కరీంనగర్‌లోని గాంధీ రోడ్డు ప్రాంతంలో ఓ విషాద ఘటన చోటుచేసుకుంది. నల్లమచ సుగుణమ్మ (82) అనే వృద్ధురాలు తన ఇంట్లోని చేదబావిలో ప్రమాదవశాత్తు పడి మృతి చెందారు. ఈ విషయాన్ని కుటుంబీకులు వెల్లడించారు. సమాచారం అందుకున్న ఫైర్ రెస్క్యూ సిబ్బంది వెంటనే ఘటనా స్థలానికి చేరుకుని సహాయక చర్యలు చేపట్టారు. అయితే, అప్పటికే వృద్ధురాలు మృతిచెందడంతో, సిబ్బంది మృతదేహాన్ని వెలికితీసి జిల్లా ప్రభుత్వ ఆసుపత్రి మార్చురీకి తరలించారు.

జాతీయ యోగ దినోత్సవం సందర్భంగా రాజన్న సిరిసిల్ల జిల్లా పోలీస్ కార్యాలయంలో జిల్లా ఎస్పీ మహేష్ బీ గీతే తన సిబ్బందితో కలిసి యోగాసనాలు వేశారు. ఈ కార్యక్రమంలో పోలీస్ కార్యాలయ సిబ్బంది కూడా పాల్గొని యోగ సాధన చేశారు.

హనుమకొండ కలెక్టరేట్ సోమవారం వివిధ ఆందోళనలతో దద్దరిల్లింది. ప్రజావాణి కార్యక్రమానికి పెద్ద సంఖ్యలో ప్రజలు తరలివచ్చిన సమయంలో, మున్సిపల్ కార్మికులు తమ సమస్యల పరిష్కారం కోరుతూ కలెక్టరేట్ ఎదుట ధర్నా చేపట్టారు. అదే సమయంలో, విద్యా సంస్థల్లో ఫీజుల పెంపును నిరసిస్తూ ఎస్‌ఎఫ్‌ఐ ఆధ్వర్యంలో విద్యార్థులు ఆందోళన నిర్వహించారు. ఒకేసారి రెండు వర్గాల నిరసన కార్యక్రమాలు కొనసాగడంతో కలెక్టరేట్ ప్రాంగణం నినాదాలతో మార్మోగింది. ఆందోళనకారులు తమ డిమాండ్లను నెరవేర్చాలని ప్రభుత్వాన్ని కోరుతూ నిరసన చేపట్టారు. దీంతో కలెక్టరేట్‌కు వచ్చే ప్రజలు, అధికారులు కొంత ఇబ్బందులు ఎదుర్కొన్నారు. పరిస్థితిని దృష్టిలో ఉంచుకుని అధికారులు కలెక్టరేట్‌కు వెళ్లే రెండు ప్రధాన గేట్లను తాత్కాలికంగా మూసివేశారు. ఫలితంగా, ప్రజావాణికి వచ్చిన పలువురు ప్రజలు ప్రత్యామ్నాయ మార్గాల ద్వారా కార్యాలయానికి చేరుకోవాల్సి వచ్చింది. ఎలాంటి అవాంఛనీయ ఘటనలు జరగకుండా పోలీసులు భారీ బందోబస్తు ఏర్పాటు చేసి పరిస్థితిని ఎప్పటికప్పుడు పర్యవేక్షించారు. ఆందోళనల నేపథ్యంలో కొంతసేపు కలెక్టరేట్ పరిసర ప్రాంతాల్లో ఉద్రిక్త వాతావరణం నెలకొన్నప్పటికీ, పోలీసులు అప్రమత్తంగా వ్యవహరించి పరిస్థితిని అదుపులో ఉంచారు. దీంతో నిరసన కార్యక్రమాలు శాంతియుతంగా ముగిశాయి.

నిత్యజీవితంలోని ఉరుకుల పురుగుల నుంచి ఒక్కరోజు విరామం తీసుకుని, సదాశివనగర్ మండలం వజ్జేపల్లి తాండా ప్రజలంతా కలిసి సరదాగా గడపాలని నిర్ణయించుకున్నారు. ఈ క్రమంలో, గ్రామంలోని సుమారు 120 కుటుంబాల వారు తమ ఇళ్లకు తాళాలు వేసి, గ్రామ సమీపంలో ఉన్న పంట చేనులో సామూహిక వనభోజన కార్యక్రమాన్ని ఘనంగా నిర్వహించారు. ఉదయం ప్రారంభమైన ఈ వేడుక సాయంత్రం వరకు కొనసాగింది, వజ్జేపల్లి తాండా ప్రజలందరికీ ఈ సందడి రెట్టింపు ఉత్సాహాన్ని ఇచ్చింది.

