కుమార్ సాధించిన ఈ విజయం అతనికి, అతని గ్రామానికి గర్వకారణంగా నిలిచింది. ఈ సందర్భంగా గ్రామస్తులు, కుటుంబ సభ్యులు హేమంత్ కుమార్‌ను ఘనంగా అభినందించారు. భవిష్యత్తులో సివిల్స్ సాధించి దేశానికి సేవలందించాలనే తన ఆకాంక్షను హేమంత్ కుమార్ ఈ సందర్భంగా వ్యక్తం చేశారు.

కామారెడ్డి జిల్లా కలెక్టర్ ఆశిష్ సాంగ్వాన్ శనివారం తన ఛాంబర్‌లో హైదరాబాద్‌కు చెందిన యూఎస్‌టీ సాఫ్ట్‌వేర్ సంస్థ ప్రతినిధులను అభినందించారు. 2025 సంవత్సరంలో కామారెడ్డి జిల్లాలో సంభవించిన వరదల సమయంలో కార్పొరేట్ సోషల్ రెస్పాన్సిబిలిటీ (CSR) కార్యక్రమాల కింద విశేష సేవలు అందించినందుకు ఈ ప్రశంస లభించింది. వరదల ప్రభావానికి గురైన కుటుంబాలకు యూఎస్‌టీ సంస్థ 600 డిజాస్టర్ ఫ్లడ్ రిలీఫ్ కిట్లను పంపిణీ చేసిందని, సకాలంలో మానవతా సహాయాన్ని అందించిందని కలెక్టర్ పేర్కొన్నారు. ఈ కార్యక్రమం ద్వారా అనేక కుటుంబాలకు అత్యవసర సహాయం అందిందని, ఇది సమాజ సేవ పట్ల సంస్థకు ఉన్న నిబద్ధతకు నిదర్శనంగా నిలిచిందన్నారు. యూఎస్‌టీ CSR అంబాసడర్ తిరుమల విజయ్ కుమార్‌తో పాటు వాలంటీర్ బృంద సభ్యులు రాధికా పెరుమాళ్, షాహుల్ సయ్యద్, సురేంద్రనాథ్ తిరునగరం, బిక్షపతి ఎండ్లా చేసిన సేవలను జిల్లా కలెక్టర్ ప్రత్యేకంగా అభినందించారు. జిల్లాలో సహాయక కార్యక్రమాలను సమర్థవంతంగా నిర్వహించి, బాధిత కుటుంబాలకు అండగా నిలిచినందుకు వారికి ప్రశంసలు తెలిపారు. జిల్లా ప్రజలకు అందించిన సేవలకు గుర్తింపుగా యూఎస్‌టీ సంస్థ ప్రతినిధులకు కలెక్టర్ ప్రశంసా పత్రాన్ని అందజేశారు. ఈ సందర్భంగా, విద్య, వైద్య రంగం, డిజిటల్ మౌలిక వసతులు, నైపుణ్యాభివృద్ధి, పర్యావరణ పరిరక్షణ, గ్రామీణాభివృద్ధి తదితర రంగాల్లో భవిష్యత్తులో CSR కార్యక్రమాలను విస్తరించే అవకాశాలపై చర్చించారు. జిల్లా అభివృద్ధికి తోడ్పడే కార్యక్రమాల్లో రాబోయే సంవత్సరాల్లో కూడా యూఎస్‌టీ సంస్థ తమ సహకారాన్ని కొనసాగించాలని కలెక్టర్ ఆశిష్ సాంగ్వాన్ కోరారు. సమాజాభివృద్ధి, ప్రజా సంక్షేమానికి దోహదపడే CSR కార్యక్రమాలలో జిల్లా పరిపాలన యూఎస్‌టీ సంస్థతో భవిష్యత్తులో కూడా కలిసి పనిచేయాలని ఆయన ఆకాంక్షించారు.

కామారెడ్డి జిల్లాలోని నాగిరెడ్డిపేట్ మండలం కన్నా రెడ్డి గ్రామ రైతులు తమ ధాన్యాన్ని కొనుగోలు చేయడం లేదంటూ సుమారు వారం రోజుల క్రితం ధర్నా నిర్వహించారు. ఈ విషయం తెలుసుకున్న మాజీ మంత్రి వేముల ప్రశాంత్ రెడ్డి గారు రైతులకు భరోసా కల్పించారు. అనంతరం ఆయన వెంటనే సంబంధిత అధికారులతో ఫోన్‌లో మాట్లాడి సమస్య పరిష్కారానికి కృషి చేశారు.

