বাক্সা জিলা একাডেমিক কাউন্সিলে জিলাখনৰ শীৰ্ষ মেধাৱী ছাত্ৰ-ছাত্ৰীক সম্বৰ্দ্ধনা জনালে। হাইস্কুল আৰু উচ্চতৰ মাধ্যমিক চূড়ান্ত পৰীক্ষাত সৰ্বোচ্চ স্থান লাভ কৰা দহগৰাকীকৈ ছাত্ৰ-ছাত্ৰীক এই বিশেষ সন্মান জনোৱা হয়।

বাক্সা জিলাৰ ডুমুনীৰ পৰা চিমলালৈ যোৱা সংযোগী পথটোৰ অৱস্থা অত্যন্ত শোচনীয়। পথটোৰ দুৰাৱস্থাই অঞ্চলটোৰ ৰাইজক যথেষ্ট সমস্যাত পেলাইছে। ঠায়ে ঠায়ে পথত বৃহৎ বৃহৎ গাঁতৰ সৃষ্টি হৈছে, য'ত এজাক বৰষুণ দিলেই পানীৰে ভৰি পৰে আৰু জলাশয়ৰ দৰে হৈ পৰে। ইয়াৰোপৰি, প্ৰায় চাৰি বছৰৰ পূৰ্বে কালদিয়া নৈৰ পানীয়ে খহাই নিয়া পথৰ এটা অংশ আজিও মেৰামতি কৰা হোৱা নাই। এই বিপদসংকুল পথটোৰে দৈনিক বহু যান-বাহন পাৰ হয়। এই পৰিস্থিতিৰ প্ৰতি লক্ষ্য ৰাখি পথচাৰীসকলে বিটিচি চৰকাৰলৈ অতি শীঘ্ৰে এই পথচোৱা পুনৰ নিৰ্মাণ কৰিবলৈ আহ্বান জনাইছে।

পৰ্যটকৰ বাহনৰ আগে আগে এটা প্ৰকাণ্ড হাতীৰ জাকে খোজ কাঢ়ি অহাৰ দৃশ্যই পৰ্যটকসকলক আপ্লুত কৰি তুলিছে। হাতীৰ এই জাকটোৰ গতিবিধি দেখি পৰ্যটকসকলে যথেষ্ট আনন্দ উপভোগ কৰা পৰিলক্ষিত হৈছে।

ৰাজ্যৰ লাখ লাখ ৰেচন কাৰ্ডধাৰী পৰিয়ালৰ বাবে এক বেয়া খবৰ আহিছে, যিহেতু সুলভ মূল্যত চেনি, নিমখ আৰু মচুৰ দাইল যোগান ধৰা আঁচনিৰ ভৱিষ্যৎক লৈ পুনৰ অনিশ্চয়তা সৃষ্টি হোৱাৰ আশংকাই হিতাধিকাৰীসকলৰ মাজত উদ্বেগ বৃদ্ধি কৰিছে। উল্লেখ্য যে, ৰাজ্য চৰকাৰে ২০২৫ চনৰ শেষৰ ফালে ৰাষ্ট্ৰীয় খাদ্য সুৰক্ষা আইন (NFSA)-ৰ অন্তৰ্গত প্ৰায় ৭০ লাখ পৰিয়াল আৰু ২.৪৫ কোটিতকৈ অধিক হিতাধিকাৰীক লাভান্বিত কৰিবলৈ এই বিশেষ আঁচনিখন আৰম্ভ কৰিছিল। এই আঁচনিৰ অধীনত প্ৰথম অৱস্থাত মচুৰ দাইল ৬৯ টকা, চেনি ৩৮ টকা আৰু নিমখ ১০ টকা মূল্যত প্ৰদান কৰা হৈছিল; পিছলৈ এই সামগ্ৰীসমূহৰ মূল্য অধিক হ্ৰাস কৰি মুঠ ১০০ টকাৰ ভিতৰত প্ৰদান কৰাৰ কথাও ঘোষণা কৰা হৈছিল। কিন্তু শেহতীয়া পৰিস্থিতিত বজাৰত খাদ্য সামগ্ৰীৰ মূল্য বৃদ্ধি, যোগান ব্যৱস্থাৰ ওপৰত চাপ আৰু চৰকাৰী ব্যয় বৃদ্ধিৰ ফলত এই সুবিধা অব্যাহত থাকিব নে নাই, তাক লৈ বিভিন্ন মহলত জল্পনা-কল্পনা আৰম্ভ হৈছে। ইয়াৰ ফলত বহু হিতাধিকাৰীয়ে আগন্তুক মাহসমূহত পুনৰ বজাৰ মূল্যত চেনি, নিমখ আৰু দাইল কিনিবলগীয়া হ’ব নেকি বুলি চিন্তা প্ৰকাশ কৰিছে। বিশেষজ্ঞসকলৰ মতে, ৰাজ্যৰ দৰিদ্ৰ আৰু নিম্ন মধ্যবিত্ত পৰিয়ালসমূহৰ বাবে এই আঁচনি এক ডাঙৰ সহায় আছিল আৰু যদি এই সুলভ মূল্যৰ সুবিধা বন্ধ হয় বা হ্ৰাস পায়, তেন্তে দৈনন্দিন জীৱনৰ ব্যয় অধিক বৃদ্ধি পোৱাৰ সম্ভাৱনা আছে। ইফালে, চৰকাৰৰ ফালৰ পৰা এতিয়ালৈকে এই আঁচনি সম্পূৰ্ণৰূপে বন্ধ কৰাৰ কোনো আনুষ্ঠানিক ঘোষণা প্ৰকাশ হোৱা নাই। তথাপিও হিতাধিকাৰীসকলৰ মাজত অনিশ্চয়তা অব্যাহত আছে আৰু সাধাৰণ জনতাই এই সন্দৰ্ভত চৰকাৰৰ স্পষ্টীকৰণৰ অপেক্ষাত আছে।

