వై.ఎస్.ఆర్. కడప జిల్లాలోని రాజంపేట పట్టణ పరిధిలో జిల్లా ఎస్పీ శ్రీ షెల్కే నచికేత్ విశ్వనాథ్ ఐ.పి.ఎస్. ఆదేశాల మేరకు డ్రోన్ కెమెరా నిఘా నిర్వహించారు. రాజంపేట ఎ.ఎస్పీ మనోజ్ రామనాథ్ హెగ్డే ఐ.పి.ఎస్. పర్యవేక్షణలో, రాజంపేట పట్టణ ఇన్స్పెక్టర్ బి. నాగార్జున మరియు ఎస్.ఐ వెంకటేష్ గార్లు భువనగిరి పల్లె 'Y' జంక్షన్ సమీపంలో బహిరంగ ప్రదేశాల్లో మద్యం సేవించే వారిని డ్రోన్ కెమెరా సహాయంతో గుర్తించారు. ఈ చర్యలో భాగంగా 6 మందిని అదుపులోకి తీసుకొని వారిపై కేసులు నమోదు చేశారు. అసాంఘిక కార్యకలాపాలకు పాల్పడితే చట్టపరమైన కఠిన చర్యలు తీసుకుంటామని రాజంపేట పట్టణ సి.ఐ నాగార్జున ఈ సందర్భంగా హెచ్చరించారు.

బద్వేలు నియోజకవర్గంలోని బి. కోడూరు మండల తాసిల్దార్ కార్యాలయం భూ ఆక్రమణలకు, అవినీతికి చిరునామాగా మారిందని సీపీఐ ఎంఎల్ లిబరేషన్ పార్టీ జిల్లా స్టాండింగ్ కమిటీ సభ్యులు ఎస్. చంద్రశేఖర్ తీవ్ర ఆరోపణలు చేశారు. గత తాసిల్దార్ కిషోర్ కుమార్ రెడ్డి హయాంలో మండలంలో వందల ఎకరాల ప్రభుత్వ భూములు ఆక్రమణకు గురయ్యాయని, దీనిపై తక్షణమే ఉన్నత స్థాయి విచారణ జరిపి కబ్జాదారుల చేతుల్లో ఉన్న భూములను స్వాధీనం చేసుకుని అర్హులైన పేదలకు పంచాలని డిమాండ్ చేశారు. సోమవారం ఉదయం తమ పార్టీ జిల్లా కమిటీ సభ్యులు కే. జకరయ్య, మండల కార్యదర్శి మార్క్, ఇతర బృంద సభ్యులతో కలిసి ప్రస్తుత తాసిల్దార్ రమణమ్మకు వినతిపత్రం సమర్పించారు. ఈ సందర్భంగా ఎస్. చంద్రశేఖర్ మాట్లాడుతూ, బద్వేలు-పోరుమామిళ్ల ప్రధాన రహదారికి ఇరువైపులా దప్పిలమ్మ నుండి ఐత్రం పేట వరకు ఉన్న సుమారు 200 ఎకరాల ఫ్రీహోల్డ్, ప్రభుత్వ భూములను అక్రమంగా పొంది, బినామీ పేర్లతో ఆన్‌లైన్ చేయించుకుని పండ్ల తోటలు వేసి ఫామ్‌హౌస్‌లు నిర్మించుకున్నారని ఆరోపించారు. కాసానగరం, వేమకుంట ప్రాంతాలలోని గయాల భూములను సైతం కాజేశారని పేర్కొన్నారు. రెవెన్యూ కార్యాలయానికి కూతవేటు దూరంలోనే సుమారు 20 ఎకరాలకు పైగా ఏటి పోరంబోకు భూమిని రైస్ మిల్ యజమాని బసిరెడ్డి దుగ్గిరెడ్డి ఆక్రమించి పట్టపగలే చదును చేస్తుంటే రెవెన్యూ అధికారులు కళ్ళు మూసుకున్నారా లేక కబ్జాదారులు అందించిన ముడుపుల మత్తులో మునిగి తేలుతున్నారా అని ఆయన ఘాటుగా ప్రశ్నించారు. కామకుంట గ్రామ పొలం సర్వే నంబర్లు 160, 170, 171, 202లో రిటైర్డ్ రేంజర్ ఓబుల్ రెడ్డికి 25 ఎకరాల రిజిస్టర్ భూమి ఉండగా, మరో 15 ఎకరాల ప్రభుత్వ భూమిని ఆక్రమించి కంచి వేశాడని ఆరోపించారు. అలాగే సర్వే నంబర్ 218లో 20 ఎకరాలు రాజశేఖర్ రెడ్డి, 202లో 12 ఎకరాలు తిరుపతిరెడ్డి లక్ష్మయ్య, 95, 96లో గోపవరంకు చెందిన గంగిరెడ్డి, 12, 13లో బోర్ రామ సుబ్బారెడ్డి 15 ఎకరాలు, 17లో యోగానంద రెడ్డి, మరియు మున్నెల్లి గ్రామ పొలం సర్వే నంబర్ 1641లో 18 ఎకరాల ప్రభుత్వ భూములను బినామీ పేర్లతో అక్రమంగా ఆన్‌లైన్‌లో చేయించుకొని కొంతమంది అమ్ముకుని కోట్లాది రూపాయలు సొమ్ము చేస్తున్నారని ఆయన ప్రశ్నించారు. ఈ ఆక్రమణల పరంపర అంతా గత ఇన్చార్జి తహసీల్దార్ కిషోర్ కుమార్ రెడ్డి హయాంలోనే జరిగిందని స్పష్టం చేశారు. ఈ ఆక్రమణలపై ఉన్నత స్థాయి విచారణ చేయించి, దప్పిలమ్మ నుండి ఐత్రం పేట వరకు ప్రధాన రహదారికి ఇరువైపులా ఉన్న భూములు రీ-సర్వే చేసి ప్రభుత్వ భూములను స్వాధీనం చేసుకోవాలని డిమాండ్ చేశారు. కబ్జాదారులు, వారికి సహకరించిన రెవెన్యూ సిబ్బందిపై క్రిమినల్ కేసులు నమోదు చేసి, ఆ భూములను నిజమైన అర్హులైన పేదలకు పంచాలని కోరారు. అలాగే, కాసానగరంలో మోడల్ స్కూల్‌కు కేటాయించిన 5 ఎకరాలు, వసతి గృహానికి కేటాయించిన ఎకరం స్థలంలో ఎస్సీ బాలుర భవన నిర్మాణాలకు తక్షణమే నిధులు కేటాయించి పనులు ప్రారంభించాలని డిమాండ్ చేశారు. ఉన్నతాధికారులు స్పందించి ఆక్రమణలపై ఉన్నత స్థాయి విచారణ చేపట్టి పేదలకు ఆ భూములు అందేలా చర్యలు తీసుకోవాలని, లేనిపక్షంలో పెద్ద ఎత్తున అర్హులతో కూడిన ఉద్యమ కార్యాచరణ రూపొందిస్తామని ఎస్. చంద్రశేఖర్ హెచ్చరించారు. ఈ కార్యక్రమంలో పార్టీ జిల్లా కమిటీ సభ్యులు జకరయ్య, మండల కార్యదర్శి మార్క్, మండల కమిటీ సభ్యులు వెంకట్రామయ్య, మోషే, పుల్లయ్య, బాబు, వెంకటయ్య, వెంగయ్య మరియు విప్లవ యువజన సంఘం (RYA) నాయకులు ఈశ్వర్ తదితరులు పాల్గొన్నారు.

చక్రాయపేట మండలం కుమారకాలవలోని పాపాగ్ని నది ఇసుక క్వారీ గుంతలో పడి ఇద్దరు చిన్నారులు మృతి చెందిన విషాద ఘటన చోటు చేసుకుంది. ఈ ఘటనపై తీవ్ర ఆగ్రహం వ్యక్తం చేసిన పిల్లల తల్లిదండ్రులు, గ్రామస్థులు.. రాత్రంతా మృతదేహాలతో నదిలోనే నిరసన తెలిపారు. సోమవారం ఈ ఘటనపై కడప ఎంపీ వైఎస్ అవినాష్ రెడ్డి బాధితులను పరామర్శించారు. ఈ సందర్భంగా ఎంపీ మాట్లాడుతూ, నష్టపరిహారం అందేవరకు అక్కడి నుండి కదిలేది లేదని స్పష్టం చేశారు. ఈ ఘటన ప్రభుత్వ నిర్లక్ష్యం వల్లే జరిగిందని ఆరోపించిన ఆయన, మైనింగ్ కార్యకలాపాలను వెంటనే నిలిపివేయాలని డిమాండ్ చేశారు. బాధితుల కుటుంబానికి అండగా ఉంటానని ఎంపీ వైఎస్ అవినాష్ రెడ్డి హామీ ఇచ్చారు.

