వీణవంక మండలంలోని విద్యార్థులు చెడు అలవాట్లకు దూరంగా ఉండి, విద్య, క్రీడలు, సృజనాత్మక కార్యక్రమాలపై దృష్టి సారించాలని ఎస్సై ఆవుల తిరుపతి సూచించారు. అంతర్జాతీయ మాదక ద్రవ్యాల వ్యతిరేక దినోత్సవం (జూన్-26) సందర్భంగా, కరీంనగర్ పోలీస్ కమిషనరేట్ ఆధ్వర్యంలో వీణవంక మండలంలోని చల్లూర్ ప్రభుత్వ పాఠశాల, ఘన్ముక్ల మోడల్ పాఠశాలల్లో మాదక ద్రవ్యాల నివారణపై అవగాహన కార్యక్రమం నిర్వహించారు. ఈ కార్యక్రమంలో పోలీసులు, విద్యార్థులకు మాదక ద్రవ్యాల వినియోగం వల్ల కలిగే శారీరక, మానసిక, సామాజిక నష్టాల గురించి వివరించారు. మాదక ద్రవ్యాల అక్రమ రవాణా, వినియోగం, విక్రయాలపై ఏదైనా సమాచారం ఉంటే వెంటనే పోలీసులకు తెలియజేయాలని ఈ సందర్భంగా ప్రజలను కోరారు. విద్యార్థులు, ఉపాధ్యాయులు మరియు పాఠశాల సిబ్బంది ఈ కార్యక్రమంలో పాల్గొని మాదక ద్రవ్యాల నిర్మూలనకు సహకరించాలని విద్యార్థులచే ప్రతిజ్ఞ చేయించారు. ఈ అవగాహన కార్యక్రమంలో పాఠశాల ప్రధానోపాధ్యాయులు, ఉపాధ్యాయులు, పోలీసు సిబ్బంది మరియు విద్యార్థులు పాల్గొన్నారు.