మెదక్ జిల్లాలోని జిల్లా సమీకృత కలెక్టర్ కార్యాలయంలో శనివారం, 30-5-2026న "మన హక్కులు – మన గొంతు" నినాదంతో ఒక మాక్ పార్లమెంట్ కార్యక్రమం నిర్వహించబడింది. విద్యార్థుల్లో ప్రజాస్వామ్య స్ఫూర్తిని పెంపొందించడమే దీని లక్ష్యమని జిల్లా కలెక్టర్ ప్రతిమా సింగ్ స్పష్టం చేశారు. గ్రామీణ పేదరిక నిర్మూలన సంస్థ - గ్రామీణాభివృద్ధి శాఖ ఆధ్వర్యంలో '99 రోజుల ప్రజాపాలన - ప్రగతి ప్రణాళిక కార్యక్రమం'లో భాగంగా, 'స్నేహ' సంఘాల సభ్యుల కోసం ఈ కార్యక్రమాన్ని ఏర్పాటు చేశారు. బాలల హక్కులు, బాలికల భద్రత, విద్య, ఆరోగ్యం, పరిశుభ్రత, సామాజిక సమస్యలపై విద్యార్థుల్లో అవగాహన పెంపొందించడమే ఈ మాక్ పార్లమెంట్ ముఖ్య ఉద్దేశ్యం. ఈ కార్యక్రమంలో జిల్లాలోని వివిధ మండలాల నుండి ఎంపికైన బాలికలు సభాపతి, మంత్రులు, ప్రతిపక్ష సభ్యులు, ప్రజా ప్రతినిధుల పాత్రలను సమర్థవంతంగా పోషించారు. సభా నిర్వహణ, చర్చలు, ప్రశ్నోత్తరాల ద్వారా ప్రజాస్వామ్య వ్యవస్థ పనితీరును ప్రత్యక్షంగా ప్రదర్శించారు, తమ ఆలోచనలను ధైర్యంగా వ్యక్తం చేశారు. విద్యార్థులు బాలల హక్కుల పరిరక్షణ, బాల్య వివాహాల నిర్మూలన, బాల కార్మిక వ్యవస్థ నిర్మూలన, బాలికల భద్రత, విద్యా సౌకర్యాలు, ఆరోగ్య సేవలు, పోషకాహారం, తాగునీరు, పారిశుద్ధ్యం వంటి కీలక అంశాలపై చర్చలు జరిపారు. గ్రామీణ ప్రాంతాల్లో బాలికల విద్యాభివృద్ధికి మరిన్ని అవకాశాలు కల్పించాలని, పాఠశాలల్లో పరిశుభ్రమైన మరుగుదొడ్లు, సురక్షిత వాతావరణం, నాణ్యమైన మధ్యాహ్న భోజనం అందించాలని సూచించారు. బాల కార్మిక వ్యవస్థను పూర్తిగా నిర్మూలించేందుకు బాల కార్మిక (నిషేధం మరియు నియంత్రణ) చట్టాన్ని సమర్థవంతంగా అమలు చేయాలని, పిల్లలను పనుల్లో నిమగ్నం చేయకుండా పాఠశాలల్లో చేర్పించడానికి సమాజం బాధ్యత వహించాలని కోరారు. బాలికల భద్రతకు సంబంధించి పోక్సో చట్టం, సైబర్ నేరాల నివారణ, గుడ్ టచ్–బ్యాడ్ టచ్, మహిళా హెల్ప్‌ లైన్ 181, చైల్డ్ హెల్ప్‌ లైన్ 1098 వంటి అంశాలపై మరింత అవగాహన కార్యక్రమాలు నిర్వహించాలని సూచిస్తూ, సైబర్ వేధింపులు లేదా మోసాలు ఎదురైతే వెంటనే 1930 హెల్ప్‌ లైన్‌ను సంప్రదించాలని తెలిపారు. జిల్లా కలెక్టర్ ప్రతిమా సింగ్ మాట్లాడుతూ, బాలికలు తమ హక్కులు, బాధ్యతలపై పూర్తి అవగాహన కలిగి ఉండాలని, నాయకత్వ లక్షణాలను పెంపొందించుకోవాలని అన్నారు. యుక్త వయసు బాలికల కోసం ప్రత్యేకంగా ఏర్పాటు చేసిన స్నేహ సంఘాలు ప్రతి గ్రామ పంచాయతీలో ఉన్నాయని తెలిపారు. బాల్య