மதுரை தெப்பக்குளம் கிழக்குப் பகுதியில் உள்ள ஒரு தனியார் திருமண மகாலில், சென்னையைச் சேர்ந்த மிக்கி ஃபேஷன் நிறுவனம் சிறப்புத் தள்ளுபடி விற்பனையை ஏற்பாடு செய்துள்ளது. தொடர் விடுமுறை தினங்களான ஜூன் 26, 27, 28 ஆகிய மூன்று நாட்களுக்கு நடைபெறும் இந்த விற்பனையில், பெண்களுக்கான அனைத்து வகை ஆடைகளும் ₹35 முதல் ₹500 வரையிலான விலைகளில் காட்சிப்படுத்தப்பட்டுள்ளன. இன்று காலை முதலே ஏராளமான பெண்கள் இந்த தள்ளுபடி ஆடைகளை வாங்குவதற்காகக் குவிந்து வருகின்றனர். இந்நிறுவனத்தைச் சேர்ந்த தினேஷ் என்பவர் தெரிவித்த தகவலின்படி, சுமார் பத்து லட்சம் ரூபாய் மதிப்பிலான துணிமணிகள் தற்போது விற்பனைக்குக் கொண்டுவரப்பட்டுள்ளன. விற்பனை சிறப்பாகத் தொடரும் பட்சத்தில், மேலும் அதிக துணிமணிகள் சென்னையிலிருந்து வரவழைக்கப்பட உள்ளதாகவும் அவர் குறிப்பிட்டுள்ளார்.

மதுரை, பசுமலை விநாயகர் நகரைச் சேர்ந்த 19 வயதான தேவா மற்றும் முத்துப்பட்டியைச் சேர்ந்த 20 வயதான ரோகித் ஆகியோர் சின்ன உடைப்பு அருகே உள்ள ஒரு தனியார் கல்லூரியில் மூன்றாம் ஆண்டு படித்து வந்தனர். நேற்று (ஜூன் 25) காலை இவர்கள் இருவரும் கல்லூரிக்குச் செல்வதற்காக இருசக்கர வாகனத்தில் புறப்பட்டனர். இந்த வாகனத்தை ரோகித் ஓட்டிச் சென்றார். பெருங்குடி கணேசபுரம் அருகே வந்தபோது, இருசக்கர வாகனம் திடீரென கட்டுப்பாட்டை இழந்து சாலையின் ஓரத்தில் இருந்த தடுப்புச் சுவரில் மோதியது. இந்த விபத்தில் வாகனத்தின் பின்னால் அமர்ந்திருந்த தேவா தூக்கி வீசப்பட்டு தலையில் பலத்த காயம் அடைந்தார். ரோகித்தும் படுகாயமடைந்தார். உயிருக்குப் போராடிய நிலையில், தேவா மதுரை அரசு ராஜாஜி மருத்துவமனைக்குக் கொண்டு செல்லும் வழியிலேயே உயிரிழந்தார். ரோகித் தற்போது சிகிச்சை பெற்று வருகிறார். இந்த சாலை விபத்து குறித்து போக்குவரத்து புலனாய்வு போலீசார் விசாரணை நடத்தி வருகின்றனர்.

சர்வதேச போதை ஒழிப்பு தினத்தை முன்னிட்டு, விருதுநகர் மாவட்டம் காரியாபட்டியில், காவை தென் இந்திய கட்டுமானம் மற்றும் அமைப்புசாரா தொழிலாளர்கள் முன்னேற்ற நலச்சங்கம் சார்பில், போதை ஒழிப்பு விழிப்புணர்வு நிகழ்ச்சி சிறப்பாக நடைபெற்றது. இந்நிகழ்ச்சிக்கு தொழிற்சங்கத்தின் பொதுச்செயலாளர் முருகேசன் தலைமை வகித்தார். நிகழ்வில் பள்ளி மாணவர்களின் சிலம்பக் கலை நிகழ்ச்சி, போதைப்பொருள் பயன்பாட்டின் தீமைகள் குறித்த விழிப்புணர்வு உரை மற்றும் "போதையில்லா தமிழகத்தை உருவாக்குவோம்" என்ற உறுதிமொழி ஏற்பு நிகழ்ச்சி ஆகியவை இடம்பெற்றன. உயர் நீதிமன்ற வழக்கறிஞர் ஜெயபிரகாஷ் மற்றும் காரியாபட்டி காவல் உதவி ஆய்வாளர் அப்துல் காதர் பாட்ஷா ஆகியோர் சிறப்பு அழைப்பாளர்களாகக் கலந்துகொண்டு, போதைப்பொருட்களின் பாதிப்புகள் குறித்து பொதுமக்கள் மற்றும் மாணவர்களிடையே விழிப்புணர்வு ஏற்படுத்தும் வகையில் உரையாற்றினர். மேலும், நிகழ்ச்சியில் பங்கேற்ற பள்ளி மாணவர்களுக்கு சான்றிதழ்கள், பரிசுகள் மற்றும் இனிப்புகளும் வழங்கிப் பாராட்டப்பட்டது. இந்த நிகழ்ச்சிக்கான ஏற்பாடுகளை காரியாபட்டி நகர துணைத் தலைவர் பாலமுருகன் மற்றும் காரியாபட்டி நகர மகளிரணி செயலாளர் ஸ்ரீதேவி ஆகியோர் செய்திருந்தனர். இதில் அருப்புக்கோட்டை நகர மகளிரணி தலைவி ரேணுகா, பொதுமக்கள் மற்றும் மாணவர்கள் என ஏராளமானோர் கலந்துகொண்டனர்.

