କେନ୍ଦୁଝର ଜିଲ୍ଲା ଦେଇ ଯାଇଥିବା NH-520 ଜାତୀୟ ରାଜପଥର ଭଦ୍ରାସାହି ଠାରୁ ଗୁଆଲି ପର୍ଯ୍ୟନ୍ତ ଅଂଶରେ ଅବୈଧ ପାର୍କିଂ ସମସ୍ୟା ଦିନକୁ ଦିନ ବଢ଼ିବାରେ ଲାଗିଛି। ରାଜପଥର ଉଭୟ ପାର୍ଶ୍ୱରେ ଶତାଧିକ ଟ୍ରକ, ହାଇୱା ଏବଂ ଅନ୍ୟାନ୍ୟ ଭାରୀ ଯାନ ଘଣ୍ଟା ଘଣ୍ଟା ଧରି ଛିଡ଼ା ହୋଇ ରହୁଥିବାରୁ ଯାତାୟାତରେ ବାଧା ସୃଷ୍ଟି ହେବା ସହ ଦୁର୍ଘଟଣା ଆଶଙ୍କା ବଢ଼ୁଛି। ସର୍ବୋଚ୍ଚ ନ୍ୟାୟାଳୟ ଜାତୀୟ ରାଜପଥରେ ଭାରୀ ଯାନର ଅବୈଧ ପାର୍କିଂ ଉପରେ କଡ଼ା ରୋକ ଲଗାଇ କେବଳ ନିର୍ଦ୍ଦିଷ୍ଟ ପାର୍କିଂ ବେ ଓ ଟ୍ରକ ଟର୍ମିନାଲରେ ଗାଡ଼ି ରଖିବାକୁ ନିର୍ଦ୍ଦେଶ ଦେଇଛନ୍ତି। ସୁପ୍ରିମକୋର୍ଟଙ୍କ ଏହି ନିର୍ଦ୍ଦେଶ ସତ୍ତ୍ୱେ NH-520 ରେ ଅନେକ ସ୍ଥାନରେ ରାସ୍ତା କଡ଼ରେ ଗାଡ଼ି ପାର୍କିଂ ହେଉଥିବା ଦେଖିବାକୁ ମିଳୁଛି। ବିଶେଷ କରି ରାତି ସମୟରେ ରାସ୍ତା ଉପରେ ଛିଡ଼ା ହୋଇଥିବା ଭାରୀ ଯାନ ଯୋଗୁଁ ଦୁର୍ଘଟଣାର ସମ୍ଭାବନା ବଢ଼ୁଥିବାରୁ ସାଧାରଣ ଲୋକ ଚିନ୍ତା ପ୍ରକାଶ କରିଛନ୍ତି। ରାଜ୍ୟ ସରକାର ଏବଂ ପରିବହନ ବିଭାଗ ଟ୍ରକ ଟର୍ମିନାଲ କାର୍ଯ୍ୟକ୍ଷମ କରିବା ସହ ରାସ୍ତା କଡ଼ରେ ପାର୍କିଂ ରୋକିବାକୁ ପଦକ୍ଷେପ ନେଉଥିବା କହୁଥିଲେ ମଧ୍ୟ ବାସ୍ତବ ଚିତ୍ର ଭିନ୍ନ ଥିବା ଅଭିଯୋଗ ହେଉଛି। ସ୍ଥାନୀୟ ଅଞ୍ଚଳବାସୀଙ୍କ ଦାବି ରହିଛି ଯେ, NH-520 ରେ ଏହି ଅବୈଧ ପାର୍କିଂ ତୁରନ୍ତ ବନ୍ଦ କରାଯାଉ ଏବଂ ନିୟମ ଉଲ୍ଲଂଘନକାରୀଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ନିଆଯାଉ। ଅନ୍ୟଥା, ଆଗାମୀ ଦିନରେ ଆହୁରି ବଡ଼ ଦୁର୍ଘଟଣା ଘଟିବାର ଆଶଙ୍କା ରହିଛି।