1 hr ago

T. sridhar✍️

వీణవంక, కరీంనగర్, తెలంగాణ•

1 hr ago

టీపీసీసీ ప్రధాన కార్యదర్శి గజ్జల కాంతం, మంథని మాజీ ఎమ్మెల్యే పుట్ట మధు గత బీఆర్ఎస్ ప్రభుత్వ హయాంలో భారీగా అక్రమాస్తులు కూడబెట్టారని సంచలన ఆరోపణలు చేశారు. పుట్ట మధుకు సంబంధించిన దాదాపు రూ.900 కోట్ల ఆస్తుల చిట్టా తమ వద్ద సిద్ధంగా ఉందని కరీంనగర్ నగరంలోని ఆర్అండ్‌బీ అతిథి గృహంలో సోమవారం ఏర్పాటు చేసిన విలేకరుల సమావేశంలో ఆయన వెల్లడించారు. ఈ సందర్భంగా బీఆర్ఎస్ పార్టీ అధినేత కేసీఆర్, కేటీఆర్‌లతో పాటు మాజీ ఎమ్మెల్యే పుట్ట మధుపై తీవ్రస్థాయిలో విరుచుకుపడ్డారు. బీఆర్ఎస్ పార్టీ మూడు వేల కోట్లు దోచుకుంటే, పుట్ట మధుకు తొమ్మిది వందల కోట్ల ఆస్తులు ఎక్కడి నుండి వచ్చాయని గజ్జల కాంతం నిలదీశారు. కేసీఆర్, కేటీఆర్‌లు లక్షల కోట్లు సంపాదిస్తే, గత బీఆర్ఎస్ ఎమ్మెల్యేలు వేల కోట్లు వెనకేశారని ఆరోపించారు. పెద్దపల్లి జెడ్పీ చైర్మన్ కాకముందు పుట్ట మధు ఆస్తులు ఎంత, ప్రస్తుతం ఎంత అనే విషయాలను బహిర్గతం చేయాలని డిమాండ్ చేయడంతో పాటు, ఆయన ఆస్తులపై సమగ్ర విచారణ జరపాలని కోరారు. కేవలం ఒకే ఒక్కసారి ఎమ్మెల్యే అయిన వ్యక్తికి వేల కోట్ల ఆస్తులు ఎలా సాధ్యమని గజ్జల కాంతం ప్రశ్నించారు. నియోజకవర్గంలో ఇసుక దందా, గంజాయి వ్యాపారాలు చేస్తూ అక్రమాలకు పాల్పడ్డారని ఆరోపించారు. గతంలో దళిత వ్యక్తిపై దాడులు చేయించడమే కాకుండా, సంచలనం సృష్టించిన అడ్వకేట్ దంపతుల హత్య ఉదంతం వెనుక ఉన్నది పుట్ట మధు కాదా అని నేరుగా ప్రశ్నించారు. గతంలో మంథని మధును చంపి కాలువలో పడేసింది కూడా పుట్ట మధు అనుచరులేనని ఆయన తీవ్ర ఆరోపణలు చేశారు. దివంగత నేత దుద్దిళ్ల శ్రీపాద రావు పెట్టిన రాజకీయ బిక్షతోనే పుట్ట మధు ఈ స్థాయికి వచ్చారని గుర్తు చేస్తూ, రాష్ట్ర ఐటీ, పరిశ్రమల శాఖ మంత్రి దుద్దిళ్ల శ్రీధర్‌బాబు ఇంటి గేటు వద్ద నిలబడి, ఆయన దయతో జెడ్పీటీసీగా పోటీ చేసే అవకాశం వచ్చిందన్న పాత చరిత్రను గుర్తుంచుకోవాలని హితవు పలికారు. మంత్రి శ్రీధర్‌బాబు గురించి మాట్లాడే నైతిక అర్హత పుట్ట మధుకు లేదని, నోరు అదుపులో పెట్టుకొని మాట్లాడాలని హెచ్చరించారు. తాను గనుక నోరు తెరిస్తే పుట్ట మధు తట్టుకోలేక ఊరేసుకునే పరిస్థితి వస్తుందని తీవ్ర హెచ్చరికలు జారీ చేశారు. బీఆర్ఎస్ పదేళ్ల పాలనలో రాష్ట్రాన్ని భారీ అప్పుల ఊబిలోకి నెట్టి ప్రజాధనాన్ని దోచుకుందని గజ్జల కాంతం ఆరోపించారు. మాజీ ముఖ్యమంత్రి కేసీఆర్ నేతృత్వంలోని గత ప్రభుత్వం రాష్ట్రాన్ని సుమారు రూ.8 లక్షల కోట్ల అప్పుల పాల్జేసిందని, అందులో రూ.3 లక్షల కోట్లను దోచుకున్నారని విమర్శించారు. కాళేశ్వరం ప్రాజెక్టు పేరిట రూ.1.50 లక్షల కోట్ల వ్యయంలో లక్ష కోట్ల రూపాయల మేర అవినీతి జరిగిందని పేర్కొన్నారు. హైదరాబాద్‌లో వేల కోట్ల విలువైన సుమారు 30 వేల ఎకరాల భూములను కూడా ఆక్రమించారని ఆయన మండిపడ్డారు. రాబోయే రోజుల్లో ప్రజలు బీఆర్ఎస్ పార్టీని పూర్తిగా బొంద పెడతారని, అది బీజేపీలో విలీనం కావడం ఖాయమని ఆయన రాజకీయ జోస్యం చెప్పారు. పదేళ్ల పాటు దొర కుటుంబాన్ని నమ్మి మోసపోయిన ప్రజలు ఇకపై ఆ పార్టీని మరో పదేళ్లయినా నమ్మే పరిస్థితి లేదని గజ్జల కాంతం స్పష్టం చేశారు. ఈ విలేకరుల సమావేశంలో కాంగ్రెస్ పార్టీ నాయకులు సముద్రాల అజయ్, కేశవేని రవీందర్ యాదవ్, తదితరులు పాల్గొన్నారు.

OM NAMSHIVAYA

Karimnagar, Telangana•

3 hrs ago