खामगाव : भारतीय राज्यघटनेचे शिल्पकार, भारतरत्न डॉ. बाबासाहेब आंबेडकर यांची , १४ एप्रिल २०२६ रोजी साजरी होणारी १3५ वी जयंती उत्सवात साजरी करण्यासाठी खामगाव शहर सज्ज झाले आहे. या निमित्ताने शहरातील नगरपरिषद मैदान येथील डॉ. बाबासाहेब आंबेडकरांच्या मुख्य पुतळ्याला आणि संपूर्ण परिसराला अतिशय सुंदर व भव्य विद्युत रोषणाई करण्यात आली आहे. नगरपरिषद प्रशासनाच्या वतीने पुतळा परिसरात रंगीबेरंगी दिव्यांची आरास करण्यात आली असून, रात्रीच्या वेळी हे दृश्य अत्यंत विलोभनीय दिसत आहे. निळ्या आणि पांढऱ्या विद्युत माळांच्या प्रकाशझोतात महामानवाचा पुतळा न्हाऊन निघाला आहे. ही रोषणाई पाहण्यासाठी आणि महामानवाला अभिवादन करण्यासाठी आज रात्रीपासूनच नागरिकांनी परिसरात गर्दी करण्यास सुरुवात केली आहे.शहरातील मुख्य पुतळ्याची ही सजावट भीम अनुयायांसाठी आकर्षणाचे केंद्र ठरत आहे. "कोटी कोटी प्रणाम त्या महामानवाला!" अशा शब्दांत नागरिक आपल्या भावना व्यक्त करत आहेत. केवळ रोषणाईच नव्हे, तर स्वच्छतेवरही विशेष भर देण्यात आला असून, संपूर्ण परिसरात एक चैतन्यमय आणि मंगलमय वातावरण निर्माण झाले आहे. १४ एप्रिल रोजी सकाळी ७ वाजेपासूनच विविध सामाजिक संघटना आणि राजकीय पक्षांच्या वतीने पुतळ्याला पुष्पहार अर्पण करून अभिवादन केले. तर दिवसभर शहरातून विविध मिरवणुका आणि सामाजिक उपक्रमांचे आयोजन करण्यात आले आहे.

Shivaji Bhosale

Journalist खामगाव, बुलढाणा, महाराष्ट्र•

15 hrs ago