କଟକ ସିଡିଏ ସେକ୍ଟର-୬ରେ ଶିଶୁମାନଙ୍କ ପ୍ରାରମ୍ଭିକ ଶିକ୍ଷା କ୍ଷେତ୍ରରେ ଏକ ନୂଆ ଅଧ୍ୟାୟ ଯୋଡ଼ି ହୋଇଛି। ଅତ୍ୟାଧୁନିକ ଢଙ୍ଗରେ ପ୍ରସିଦ୍ଧ 'ବଚପନ୍ ପ୍ଲେ ସ୍କୁଲ୍' ସେଠାରେ ଉଦଘାଟିତ ହୋଇଯାଇଛି। ଏହି ଭବ୍ୟ ଉଦଘାଟନୀ ଉତ୍ସବରେ ବାରବାଟୀ-କଟକ ବିଧାୟିକା ସୋଫିଆ ଫିରଦୋଷ ମୁଖ୍ୟ ଅତିଥି ଭାବେ ଯୋଗଦେଇ ପ୍ରଦୀପ ପ୍ରଜ୍ଜ୍ୱଳନ କରିବା ସହ ସ୍କୁଲ୍‌ର ମୁଖ୍ୟଦ୍ଵାର ଉଦଘାଟନ କରିଥିଲେ।

ଗଞ୍ଜାମ ଜିଲ୍ଲା କବିସୂର୍ଯ୍ୟନଗର ଥାନା ଅନ୍ତର୍ଗତ ଗୋକୁଳପଲ୍ଲୀରେ ଥିବା ଆଇକନ ଫାର୍ମହାଉସ ମାଲିକଙ୍କୁ ବନ୍ଧୁକ ଦେଖାଇ ଲୁଟ୍ ଘଟଣାରେ ପୋଲିସ ସାତ ଜଣ ଅଭିଯୁକ୍ତଙ୍କୁ ଗିରଫ କରିଛି। ଗିରଫ ହୋଇଥିବା ଅଭିଯୁକ୍ତମାନେ ହେଲେ ରୁଦ୍ର ନାରାୟଣ ସେଠୀ, ଶୁଭମ ରାଉତ, ଜିତେନ୍ଦ୍ର ଖଟେଇ, ଦୂତିକୃଷ୍ଣ ନାୟକ, ମନୋରଞ୍ଜନ ଗୌଡ଼, ସନ୍ତୋଷ ମହାପାତ୍ର ଏବଂ ରାଜୀବ କୁମାର ଦାସ। ଏହି ଅଭିଯୁକ୍ତମାନଙ୍କ ଠାରୁ ଲୁଟ୍ ହୋଇଥିବା ସୁନା ଓ ରୂପା ଅଳଙ୍କାର, ନଗଦ ୧୨,୫୦୦ ଟଙ୍କା, ମୋବାଇଲ ଫୋନ୍, ଦୁଇଟି ମଟରସାଇକେଲ ସମେତ ଗୋଟିଏ ଦେଶୀ ପିସ୍ତଲ ଏବଂ ତିନୋଟି ଜୀବନ୍ତ ଗୁଳି ଜବତ କରାଯାଇଛି ବୋଲି ପୁରୁଷୋତ୍ତମପୁର ଏସଡିପିଓ ସୂଚନା ଦେଇଛନ୍ତି। ପ୍ରକାଶଯୋଗ୍ୟ ଯେ ଗତ ୧୯ ତାରିଖ ରାତିରେ ଦୁର୍ବୃତ୍ତମାନେ ଆଇକନ ଫାର୍ମହାଉସରେ ପଶି ମାଲିକ ରଜନୀକାନ୍ତ ମିଶ୍ର ଓ ତାଙ୍କ ସ୍ତ୍ରୀଙ୍କୁ ବନ୍ଧୁକ ଦେଖାଇ ହାତଗୋଡ଼ ବାନ୍ଧି ଦେଇଥିଲେ। ସେମାନେ ୧୫ ତୋଳା ସୁନା, ୧୨ ହଜାର ଟଙ୍କା ଏବଂ ଦୁଇଟି ମୋବାଇଲ ଫୋନ୍ ଲୁଟି ନେଇ ଘଟଣାସ୍ଥଳରୁ ଫେରାର ହୋଇଯାଇଥିଲେ। ଥାନାରେ ଅଭିଯୋଗ ହେବା ପରେ କବିସୂର୍ଯ୍ୟନଗର ପୋଲିସ ଘଟଣାକୁ ଗୁରୁତ୍ୱର ସହ ନେଇ ତଦନ୍ତ କରିଥିଲା ଏବଂ ଏହି ଲୁଟ୍ ଘଟଣାରେ ସମ୍ପୃକ୍ତ ଥିବା ସାତ ଜଣ ଅଭିଯୁକ୍ତଙ୍କୁ ଗିରଫ କରିବାରେ ସଫଳ ହୋଇଛି।

