தூத்துக்குடி மாவட்ட கண்காணிப்பாளர் அலுவலகம் முன்பு செய்தியாளர்களைச் சந்தித்த இரண்டு பெண்கள், பத்திரிக்கையாளர் என கூறிக்கொண்ட ஒருவர் தங்களுக்கு மோசடி செய்ததாகக் குற்றம்சாட்டினர். ஒரே வீட்டை காட்டி தங்களுக்கு தலா இருவரிடமும் 12 லட்சம் ரூபாய் வரை பெற்றதாக அந்தப் பெண்கள் தெரிவித்தனர்.

தூத்துக்குடி மாவட்டம் கோவில்பட்டி நகரில் அதிக போக்குவரத்து நெரிசல் மற்றும் விபத்துகளை ஏற்படுத்தும் மந்திதோப்பு சாலையை விரிவாக்கம் செய்யக் கோரியும், முற்றிலும் சேதமடைந்து குண்டும் குழியுமாக உள்ள சாலையை நகராட்சி நிர்வாகம் உடனடியாக சீரமைக்க வலியுறுத்தியும் இந்திய கம்யூனிஸ்ட் கட்சியினர் சாலை மறியல் போராட்டத்தில் ஈடுபட்டனர். அக்கட்சியின் தாலூகா செயலாளர் பாபு தலைமையில், மந்திதோப்பு சாலையில் பால்பண்ணை அருகே நடைபெற்ற இந்தப் போராட்டத்தில் கட்சியினர் தங்கள் கோரிக்கைகளை வலியுறுத்தி கண்டன கோஷங்களை எழுப்பினர். இது குறித்து தகவல் அறிந்த மேற்கு காவல்நிலைய போலீசார் சம்பவ இடத்திற்கு விரைந்து சென்று போராட்டத்தில் ஈடுபட்டவர்களை அப்புறப்படுத்தினர்.

தென்காசி மாவட்டத்தில் உள்ள முக்கிய சுற்றுலாத் தலமான குற்றாலம் அருவிகளில், தொடர் விடுமுறை காரணமாக ஏராளமான சுற்றுலாப் பயணிகள் குவிந்துள்ளனர். இரவு நேரத்திலும் சுற்றுலாப் பயணிகளின் வருகை அதிகரித்துக் காணப்பட்டது, அவர்கள் ஐந்தருவியில் மிகுந்த உற்சாகத்துடன் குளியல் போட்டு மகிழ்ந்தனர்.

கன்னியாகுமரி மாவட்டத்தில் கடந்த சில தினங்களாக வெயில் நிலவி வந்த நிலையில், இன்று காலை முதல் வானம் மப்பும், மந்தாரமுமாக காணப்பட்டது. இந்நிலையில், காலை திடீரென்று மழை பெய்யத் தொடங்கியது. நாகர்கோவில் மாவட்ட ஆட்சியர் அலுவலகம், பார்வதிபுரம், வடசேரி, ஆசாரிப்பள்ளம் உள்ளிட்ட பல்வேறு பகுதிகளில் இந்த மழை பெய்தது. மழையின் காரணமாக மாவட்டத்தில் குளிர்ச்சியான சூழல் நிலவியதால், பொதுமக்கள் மகிழ்ச்சி அடைந்தனர்.

மதுரை, பசுமலை விநாயகர் நகரைச் சேர்ந்த 19 வயதான தேவா மற்றும் முத்துப்பட்டியைச் சேர்ந்த 20 வயதான ரோகித் ஆகியோர் சின்ன உடைப்பு அருகே உள்ள ஒரு தனியார் கல்லூரியில் மூன்றாம் ஆண்டு படித்து வந்தனர். நேற்று (ஜூன் 25) காலை இவர்கள் இருவரும் கல்லூரிக்குச் செல்வதற்காக இருசக்கர வாகனத்தில் புறப்பட்டனர். இந்த வாகனத்தை ரோகித் ஓட்டிச் சென்றார். பெருங்குடி கணேசபுரம் அருகே வந்தபோது, இருசக்கர வாகனம் திடீரென கட்டுப்பாட்டை இழந்து சாலையின் ஓரத்தில் இருந்த தடுப்புச் சுவரில் மோதியது. இந்த விபத்தில் வாகனத்தின் பின்னால் அமர்ந்திருந்த தேவா தூக்கி வீசப்பட்டு தலையில் பலத்த காயம் அடைந்தார். ரோகித்தும் படுகாயமடைந்தார். உயிருக்குப் போராடிய நிலையில், தேவா மதுரை அரசு ராஜாஜி மருத்துவமனைக்குக் கொண்டு செல்லும் வழியிலேயே உயிரிழந்தார். ரோகித் தற்போது சிகிச்சை பெற்று வருகிறார். இந்த சாலை விபத்து குறித்து போக்குவரத்து புலனாய்வு போலீசார் விசாரணை நடத்தி வருகின்றனர்.

