ରାସ୍ତା କାମକୁ ନେଇ ଦୁଇ ଯୁବକଙ୍କ ଉପରେ ଦିବାଲୋକରେ ହୋଇଥିବା ସଂଘବଦ୍ଧ ଆକ୍ରମଣ ଘଟଣାରେ ଏବେ ଆଉ ଏକ ନୂଆ ତଥ୍ୟ ସାମ୍ନାକୁ ଆସିଛି। ଏହି ସଂଘବଦ୍ଧ ଆକ୍ରମଣର ମାଷ୍ଟରମାଇଣ୍ଡ ଥିବା ଠିକାଦାର ରଞ୍ଜନ ପାତ୍ରଙ୍କ ଗୁଣ୍ଡାଗିରି ଚରମସୀମାରେ ପହଞ୍ଚିଛି ବୋଲି ଅଭିଯୋଗ ହୋଇଛି। ତାଙ୍କ ଉପରେ ଅଭିଯୋଗ ରହିଛି ଯେ, ସେ ଏକ ଘରେ ପଶି ଜଣେ ମହିଳାଙ୍କ ପ୍ରତି ଅଶାଳୀନ ବ୍ୟବହାର କରିବା ସହ ତାଙ୍କ ପୁଅର ଜୀବନ ନେବାକୁ ଧମକ ଦେଇଛନ୍ତି। ଏହି ଘଟଣାକୁ ନେଇ ପୀଡ଼ିତା ମହିଳା ଜଣଙ୍କ ପକ୍ଷରୁ ଅଭିଯୋଗ ଦାୟର କରାଯାଇଛି।

ମୟୁରଭଞ୍ଜ ଜିଲ୍ଲା କପ୍ତିପଦା ବ୍ଲକ ଜଡିଦା ଗ୍ରାମପଞ୍ଚାୟତର ପଥରଖଣି ଗ୍ରାମରେ ଏକ ପରିବାର ତିନି ବର୍ଷ ପୂର୍ବେ ଖ୍ରୀଷ୍ଟିଆନ ଧର୍ମ ଗ୍ରହଣ କରିବା ପରେ ପୁଣି ନିଜ ମୂଳ ଧର୍ମକୁ ଫେରିଥିବା ଘଟଣା ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି। ଗ୍ରାମବାସୀଙ୍କ ସୂଚନା ଅନୁଯାୟୀ, ଭାଟୁ ମାରାଣ୍ଡି, ବାଲି ମାରାଣ୍ଡି, ପିରୁ ମାରାଣ୍ଡି ଏବଂ ଆରତୀ ମାରାଣ୍ଡିଙ୍କ ପରିବାର ପ୍ରାୟ ତିନି ବର୍ଷ ତଳେ ବିଭିନ୍ନ ରୋଗରେ ପୀଡିତ ଥିଲେ। ସେହି ସମୟରେ କିଛି ବ୍ୟକ୍ତି ସେମାନଙ୍କ ସହ ସଂପର୍କ ସ୍ଥାପନ କରି ଧର୍ମ ପରିବର୍ତ୍ତନ କଲେ ରୋଗ ଭଲ ହେବ ଓ ଜୀବନର ସମସ୍ୟା ଦୂର ହେବ ବୋଲି ପ୍ରଲୋଭନ ଦେଇଥିବା ଅଭିଯୋଗ ହୋଇଥିଲା। ଏହାପରେ ପରିବାରଟି ଖ୍ରୀଷ୍ଟିଆନ ଧର୍ମ ଗ୍ରହଣ କରିଥିଲା। ତେବେ ତିନି ବର୍ଷ ପରେ ମଧ୍ୟ ସେମାନଙ୍କ ଅବସ୍ଥାରେ କୌଣସି ସୁଧାର ନ ଆସିବାରୁ ସେମାନେ ନିଜ ଭୁଲ ବୁଝିପାରି ପୁଣି ନିଜ ପୂର୍ବ ଧର୍ମକୁ ଫେରିବା ପାଇଁ ଗ୍ରାମର ମୁଖିଆ ଓ ବରିଷ୍ଠମାନଙ୍କ ସହ ଆଲୋଚନା