୨୧.୦୬.୨୦୨୬ ରେ ବ୍ରହ୍ମପୁରର ଅଙ୍କୁଳି ସ୍ଥିତ ଶ୍ରୀହରି ନଗରର ଶ୍ରୀ ଲେଡିଜ୍ ଗ୍ରୁପ୍ ପକ୍ଷରୁ ହରିହର କଲ୍ୟାଣ ମଣ୍ଡପ ପରିସରରେ ୧୨ତମ ଆନ୍ତର୍ଜାତୀୟ ଯୋଗ ଦିବସ ପାଳନ କରାଯାଇଛି। ଚଳିତ ବର୍ଷର ଏହି କାର୍ଯ୍ୟକ୍ରମର ବିଷୟବସ୍ତୁ ଥିଲା “ସୁସ୍ଥ ବୃଦ୍ଧାବସ୍ଥା ପାଇଁ ଯୋଗ”।

ଡାରିଙ୍ଗବାଡ଼ି ଅଧୀନରେ ଥିବା କିରିକୁଟି ପଞ୍ଚାୟତରେ ଏକ କୃଷକ ବୈଠକ ଅନୁଷ୍ଠିତ ହୋଇଛି।

ପ୍ରଧାନମନ୍ତ୍ରୀଙ୍କ ଓଡିଶା ଗସ୍ତକୁ ବିରୋଧ କରି ମହିଳା କଂଗ୍ରେସ ପକ୍ଷରୁ ରାଜ୍ୟରେ ପ୍ରତିବାଦ କରାଯାଇଛି।

ଆନ୍ଧ୍ର ପ୍ରଦେଶର ଶ୍ରୀକାକୁଲମ ଜିଲ୍ଲାର ପାଟପାଟନମରୁ ସଂଗୃହିତ ବିଷାକ୍ତ ମଇଳା ଆବର୍ଜନା ପାରଳା ସହରର ମହେନ୍ଦ୍ରତାନୟା ନଦୀରେ ଲଗାତାର ଭାବେ ପକାଯାଉଛି। ଏହି କାର୍ଯ୍ୟକଳାପ ଯୋଗୁଁ ପରିବେଶ ଦୂଷିତ ହେବା ସହ ସେହି ଅଞ୍ଚଳରେ ବସବାସ କରୁଥିବା ଲୋକେ ରୋଗଗ୍ରସ୍ତ ହେଉଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ଏହି ପରିସ୍ଥିତିକୁ ଆଜି ମାନ୍ୟବର ପାରଳା ବିଧାୟକ ରୂପେଶ ପାଣିଗ୍ରାହୀ ଅନୁଧ୍ୟାନ କରିଛନ୍ତି। ବିଧାୟକ ରୂପେଶ ପାଣିଗ୍ରାହୀ ତୁରନ୍ତ ଫୋନ୍ ମାଧ୍ୟମରେ ଆନ୍ଧ୍ର ପ୍ରଦେଶ ଶ୍ରୀକାକୁଲମ ଜିଲ୍ଲାର ପ୍ରଶାସନିକ ଅଧିକାରୀଙ୍କୁ ଏହାର ପଦକ୍ଷେପ ନେବାକୁ ଉପଦେଶ ଦେଇଛନ୍ତି। ଏହା ସହିତ, ସେ ପାରଳା ପୌର ପରିଷଦ ନିର୍ବାହୀ ଅଧିକାରୀ ଏବଂ ପୌର ଅଧ୍ୟକ୍ଷାଙ୍କୁ ମଧ୍ୟ ଏହି ଅଞ୍ଚଳର ଉନ୍ନତିକରଣ ତୁରନ୍ତ କରିବାକୁ ନିବେଦନ କରିଛନ୍ତି। ଉଲ୍ଲେଖଯୋଗ୍ୟ ଯେ, ୧୯୩୬ ମସିହାରେ ଓଡ଼ିଶା ଏକ ସ୍ୱତନ୍ତ୍ର ରାଜ୍ୟ ପାହ୍ୟା ପାଇବା ପୂର୍ବରୁ ଓଡ଼ିଶା ଉପରେ ଆନ୍ଧ୍ରର ଲୋଲୁପ ଦୃଷ୍ଟି ରହିଥିଲା। ଓଡ଼ିଶା-ଆନ୍ଧ୍ର ସୀମାରେ ଥିବା କୋଟିଆ ଠାରୁ ଆରମ୍ଭ କରି ଗଜପତି ଜିଲ୍ଲାର ମାଣିକପୁର ଗ୍ରାମକୁ ନିଜ ଅକ୍ତିଆରକୁ ନେବାକୁ ଆନ୍ଧ୍ର ସରକାର ଅଦ୍ୟାବଧି ଚେଷ୍ଟା କରି ବିଫଳ ହୋଇଆସୁଛି। ବର୍ତ୍ତମାନ ଆନ୍ଧ୍ର ଏତେ ତଳକୁ ଖସିଯାଇଛି ଯେ ସୀମାନ୍ତ ଅଞ୍ଚଳରେ ବିଷାକ୍ତ ମଇଳା ଫିଙ୍ଗି ପରିବେଶ ଦୂଷିତ କରୁଛି।

