निज ज्येष्ठ शुद्ध नवमी, मंगळवार, २३ जून २०२६ रोजी श्रींच्या ५७व्या पालखी सोहळ्याचे आजचे श्रीमुख दर्शन झाले. हा पालखी सोहळा अकोला जिल्ह्यात पोहोचला असून, दुपारचा विसावा अकोला येथे ५ किलोमीटर अंतरावर झाला, तर रात्रीचा मुक्काम ४ किलोमीटर अंतरावर अकोला येथेच करण्यात आला. श्रींचा संपूर्ण प्रस्थान सोहळा युट्यूब माध्यमांवर पाहता येणार आहे.

शेगाव नगरपालिकेच्या कचरा संकलन गाड्यांच्या बेफाम वेगामुळे शहरातील नागरिकांना मोठा त्रास सहन करावा लागत आहे. भरधाव वेगाने धावणाऱ्या या गाड्यांमधून सुका कचरा रस्त्यावर उडून पडत असल्याने, स्वच्छ शहराच्या दाव्यालाच तडा जात असल्याचे चित्र निर्माण झाले आहे. नागरिकांच्या म्हणण्यानुसार, कचरा गाड्यांमध्ये भरलेले पुठ्ठे, कागद, प्लास्टिक पिशव्या आणि इतर हलका सुका कचरा गाडीच्या मागील बाजूने हवेत उडून रस्त्यांवर व रस्त्याच्या कडेला विखुरला जात आहे. यामुळे शहरात पुन्हा अस्वच्छता पसरत असून, धूळ आणि कचऱ्यामुळे नागरिकांच्या आरोग्यावरही नकारात्मक परिणाम होण्याची शक्यता निर्माण झाली आहे. शहर स्वच्छ ठेवण्यासाठी दररोज कचरा संकलन केले जात असताना, त्याच गाड्यांमुळे रस्त्यावर कचरा विखुरला जात असल्याने नागरिकांनी तीव्र नाराजी व्यक्त केली आहे. अनेक ठिकाणी कचरा उडाल्यानंतर तो पुन्हा उचलला जात नसल्याने परिसर अस्वच्छ दिसत असल्याची तक्रार स्थानिकांनी केली आहे. या प्रकारामुळे नागरिकांनी नगरपालिकेकडे मागणी केली आहे की, कचरा गाड्यांवर योग्य जाळी किंवा झाकण बसविण्यात यावे, तसेच चालकांना वेगावर नियंत्रण ठेवण्याच्या स्पष्ट सूचना द्याव्यात. अन्यथा, स्वच्छतेच्या नावाखाली शहरातच कचरा पसरविण्याचा प्रकार सुरू राहील, अशी संतप्त प्रतिक्रिया नागरिकांनी व्यक्त केली आहे. 'स्वच्छ शहराचा नारा एकीकडे आणि भरधाव कचरा गाड्यांमधून रस्त्यावर उडणारा कचरा दुसरीकडे; याची दखल नगरपालिकेने तातडीने घेण्याची गरज आहे,' अशी मागणी आता जोर धरू लागली आहे.

आज सायंकाळी साडेसात ते आठ वाजण्याच्या सुमारास शेगाव शहर आणि परिसरात वादळी वाऱ्यासह विजांच्या कडकडाटात पावसाने जोरदार हजेरी लावली. अनेक दिवसांपासून पावसाच्या प्रतीक्षेत असलेल्या शेतकरी आणि शेतमजुरांना या पावसामुळे मोठा दिलासा मिळाला असून सर्वत्र आनंदाचे वातावरण निर्माण झाले आहे. या दमदार पावसामुळे शेतीच्या कामांना गती मिळणार आहे, आणि उद्यापासून शेतकरी मशागत, नांगरणी तसेच पेरणीपूर्व तयारीला सुरुवात करतील. वेळेवर झालेल्या या पावसामुळे खरीप हंगामाबाबत शेतकऱ्यांच्या आशा वाढल्या असून त्यांच्या चेहऱ्यावर समाधान स्पष्टपणे दिसून येत आहे. या पावसाच्या सरींनी बळीराजाच्या आशा पुन्हा एकदा पल्लवित केल्या आहेत.

शेतकरी विकास मंचाने अकोला येथे सरसकट कर्जमाफीच्या मागणीसाठी धरणे आंदोलन केले.

एसटी महामंडळातील कर्मचाऱ्यांच्या प्रलंबित आर्थिक मागण्यांवर अद्याप निर्णय न झाल्यामुळे संयुक्त कृती समिती आक्रमक झाली आहे. अकोला येथून मिळालेल्या माहितीनुसार, समितीने २९ जूनपासून बेमुदत धरणे आंदोलन सुरू करण्याचा इशारा दिला आहे. वेतन थकबाकी, महागाई भत्ता, घरभाडे भत्ता (HRA) आणि इतरही अनेक मागण्यांसाठी एसटी कर्मचारी आता रस्त्यावर उतरणार आहेत. संयुक्त कृती समितीने आपल्या मागण्या पूर्ण होईपर्यंत हा एल्गार कायम ठेवण्याचा निर्धार केला आहे.