వివాహాల నిర్మూలనకు 1098 చైల్డ్ లైన్, ఇంటి సమస్యలకు సఖి సహాయ కేంద్రం 181 లేదా పోలీస్ 100 నంబర్లను సంప్రదించాలని సూచించారు. గుట్కా, పొగాకు, గంజాయి విక్రయాలు, సరఫరాపై నిషేధం ఉందని, అలాంటి అలవాట్లకు ఎవరైనా బానిసలైతే లేదా విక్రయాలకు పాల్పడితే ఈగల్ బృందం 1908 టోల్ ఫ్రీ నంబర్‌కు సమాచారం అందించాలని ఆమె కోరారు. పాఠశాలల్లో తరగతి గదులు, మూత్రశాలలు, మరుగుదొడ్లు, రుతుక్రమ పరిశుభ్రతపై స్నేహ సంఘాలు చర్చించాలని ఆమె దిశానిర్దేశం చేశారు. బాలికల భద్రతకు అత్యంత ప్రాధాన్యత ఇవ్వాలని, పోక్సో చట్టం, బాల్య వివాహ నిరోధక చట్టం, ఇతర బాలల రక్షణ చట్టాలపై విద్యార్థులకు అవగాహన కల్పించాలని ఆమె ఉద్ఘాటించారు. వేధింపులు, హింస లేదా భద్రతా సమస్యలు ఎదురైనప్పుడు వెంటనే ఫిర్యాదు చేయాలని ఆమె ప్రోత్సహించారు. విద్యార్థుల్లో మంచి నడవడి, నైతిక విలువలు, పరస్పర గౌరవాన్ని పెంపొందించడమే ఈ కార్యక్రమ ముఖ్య ఉద్దేశ్యమని, బాలికలు విద్య, ఆరోగ్యం, భద్రతతో పాటు నాయకత్వ లక్షణాలను పెంపొందించుకొని, తమ భవిష్యత్తును తామే నిర్మించుకునే స్థాయికి ఎదగాలని సూచించారు. సాధికారత అంటే కేవలం ఉద్యోగం లేదా ఆర్థిక స్వావలంబన మాత్రమే కాదని, సరైన నిర్ణయాలు తీసుకునే సామర్థ్యం, ఆత్మగౌరవం, సమాజానికి ఉపయోగపడే విధంగా జీవించడం కూడా భాగమేనని ఆమె వివరించారు. జిల్లా వ్యాప్తంగా 14,000 మంది నిరక్షరాస్యులను అక్షరాస్యులుగా తీర్చిదిద్దారని కూడా కలెక్టర్ ఈ సందర్భంగా ప్రస్తావించారు. అనంతరం జిల్లా ఎస్పీ శ్రీనివాసరావు మాట్లాడుతూ, బాలికల భద్రతకు సంబంధించిన చట్టాలు, సైబర్ భద్రత, స్టాకింగ్ వంటి నేరాలపై విద్యార్థులు అవగాహన కలిగి ఉండాలని, ఎలాంటి వేధింపులు ఎదురైనా భయపడకుండా సంబంధిత అధికారులకు సమాచారం అందించాలని సూచించారు. మాక్ పార్లమెంట్ ద్వారా విద్యార్థుల్లో వక్తృత్వ నైపుణ్యాలు, నాయకత్వ సామర్థ్యాలు, సమస్యలను విశ్లేషించే దృక్పథం, ప్రజాస్వామ్య విలువలపై అవగాహన పెంపొందుతాయని ఆయన తెలిపారు. బాలికల్లో వ్యక్తిగత పరిశుభ్రతపై అవగాహన, ఆరోగ్యకరమైన జీవన విధానాలు, శారీరక, మానసిక ఆరోగ్యంపై శ్రద్ధ అవసరమని ఆయన పేర్కొన్నారు. గుడ్ టచ్, బ్యాడ్ టచ్ గురించి విద్యార్థులకు స్పష్టమైన అవగాహన ఉండాలని, బాల్య వివాహాలు చట్టరీత్యా నేరమని, అవి బాలికల విద్య, ఆరోగ్యం, భవిష్యత్తుపై ప్రతికూల ప్రభావం చూపుతాయని హెచ్చరించారు. ప్రస్తుతం పెరుగుతున్న సైబర్ నేరాల నేపథ్యంలో సోషల్ మీడియా వినియోగంలో