আজি চাৰিদিনীয়া ভ্ৰমণসূচীৰে দিল্লীত উপস্থিত হৈয়েই মুখ্যমন্ত্ৰী ড° হিমন্ত বিশ্ব শৰ্মাই প্ৰধানমন্ত্ৰী নৰেন্দ্ৰ মোদীক সাক্ষাৎ কৰে। দেশৰ প্ৰধানমন্ত্ৰীৰ সৈতে মুখ্যমন্ত্ৰীয়ে অসমৰ আন্তঃগাঁথনি, বিনিয়োগ, উদ্যোগ আৰু জনকল্যাণক অধিক শক্তিশালী কৰাৰ দিশত ভৱিষ্যতৰ দিনসমূহৰ ৰূপৰেখা সন্দৰ্ভত বিতং আলোচনা কৰে। ইয়াৰ পিছতে মুখ্যমন্ত্ৰীগৰাকীয়ে কেন্দ্ৰীয় ৰে'লমন্ত্ৰী অশ্বিনী বৈষ্ণৱকো সাক্ষাৎ কৰে। কেন্দ্ৰীয় ৰে'ল মন্ত্ৰীগৰাকীৰ সৈতে ১,৩০০ কিলোমিটাৰতকৈ অধিক ৰে'লপথ সম্প্ৰসাৰণ আৰু ৫০টাতকৈও অধিক অমৃত ষ্টেচনৰ উন্নয়নমূলক কাৰ্যসূচীকে ধৰি অসমৰ সামগ্ৰিক ৰে'ল নেটৱৰ্ক আৰু ৰে'ল আন্তঃগাঁথনিৰ বিভিন্ন বিষয়কলৈ আলোচনা অনুষ্ঠিত হয়। মুখ্যমন্ত্ৰী ড° হিমন্ত বিশ্ব শৰ্মা চাৰিদিনীয়া চৰকাৰী কামকাজ সামৰি ২ জুনত পুনৰ অসমলৈ উভতি আহিব।

অসম বিধানসভাত অভিন্ন অসামৰিক সংহিতা গৃহীত হোৱাৰ পাছত কংগ্ৰেছৰ বিধায়ক জাকিৰ হুছেইন শিকদাৰে অসন্তুষ্টি ব্যক্ত কৰিছে।

অহা ৫ আৰু ৬ জুনত মৰিগাঁৱত জিলা শিক্ষা আৰু প্ৰশিক্ষণ প্ৰতিষ্ঠান (DIET)ৰ উদ্যোগত দুদিনীয়া এক ‘আন্তঃৰাষ্ট্ৰীয় শৈক্ষিক আলোচনা চক্ৰ’ অনুষ্ঠিত হ'ব। এই বৃহৎ আয়োজনৰ সন্দৰ্ভত কৰ্তৃপক্ষই এক বিশেষ সংবাদ মেলৰ আয়োজন কৰিছিল।

বাক্সা জিলাৰ শিমলাত ১০০ গৰাকী বিশেষভাৱে শাৰীৰিক সক্ষম লোকক চেক প্ৰদান কৰা হৈছে। এই চেকসমূহৰ জৰিয়তে প্ৰতিগৰাকী হিতাধিকাৰীক ১০ হাজাৰকৈ টকা প্ৰদান কৰা হৈছে। এই চেক বিতৰণ কাৰ্যসূচীত বিধায়ক থানেশ্বৰ বসুমতাৰীয়ে উপস্থিত থাকি বিশেষভাৱে শাৰীৰিক সক্ষম লোকসকলক এই চেকসমূহ প্ৰদান কৰে।

নগাঁৱৰ জাজৰিত এজন যুৱকৰ প্ৰাণহানিৰ ঘটনাই চাঞ্চল্যৰ সৃষ্টি কৰিছে। এই মৰ্মান্তিক ঘটনাক লৈ ৰিংকু দাস নামৰ যুৱকজনৰ পৰিয়ালে মৰিগাঁৱৰ এগৰাকী প্ৰেমিকাৰ বিৰুদ্ধে গুৰুতৰ অভিযোগ উত্থাপন কৰিছে। পৰিয়ালৰ দাবী অনুসৰি, তেওঁলোকে কেতিয়াও ভবা নাছিল যে ভালপোৱা ছোৱালীজনীয়ে এনেধৰণৰ কাম কৰিব পাৰে। পৰিয়ালৰ অভিযোগ অনুসৰি, ৰিংকু দাসে প্ৰেমিকাগৰাকীক নাৰ্চিং পঢ়িবলৈ প্ৰায় ১ লাখ টকা দিছিল। ২৫ মে' তাৰিখে ৰিংকু দাস প্ৰেমিকাৰ ঘৰলৈ গৈছিল বুলিও পৰিয়ালে জানিবলৈ দিছে। তেওঁলোকে সন্দেহ কৰিছে যে প্ৰেমিকাৰ ঘৰতেই ৰিংকুক শেষ কৰি দিয়া হৈছে। এই সন্দৰ্ভত ন্যায় বিচাৰি ৰিংকু দাসৰ পৰিয়ালে আৰক্ষীৰ কাষ চাপিছে।