Post by KHADEER REPORTER

టీపీసీసీ ప్రధాన కార్యదర్శి గజ్జల కాంతం, మంథని మాజీ ఎమ్మెల్యే పుట్ట మధు గత బీఆర్ఎస్ ప్రభుత్వ హయాంలో భారీగా అక్రమాస్తులు కూడబెట్టారని సంచలన ఆరోపణలు చేశారు. పుట్ట మధుకు సంబంధించిన దాదాపు రూ.900 కోట్ల ఆస్తుల చిట్టా తమ వద్ద సిద్ధంగా ఉందని కరీంనగర్ నగరంలోని ఆర్అండ్‌బీ అతిథి గృహంలో సోమవారం ఏర్పాటు చేసిన విలేకరుల సమావేశంలో ఆయన వెల్లడించారు. ఈ సందర్భంగా బీఆర్ఎస్ పార్టీ అధినేత కేసీఆర్, కేటీఆర్‌లతో పాటు మాజీ ఎమ్మెల్యే పుట్ట మధుపై తీవ్రస్థాయిలో విరుచుకుపడ్డారు. బీఆర్ఎస్ పార్టీ మూడు వేల కోట్లు దోచుకుంటే, పుట్ట మధుకు తొమ్మిది వందల కోట్ల ఆస్తులు ఎక్కడి నుండి వచ్చాయని గజ్జల కాంతం నిలదీశారు. కేసీఆర్, కేటీఆర్‌లు లక్షల కోట్లు సంపాదిస్తే, గత బీఆర్ఎస్ ఎమ్మెల్యేలు వేల కోట్లు వెనకేశారని ఆరోపించారు. పెద్దపల్లి జెడ్పీ చైర్మన్ కాకముందు పుట్ట మధు ఆస్తులు ఎంత, ప్రస్తుతం ఎంత అనే విషయాలను బహిర్గతం చేయాలని డిమాండ్ చేయడంతో పాటు, ఆయన ఆస్తులపై సమగ్ర విచారణ జరపాలని కోరారు. కేవలం ఒకే ఒక్కసారి ఎమ్మెల్యే అయిన వ్యక్తికి వేల కోట్ల ఆస్తులు ఎలా సాధ్యమని గజ్జల కాంతం ప్రశ్నించారు. నియోజకవర్గంలో ఇసుక దందా, గంజాయి వ్యాపారాలు చేస్తూ అక్రమాలకు పాల్పడ్డారని ఆరోపించారు. గతంలో దళిత వ్యక్తిపై దాడులు చేయించడమే కాకుండా, సంచలనం సృష్టించిన అడ్వకేట్ దంపతుల హత్య ఉదంతం వెనుక ఉన్నది పుట్ట మధు కాదా అని నేరుగా ప్రశ్నించారు. గతంలో మంథని మధును చంపి కాలువలో పడేసింది కూడా పుట్ట మధు అనుచరులేనని ఆయన తీవ్ర ఆరోపణలు చేశారు. దివంగత నేత దుద్దిళ్ల శ్రీపాద రావు పెట్టిన రాజకీయ బిక్షతోనే పుట్ట మధు ఈ స్థాయికి వచ్చారని గుర్తు చేస్తూ, రాష్ట్ర ఐటీ, పరిశ్రమల శాఖ మంత్రి దుద్దిళ్ల శ్రీధర్‌బాబు ఇంటి గేటు వద్ద నిలబడి, ఆయన దయతో జెడ్పీటీసీగా పోటీ చేసే అవకాశం వచ్చిందన్న పాత చరిత్రను గుర్తుంచుకోవాలని హితవు పలికారు. మంత్రి శ్రీధర్‌బాబు గురించి మాట్లాడే నైతిక అర్హత పుట్ట మధుకు లేదని, నోరు అదుపులో పెట్టుకొని మాట్లాడాలని హెచ్చరించారు. తాను గనుక నోరు తెరిస్తే పుట్ట మధు తట్టుకోలేక ఊరేసుకునే పరిస్థితి వస్తుందని తీవ్ర హెచ్చరికలు జారీ చేశారు. బీఆర్ఎస్ పదేళ్ల పాలనలో రాష్ట్రాన్ని భారీ అప్పుల ఊబిలోకి నెట్టి ప్రజాధనాన్ని దోచుకుందని గజ్జల కాంతం ఆరోపించారు. మాజీ ముఖ్యమంత్రి కేసీఆర్ నేతృత్వంలోని గత ప్రభుత్వం రాష్ట్రాన్ని సుమారు రూ.8 లక్షల కోట్ల అప్పుల పాల్జేసిందని, అందులో రూ.3 లక్షల కోట్లను దోచుకున్నారని విమర్శించారు. కాళేశ్వరం ప్రాజెక్టు పేరిట రూ.1.50 లక్షల కోట్ల వ్యయంలో లక్ష కోట్ల రూపాయల మేర అవినీతి జరిగిందని పేర్కొన్నారు. హైదరాబాద్‌లో వేల కోట్ల విలువైన సుమారు 30 వేల ఎకరాల భూములను కూడా ఆక్రమించారని ఆయన మండిపడ్డారు. రాబోయే రోజుల్లో ప్రజలు బీఆర్ఎస్ పార్టీని పూర్తిగా బొంద పెడతారని, అది బీజేపీలో విలీనం కావడం ఖాయమని ఆయన రాజకీయ జోస్యం చెప్పారు. పదేళ్ల పాటు దొర కుటుంబాన్ని నమ్మి మోసపోయిన ప్రజలు ఇకపై ఆ పార్టీని మరో పదేళ్లయినా నమ్మే పరిస్థితి లేదని గజ్జల కాంతం స్పష్టం చేశారు. ఈ విలేకరుల సమావేశంలో కాంగ్రెస్ పార్టీ నాయకులు సముద్రాల అజయ్, కేశవేని రవీందర్ యాదవ్, తదితరులు పాల్గొన్నారు.

