అనంతపురం జిల్లాలోని కళ్యాణదుర్గం పట్టణంలో, కళ్యాణదుర్గం ఎమ్మెల్యే సురేంద్రబాబు మాట్లాడుతూ, ప్రతిపక్షాలు ఎన్ని విమర్శలు చేసినప్పటికీ, కూటమి ప్రభుత్వ లక్ష్యం కేవలం అభివృద్ధి, సంక్షేమం మాత్రమేనని స్పష్టం చేశారు. కూటమి ప్రభుత్వం రెండేళ్లు పూర్తి చేసుకున్న సందర్భంగా ఏర్పాటు చేసిన సంబరాల కార్యక్రమంలో ఆయన ఈ వ్యాఖ్యలు చేశారు. ఈ సందర్భంగా, మున్సిపాలిటీలో ఇంటింటికీ నీళ్లు అందించే పనులకు సంబంధించిన భూమి పూజ అతి త్వరలో నిర్వహిస్తామని ఆయన హామీ ఇచ్చారు. అభివృద్ధిని లక్ష్యంగా చేసుకుని ముందుకు సాగుతామని పునరుద్ఘాటించిన ఎమ్మెల్యే, కూటమి ప్రభుత్వం అభివృద్ధి, సంక్షేమ లక్ష్యాలతోనే పనిచేస్తుందని తెలిపారు.

అనంతపురం జిల్లాలోని శింగనమల మండలం ఆకులేడు గ్రామ శివారులో రాత్రి దొంగలు ఒక ఏటీఎంను పగులగొట్టి, అందులోని నగదును దోచుకున్నారు. ఆ తర్వాత వారు ఆ ఏటీఎంపై పెట్రోల్ పోసి తగలబెట్టారు. కాగా, ఇదే శింగనమల మండలంలో దుండగులు మరో ఏటీఎంను పూర్తిగా ఎత్తుకెళ్లారు.

ప్రజలకు మెరుగైన తాగునీటి సేవలను అందించడమే ప్రధాన లక్ష్యంగా కమిషనర్ ఎన్. గంగిరెడ్డి గాంధీనగర్‌లో నీటి సరఫరా వ్యవస్థను క్షుణ్ణంగా పరిశీలించారు.

పాములపాడు మండలంలోని వెంపెంట గ్రామంలో శ్రీ సీతారామ లక్ష్మణ హనుమత్సమేత శిఖర ధ్వజ ప్రతిష్ట మహోత్సవం అత్యంత వైభవంగా జరిగింది. గ్రామ నాయకులు టేకురి రామసుబ్బమ్మ, టేకురి నాగేశ్వరరావు గార్ల ప్రత్యేక ఆహ్వానం మేరకు నంద్యాల పార్లమెంట్ ఇంచార్జ్ మాండ్ర శివానంద రెడ్డి ఈ కార్యక్రమానికి హాజరయ్యారు. ఆలయానికి వచ్చిన శివానంద రెడ్డికి గ్రామస్థులు, నాయకులు ఘన స్వాగతం పలికారు. అనంతరం ఆయన స్వామివార్లను దర్శించుకుని ప్రత్యేక పూజలు చేశారు. ఈ ఆధ్యాత్మిక కార్యక్రమంలో మాండ్ర శివానంద రెడ్డితో పాటు రవీంద్రా రెడ్డి (కన్వీనర్), హరినాథ్ రెడ్డి (క్లస్టర్ ఇంచార్జ్), తిమ్మారెడ్డి, లక్ష్మీ కాంతారెడ్డి, గోవిందు వంటి ప్రముఖులు, పార్టీ శ్రేణులు పాల్గొన్నారు. వీరితో పాటు మండల స్థాయి నాయకులు, కార్యకర్తలు, పెద్ద సంఖ్యలో భక్తులు పాల్గొని ప్రతిష్టోత్సవ కార్యక్రమాన్ని విజయవంతం చేశారు.

చిత్తూరు రైల్వేస్టేషన్‌లో ఒక ప్రయాణికుడిపై చెప్పుతో దాడి చేసిన ఘటనలో గుంతకల్లు రైల్వే డివిజన్‌లో కమర్షియల్ విభాగం RS-2/CTO హోదాలో పనిచేస్తున్న కె. జ్యోతిని సస్పెండ్ చేశారు. ఈ సంఘటన ఆలస్యంగా వెలుగులోకి వచ్చినప్పటికీ, సమాచారం అందిన వెంటనే ఆమెపై చర్యలకు ఉపక్రమించారు. దక్షిణ తీర రైల్వే ప్రధాన కమర్షియల్ కంట్రోలర్ జూన్ 14న ఈ సస్పెన్షన్ ఉత్తర్వులను జారీ చేశారు. తదుపరి ఆదేశాలు వెలువడే వరకు విధులు, వేతనం నుంచి ఆమె సస్పెన్షన్ కొనసాగుతుందని ఆ ఉత్తర్వుల్లో పేర్కొన్నారు.