మాజీ మంత్రి అంబటి రాంబాబు పోలీసుల దర్యాప్తు తీరుపై తీవ్ర అనుమానాలు వ్యక్తం చేశారు, ముఖ్యంగా సీఐ నాగరాజును ఇప్పటివరకు ఎందుకు అరెస్టు చేయలేదని ప్రశ్నించారు. పోలీసులు నిజాయితీగా దర్యాప్తు చేస్తుంటే, విదేశాలకు వెళ్లని సీఐ నాగరాజును అరెస్టు చేయకపోవడం వెనుక కారణం ఏమిటని ఆయన అడిగారు. ఆయన్ను అరెస్టు చేసి విచారిస్తే పెద్ద పెద్ద వాళ్ల పేర్లు బయటకు వస్తాయని భయపడుతున్నారని ఆరోపించారు. అంతేకాకుండా, కొందరు సీఐ నాగరాజును అరెస్టు చేయడానికి వీల్లేదంటూ ఆందోళనలు చేస్తున్న విషయాన్ని ఆయన ప్రస్తావించారు. క్రాంతికుమార్ ఆత్మహత్య కేసులో కూడా పోలీసుల వైఖరిపై రాంబాబు గారు పలు ప్రశ్నలు లేవనెత్తారు. మే 21న క్రాంతికుమార్ ఆత్మహత్య చేసుకున్నారని, అదే రోజు అనుమానాస్పద మృతిగా కేసు నమోదు చేశారని ఆయన గుర్తుచేశారు. ఆ తర్వాత ఒక వీడియో బయటకు వచ్చినా, క్రాంతికుమార్ తండ్రి ఫిర్యాదు చేసినా, కేసులో ఎందుకు మార్పులు చేయలేదని మాజీ మంత్రి ప్రశ్నించారు.

ఉమ్మడి ప్రకాశం జిల్లా ఎస్పీ హర్షవర్ధన్ రాజు మాట్లాడుతూ, గత సంవత్సరంతో పోలిస్తే జిల్లాలో క్రైమ్ రేట్ తగ్గిందని స్పష్టం చేశారు. సోమవారం దర్శి పోలీస్ స్టేషన్ పరిధిలో జరిగిన ప్రజా సమస్యల పరిష్కార వేదిక కార్యక్రమానికి హాజరైన ఎస్పీ, ప్రజల నుండి అర్జీలు స్వీకరించారు. నేరాల నియంత్రణకు బహిరంగంగా మద్యం సేవించే వారిపై కఠిన చర్యలు తీసుకుంటున్నామని ఆయన ఈ సందర్భంగా తెలియజేశారు. అంతేకాకుండా, రోడ్డు ప్రమాదాల నివారణపై కూడా ప్రత్యేక దృష్టి సారించినట్లు ఎస్పీ హర్షవర్ధన్ రాజు వివరించారు.

ముక్కోటి తొండవాడలో శ్రీ అగస్యేశ్వర స్వామి వారి దేవాలయం మరియు శ్రీ దక్షిణామూర్తి అన్నదాన సత్రం ఉన్నాయని తెలియజేశారు. భక్తులు ఈ దేవాలయాన్ని సందర్శించి స్వామివారి కృపా కటాక్షాలను పొందవచ్చని పేర్కొన్నారు. ఈ దివ్య క్షేత్రం నుండి 'హర హర మహాదేవ శంభో శంకర', 'ఓం నమశ్శివాయ' వంటి మంత్రాలతో శివుని కీర్తించారు. ఈ సందర్భంగా అన్నం పరబ్రహ్మ స్వరూపమని, దానిని వృధా చేయరాదని సందేశమిచ్చారు. అన్నదాతలు సుఖీభవించాలని ఆకాంక్షిస్తూ, అన్నదానం యొక్క ప్రాముఖ్యతను నొక్కి చెప్పారు.

వేముల మండలం భూమయ్యగారి పల్లె సమీపంలో నూతనంగా నిర్మించిన శ్రీ లక్ష్మీ నరసింహ స్వామి ఆలయాన్ని ఎంపీ వైఎస్ అవినాశ్ రెడ్డి పరిశీలించారు. ఈ సందర్భంగా ఆయన వైసీపీ నాయకులు సాంబశివారెడ్డి, బయపు రెడ్డిలతో ఆలయ నిర్మాణ పనుల గురించి అడిగి తెలుసుకున్నారు. అలాగే విగ్రహ ప్రతిష్ట వేడుకల ఏర్పాట్లు, బండలాగుడు పోటీల నిర్వహణ గురించి కూడా ఎంపీ ఆరా తీశారు. ఆయన వెంట వైసీపీ శ్రేణులు ఉన్నారు.