జాగ్రత్తలు పాటించాలని, వ్యక్తిగత సమాచారాన్ని అపరిచితులతో పంచుకోవద్దని ఆయన సూచించారు. ఈ మాక్ పార్లమెంట్ కార్యక్రమంలో ప్రతిభ కనబరిచిన విద్యార్థులకు బహుమతులు ప్రదానం చేయగా, ఉల్లాస్ కింద ట్రైనర్, లెర్నర్‌లకు ప్రశంసాపత్రాలు అందజేశారు. ఈ కార్యక్రమానికి అదనపు కలెక్టర్ నగేష్, జిల్లా ఎస్పీ శ్రీనివాసరావు, జెడ్పి సీఓ ఎల్లయ్య, డిఆర్.డి.ఓ శ్రీనివాసరావు, డీఎస్పీ ప్రసన్నకుమార్, బి డబ్ల్యు ఓ హేమా భార్గవి, అడిషనల్ డిఆర్డిఓ సరస్వతి, సంబంధిత శాఖల అధికారులు, ఉపాధ్యాయులు, విద్యార్థులు, కిశోర బాలికలు హాజరయ్యారు.

కర్నూలు జిల్లా వైసీపీ అధ్యక్షుడు, మాజీ ఎమ్మెల్యే ఎస్వీ. మోహన్ రెడ్డి తెలుగు దేశం పార్టీని 'వెన్నుపోటు పార్టీ'గా అభివర్ణించారు. వైసీపీ కార్యక్రమంలో ఏర్పాటు చేసిన మీడియా సమావేశంలో ఆయన మాట్లాడుతూ, మహానాడు కార్యక్రమం కేవలం వైసీపీ పార్టీ మరియు మాజీ ముఖ్యమంత్రి వైఎస్. జగన్మోహన్ రెడ్డిని విమర్శించడానికే పరిమితమైందని ఆరోపించారు. వైసీపీ పార్టీ గొడ్డలి పార్టీ కాదని, సంక్షేమ పథకాల పార్టీ అని ఎస్వీ. మోహన్ రెడ్డి స్పష్టం చేశారు. మహిళలకు, రైతులకు, నిరుద్యోగులకు ఎన్నికల్లో ఇచ్చిన హామీలను తెలుగు దేశం పార్టీ నెరవేర్చలేదని కూడా ఆయన తీవ్రంగా విమర్శించారు.

రాజన్న సిరిసిల్ల జిల్లాలోని కోనరావుపేట మండలంలో వివోఏల (విలేజ్ ఆర్గనైజేషన్ అసిస్టెంట్) నిరవధిక సమ్మెకు తెలంగాణ రక్షణ సేన (టిఆర్ఎస్) నాయకులు సంఘీభావం తెలిపారు.

ఏఐటీయూసీ రాష్ట్ర కార్యదర్శి టేకుమల్ల సమ్మయ్య, జగిత్యాల జిల్లాలోని మెట్‌పల్లి ఐసీడీఎస్ ప్రాజెక్టులో 2008 నుండి 2025 వరకు గర్భిణీ స్త్రీలు, పసిపిల్లల కోసం కేటాయించిన నిధులను అధికారులు కాజేసి, రికార్డులను మాయం చేశారని ఆరోపించారు. ఈ విషయమై ఐసీడీఎస్ అధికారులపై తక్షణమే చట్టరీత్యా చర్యలు తీసుకోవాలని, విజిలెన్స్ ద్వారా విచారణ చేపట్టాలని ఆయన ప్రభుత్వాన్ని డిమాండ్ చేశారు. 2005 సమాచార హక్కు చట్టం ప్రకారం మెట్‌పల్లి ఐసీడీఎస్ అధికారుల నుండి సమాచారం కోరగా, తమకు కావలసిన రికార్డులను తనిఖీ చేసుకోమని వారు చెప్పినట్లు సమ్మయ్య పేర్కొన్నారు. అయితే, అడిగిన రికార్డులు లేవని, రికార్డులు కాలిపోయాయని యూడీసీ, సీడీపీఓలు నిర్లక్ష్యంగా మౌఖిక సమాధానం ఇచ్చారని ఆయన ఆరోపించారు. ఈ అంశంపై సమాచార హక్కు చట్టం రాష్ట్ర కమిషనర్‌ను కోరగా, ఐసీడీఎస్ అధికారులకు ఆయనకు కావలసిన సమాచారం ఇవ్వాలని ఆదేశించారు. 