சிவகங்கை மாவட்டம் திருவேம்பத்தூர் அருகே உள்ள நீடோடை மாரியம்மன் கோவில் திருவிழாவை முன்னிட்டு, மாட்டு வண்டி எல்லை பந்தயம் உற்சாகமாக நடைபெற்றது. இந்தப் போட்டியில் சிவகங்கை, மதுரை, புதுக்கோட்டை, தூத்துக்குடி மற்றும் இராமநாதபுரம் மாவட்டங்களைச் சேர்ந்த மொத்தம் 31 ஜோடி மாடுகள் பங்கேற்று தங்களது திறமையை வெளிப்படுத்தின. இந்த மாட்டு வண்டி பந்தயம் பெரிய மாடு, சிறிய மாடு மற்றும் பூஞ்சிட்டு என மூன்று பிரிவுகளாக நடத்தப்பட்டது. பெரிய மாட்டுப் பிரிவில் 11 ஜோடி மாடுகள் 8 மைல் தூரத்திற்கும், சிறிய மாட்டுப் பிரிவில் 16 ஜோடி மாடுகள் 6 மைல் தூரத்திற்கும், பூஞ்சிட்டுப் பிரிவில் 11 ஜோடி மாடுகள் 5 மைல் தூரத்திற்கும் பந்தய எல்லையாக நிர்ணயிக்கப்பட்டு போட்டியிட்டன. விறுவிறுப்பாக நடைபெற்ற இந்தப் போட்டியில், சீறிப்பாய்ந்த காளைகள் ஒன்றையொன்று முந்திச் செல்ல முயன்ற காட்சிகள் பார்வையாளர்களை வெகுவாகக் கவர்ந்தன. காளையார்கோவில், புலியடித்தம்பம், திருவேம்பத்தூர் மற்றும் சுற்றுவட்டாரப் பகுதிகளைச் சேர்ந்த ஏராளமான பொதுமக்கள் சாலையின் இருபுறங்களிலும் திரண்டு நின்று போட்டியை உற்சாகமாக கண்டுகளித்தனர். போட்டியின் முடிவில், முதல் நான்கு இடங்களைப் பிடித்த மாட்டு வண்டிகளின் உரிமையாளர்கள் மற்றும் சாரதிகளுக்கு ரொக்கப் பரிசுகளும் கோப்பைகளும் வழங்கப்பட்டன.

தூத்துக்குடியில் செய்தியாளர்களிடம் பேசிய சிறு, குறு மற்றும் நடுத்தர தொழில் துறை அமைச்சர் மதன் ராஜா, தமிழகத்தில் இனிவரும் காலங்களில் மாவட்ட இளைஞர்களுக்கு அவர்களது சொந்தப் பகுதிகளிலேயே வேலைவாய்ப்புகளை வழங்கும் வகையில் தேவையான நடவடிக்கைகள் தீவிரமாக மேற்கொள்ளப்படும் என்று தெரிவித்தார். பொதுமக்கள் அனைவரும் பயன்பெறும் விதமாக இந்தத் திட்டங்கள் மிகச் சிறப்பான முறையில் அமைக்கப்படும் என்றும், இதன் மூலம் தூத்துக்குடி மாவட்டத்தின் தொழில் வளர்ச்சி மிகச் சிறப்பாக அமையும் என்றும் அவர் உறுதிபடக் கூறினார்.

மதுரை தெப்பக்குளம் கிழக்குப் பகுதியில் உள்ள ஒரு தனியார் திருமண மகாலில், சென்னையைச் சேர்ந்த மிக்கி ஃபேஷன் நிறுவனம் சிறப்புத் தள்ளுபடி விற்பனையை ஏற்பாடு செய்துள்ளது. தொடர் விடுமுறை தினங்களான ஜூன் 26, 27, 28 ஆகிய மூன்று நாட்களுக்கு நடைபெறும் இந்த விற்பனையில், பெண்களுக்கான அனைத்து வகை ஆடைகளும் ₹35 முதல் ₹500 வரையிலான விலைகளில் காட்சிப்படுத்தப்பட்டுள்ளன. இன்று காலை முதலே ஏராளமான பெண்கள் இந்த தள்ளுபடி ஆடைகளை வாங்குவதற்காகக் குவிந்து வருகின்றனர். இந்நிறுவனத்தைச் சேர்ந்த தினேஷ் என்பவர் தெரிவித்த தகவலின்படி, சுமார் பத்து லட்சம் ரூபாய் மதிப்பிலான துணிமணிகள் தற்போது விற்பனைக்குக் கொண்டுவரப்பட்டுள்ளன. விற்பனை சிறப்பாகத் தொடரும் பட்சத்தில், மேலும் அதிக துணிமணிகள் சென்னையிலிருந்து வரவழைக்கப்பட உள்ளதாகவும் அவர் குறிப்பிட்டுள்ளார்.