जळगाव (जामोद) तालुक्यात विविध घरकुल योजनांमधील हजारो लाभार्थ्यांचे प्रलंबित हप्ते अद्यापही वितरित न झाल्याने ग्रामीण भागात तीव्र नाराजीचे वातावरण आहे. या गंभीर प्रश्नावर शेतकरी आंदोलक प्रकाश विठ्ठलराव भिसे यांनी प्रशासनाला निवेदन देत तात्काळ कार्यवाहीची मागणी केली. निवेदनाद्वारे प्रधानमंत्री आवास योजना ग्रामीण, रमाई आवास योजना, शबरी आवास योजना आणि यशवंतराव चव्हाण मुक्ता वसाहत योजनेअंतर्गत मंजूर लाभार्थ्यांचे पहिला, दुसरा, तिसरा व चौथा हप्ता तात्काळ देण्याची मागणी करण्यात आली. पंचायत समिती जळगाव जामोद येथे नव्याने नियुक्त गटविकास अधिकाऱ्यांचे DSC अद्याप सक्रिय नसल्याने घरकुल निधी वितरणाची प्रक्रिया पूर्णपणे ठप्प झाली असल्याचेही निदर्शनास आणून देण्यात आले. प्रकाश भिसे यांनी प्रशासनाला स्पष्ट इशारा दिला आहे की, गरिबांच्या हक्काचे घरकुल रोखले जात असेल, तर लाभार्थी शांत बसणार नाहीत. त्यांनी तात्काळ हप्ते वितरित करण्याची मागणी केली, अन्यथा लाभार्थ्यांसह तीव्र जनआक्रोश आंदोलन उभारले जाईल. निवेदन देतेवेळी अशपाक भाई देशमुख, राजेंद्रभाऊ परिहार, कार्तिक भाऊ राऊत, विलासभाऊ दातीर, भगवान भाऊ बघे आदी नागरिक उपस्थित होते. शेतकरी आंदोलक प्रकाश विठ्ठलराव भिसे यांनी “घरकुलाचा हक्क द्या… अन्यथा रस्त्यावर उतरू!” असा निर्धार व्यक्त केला.

बुलढाणा जिल्ह्याच्या सर्वांगीण विकासाला गती देण्यासाठी मुंबईतील मंत्रालयात आज जिल्हा नियोजन समितीची एक अत्यंत महत्त्वपूर्ण बैठक पार पडली. या बैठकीत जिल्ह्याच्या प्रगतीशी संबंधित विविध विकासकामांचा सखोल आढावा घेण्यात आला. या बैठकीत जिल्हा वार्षिक योजना २०२५-२६ अंतर्गत सर्वसाधारण योजना, अनुसूचित जाती उपयोजना आणि आदिवासी घटक कार्यक्रमाच्या ३१ मार्च २०२६ अखेरच्या खर्चास अधिकृत मान्यता देण्यात आली. तसेच, जिल्हा वार्षिक योजना २०२६-२७ च्या अंमलबजावणीचा ३१ मे २०२६ पर्यंतचा मासिक प्रगती अहवाल तपासण्यात आला. यावेळी जिल्ह्यासाठी पायाभूत सुविधा, आरोग्य, शिक्षण, कृषी आणि पाणीपुरवठा यांसारख्या महत्त्वाच्या क्षेत्रांवर विशेष लक्ष केंद्रित करण्याचे निर्देश दिले गेले. उपलब्ध निधीचा पारदर्शक आणि वेळेत विनियोग करून जनकल्याणकारी योजना तळागाळापर्यंत पोहोचवण्यावर भर देण्यात आला. या उच्चस्तरीय बैठकीला मदत व पुनर्वसन मंत्री तथा बुलढाणा जिल्ह्याचे पालकमंत्री मकरंद आबा पाटील आणि वस्त्रोद्योग मंत्री तथा सह पालकमंत्री मा. संजयजी सावकारे प्रामुख्याने उपस्थित होते. जिल्ह्याचे लोकप्रतिनिधी म्हणून आमदार चैनसुखजी संचेती, आमदार संजयजी गायकवाड, आमदार सिद्धार्थजी खरात, आमदार मनोजजी कायंदे, आमदार श्वेता महाले आणि आमदार किरणजी सरनाईक यांनीही उपस्थित राहून विविध विषयांवर चर्चा केली.