2008 నుండి 2025 వరకు కార్యాలయంలో ఉన్న రికార్డులను తనిఖీ చేయగా, గర్భిణీ స్త్రీలు, పసిపిల్లలకు అందించాల్సిన బాలామృతం, కోడిగుడ్లు, పప్పులు, బియ్యం, నూనెల పంపిణీకి సంబంధించిన రికార్డులలో అనేక తప్పులు, అవినీతి జరిగినట్లు కనిపించిందని సమ్మయ్య తెలిపారు. రికార్డులపై సంతకాలు లేకుండానే బిల్లులు కాజేసి, ఒకే బిల్లును మళ్లీ మళ్లీ చేసుకుంటూ అనేక రకాలుగా అవినీతికి పాల్పడిన వారిపై ఎటువంటి చర్యలు తీసుకోకపోవడం సిగ్గుచేటన్నారు. కావాల్సిన రికార్డులు లేవని, అడిగినా అస్పష్టమైన సమాధానాలు వస్తున్నాయని, ఇది రికార్డులు లేకపోవడంపై అనేక అనుమానాలకు తావిస్తోందని ఆయన అన్నారు. సమాచార హక్కు చట్టం రాష్ట్ర కమిషనర్‌కు అన్ని రికార్డులు చూపించామని తప్పుడు సమాచారం ఇచ్చిన అధికారులపై చట్టరీత్యా చర్యలు తీసుకోవాలని కమిషనర్‌ను కోరుతున్నామని టేకుమల్ల సమ్మయ్య చెప్పారు. ప్రభుత్వం వెంటనే జోక్యం చేసుకొని, గర్భిణీ స్త్రీలు, పసిపిల్లల సొమ్మును కాజేసి రికార్డులు మాయం చేసిన ఐసీడీఎస్ అధికారులు, సిబ్బందిపై చట్టరీత్యా చర్యలు తీసుకోవాలని, మాయమైన రికార్డులపై విజిలెన్స్ అధికారులతో విచారణ చేపట్టాలని డిమాండ్ చేశారు. పౌష్టికాహార లోపంతో ఎవరూ బాధపడకూడదనే ఉద్దేశంతో కేంద్ర, రాష్ట్ర ప్రభుత్వాలు బడ్జెట్‌లో కోట్ల రూపాయల నిధులు కేటాయిస్తుంటే, ఐసీడీఎస్ అధికారులు తప్పుడు రికార్డులు సృష్టించి పసిపిల్లల సొమ్మును కాజేసినట్లు స్పష్టంగా కనబడుతోందని ఆయన అన్నారు. సమాచార హక్కు చట్టం 2005ను దుర్వినియోగం చేసి, తప్పుడు సమాచారం ఇచ్చిన అధికారులపై చర్యలు తీసుకొని, దుర్వినియోగమైన పసిపిల్లల సొమ్మును రికవరీ చేసి ప్రభుత్వ ఖజానాకు జమ చేయాలని ఆయన ప్రభుత్వాన్ని కోరారు. అలాగే, 2024 జులై నెలలో 220 మంది అంగన్‌వాడీ ఆయాలకు రెండు సంవత్సరాల వేతనం పెండింగ్‌లో ఉందని, వేతనాలు ఇవ్వమని అడిగితే అధికారులు తప్పుడు సమాచారం ఇస్తున్నారని సమ్మయ్య ఆరోపించారు. సీడీపీఓ, యూడీసీ, సూపర్వైజర్లు, డీడబ్ల్యుఓలపై శాఖాపరమైన చర్యలు తీసుకొని, అంగన్‌వాడీ ఆయాల జీతాలను వెంటనే ఇప్పించాలని టేకుమల్ల సమ్మయ్య ప్రభుత్వాన్ని కోరారు. పిల్లల పౌష్టికాహారం కోసం ప్రభుత్వం కోట్ల రూపాయలు వెచ్చిస్తుంటే, ఐసీడీఎస్ అధికారులు పందికొక్కుల్లా స్వాహా చేస్తున్న పట్టించుకునే నాథుడు లేకపోవడం సిగ్గుచేటని ఆయన విమర్శించారు. అవినీతిని ఆధారాలతో చూపించినా అధికారుల్లో చలనం లేకపోవడం ఐసీడీఎస్‌లో అవినీతి ఏ విధంగా జరుగుతుందో తెలియజేస్తోందని అన్నారు.