କେନ୍ଦୁଝର ଜିଲ୍ଲା ଚମ୍ପୁଆ ଅଞ୍ଚଳରେ ରାଜ୍ୟ ସରକାରଙ୍କ ସ୍ୱଚ୍ଛ ଶାସନ ଦାବି ଉପରେ ଏକ ବଡ଼ଧରଣର କୁଠାରଘାତ କରାଯାଉଛି। ବାରିଆ ଥାନା ଅଧୀନ ଉଚ୍ଚବାଲି ପଞ୍ଚାୟତର ମାଳିପଶି ଗ୍ରାମ ଏବଂ ଜ୍ୟୋତିପୁର ଘାଟରେ ସରକାରୀ ନିୟମକୁ ଖୋଲାଖୋଲି ଭାବେ ଉଲ୍ଲଂଘନ କରି ବେଆଇନ ବାଲି କାରବାର ଜାରି ରହିଛି। ଅଭିଯୋଗ ଅନୁଯାୟୀ, ୨୦୨୨-୨୩ ମସିହାରେ ଜ୍ୟୋତିପୁର ବାଲିଘାଟକୁ ସରକାରୀ ନିଲାମ ଦିଆଯାଇଥିଲେ ମଧ୍ୟ, ଲିଜ୍‌ଧାରୀ ନିଜ ସୀମା ବାହାରୁ, ବିଶେଷ କରି ମାଳିପଶି ଗ୍ରାମରୁ ବାଲି ଜୋର-ଜବରଦସ୍ତ ଲୁଟ୍ କରୁଛନ୍ତି। ଏହାସହ ପଡ଼ୋଶୀ ମୟୂରଭଞ୍ଜ ଜିଲ୍ଲାର ଆଦିପୁର ଗ୍ରାମ ସୀମା ପଟୁ ମଧ୍ୟ ବାଲି ଚୋରି ଚାଲିଛି। ଏହି ବେଆଇନ ବାଲି ଉତ୍ତୋଳନ ଉଚ୍ଚବାଲି ପଞ୍ଚାୟତର ଜଳ ଯୋଗାଣ ପ୍ରକଳ୍ପ 'ବସୁଧା'କୁ ସମ୍ପୂର୍ଣ୍ଣ ରୂପେ ଠପ୍ କରିଦେଇଛି। ବୈତରଣୀ ନଦୀରୁ କୋଟି କୋଟି ଟଙ୍କା ବ୍ୟୟରେ ୯ଟି ଗ୍ରାମକୁ ପାଣି ସଂଯୋଗ କରିବା ପାଇଁ ଉଦ୍ଦିଷ୍ଟ ଏହି ପ୍ରକଳ୍ପ, ନିଲାମଧାରୀଙ୍କ ଦ୍ୱାରା ଅତି ଗଭୀରରେ ବାଲି ଉତ୍ତୋଳନ ହେତୁ ବନ୍ଦ ହୋଇଯାଇଛି, ଫଳରେ ଗ୍ରାମବାସୀଙ୍କୁ ବୁନ୍ଦାଏ ପାଣି ପାଇଁ ୧ରୁ ୨ କିଲୋମିଟର ଦୌଡ଼ିବାକୁ ପଡୁଛି। ସରକାରୀ ନିୟମ ଅନୁସାରେ ନଦୀର ପୋଲ, ବନ୍ଧ ଓ ଜଳସେଚନ ପ୍ରକଳ୍ପର ୨୦୦ରୁ ୫୦୦ ମିଟର ଭିତରେ ବାଲି ଉଠାଇବା ମନା ହୋଇଥିବାବେଳେ ଏଠାରେ ଏହି ନିୟମର ଖୋଲାଖୋଲି ଉଲ୍ଲଂଘନ କରାଯାଉଛି। ବାଲି ମାଫିଆମାନେ ନିର୍ଦ୍ଧାରିତ ରାସ୍ତା ବ୍ୟବହାର ନକରି ଗ୍ରାମ୍ୟ ଜଙ୍ଗଲର ଗଛ କାଟି ନୂଆ ରାସ୍ତା ତିଆରି କରୁଛନ୍ତି ଏବଂ ଚାଷ ଜମି ଉପରେ ଦାଦାଗିରି କରି ବାଲି ଗାଡ଼ି ଚଳାଇ ଏକର ଏକର ଚାଷ ଜମି ନଷ୍ଟ କରୁଛନ୍ତି। ସ୍ଥାନୀୟ ଚାଷୀ ବିରୋଧ କଲେ ଲିଜ୍‌ଧାରୀ ଓ ତାଙ୍କ ଗୁଣ୍ଡାବାହିନୀ ସେମାନଙ୍କୁ ଜୀବନରୁ ମାରିଦେବାକୁ ଧମକ ଦେଉଥିବା ଅଭିଯୋଗ ହୋଇଛି। ସରକାରୀ ଗାଇଡଲାଇନ ଅନୁଯାୟୀ, ବାଲି ଉତ୍ତୋଳନ କେବଳ ଦିନରେ (ସୂର୍ଯ୍ୟୋଦୟରୁ ସୂର୍ଯ୍ୟାସ୍ତ) ହେବା ଉଚିତ ଏବଂ ରାତିରେ ସମ୍ପୂର୍ଣ୍ଣ ନିଷେଧ। କିନ୍ତୁ ଏଠାରେ ଦିନରାତି ବାଲି ଲୁଟ୍ ଚାଲିଛି। ଜେସିବି କିମ୍ବା ବଡ଼ ପୋକ୍‌ଲିନ ମେସିନ ସାହାଯ୍ୟରେ ଗଭୀର ଖନନ ବାରଣ ଥିବାବେଳେ, ବେଆଇନ ଭାବେ ବଡ଼ ବଡ଼ ମେସିନ ଲଗାଇ ଭୂତଳ ଜଳସ୍ତରଠାରୁ ଅଧିକ ଗଭୀରତାକୁ ଖୋଳାଯାଉଛି। ରାସ୍ତାରେ ପ୍ରଦୂଷଣ ରୋକିବା ପାଇଁ ଜଳ ସିଞ୍ଚନ, ଗାଡ଼ିରେ ତ୍ରିପାଲ ଢାଙ୍କିବା, ଜିପିଏସ୍, ଓଜନ ମେସିନ ଏବଂ ପ୍ରବେଶ ପଥରେ ଲାଇଭ୍ ସିସିଟିଭି କ୍ୟାମେରା ବାଧ୍ୟତାମୂଳକ ଥିଲେ ମଧ୍ୟ ଏସବୁ ନିୟମ ପାଳନ କରାଯାଉନାହିଁ। ବିନା ସରକାରୀ ରସିଦରେ ୧୦/୧୨ ଚକିଆ ଟ୍ରକ ଯୋଗେ ବାଲି ଚାଲାଣ କରି ଓଡ଼ିଶା ସରକାରଙ୍କ କୋଟି କୋଟି ଟଙ୍କାର ରାଜସ୍ୱ ହାନି କରାଯାଉଛି। ଏହି ସଂଘାତିକ ବେଆଇନ କାର୍ଯ୍ୟ ବିରୋଧରେ ମାଳିପଶି ଗ୍ରାମବାସୀ ଏକତ୍ରିତ ହୋଇ ଜିଲ୍ଲାପାଳଙ୍କ ନିକଟରେ ଲିଖିତ ଅଭିଯୋଗ କରିଛନ୍ତି। ଏହି ଅଭିଯୋଗ ପତ୍ରର ନକଲ ଓଡ଼ିଶାର ରାଜସ୍ୱ ମନ୍ତ୍ରୀ, କେନ୍ଦୁଝର ଆରକ୍ଷୀ ଅଧୀକ୍ଷକ, କେନ୍ଦୁଝର ବନଖଣ୍ଡ ଅଧିକାରୀ, ଚମ୍ପୁଆ ଉପଜିଲାପାଳ, ଚମ୍ପୁଆ ତହସିଲଦାର ଏବଂ ଖଣି ଉପନିର୍ଦ୍ଦେଶକଙ୍କୁ ମଧ୍ୟ ପ୍ରେରଣ କରାଯାଇଛି। ଏ ସମ୍ପର୍କରେ ଭାରପ୍ରାପ୍ତ ଖଣି ନିର୍ଦ୍ଦେଶକଙ୍କୁ ପଚାରିବାରୁ ସେ କହିଛନ୍ତି ଯେ, ଅଭିଯୋଗକୁ ଅନୁଧ୍ୟାନ କରାଯାଇଛି ଏବଂ ସ୍ଥିତିର ମିଳିତ ଯାଞ୍ଚ କରିବା ପାଇଁ ଚମ୍ପୁଆ ଖଣି ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି, ରିପୋର୍ଟ ଆସିବା ପରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ସବୁ ଜାଣିଶୁଣି ମଧ୍ୟ ଖଣି ବିଭାଗ ଓ ସ୍ଥାନୀୟ ପ୍ରଶାସନ ଘୁଘୁଡ଼ି ମାରି ଶୋଇଥିବା ଭଳି ଅଭିନୟ କରୁଛି ବୋଲି ଅଭିଯୋଗ ହୋଇଛି, ଯାହା ସରକାରଙ୍କୁ ବଦନାମ କରିବାରେ ବାବୁମାନଙ୍କ ମାହିରପଣିଆକୁ ପଦାରେ ପକାଇଛି। ଏବେ ପ୍ରଶ୍ନ ଉଠୁଛି ଯେ, ବାଲିଘାଟ ଲିଜ୍ ଦେବା ସମୟରେ ଖଣି ବିଭାଗ କ'ଣ ଆଖି ବୁଜି ଦେଇଥିଲା? ନିୟମର ଖୋଲା ଉଲ୍ଲଂଘନ କରୁଥିବା ଏହି ମାଫିଆଙ୍କ ପଛରେ କେଉଁ ପ୍ରଭାବଶାଳୀ ନେତା ବା ବାବୁଙ୍କ ହାତ ରହିଛି? ଜିଲ୍ଲା ପ୍ରଶାସନ ତଦନ୍ତ ନାମରେ କେବଳ ସମୟ ଗଡ଼ାଉଛି ନା ସ୍ଥାନୀୟ ଚାଷୀ ଓ ଜନସାଧାରଣଙ୍କୁ ନ୍ୟାୟ ମିଳିବ, ତାହା ଦେଖିବାକୁ ବାକି ରହିଲା।

କେରୀ ଗ୍ରାମର ଜଣାଶୁଣା ସୋସିଆଲ ମିଡିଆ ଷ୍ଟାର୍ ତଥା ଭାଇରାଲ୍ ବୟ ପ୍ରଦୀପ କୁମାର ନିଜର ନିଆରା ପ୍ରତିଭା ଏବଂ ଅଲଗା ଅନ୍ଦାଜ୍ ପାଇଁ ସବୁବେଳେ ଚର୍ଚ୍ଚାରେ ରୁହନ୍ତି। ଏଥର ସେ ପୁଣି ଥରେ ଏକ ସୁନ୍ଦର ନାରୀ ବେଶ ବା 'ଝିଅ ଗେଟ୍‌ଅପ୍'ରେ ସାମ୍ନାକୁ ଆସି ଇଣ୍ଟରନେଟ୍‌ରେ ହଲଚଲ ସୃଷ୍ଟି କରିଛନ୍ତି। ତାଙ୍କର ଏହି ନୂଆ ଅବତାର ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଛି, କାରଣ ଏହି ଝିଅ ବେଶରେ ତାଙ୍କୁ ଚିହ୍ନିବା ମୁସ୍କିଲ୍ ହୋଇପଡ଼ିଛି ଏବଂ ଭିଡିଓଟି ସୋସିଆଲ ମିଡିଆରେ ବେଶ୍ ଭାଇରାଲ୍ ହେବାରେ ଲାଗିଛି।

ମୟୁରଭଞ୍ଜ ଜିଲ୍ଲାର କରଞ୍ଜିଆ ଉପଖଣ୍ଡ ଅଞ୍ଚଳରେ କାଳ ବୈଶାଖୀର ଭୀଷଣ ତାଣ୍ଡବ ଦେଖିବାକୁ ମିଳିଛି। ଗତ ଦୁଇ ଦିନ ହେବ ଏଠାରେ ପ୍ରବଳ ବର୍ଷା ସାଙ୍ଗକୁ ଘୁର୍ଣ୍ଣିଝଡ଼ ଯୋଗୁଁ ବ୍ୟାପକ କ୍ଷୟକ୍ଷତି ଘଟିଛି। ଏହି ପ୍ରାକୃତିକ ବିପର୍ଯ୍ୟୟରେ ଘର ଭାଙ୍ଗିଯାଇଥିବା