తెలంగాణ రాజన్న సిరిసిల్ల జిల్లాకు చెందిన ప్రముఖ చేనేత కళాకారుడు, ‘చేనేత కళా రత్న’ అవార్డు గ్రహీత నల్ల విజయ్ కుమార్ మంగళవారం నాడు ఇంద్రకీలాద్రిపై కొలువైన శ్రీ దుర్గా మల్లేశ్వర స్వామి వార్ల దేవస్థానాన్ని సందర్శించారు. తన తండ్రి, ప్రముఖ చేనేత శిల్పి అవార్డు గ్రహీత స్వర్గీయ నల్ల పరంధాములు గారి స్ఫూర్తితో, వారి అడుగుజాడల్లో నడుస్తూ తాను ప్రత్యేకంగా నేసిన అత్యంత విలక్షణమైన పట్టుచీరను శ్రీ కనకదుర్గఅమ్మవారికి అలంకరణ చేయవలసినదిగా ఆలయ ఈవో వికె శీనా నాయక్ కు ఆయన అందజేశారు. ‘అగ్గిపెట్టెలో పట్టే పట్టుచీర’గా చేనేత రంగానికే మచ్చుతునకగా నిలిచిన ఈ కళాఖండాన్ని విజయ్ కుమార్ వారం రోజుల పాటు రాత్రింబవళ్లు శ్రమించి మగ్గంపై అద్భుతంగా మలిచారు. ఈ పట్టుచీర పొడవు 5.5 మీటర్లు, వెడల్పు 48 ఇంచులు ఉంటుంది. ఇంత పెద్ద పరిమాణం ఉన్నప్పటికీ, దీని బరువు కేవలం 200 గ్రాములు మాత్రమే కావడం విశేషం. సాంప్రదాయ, ఆకర్షణీయమైన ‘ఇక్కత్ డిజైన్’ వచ్చేలా అత్యంత నైపుణ్యంతో రూపొందించిన ఈ చీరను మడతపెడితే సులభంగా ఒక చిన్న అగ్గిపెట్టెలో ఇమిడిపోతుంది. ఈ సందర్భంగా చేనేత కళాకారుడు నల్ల విజయ్ కుమార్ మాట్లాడుతూ, గతంలో తాను తయారు చేసిన ప్రతి సరికొత్త చేనేత సృష్టికి ఇంద్రకీలాద్రి అమ్మవారి ఆశీస్సులు లభించాయని తెలిపారు. ఎల్లప్పుడూ దుర్గమ్మ తల్లి దీవెనలు తమపై ఉండాలని కోరుకుంటూ ఈ సరికొత్త పట్టుచీరను సమర్పించి, అమ్మవారి కృపకు పాత్రులం కావడం ఎంతో సంతోషంగా ఉందని పేర్కొన్నారు. గతంలో ‘ఆపరేషన్ సింధు’ పేరిట అద్భుతమైన శాలువను తయారు చేసి భారత ప్రధాని శ్రీ నరేంద్ర మోడీ గారికి అందించి, వారి చేతుల మీదుగా ఘనమైన ప్రశంసలు పొందిన స్ఫూర్తితోనే, చేనేత కళా నైపుణ్యాన్ని చాటుతూ ఈ చీరను రూపొందించినట్లు వివరించారు. అమ్మవారికి సమర్పించిన ఈ అద్భుతమైన చేనేత కళాఖండాన్ని ఆలయ ఈవో శీనానాయక్ పరిశీలించి, అసాధారణ ప్రతిభ చూపిన చేనేత కళాకారుణ్ణి ప్రశంసించారు. కేంద్ర, రాష్ట్ర ప్రభుత్వాలు ప్రోత్సాహిస్తున్న రీతిగా మన సంప్రదాయ కళలను ప్రతి ఒక్కరూ ఆదరించాలని శీనానాయక్ ఈ సందర్భంగా కోరారు.

నంద్యాల జిల్లాలోని మహానంది ఈశ్వర్ నగర్ ఎస్సీ కాలనీలో గత కొద్ది రోజులుగా వీధి దీపాలు వెలగకపోవడంతో స్థానికులు తీవ్ర భయాందోళనకు గురవుతున్నారు. అటవీ ప్రాంతంలో ఉన్న ఈ కాలనీలో రాత్రి వేళల్లో చిమ్మ చీకటి అలుముకోవడంతో, పిల్లలు, పెద్దలు ఎవరూ బయటకు రావాలంటేనే భయపడుతున్నారని కాలనీవాసులు ఆవేదన వ్యక్తం చేస్తున్నారు. గతంలో అడవి జంతువులు జనావాసంలోకి ప్రవేశించి ప్రజలను భయభ్రాంతులకు గురిచేసిన సంఘటనలను అధికారులు గుర్తుంచుకోవాలని వారు కోరుతున్నారు. ఇప్పటికైనా సంబంధిత అధికారులు వెంటనే స్పందించి వీధి దీపాలు త్వరగా వెలిగేలా చర్యలు తీసుకోవాలని కాలనీవాసులు విజ్ఞప్తి చేస్తున్నారు.

అనంతపురం జిల్లాలోని కళ్యాణదుర్గం పట్టణంలో ఉన్న నగరవనాన్ని త్వరలో ప్రజలకు అందుబాటులోకి తీసుకువచ్చేందుకు చర్యలు తీసుకుంటామని జిల్లా కలెక్టర్ ఓ. ఆనంద్ తెలిపారు. స్థానిక ఎమ్మెల్యే అమిలినేని సురేంద్ర బాబుతో కలిసి జిల్లా కలెక్టర్ ఓ. ఆనంద్ పట్టణంలోని నగరవనాన్ని సందర్శించారు. ఈ సందర్శనలో భాగంగా, వారు నగరవనంలోని పక్షుల కేంద్రాన్ని, చిన్నపిల్లల ఆటస్థలం, చిన్న కాటేజీలను పరిశీలించారు. అనంతరం హిల్ వ్యూ పాయింట్ వద్దకు వెళ్లి అక్కడి పరిసరాలను వీక్షించిన కలెక్టర్, నగరవనం చాలా బాగుందని సంతోషం వ్యక్తం చేశారు.