କରିଥିଲେ। ଗ୍ରାମର ପାରମ୍ପରିକ ବିଧି ଅନୁଯାୟୀ, ସମାଜରେ ପୁଣି ସ୍ୱୀକୃତି ପାଇବା ପାଇଁ ପରିବାରକୁ ତିନି ହାଣ୍ଡି ହାଣ୍ଡିଆ, ପାଞ୍ଚଟି କୁକୁଡ଼ା ଓ ଗୋଟିଏ ଛେଳି ଦେଇ ଭୋଜିଭାତ କରାଇବାକୁ ପଡ଼ିଥିଲା। ପରେ ଗ୍ରାମର ବୃଦ୍ଧ ଓ ସମାଜର ମୁଖ୍ୟମାନେ ପାରମ୍ପରିକ ରୀତିନୀତି ପାଳନ କରି ପରିବାରକୁ ପୁଣି ସମାଜରେ ସାମିଲ କରିଥିଲେ। ସମାଜସେବୀ ବିଜୁ ହେମ୍ବ୍ରମ ହସ୍ଦା ଏବଂ ଜଗଦିଶ ମୁର୍ମୁ ଏହି ପ୍ରସଙ୍ଗରେ କହିଛନ୍ତି ଯେ ଗ୍ରାମାଞ୍ଚଳର ଆଦିବାସୀ ଓ ସରଳ ଲୋକଙ୍କ ମଧ୍ୟରେ ସଚେତନତାର ଅଭାବ କାରଣରୁ ସେମାନେ ସହଜରେ ପ୍ରଲୋଭନରେ ପଡ଼ୁଛନ୍ତି। ସରକାର ଏନେଇ ଲୋକମାନଙ୍କୁ ଅଧିକ ସଚେତନ କରିବା ଆବଶ୍ୟକ ବୋଲି ସେମାନେ ମତ ଦେଇଛନ୍ତି। ଏହି ଘଟଣାକୁ କେହି ଗ୍ରାମୀଣ ପରମ୍ପରା ଓ ଆସ୍ଥାର ପ୍ରତିଫଳନ ବୋଲି ବର୍ଣ୍ଣନା କରିଥିବାବେଳେ, ଆଉ କେହି ଏହାକୁ ଧାର୍ମିକ ପ୍ରଭାବ ଓ ସାମାଜିକ ପରିବର୍ତ୍ତନ ସହ ଜଡିତ ଏକ ସମ୍ବେଦନଶୀଳ ପ୍ରସଙ୍ଗ ବୋଲି ମତ ଦେଇଛନ୍ତି।

ମୁଣ୍ଡାରୀ ଭାଷା, ସଂସ୍କୃତି ଏବଂ କଳାର ପ୍ରଚାର ପ୍ରସାର ଲକ୍ଷ୍ୟରେ ୨୪ ମେ ୨୦୨୬ ରେ ତୃତୀୟ ମୁଣ୍ଡାରୀ ଗ୍ରାଣ୍ଡ ଆୱାର୍ଡ ସେରିମନି-୨୦୨୬ ଆୟୋଜିତ ହୋଇଯାଇଛି। ମୁଣ୍ଡାରୀ ଯୁବକ, ପ୍ରୋଡ୍ୟୁସର ଏବଂ ଆର୍ଟିଷ୍ଟ ଆସୋସିଏସନ (MYPAA) ଆନୁକୂଲ୍ୟରେ ଏହି ମେଗା କାର୍ଯ୍ୟକ୍ରମରେ ଓଡ଼ିଶା, ଝାଡ଼ଖଣ୍ଡ ଏବଂ ପଶ୍ଚିମବଙ୍ଗ ଭଳି ବିଭିନ୍ନ ପ୍ରାନ୍ତରୁ ଶତାଧିକ ମୁଣ୍ଡାରୀ କଳାକାର ଓ ସଂସ୍କୃତି ପ୍ରେମୀ ଏକାଠି ହୋଇଥିଲେ। ଆଜିର ଆଧୁନିକ ତଥା ଡିଜିଟାଲ୍ ଯୁଗରେ ନିଜର ମାତୃଭାଷା ଏବଂ ପାରମ୍ପରିକ ସଂସ୍କୃତିକୁ ବଞ୍ଚାଇ ରଖିବା ସହ ନୂତନ ପିଢ଼ି ପାଖରେ ପହଞ୍ଚାଇବା