కామారెడ్డి జిల్లాలో జూన్ 1 నుండి 12వ తేదీ వరకు నిర్వహించనున్న పర్యావరణ పరిరక్షణ కార్యక్రమాలపై జిల్లా కలెక్టర్ ఆశిష్ సాంగ్వాన్ శనివారం క్యాంపు కార్యాలయంలో సమీక్ష సమావేశం నిర్వహించారు. ప్రజాపాలన ప్రగతి ప్రణాళిక 99 రోజుల కార్యాచరణలో భాగంగా అటవీ శాఖ ఆధ్వర్యంలో ఈ కార్యక్రమాలు జరగనున్నాయి. ఈ సమావేశంలో జిల్లా అటవీ శాఖ అధికారి నీరజ్ తో కలిసి కలెక్టర్ ఆశిష్ సాంగ్వాన్ కార్యక్రమాల నిర్వహణ, కార్యాచరణ ప్రణాళిక, ప్రజల్లో పర్యావరణ పరిరక్షణపై అవగాహన పెంపు చర్యలపై చర్చించారు. జూన్ 1 నుండి 12 వరకు జిల్లావ్యాప్తంగా మొక్కల నాటడం, పర్యావరణ పరిరక్షణపై అవగాహన ర్యాలీలు, విద్యా సంస్థల్లో ప్రత్యేక కార్యక్రమాలు, ప్రకృతి సంరక్షణపై చర్చా వేదికలు, స్వచ్ఛత కార్యక్రమాలు నిర్వహించాలని కలెక్టర్ అధికారులకు సూచించారు. ఈ కార్యక్రమాలలో విద్యార్థులు, యువత, స్వచ్ఛంద సంస్థలు, గ్రామస్థాయిలో ప్రజలను భాగస్వామ్యం చేస్తూ విస్తృతంగా నిర్వహించాలని ఆయన ఆదేశించారు. పర్యావరణ పరిరక్షణ ప్రతి ఒక్కరి బాధ్యత అని, భవిష్యత్ తరాలకు స్వచ్ఛమైన వాతావరణాన్ని అందించేందుకు అందరూ కృషి చేయాలని కలెక్టర్ ఈ సందర్భంగా పేర్కొన్నారు. ప్రజాపాలన ప్రగతి ప్రణాళిక లక్ష్యాలకు అనుగుణంగా కార్యక్రమాలను సమర్థవంతంగా అమలు చేయాలని ఆయన అధికారులకు సూచించారు.

నాచారం సర్కిల్ వద్ద జరిగిన ఒక ఘటనలో, కారు డోర్ అకస్మాత్తుగా తెరవడంతో వెనుక నుండి వస్తున్న బైక్ దానిని ఢీకొట్టింది. ఈ ప్రమాదంలో బైక్‌పై ప్రయాణిస్తున్న ఇద్దరు తీవ్రంగా గాయపడ్డారు. ప్రమాద సమయంలో కారులో డిఈఈ, హెచ్‌ఎంటీ నగర్ వర్క్ ఇన్‌స్పెక్టర్ విజయ్‌కుమార్, మరియు డ్రైవర్ అర్జున్ ఉన్నట్లు సమాచారం. కారు డోర్ నిర్లక్ష్యంగా తెరవడం వల్లే ఈ ప్రమాదం జరిగిందని ఆరోపణలు వస్తున్నాయి. అంతేకాకుండా, ప్రమాదంలో గాయపడిన బాధితుల ఆసుపత్రి ఖర్చులు భరిస్తామని మొదట చెప్పిన కారులోని వ్యక్తులు ఇప్పుడు తమ బాధ్యత నుండి తప్పించుకుంటున్నారని తీవ్ర విమర్శలు వెల్లువెత్తుతున్నాయి. గాయపరిచి బాధితులను గాలికొదిలేసిన నాచారం డిఈఈ తీరుపై ఆగ్రహం వ్యక్తమవుతోంది.