సిరికొండ మండల కాంగ్రెస్ కమిటీ అధ్యక్షుడిగా చిన్నవాల్గోట్ గ్రామ ఉపసర్పంచ్ రోండ్ల గోవర్ధన్ రెడ్డి నియమితులయ్యారు. పార్టీ అధిష్ఠానం తనపై ఉంచిన నమ్మకాన్ని నిలబెట్టుకుంటూ కాంగ్రెస్ పార్టీ బలోపేతానికి కృషి చేస్తానని ఆయన ఈ సందర్భంగా తెలిపారు. కార్యకర్తలను సమన్వయం చేసుకుంటూ, ప్రజా సమస్యలపై పోరాడుతూ పార్టీని గ్రామస్థాయిలో మరింత బలోపేతం చేస్తానని రోండ్ల గోవర్ధన్ రెడ్డి పేర్కొన్నారు.

నిజామాబాద్ జిల్లాలోని బోధన్ మండలం, బోధన్ పట్టణంలో బీఆర్ఎస్ సభ్యత్వ నమోదు కార్యక్రమాన్ని పార్టీ శ్రేణులు విస్తృతంగా చేపట్టాలని బీఆర్ఎస్ సీనియర్ నాయకులు దాదన్నగారి విఠల్, వీజీ గౌడ్ పిలుపునిచ్చారు. సోమవారం రోజున మాజీ ఎమ్మెల్యే షకీల్ ఆమెర్ నివాస గృహంలో నిర్వహించిన నియోజకవర్గ స్థాయి సమన్వయ కమిటీ సమావేశంలో వారు ఈ సూచనలు చేశారు. ఈ సందర్భంగా నాయకులు, కార్యకర్తలు సభ్యత్వ నమోదును యుద్ధ ప్రాతిపదికన చేపట్టాలని, బూత్ కమిటీలు ఈ కార్యక్రమంలో పూర్తిస్థాయిలో పాలుపంచుకోవాలని దిశానిర్దేశం చేశారు. రాష్ట్రవ్యాప్తంగా 85 లక్షల సభ్యత్వ నమోదు చేయాలని లక్ష్యంగా పెట్టుకున్నట్లు తెలిపారు. జూన్ 25 నుంచి జూలై 24 వరకు జరిగే ఈ సభ్యత్వ నమోదు కార్యక్రమాన్ని బీఆర్ఎస్ శ్రేణులు విజయవంతంగా పూర్తి చేయాలని కోరారు. ఈ కార్యక్రమంలో మాజీ జిల్లా పరిషత్ చైర్మన్, బీఆర్ఎస్ సీనియర్ నాయకులు దాదన్నగారి విఠల్, వీజీ గౌడ్, పట్టణ అధ్యక్షులు రవీంద్ర యాదవ్, సంజీవ్, నరసయ్య, కౌన్సిలర్ గుమ్ముల అశోక్ రెడ్డి, బీఆర్ఎస్ నాయకులైన రవి శంకర్ గౌడ్, మిర్జాపురం హరీశంకర్, మండల టిఆర్ఎస్ పార్టీ నాయకులు, కార్యకర్తలు తదితరులు పాల్గొన్నారు.

తెలంగాణ సాంస్కృతిక సారథి ఆధ్వర్యంలో కళాకారులు ప్రభుత్వ పథకాలపై ఒక కళాజాత కార్యక్రమాన్ని నిర్వహించారు.