रविवारी, २१ जून २०२६ रोजी शेगाव नगरी "शेगांवीचा राणा माहेरी निघाला, संगे संतमेळा भजनी रंगला..." या अभंगाच्या सुरांनी आणि "गजानन... गजानन..." च्या अखंड जयघोषाने भक्तिरसात न्हाऊन निघाली. श्री गजानन महाराज संस्थानच्या ५७ व्या पालखी सोहळ्याचे श्रीक्षेत्र पंढरपूरच्या पवित्र पायी वारीसाठी अत्यंत भक्तिमय आणि मंगलमय वातावरणात भव्य प्रस्थान झाले. निज ज्येष्ठ शुद्ध सप्तमीला सकाळी ठीक ७ वाजता हजारो भाविकांच्या उपस्थितीत श्रींची पालखी श्रीक्षेत्र शेगाव येथून विठुरायाच्या भेटीसाठी मार्गस्थ झाली. पालखी प्रस्थानाच्या वेळी टाळ-मृदंगाचा निनाद, हरिनामाचा गजर आणि भाविकांच्या डोळ्यांतील भक्तिभावाचे अश्रू यामुळे संपूर्ण परिसर आध्यात्मिक चैतन्याने भारावून गेला होता. ज्ञान, भक्ती, सेवा आणि मानवतेचा संदेश देणारी ही पवित्र पदयात्रा बुलढाणा, अकोला, वाशीम, हिंगोली, परभणी, बीड, धाराशिव आणि सोलापूर या जिल्ह्यांमधून प्रवास करणार आहे, ज्यामुळे लाखो भाविकांना भक्तीचा अनमोल संदेश मिळेल. मार्गावरील गावोगावी श्रींच्या पालखीचे उत्स्फूर्त स्वागत होऊन भक्तीचा महासागर उसळणार आहे. दि. २३ जुलै २०२६ रोजी श्रींची पालखी श्रीक्षेत्र पंढरपूर येथे पोहोचणार असून, २८ जुलैपर्यंत तेथे मुक्काम करेल. त्यानंतर २८ जुलै रोजीच पालखी परतीच्या प्रवासाला निघेल. सुमारे दोन महिन्यांच्या या पवित्र पदयात्रेनंतर दि. १९ ऑगस्ट २०२६ रोजी श्रींचे श्रीक्षेत्र शेगाव येथे भव्य, दिव्य आणि जल्लोषपूर्ण स्वागत होण्यास भाविकांमध्ये आतापासूनच मोठी उत्सुकता निर्माण झाली आहे. श्री गजानन महाराजांच्या कृपेचा आणि भक्तीच्या अखंड परंपरेचा साक्षीदार ठरणारा हा ५७ वा पालखी सोहळा पुन्हा एकदा महाराष्ट्राच्या संतपरंपरेचे वैभव अधोरेखित करत आहे.

खामगाव: शेगाव रस्त्यावरील माउली वॉटर पार्कजवळ आज सोमवारी, २२ जून २०२६ रोजी दुपारी १२:४५ वाजताच्या सुमारास कार आणि दुचाकी यांच्यात भीषण अपघात झाला. या दुर्घटनेत अकोला जिल्ह्यातील बाळापूर तालुक्यातील नवा अंदुरा येथील ५३ वर्षीय दुचाकीस्वार शिवशंकर तुळशीराम झाडे यांचा जागीच मृत्यू झाला. मृतक शिवशंकर झाडे हे त्यांच्या MH-30-N-9730 क्रमांकाच्या मोटारसायकलने शेगावहून खामगावकडे जात असताना, समोरून येणाऱ्या MH-23-AS-0090 क्रमांकाच्या पांढऱ्या रंगाच्या स्विफ्ट डिझायर कारने त्यांच्या मोटारसायकलला जोरदार समोरासमोर धडक दिली. हा अपघात इतका भीषण होता की, यात शिवशंकर झाडे यांना गंभीर दुखापत झाल्याने त्यांचा घटनास्थळीच मृत्यू झाला. या अपघातात दोन्ही वाहनांचेही मोठे नुकसान झाले आहे. अपघात घडवून कार चालकाने जखमीला कोणतीही वैद्यकीय मदत न करता किंवा अपघाताची माहिती तातडीने पोलिसांना न देता, आपले वाहन घेऊन घटनास्थळावरून पळ काढला. या प्रकरणी, मृताचे पुतणे अनिकेत नागोराव झाडे (वय २९, रा. नवा अंदुरा, ता. बाळापूर) यांनी शेगाव ग्रामीण पोलिसांत दिलेल्या तोंडी तक्रारीवरून आणि ओपीडी मेमोवरून दुपारी अज्ञात कार चालकाविरुद्ध गुन्हा दाखल करण्यात आला आहे.