రాజన్న సిరిసిల్ల జిల్లాలోని బోయినపల్లి మండలం కోరెం గ్రామంలో, మంచి వర్షాలు కురిసి రైతులు సుభిక్షంగా ఉండాలని గ్రామస్తులు ప్రత్యేక పూజలు నిర్వహించారు. వర్షాకాలం ప్రారంభమై నెల రోజులు అవుతున్నా వరుణ దేవుడు కరుణించకపోవడంతో, గ్రామ ప్రజలు కప్పతల్లి ఆట ఆడి గ్రామంలోని దేవాలయాల్లోని దేవతామూర్తులకు జలాభిషేకాలు చేశారు. అనంతరం, వెంకటేశ్వర స్వామి ఆలయంలో వరుణ హోమం నిర్వహించారు. ఈ సందర్భంగా పలువురు మాట్లాడుతూ, వర్షాలు సమృద్ధిగా కురిసి రైతాంగం కష్టాలు తొలగి, పంటలు బాగా పండాలని, చెరువులు, కుంటలు నిండాలని, ప్రజలందరూ సుఖశాంతులతో జీవించాలని దేవుళ్లను ప్రార్థించినట్లు తెలిపారు. వ్యవసాయం అభివృద్ధి చెందాలనే సంకల్పంతో ఈ కార్యక్రమాన్ని చేపట్టినట్లు పేర్కొన్నారు. ఈ కార్యక్రమంలో గ్రామస్తులు, యువకులు, మహిళలు పెద్ద సంఖ్యలో పాల్గొన్నారు.

హన్మకొండ జిల్లాలోని ఐనవోలు మండలం కక్కిరాపల్లి గ్రామ పంచాయతీ కార్యాలయం ఎదుట మాజీ సర్పంచులు, మాజీ ఉపసర్పంచ్ బుధవారం బైఠాయించి నిరసన చేపట్టారు. గ్రామ పంచాయతీ అభివృద్ధి పనులకు సంబంధించిన పెండింగ్ బిల్లులు విడుదలై ఆరు నెలలు గడిచినా తమ ఖాతాల్లో జమ కాలేదని వారు తీవ్ర ఆవేదన వ్యక్తం చేశారు. ఈ సందర్భంగా వారు మాట్లాడుతూ, ప్రభుత్వం బిల్లులు మంజూరు చేసినప్పటికీ అధికారుల నిర్లక్ష్యం కారణంగానే చెల్లింపులు నిలిచిపోయాయని ఆరోపించారు. అభివృద్ధి పనుల కోసం అప్పులు చేసి మరీ పనులు పూర్తి చేశామని, అయితే ఇప్పటికీ బకాయిలు అందక తాము తీవ్ర ఆర్థిక ఇబ్బందులను ఎదుర్కొంటున్నామని స్పష్టం చేశారు. అనంతరం, నిరసనకారులు పంచాయతీ కార్యదర్శికి వినతిపత్రం అందజేశారు. పెండింగ్ బిల్లులను వెంటనే చెల్లించి తమ సమస్యలను పరిష్కరించాలని వారు డిమాండ్ చేశారు. సమస్య పరిష్కారం కాకపోతే తమ ఆందోళనను మరింత ఉధృతం చేస్తామని హెచ్చరించారు. ఈ నిరసన కార్యక్రమంలో పలువురు మాజీ ప్రజాప్రతినిధులు కూడా పాలుపంచుకున్నారు.

కామారెడ్డి జిల్లాలోని పలాంచ మర్రి, చుక్కాపూర్ మధ్యలో గోరా అనే వ్యక్తికి రోడ్డు ప్రమాదం జరిగింది. ద్విచక్ర వాహనంపై వెళ్తుండగా ఈ ప్రమాదం చోటుచేసుకుంది.