ଆଜି ସାରା ବିଶ୍ୱରେ ୧୨ତମ ଆନ୍ତର୍ଜାତିୟ ଯୋଗ ଦିବସ ପାଳିତ ହେଉଛି। ଏହି ଅବସରରେ ବିଶ୍ୱର ବିଭିନ୍ନ ବଡ଼ ବଡ଼ ଦେଶରେ ଯୋଗାଭ୍ୟାସ କାର୍ଯ୍ୟକ୍ରମ ମାଧ୍ୟମରେ ଯୋଗର ମହତ୍ତ୍ୱ ଓ ଉପକାରିତା ସମ୍ପର୍କରେ ସଚେତନତା ସୃଷ୍ଟି କରାଯାଉଛି। ବିଶେଷଜ୍ଞମାନେ ମତ ପ୍ରକାଶ କରୁଛନ୍ତି ଯେ ଯୋଗ ଦ୍ୱାରା ଶାରୀରିକ ସୁସ୍ଥତା, ମାନସିକ ସନ୍ତୁଳନ ଏବଂ ନିରୋଗ ଜୀବନଶୈଳୀ ଗଠନ ସମ୍ଭବ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଆହ୍ୱାନ ଏବଂ ଯୋଗ ପ୍ରତି ତାଙ୍କର ପ୍ରୋତ୍ସାହନ ଫଳରେ ଯୋଗ ଦିବସ ଆଜି ଏକ ବିଶ୍ୱବ୍ୟାପୀ ଜନଆନ୍ଦୋଳନର ରୂପ ନେଇଛି। ଏହି ଆନ୍ତର୍ଜାତିୟ ଯୋଗ ଦିବସ ଅବସରରେ ଖୋର୍ଦ୍ଧା ଜିଲ୍ଲାର ଜଂକିଆ ଥାନା ଅନ୍ତର୍ଗତ ସରପାରୀ ଗ୍ରାମର ସମାଜସେବୀ ସୁଦାମ ଚରଣ ସାହୁ ଏକ ନିଆରା ଉପାୟରେ ଏହି ଦିବସ ପାଳନ କରିଛନ୍ତି। ସେ ମନ୍ଦାକିନୀ ନଦୀ ମଧ୍ୟରେ 'ଜଳଯୋଗ' ପ୍ରଦର୍ଶନ କରି ଯୋଗର ଗୁରୁତ୍ୱ ସମ୍ପର୍କରେ ବିଶ୍ୱବାସୀଙ୍କୁ ସଚେତନତାର ବାର୍ତ୍ତା ଦେଇଛନ୍ତି। ସେ ଯୋଗକୁ ଦୈନନ୍ଦିନ ଜୀବନର ଏକ ଅଂଶ ଭାବେ ଗ୍ରହଣ କରି ସୁସ୍ଥ ଓ ସମୃଦ୍ଧ ସମାଜ ଗଠନ ପାଇଁ ଆହ୍ୱାନ ଜଣାଇଛନ୍ତି। ଏହାସହ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଆନ୍ତର୍ଜାତିୟ ଯୋଗ ଦିବସ ଅବସରରେ ଶୁଭେଚ୍ଛା ଜଣାଇଛନ୍ତି। ସମାଜସେବୀ ସୁଦାମ ଚରଣ ସାହୁଙ୍କ ଏହି ନିଆରା ପଦକ୍ଷେପ ସ୍ଥାନୀୟ ଅଞ୍ଚଳରେ ବେଶ୍ ପ୍ରଶଂସା ସାଉଁଟିଛି ଏବଂ ଏହା ଯୋଗ ପ୍ରତି ସାଧାରଣ ଲୋକଙ୍କ ଆଗ୍ରହ ବୃଦ୍ଧି କରିବ ବୋଲି ଆଶା କରାଯାଉଛି।