కామారెడ్డిలో సమాజ సేవనే లక్ష్యంగా పనిచేస్తున్న శ్రీమాతా సేవ చారిటబుల్ సంస్థ, జూన్ 22న తన "నెలకు ఒక మంచి పని – నెలకు ₹100" నారాయణ సేవ కార్యక్రమంలో భాగంగా మరో సేవా కార్యక్రమాన్ని చేపట్టింది. తల్లిదండ్రులను కోల్పోయి నిరుపేద కుటుంబానికి చెందిన చిన్నారి సహస్ర విద్యాభ్యాసానికి ఆర్థిక సహాయం అందించి, ఆమె భవిష్యత్తుకు భరోసా కల్పించింది. కామారెడ్డి పట్టణంలోని ప్రియా టాకీస్ రోడ్ ప్రాంతానికి చెందిన సహస్రను శ్లోక ఇన్నోవేటివ్ స్కూల్‌లో 5వ తరగతిలో చేర్పించి, ఆమె ఏడాది విద్యా ఖర్చులను భరించాలని సంస్థ నిర్ణయించింది. ఈ సందర్భంగా స్కూల్ ఫౌండర్ జాలిగామ శ్రీకాంత్ 50 శాతం ఫీజు మాఫీ చేసి చిన్నారికి అండగా నిలిచారు. ఈ సందర్భంగా శ్రీమాతా సేవ చారిటబుల్ సంస్థ వ్యవస్థాపకులు శ్రీకాంత్ దత్త మాట్లాడుతూ, విద్య ద్వారా సహస్ర జీవితంలో వెలుగులు నింపాలన్న ఉద్దేశంతోనే ఈ సహాయాన్ని అందిస్తున్నట్లు తెలిపారు. స్కూల్ యాజమాన్యం అందించిన సహకారానికి ఆయన కృతజ్ఞతలు తెలియజేశారు. శ్లోక ఇన్నోవేటివ్ స్కూల్ ప్రిన్సిపల్ శ్రీకాంత్ కూడా మాట్లాడుతూ, నిరుపేద విద్యార్థుల విద్యాభివృద్ధి కోసం శ్రీమాతా సేవ చారిటబుల్ సంస్థ చేస్తున్న సేవా కార్యక్రమాలు అభినందనీయమని పేర్కొన్నారు. సహస్ర విద్యలో మరింత ఉన్నత స్థాయికి చేరుకునేలా తనవంతు సహకారం అందిస్తానని ఆయన హామీ ఇచ్చారు. చిన్నారికి పుస్తకాలు అందించిన మచ్చ నాగరాజు కుటుంబ సభ్యులకు, శ్లోక స్కూల్ యాజమాన్యానికి, నారాయణ సేవ కార్యక్రమానికి ప్రత్యక్షంగా, పరోక్షంగా సహకరించిన ప్రతి ఒక్కరికీ శ్రీకాంత్ దత్త హృదయపూర్వక ధన్యవాదాలు తెలియజేశారు. ఈ కార్యక్రమంలో సంస్థ సభ్యులు కే. సాయిరాం, ABN న్యూస్ ప్రతినిధి శ్రీనివాస్, సిద్ధంశెట్టి వేణుగోపాల్, కే. శిరీష, కామారెడ్డి ఎలక్ట్రానిక్ మీడియా అధ్యక్షులు పట్నంశెట్టి శ్రీనివాస్, కొడిప్యాక సాయిరాం తదితరులు పాల్గొని చిన్నారిని పాఠశాలలో చేర్పించారు. ఈ సేవా కార్యక్రమం 'నెలకొక మంచి పని నారాయణ సేవ', 'మానవసేవే మాధవసేవ' అనే నినాదాలకు అనుగుణంగా చిన్నారి సహస్రకు విద్యాదానం చేసింది.

ప్రొఫెసర్ జయశంకర్ గారి బడివాడ కార్యక్రమంలో ప్రభుత్వ పాఠశాలల ఉపాధ్యాయులు పాలుపంచుకుంటున్నప్పటికీ, వారి సొంత పిల్లలు మాత్రం ప్రైవేటు పాఠశాలల్లో విద్యనభ్యసిస్తున్నారనే విమర్శ వ్యక్తమవుతోంది. ఇది ప్రభుత్వ ఉపాధ్యాయుల వైఖరిలో ఒక విరుద్ధమైన అంశాన్ని ఎత్తిచూపుతోంది.

నిత్యజీవితంలోని ఉరుకుల పురుగుల నుంచి ఒక్కరోజు విరామం తీసుకుని, సదాశివనగర్ మండలం వజ్జేపల్లి తాండా ప్రజలంతా కలిసి సరదాగా గడపాలని నిర్ణయించుకున్నారు. ఈ క్రమంలో, గ్రామంలోని సుమారు 120 కుటుంబాల వారు తమ ఇళ్లకు తాళాలు వేసి, గ్రామ సమీపంలో ఉన్న పంట చేనులో సామూహిక వనభోజన కార్యక్రమాన్ని ఘనంగా నిర్వహించారు. ఉదయం ప్రారంభమైన ఈ వేడుక సాయంత్రం వరకు కొనసాగింది, వజ్జేపల్లి తాండా ప్రజలందరికీ ఈ సందడి రెట్టింపు ఉత్సాహాన్ని ఇచ్చింది.