தேனி மாவட்டம் ஆண்டிபட்டி அருகே மேற்கு தொடர்ச்சி மலை அடிவாரத்தில் உள்ள திம்மரச நாயக்கனூரில் அமைந்துள்ள நூற்றாண்டு பழமையான கோகுலகிருஷ்ணன் கோவிலில், ஆகம விதிப்படி 12 ஆண்டுகளுக்கு ஒருமுறை நடத்தப்பட வேண்டிய கும்பாபிஷேக விழா, இன்று வளர்பிறை துவாதசி தினமான வெள்ளிக்கிழமை வெகு விமரிசையாக நடைபெற்றது. இந்தக் கோவிலில் கடைசியாக கடந்த 2014ஆம் ஆண்டு கும்பாபிஷேகம் நடைபெற்றிருந்தது. விழாவிற்கு முன்னதாக, கடந்த ஆறு மாதங்களாக கோவிலின் புனரமைப்பு பணிகள் முழுமையாக நிறைவு பெற்றன. கும்பாபிஷேக நிகழ்ச்சியின் ஒரு பகுதியாக, மூன்று கால யாக பூஜைகள் நடத்தப்பட்டன. அதனைத் தொடர்ந்து கடங்கள் புறப்பாடாகி, கோவிலின் கலசத்தில் 108 புண்ணிய தீர்த்தங்களில் இருந்து சேகரித்துக் கொண்டுவரப்பட்ட புனித நீர் தெளிக்கப்பட்டு கும்பாபிஷேகம் இனிதே நடைபெற்றது. கும்பாபிஷேகத்தை தொடர்ந்து, கோவிலில் மூலவர் பிரதிஷ்டை செய்யப்பட்டு, அபிஷேகங்கள் நடத்தப்பட்டு மகாதீப ஆராதனை காட்டப்பட்டது. பின்னர், பக்தர்களின் மீது தீர்த்தங்கள் தெளித்து தீர்த்தவாரி நிகழ்ச்சி நடைபெற்றது. இந்த விழாவில் ஆண்டிபட்டி மற்றும் சுற்றுவட்டாரப் பகுதியைச் சேர்ந்த ஏராளமான பக்தர்கள் கலந்து கொண்டதால், ஆயிரத்திற்கும் மேற்பட்டோருக்கு அன்னதானம் வழங்கப்பட்டதுடன், பாதுகாப்பு கருதி போலீசார் பலத்த பாதுகாப்பு ஏற்பாடுகளைச் செய்திருந்தனர்.

தூத்துக்குடி நகரிலுள்ள ரயில் நிலையத்தை அடையும் வழியில் அமைந்துள்ள ஒன்று மற்றும் இரண்டாம் ரயில்வே கேட்டுகள் பகல் வேளைகளில் அடிக்கடி அடைக்கப்படுவதால் பொதுமக்களுக்கு பெரும் சிரமம் ஏற்பட்டுள்ளது. குறிப்பாக, பள்ளி மாணவர்கள் பள்ளிக்குச் செல்லும் காலை மற்றும் மாலை நேரங்களில் இந்த கேட்டுகள் மூடப்படுவதால் நிலைமை மிகவும் மோசமாகிறது. இந்தத் தொடர்ச்சியான கேட் அடைப்பு காரணமாக, பள்ளி மாணவர்கள் ஆபத்தான நிலையில் ரயில் தண்டவாளங்களைக் கடந்து செல்ல வேண்டிய கட்டாயத்திற்கு ஆளாகின்றனர். மேலும், இருசக்கர வாகனங்களில் பயணிக்கும் பள்ளி மாணவர்கள் மற்றும் பொதுமக்களும் தினமும் சுமார் 20 நிமிடங்கள் வரை தாமதமாகச் செல்ல வேண்டிய அவல நிலைக்குத் தள்ளப்பட்டுள்ளனர். இந்த சிரமங்களை எதிர்கொண்டு வரும் பொதுமக்கள், பள்ளி நேரங்களிலாவது போக்குவரத்து நெரிசலைத் தவிர்க்க உரிய நடவடிக்கை எடுக்க வேண்டும் என்று சம்பந்தப்பட்ட அதிகாரிகளுக்கு கோரிக்கை விடுத்துள்ளனர்.