ଗଜପତି ଜିଲ୍ଲାର ଗୁମ୍ମା ବ୍ଲକରେ କନିଷ୍ଠ ଯନ୍ତ୍ରୀ ମହେଶ୍ୱର ମାରାଣ୍ଡି ଡୁମ୍ବାଡା ପଞ୍ଚାୟତର ପ୍ରକଳ୍ପଗୁଡ଼ିକ ପାଇଁ ପନ୍ଦର ଲକ୍ଷରୁ ଉର୍ଦ୍ଧ୍ବ ଟଙ୍କାର ବିଲ୍‌ କରି ଦୀର୍ଘ ଦିନ ଧରି ଛୁଟିରେ ରହିଛନ୍ତି। ପୂର୍ବରୁ ଏହି ବିଷୟରେ ଜନ ପ୍ରତିନିଧି ଏବଂ ଅଞ୍ଚଳବାସୀ ଗୁମ୍ମା ଗୋଷ୍ଠୀ ଉନ୍ନୟନ ଅଧିକାରୀ ତଥା ଗଜପତିର ଏଡିଏମ୍‌ଙ୍କ ଦ୍ୱାରସ୍ଥ ହୋଇ ସମସ୍ୟା ସମ୍ପର୍କରେ ଜଣାଇଥିଲେ। ଏଡିଏମ୍‌ ଦେଢ଼ ମାସ ମଧ୍ୟରେ ସମସ୍ୟା ସମାଧାନ କରିବାକୁ ପ୍ରତିଶ୍ରୁତି ଦେଇଥିଲେ, କିନ୍ତୁ ୫୦ ଦିନରୁ ଉର୍ଦ୍ଧ୍ବ ଦିନ ବିତି ଯାଇଥିଲେ ମଧ୍ୟ ସମାଧାନ ହୋଇପାରି ନାହିଁ। ଏହି ଅସମାହିତ ସମସ୍ୟା ଯୋଗୁଁ ମ୍ୟାଟେରିଆଲ୍‌ ସପ୍ଲାୟର୍ସ ଏବଂ ଶ୍ରମିକମାନେ ସେମାନଙ୍କର ପାଉଣା ପାଇପାରି ନାହାନ୍ତି। ଏହି କାରଣରୁ କାମ କରାଇଥିବା ବ୍ୟକ୍ତିମାନେ ଭୟ ଏବଂ ଆଶଙ୍କାରେ ଦିନ କାଟୁଛନ୍ତି। ଡୁମ୍ବାଡା ସମିତି ସଭ୍ୟ ଦୁମନ୍‌ ଗମାଙ୍ଗ ଏହି ବିଷୟରେ ବିଧାୟକ ରୂପେଶ ପାଣିଗ୍ରାହୀଙ୍କୁ ଅବଗତ କରାଇଛନ୍ତି, ଯିଏ ମଧ୍ୟ ଘଟଣାର ସମାଧାନ ପାଇଁ ପ୍ରତିଶ୍ରୁତି ଦେଇଛନ୍ତି।

ଚନ୍ଦ୍ରଗିରି ଅଞ୍ଚଳରେ ଦୁଇଟି ବାଇକ ମୁହାଁମୁହିଁ ଧକ୍କା ହୋଇଛି। ଏହି ଦୁର୍ଘଟଣାରେ ଦୁଇ ଜଣ ଗୁରୁତର ଆହତ ହୋଇଛନ୍ତି। ପ୍ରାଥମିକ ଚିକିତ୍ସା ପାଇଁ ଆହତମାନଙ୍କୁ ଚନ୍ଦ୍ରଗିରି ମେଡିକାଲରେ ଭର୍ତ୍ତି କରାଯାଇଥିଲା। ତେବେ, ସେମାନଙ୍କ ଅବସ୍ଥା ଗୁରୁତର ଥିବାରୁ ସେଠାରୁ ବ୍ରହ୍ମପୁର ସ୍ଥାନାନ୍ତର କରାଯାଇଛି।