ముక్కోటిలోని తొండవాడ గ్రామంలో శివాలయంగా వెలసిన శ్రీ అగస్యేశ్వర స్వామి వారి దేవాలయం, శ్రీకృష్ణదేవరాయల కాలం నాటి అత్యంత శక్తివంతమైన పుణ్యక్షేత్రంగా భాసిల్లుతోంది. పురాణాల ప్రకారం, అగస్త మహాముని కొన్ని సంవత్సరాల పాటు తీవ్ర తపస్సు చేసి పరమ శివుడిని ప్రసన్నం చేసుకున్నారు. అనంతరం, ఆయనే స్వయంగా ఈ లింగాన్ని ఇక్కడ ప్రతిష్టించారు. తపస్సు చేసిన మహాముని పేరు మీదనే ఈ దేవాలయానికి శ్రీ అగస్యేశ్వర స్వామి దేవాలయం అని నామకరణం కూడా జరిగింది. ఈ ఆలయ చరిత్రను మనం తెలుసుకోవడం ఎంతైనా ముఖ్యం, భావి తరాలకు భగవంతుడి పట్ల భక్తిని పెంపొందించాలి. హర హర మహాదేవ శంభో శంకర!

మైలవరం నియోజకవర్గంలో జరుగుతున్న ఎర్రమట్టి దందాపై మాజీ మంత్రి జోగి రమేష్ గారు తీవ్ర ఆగ్రహం వ్యక్తం చేశారు. కొత్తూరు తాడేపల్లిలో అనుమతులు తీసుకుని, కందులపాడులో అక్రమంగా ఎర్రమట్టిని తరలిస్తున్నారని ఆయన ఆరోపించారు. ఎమ్మెల్యే వసంత కృష్ణ ప్రసాద్ మట్టి తింటూ కోట్లు సంపాదిస్తున్నాడని జోగి రమేష్ గారు తీవ్ర స్థాయిలో ధ్వజమెత్తారు. రెండేళ్లుగా ఈ అక్రమ మట్టి తరలింపు జరుగుతున్నా అధికారులు పట్టనట్లు వ్యవహరిస్తున్నారని మండిపడ్డారు. ఈ దోపిడీ ఇంకెన్నాళ్లు కొనసాగుతుందని చంద్రబాబును ఉద్దేశించి ప్రశ్నించారు.

ఎన్టీఆర్ జిల్లాలోని విజయవాడ కృష్ణలంకలో సోమవారం రాత్రి బ్లేడ్ బ్యాచ్ వీరంగం సృష్టించింది. కరకట్టపై శిశుభవన్ సమీపంలో ఓ కుటుంబానికి చెందిన తండ్రి, కుమారుడిపై దుండగులు బ్లేడ్‌లతో దాడి చేసి తీవ్రంగా గాయపరచడం స్థానికంగా కలకలం రేపింది. ఈ ఘటనలో కృష్ణలంకకు చెందిన భాను, ఆయన కుమారుడిపై చెక్క కుమార్ అనే వ్యక్తి బ్లేడ్‌తో దాడి చేసినట్లు సమాచారం. ఈ దాడిలో ఇద్దరికీ తీవ్ర గాయాలు కాగా, ముఖ్యంగా బాలుడి గొంతు భాగంలో తీవ్ర గాయాలయ్యాయి. గాయపడిన తండ్రి, కుమారుడిని స్థానికులు వెంటనే కృష్ణలంకలోని శ్రీరామ్ ఆసుపత్రికి తరలించారు. అయితే, గాయాల తీవ్రత ఎక్కువగా ఉండటంతో వైద్యులు మెరుగైన చికిత్స కోసం వారిని విజయవాడ ప్రభుత్వాసుపత్రికి (జీజీహెచ్) తరలించారు. ప్రస్తుతం బాలుడి పరిస్థితి విషమంగా ఉన్నట్లు వైద్య వర్గాల ద్వారా తెలుస్తోంది. గంజాయి మత్తులో తిరిగే బ్లేడ్ బ్యాచ్ సభ్యులే ఈ ఘటనకు కారణమని స్థానికులు ఆరోపిస్తున్నారు. కరకట్ట పరిసరాల్లో తరచూ అసాంఘిక కార్యకలాపాలు జరుగుతున్నాయని, ఇలాంటి ఘటనలు పునరావృతం కాకుండా పోలీసులు కఠిన చర్యలు తీసుకోవాలని ప్రజలు డిమాండ్ చేస్తున్నారు. సమాచారం అందుకున్న కృష్ణలంక పోలీసులు ఘటన స్థలానికి చేరుకుని ఆధారాలు సేకరించారు. బాధితుల కుటుంబ సభ్యులు, ప్రత్యక్ష సాక్షుల నుంచి వివరాలు నమోదు చేసుకుంటున్నారు. ఈ దాడికి గల కారణాలు, నిందితుల పాత్రపై విచారణ కొనసాగుతోంది. ఈ ఘటనకు సంబంధించిన పూర్తి వివరాలు ఇంకా తెలియాల్సి ఉంది.