ଏହି କାର୍ଯ୍ୟକ୍ରମର ମୂଳ ଲକ୍ଷ୍ୟ। ବିଶେଷ କରି ମୁଣ୍ଡାରୀ ଭାଷାକୁ ସମ୍ବିଧାନର ଅଷ୍ଟମ ଅନୁସୂଚୀରେ ସାମିଲ କରିବା ଏବଂ ଡିଜିଟାଲ୍ ମାଧ୍ୟମରେ ନିଜ ପରମ୍ପରାକୁ ଆଗକୁ ନେବା ପାଇଁ ଏହା ଏକ ଶକ୍ତ ମାଧ୍ୟମ ସାଜିଛି। ସ୍ଥାନୀୟ ସହିଦ ସ୍ମୃତି ଭବନ ଠାରେ ମୁଣ୍ଡାରୀ ସମ୍ପ୍ରଦାୟର ଯୁବ ନେତା ମଙ୍ଗଲ ସିଂହଙ୍କ ନେତୃତ୍ୱରେ ଆୟୋଜିତ ଏହି ଭବ୍ୟ ସମାରୋହରେ, ମୁଣ୍ଡାରୀ ଚଳଚ୍ଚିତ୍ର, ଆଲବମ୍, ୟୁଟ୍ୟୁବର୍ ଏବଂ ସୋସିଆଲ୍ ମିଡିଆ ଇନଫ୍ଲୁଏନ୍ସର, ଯେଉଁମାନେ ବର୍ଷସାରା ଭଲ କାମ କରିଛନ୍ତି, ସେମାନଙ୍କୁ ସେମାନଙ୍କର ଉଲ୍ଲେଖନୀୟ ଅବଦାନ ପାଇଁ ସମ୍ମାନିତ କରାଯାଇଛି। ସ୍ମୃତି, କଳା ଏବଂ ଐତିହ୍ୟକୁ ଉଜ୍ଜୀବିତ ରଖିବା ପାଇଁ ଏହିଭଳି ଆଞ୍ଚଳିକ ଏବଂ ଜନଜାତି କାର୍ଯ୍ୟକ୍ରମ ଏକ ମାଇଲଖୁଣ୍ଟ ସଦୃଶ। ଆଶା କରାଯାଉଛି ଯେ, ଆଗାମୀ ଦିନରେ ଏହି ପ୍ରୟାସ ମୁଣ୍ଡାରୀ ଭାଷା ଓ ସଂସ୍କୃତିକୁ ସାରା ବିଶ୍ୱ ଦରବାରରେ ଏକ ସ୍ୱତନ୍ତ୍ର ପରିଚୟ ଦେବ।

ଆଜି ରାତି ପ୍ରାୟ ୯ ଘଟିକା ସମୟରେ କରଞ୍ଜିଆ-ସହାରପଡ଼ା ମୁଖ୍ୟ ରାସ୍ତାର ପାକୁଟ୍ ସାହି ନିକଟରେ ଏକ ହାତୀପଲ ଡେରା ପକାଇଥିବା ଦେଖାଯାଇଛି। ଏହି ଖବର ମିଳିବା ପରେ ସ୍ଥାନୀୟ ଅଞ୍ଚଳରେ ଭୟ ଓ ଆତଙ୍କର ପରିସ୍ଥିତି ସୃଷ୍ଟି ହୋଇଛି। ହାତୀପଲକୁ ଦେଖିବା ପାଇଁ ସ୍ଥାନୀୟ ଲୋକଙ୍କ ଭିଡ଼ ଜମିଥିବା ବେଳେ, ସୁରକ୍ଷା ଦୃଷ୍ଟିରୁ ବନ ବିଭାଗ ପକ୍ଷରୁ ବନ କର୍ମଚାରୀମାନଙ୍କୁ ଘଟଣାସ୍ଥଳରେ ନିୟୋଜିତ କରାଯାଇଛି। ବନ ବିଭାଗ ହାତୀମାନଙ୍କ ଗତିବିଧି ଉପରେ କଡ଼ା ନଜର ରଖିବା ସହ ସ୍ଥାନୀୟ ଲୋକଙ୍କୁ ସତର୍କ ରହିବାକୁ ପରାମର୍ଶ ଦେଇଛି।

shocking incident

