ભરૂચ જિલ્લાના 77મા પ્રજાસત્તાક દિનની જિલ્લા કક્ષાની ઉજવણી આ વર્ષે આમોદ ખાતે યોજાવાની હોવાથી વહીવટી તંત્ર દ્વારા તમામ તૈયારીને અંતિમ સ્પર્શ આપવામાં આવી રહ્યો છે. કાર્યક્રમને સુવ્યવસ્થિત અને ભવ્ય બનાવવા માટે આજે આમોદ સ્થિત રેવા સુગરના મેદાનમાં વ્યાપક રિહર્સલ યોજાયું હતું. આ આયોજનબદ્ધ રિહર્સલમાં જિલ્લા પ્રશાસનના ઉચ્ચ અધિકારીઓ હાજર રહ્યા હતા. જિલ્લામાંથી પસંદ કરાયેલી વિવિધ શાળાઓના વિદ્યાર્થીઓએ ઉત્સાહ, શિસ્ત અને સમર્પણ સાથે ભાગ લઈ દેશભક્તિનો માહોલ સર્જ્યો હતો. વિદ્યાર્થીઓની હાજરીથી સમગ્ર મેદાન ઉર્જા અને ઉત્સાહથી ગુંજી ઉઠ્યું હતું. આ સાથે જિલ્લા પોલીસ દળ દ્વારા પરેડની સુવ્યવસ્થિત રિહર્સલ કરવામાં આવી, જેમાં શિસ્ત, સુરક્ષા અને સંકલનની ઝલક જોવા મળી હતી. સુરક્ષા વ્યવસ્થાના ભાગરૂપે ભરૂચ જિલ્લા પોલીસના ડોગ સ્ક્વોડ દ્વારા વિશેષ ડેમો રજૂ કરવામાં આવ્યો હતો. પ્રશિક્ષિત શ્વાન ‘સિલ્કી’ દ્વારા કરવામાં આવેલી કામગીરીએ સૌનું ધ્યાન આકર્ષ્યું અને સુરક્ષા વ્યવસ્થાની મજબૂતી સ્પષ્ટ કરી હતી. રીહર્સલ દરમિયાન રાષ્ટ્રગીતના ગુંજનથી સમગ્ર રેવા સુગર મેદાન દેશભક્તિના રંગે રંગાઈ ગયું હતું, જેને કારણે હાજર તમામમાં ગૌરવ અને ઉત્સાહની લાગણી પ્રસરી ગઈ હતી. આ પ્રસંગે ભરૂચ જિલ્લા કલેક્ટર ગૌરાંગ મકવાણા, પ્રાંત અધિકારી, આમોદ-જંબુસરના મામલતદાર, નાયબ કાર્યપાલક ઇજનેર રોનકભાઈ શાહ, તાલુકા વિકાસ અધિકારી તેમજ ડી.વાય.એસ.પી. બી.એલ. ચૌધરી સહિત અનેક જિલ્લા કક્ષાના અધિકારીઓ ઉપસ્થિત રહ્યા હતા. આ રિહર્સલથી સ્પષ્ટ થાય છે કે આમોદમાં યોજાનાર જિલ્લા કક્ષાનો પ્રજાસત્તાક દિનનો કાર્યક્રમ ભવ્ય અને સફળ બનાવવા વહીવટી તંત્ર દરેક રીતે સંપૂર્ણ સજ્જ છે.

Daily amod news

Journalist આમોદ, ભરૂચ, ગુજરાત•

11 hrs ago