రాజన్న సిరిసిల్ల జిల్లా బోయినపల్లి మండలం జగ్గారావు పల్లిలో గ్రామస్థులు పోచమ్మ బోనాలను అత్యంత వైభవంగా నిర్వహించారు. ఈ వేడుకలో మహిళలు ఉపవాసంతో తమ తలపై బోనం ఎత్తుకొని, డప్పు చప్పుళ్ల మధ్య, బైండ్ల పూజారుల విన్యాసాల నడుమ ఊరేగింపుగా పోచమ్మ ఆలయానికి చేరుకున్నారు. అక్కడ వారు నైవేద్యం సమర్పించి, తమ మొక్కులను చెల్లించుకున్నారు. ఈ సందర్భంగా సర్పంచ్ మధు మాట్లాడుతూ, గ్రామానికి సమృద్ధిగా వర్షాలు కురిసి సుభిక్షంగా ఉండాలని, పాడిపంటలు, గ్రామస్తులు బాగుండాలని పోచమ్మ తల్లిని వేడుకున్నట్లు తెలిపారు. పోచమ్మ బోనాల నిర్వహణకు సహకరించిన గ్రామస్థులందరికీ ఆయన ధన్యవాదాలు తెలియజేశారు.

మెదక్ జిల్లాలో మాజీ మంత్రి హరీష్ రావు, కేటీఆర్ వ్యాఖ్యలు పూర్తిగా బాధ్యతారాహిత్యమని డీసీసీ అధ్యక్షుడు ఆంజనేయులు గౌడ్ తీవ్రంగా విమర్శించారు. సోమవారం ఎమ్మెల్యే క్యాంపు కార్యాలయంలో ఏర్పాటు చేసిన విలేకరుల సమావేశంలో ఆయన మాట్లాడుతూ, మెదక్ జిల్లాకు శని పట్టడానికి హరీష్ రావు, కేటీఆర్ వల్లే కారణమని ధ్వజమెత్తారు. మెదక్ ఎమ్మెల్యే డాక్టర్ మైనంపల్లి రోహిత్ రావు, మాజీ ఎమ్మెల్యే మైనంపల్లి హనుమంతరావు ప్రజలకు జవాబుదారీతనంతో పనిచేస్తున్న నాయకులని ఆంజనేయులు గౌడ్ అన్నారు. ఎమ్మెల్యే రోహిత్ రావు గానీ, మైనంపల్లి హనుమంతరావు గానీ కమిషన్ల కోసం రాజకీయాలు చేసే వ్యక్తులు కాదని స్పష్టం చేశారు. వారికి, బీఆర్ఎస్ నాయకులకూ మధ్య “నక్కకు నాగలోకానికి ఉన్నంత తేడా” ఉందని వ్యాఖ్యానించారు. మాజీ డిప్యూటీ స్పీకర్ చేసిన వ్యక్తిగత విమర్శలు తగవని, “బడిమియా–చోటిమియా” వంటి వ్యాఖ్యలను మానుకోవాలని సూచించారు. అభివృద్ధికి చిరునామాగా ఎమ్మెల్యే రోహిత్ రావు నిలుస్తున్నారని ఆయన కొనియాడారు. కాంగ్రెస్ ప్రభుత్వం అమలు చేస్తున్న సంక్షేమ పథకాలతో ప్రజలు సంతోషంగా ఉన్నారని, ప్రజల పూర్తి మద్దతు కాంగ్రెస్‌కే ఉందని ఆంజనేయులు గౌడ్ పేర్కొన్నారు. ఈ సమావేశంలో మునిసిపల్ చైర్‌పర్సన్ కానుగురాధిక, వైస్ చైర్మన్ నరేష్ గౌడ్, మెదక్ కాంగ్రెస్ పార్టీ అధ్యక్షులు గంగాధర్, బ్లాక్ కాంగ్రెస్ అధ్యక్షులు హఫీజుద్దీన్ తదితరులు పాల్గొన్నారు.

జిల్లా కలెక్టర్ మరియు డిపిఆర్ఓ ఆదేశాల మేరకు, తెలంగాణ సాంస్కృతిక సారథి కళాకారులు విద్యార్థులకు వివిధ అంశాలపై పాటల ద్వారా అవగాహన కల్పించారు. ఈ కార్యక్రమంలో ప్రభుత్వ పథకాలు, రోడ్డు భద్రత, పర్యావరణ పరిరక్షణ, సైబర్ నేరాల వంటి విషయాలపై దృష్టి సారించారు. ఈ కళాజాత ప్రదర్శనలో ఆకుల మహేందర్, రమేష్ రావు, తిరుపతి, రాము, నాగరాజు, లక్ష్మీనారాయణ, పోశెట్టి, కాశీరాం, సవిత, దివ్య, లతా, శిల్ప, నరేష్ వంటి కళాకారులు పాల్గొన్నారు.