ବାଲେଶ୍ୱରର ଶ୍ରୀ ଗଣେଶ +2 Arts ଏବଂ Science Academy ର କଳା ବିଭାଗର ସମସ୍ତ ୨୫ ଜଣ ପରୀକ୍ଷାର୍ଥୀ ଚଳିତ ବର୍ଷର ପରୀକ୍ଷାରେ ପ୍ରଥମ ଶ୍ରେଣୀରେ ଉତ୍ତୀର୍ଣ୍ଣ ହୋଇ ଏକ ଗୌରବମୟ ସଫଳତା ହାସଲ କରିଛନ୍ତି। ସମସ୍ତ ଛାତ୍ରଛାତ୍ରୀ ପ୍ରଥମ ଶ୍ରେଣୀରେ ଉତ୍ତୀର୍ଣ୍ଣ ହେବା ସଂସ୍ଥା ପାଇଁ ଏକ ବଡ଼ ଉପଲବ୍ଧି ଅଟେ। ଏହି ସଫଳତା ମଧ୍ୟରେ, FM କଲେଜର ଛାତ୍ରୀ ଦୀପ୍ତିମୟୀ ଦାସ ୬୦୦ ମାର୍କରୁ ୫୬୩ ନମ୍ବର ରଖି ସଂସ୍ଥାର ଗୌରବ ବୃଦ୍ଧି କରିଛନ୍ତି। ଏହାବ୍ୟତୀତ, ୧୫ ଜଣ ଛାତ୍ରଛାତ୍ରୀ ୫୦୦ ରୁ ଅଧିକ ମାର୍କ ରଖିଥିବା ବେଳେ ୫ ଜଣ A1 ଗ୍ରେଡ୍‌ରେ ସ୍ଥାନ ପାଇଛନ୍ତି। ଏହି ଅଦ୍ଭୁତପୂର୍ବ ସଫଳତା ପାଇଁ ସଂସ୍ଥାର Director ଶ୍ରୀ କୌଶିକ ପ୍ରଧାନ, ସହ ସାଥୀ ଶ୍ରୀ ସୁଦୀପ୍ତ ସାହୁ, ଶ୍ରୀ ଶଶିକାନ୍ତ ପ୍ରଧାନ, ଶ୍ରୀ ଗୁପାଳ କୃଷ୍ଣ ବାଗ ଏବଂ ଅନ୍ୟାନ୍ୟ କର୍ମକର୍ତ୍ତା ଛାତ୍ରଛାତ୍ରୀଙ୍କୁ ଶୁଭେଚ୍ଛା ଜଣାଇଥିଲେ। ସେହିପରି, ଶିକ୍ଷକ ଶ୍ରୀ ଲଗ୍ନଜିତ ପଣ୍ଡା, ଶ୍ରୀମତୀ ମୋନାଲିସା ଦାଶ, ଶ୍ରୀ ଭବଶଙ୍କର ରାଉଳ ଏବଂ ଅନ୍ୟାନ୍ୟ ଅଧ୍ୟାପକ ଅଧ୍ୟାପିକାଙ୍କ କଠୋର ପରିଶ୍ରମକୁ ମଧ୍ୟ ସମସ୍ତେ ପ୍ରଶଂସା କରିଥିଲେ। ଶେଷରେ, ସଂସ୍ଥା ପକ୍ଷରୁ କୃତୀ ଛାତ୍ରଛାତ୍ରୀଙ୍କୁ ଅଭିନନ୍ଦନ ଜଣାଇବା ସହିତ ସେମାନଙ୍କ ଉଜ୍ଜ୍ୱଳ ଭବିଷ୍ୟତ ପାଇଁ ଶୁଭକାମନା କରାଯାଇଥିଲା।

କେରୀ ଗ୍ରାମର ପ୍ରଦୀପ ଏବଂ ତାଙ୍କ ସାଥିମାନଙ୍କ ଏକ ଅଦ୍ଭୁତ କମେଡି ପ୍ରଦର୍ଶନ ଦର୍ଶକଙ୍କୁ ବେଶ୍ ମନୋରଞ୍ଜନ କରିଛି, ଯାହାକୁ ଦେଖିଲେ କେହି ହସ ରୋକିପାରିବେନି। କିନ୍ନର ଗେଟ୍‌ଅପ୍‌ରେ ଷ୍ଟେଜ୍ ଉପରେ ସେମାନେ କେବଳ ନିଜ ବେଶଭୂଷା ନୁହେଁ, ବରଂ ଅଦ୍ଭୁତ କମେଡି ଟାଇମିଂରେ ସମସ୍ତଙ୍କୁ ଚକିତ କରିଦେଇଛନ୍ତି। ଟ୍ରେଣ୍ଡିଂ ଓଡ଼ିଆ ଏବଂ ସମ୍ବଲପୁରୀ ଗୀତର ତାଳେ ତାଳେ ସେମାନଙ୍କର ନିଆରା କମେଡି ଡ୍ୟାନ୍ସ ଷ୍ଟେପ୍‌ସ ଦେଖି ଉପସ୍ଥିତ ଦର୍ଶକମାନେ ହସି ହସି ପେଟ ପୁରାଇଥିଲେ। ପ୍ରତିଟି ଅଭିନୟରେ ଗ୍ରାମୀଣ ସରଳତା ଏବଂ ମନୋରଞ୍ଜନର ଏକ ସୁନ୍ଦର ମିଶ୍ରଣ ଦେଖିବାକୁ ମିଳିଥିଲା, ଯାହା ଏକ ପ୍ରକୃତ ଧମାଲ୍ ପ୍ରଦର୍ଶନ ଥିଲା।

ବସ୍ତା ନିର୍ବାଚନ ମଣ୍ଡଳୀର ବିଜେଡି ମହିଳା ସ୍ୱାଧିକାର ପକ୍ଷରୁ ମହାମହିମ ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ବାଲିଆପାଳ ବିଡିଓ ରାଧା ରଞ୍ଜନ ଦାଶଙ୍କୁ ଏକ ସ୍ମାରକପତ୍ର ପ୍ରଦାନ କରାଯାଇଛି। ଏହି ସ୍ମାରକପତ୍ରରେ ୨୦୨୩ ମସିହାରେ ପାର୍ଲିଆମେଣ୍ଟରେ ସର୍ବସମ୍ମତି କ୍ରମେ ଗୃହିତ ହୋଇଥିବା ମହିଳା ସଂରକ୍ଷଣ ଅଧିନିୟମର ତ୍ୱରିତ କାର୍ଯ୍ୟାନ୍ୱୟନ ଉପରେ ଗୁରୁତ୍ୱ ଦିଆଯାଇଛି। ଏହା ସହିତ, ମହିଳାମାନଙ୍କ ପ୍ରତି ବଢ଼ି ଚାଲିଥିବା ନୃଶଂସ ନିର୍ଯାତନାକୁ ବନ୍ଦ କରିବା ପାଇଁ ଦୃଢ଼ ପଦକ୍ଷେପ ଗ୍ରହଣ କରିବାକୁ ମଧ୍ୟ ଦାବି କରାଯାଇଛି।

ରାସ୍ତା କାମକୁ ନେଇ ଦୁଇ ଯୁବକଙ୍କ ଉପରେ ଦିବାଲୋକରେ ହୋଇଥିବା ସଂଘବଦ୍ଧ ଆକ୍ରମଣ ଘଟଣାରେ ଏବେ ଆଉ ଏକ ନୂଆ ତଥ୍ୟ ସାମ୍ନାକୁ ଆସିଛି। ଏହି ସଂଘବଦ୍ଧ ଆକ୍ରମଣର ମାଷ୍ଟରମାଇଣ୍ଡ ଥିବା ଠିକାଦାର ରଞ୍ଜନ ପାତ୍ରଙ୍କ ଗୁଣ୍ଡାଗିରି ଚରମସୀମାରେ ପହଞ୍ଚିଛି ବୋଲି ଅଭିଯୋଗ ହୋଇଛି। ତାଙ୍କ ଉପରେ ଅଭିଯୋଗ ରହିଛି ଯେ, ସେ ଏକ ଘରେ ପଶି ଜଣେ ମହିଳାଙ୍କ ପ୍ରତି ଅଶାଳୀନ ବ୍ୟବହାର କରିବା ସହ ତାଙ୍କ ପୁଅର ଜୀବନ ନେବାକୁ ଧମକ ଦେଇଛନ୍ତି। ଏହି ଘଟଣାକୁ ନେଇ ପୀଡ଼ିତା ମହିଳା ଜଣଙ୍କ ପକ୍ଷରୁ ଅଭିଯୋଗ ଦାୟର କରାଯାଇଛି।