ବେଳେ ସୋଲାର ପ୍ଲେଟଗୁଡ଼ିକ ଉଡ଼ିଯାଇଛି ଏବଂ ବଡ଼ ବଡ଼ ଗଛ ଉପୁଡ଼ି ରାସ୍ତା ଅବରୋଧ ହୋଇଛି। ଆଜି ମଧ୍ୟ କରଞ୍ଜିଆ ବ୍ଲକର କଙ୍କଡା, କୁରୁଳିଆ, କୁଆଁରୀପୋଲି, ଅନ୍ଧାରଝରି, ଡୁମୁରିଆ, ଘୋଡାଘାଗରୀ ଭଳି ଅନେକ ଗ୍ରାମରେ ଝଡ଼ତୋଫାନ ଯୋଗୁଁ ବହୁତ କ୍ଷୟକ୍ଷତି ହୋଇଥିବା ଜଣାପଡ଼ିଛି। କଙ୍କଡା ଗ୍ରାମରେ ଦାଶରଥୀ ମହାନ୍ତଙ୍କ ଘର ଛାତ ଉପରେ ଲାଗିଥିବା ସୋଲାର ପ୍ଲେଟ ଏବଂ ଗୋଟିଏ ଚାଳ ଘର ସମ୍ପୂର୍ଣ୍ଣ ନଷ୍ଟ ହୋଇଯାଇଛି। ଏହା ବ୍ୟତୀତ ଗ୍ରାମର ଅନେକ ଘରର ଛାତ ମଧ୍ୟ ଆଂଶିକ ଭାବେ ନଷ୍ଟ ହୋଇଥିବା ସୂଚନା ମିଳିଛି। ଏହି କ୍ଷୟକ୍ଷତିକୁ ଦୃଷ୍ଟିରେ ରଖି ରାଜସ୍ୱ ବିଭାଗ ଏହାର ସଠିକ୍ ତଦନ୍ତ କରି ଆଦିବାସୀ ଏବଂ ଗରିବ ଲୋକଙ୍କୁ ତୁରନ୍ତ କ୍ଷତିପୂରଣ ଯୋଗାଇ ଦେବା ପାଇଁ ସାଧାରଣରେ ଦାବି ହୋଇଛି।

ଆଜି ମଳ ପୂର୍ଣ୍ଣିମା ଅବସରରେ ଆକାଶରେ ଏକ ନୀଳ ଜହ୍ନ ଦେଖିବାକୁ ମିଳିଛି। ଏହି ବିରଳ ଦୃଶ୍ୟକୁ ନେଇ ଅଯୋଧ୍ୟାକୁ ଆସିଥିବା ପର୍ଯ୍ୟଟକମାନେ ନିଜ ନିଜ ପ୍ରତିକ୍ରିୟା ପ୍ରକାଶ କରିଛନ୍ତି।

୩୧ ମେ ୨୦୨୬ ତାରିଖ ପାଇଁ ପବିତ୍ର ନ୍ୟୁଜ୍ ଓଡ଼ିଶା ପକ୍ଷରୁ ସକାଳ ବୁଲେଟିନ୍ ପ୍ରକାଶ ପାଇଛି, ଯେଉଁଥିରେ ସକାଳର ପ୍ରମୁଖ ଖବର ସ୍ଥାନ ପାଇଛି।

ଘଷିପୁରା ଥାନା ଅନ୍ତର୍ଗତ ଶାଳପଡା ନୂଆ କଲୋନୀର ମଧୁବନରେ ଏକ ନିଛାଟିଆ ସ୍ଥାନରେ ବ୍ରାଉନ ସୁଗାର କାରବାର ଚାଲିଥିବା ବେଳେ ସ୍ଥାନୀୟ ମହିଳାମାନେ ଜଣେ ଯୁବକକୁ କାବୁ କରିଛନ୍ତି। ଯୁବକ ଜଣକ ବ୍ରାଉନ ସୁଗାର ସେବନ କରିବା ସହ ଏହାର ବେପାର ମଧ୍ୟ କରୁଥିଲା। ମହିଳାମାନେ ତାଙ୍କୁ ଘେରିଯାଇ କାବୁ କରିବା ସହ ତାଙ୍କ ନିକଟରୁ ୩୦ରୁ ଉର୍ଦ୍ଧ୍ବ ବ୍ରାଉନ ସୁଗାର ପ୍ୟାକେଟ ଜବତ କରିଛନ୍ତି।