சிவகங்கை மாவட்டம் திருவேம்பத்தூர் அருகே உள்ள நீடோடை மாரியம்மன் கோவில் திருவிழாவை முன்னிட்டு, மாட்டு வண்டி எல்லை பந்தயம் உற்சாகமாக நடைபெற்றது. இந்தப் போட்டியில் சிவகங்கை, மதுரை, புதுக்கோட்டை, தூத்துக்குடி மற்றும் இராமநாதபுரம் மாவட்டங்களைச் சேர்ந்த மொத்தம் 31 ஜோடி மாடுகள் பங்கேற்று தங்களது திறமையை வெளிப்படுத்தின. இந்த மாட்டு வண்டி பந்தயம் பெரிய மாடு, சிறிய மாடு மற்றும் பூஞ்சிட்டு என மூன்று பிரிவுகளாக நடத்தப்பட்டது. பெரிய மாட்டுப் பிரிவில் 11 ஜோடி மாடுகள் 8 மைல் தூரத்திற்கும், சிறிய மாட்டுப் பிரிவில் 16 ஜோடி மாடுகள் 6 மைல் தூரத்திற்கும், பூஞ்சிட்டுப் பிரிவில் 11 ஜோடி மாடுகள் 5 மைல் தூரத்திற்கும் பந்தய எல்லையாக நிர்ணயிக்கப்பட்டு போட்டியிட்டன. விறுவிறுப்பாக நடைபெற்ற இந்தப் போட்டியில், சீறிப்பாய்ந்த காளைகள் ஒன்றையொன்று முந்திச் செல்ல முயன்ற காட்சிகள் பார்வையாளர்களை வெகுவாகக் கவர்ந்தன. காளையார்கோவில், புலியடித்தம்பம், திருவேம்பத்தூர் மற்றும் சுற்றுவட்டாரப் பகுதிகளைச் சேர்ந்த ஏராளமான பொதுமக்கள் சாலையின் இருபுறங்களிலும் திரண்டு நின்று போட்டியை உற்சாகமாக கண்டுகளித்தனர். போட்டியின் முடிவில், முதல் நான்கு இடங்களைப் பிடித்த மாட்டு வண்டிகளின் உரிமையாளர்கள் மற்றும் சாரதிகளுக்கு ரொக்கப் பரிசுகளும் கோப்பைகளும் வழங்கப்பட்டன.

தேனி மாவட்டம் ஆண்டிபட்டி அருகே மேற்கு தொடர்ச்சி மலை அடிவாரத்தில் உள்ள திம்மரச நாயக்கனூரில் அமைந்துள்ள நூற்றாண்டு பழமையான கோகுலகிருஷ்ணன் கோவிலில், ஆகம விதிப்படி 12 ஆண்டுகளுக்கு ஒருமுறை நடத்தப்பட வேண்டிய கும்பாபிஷேக விழா, இன்று வளர்பிறை துவாதசி தினமான வெள்ளிக்கிழமை வெகு விமரிசையாக நடைபெற்றது. இந்தக் கோவிலில் கடைசியாக கடந்த 2014ஆம் ஆண்டு கும்பாபிஷேகம் நடைபெற்றிருந்தது. விழாவிற்கு முன்னதாக, கடந்த ஆறு மாதங்களாக கோவிலின் புனரமைப்பு பணிகள் முழுமையாக நிறைவு பெற்றன. கும்பாபிஷேக நிகழ்ச்சியின் ஒரு பகுதியாக, மூன்று கால யாக பூஜைகள் நடத்தப்பட்டன. அதனைத் தொடர்ந்து கடங்கள் புறப்பாடாகி, கோவிலின் கலசத்தில் 108 புண்ணிய தீர்த்தங்களில் இருந்து சேகரித்துக் கொண்டுவரப்பட்ட புனித நீர் தெளிக்கப்பட்டு கும்பாபிஷேகம் இனிதே நடைபெற்றது. கும்பாபிஷேகத்தை தொடர்ந்து, கோவிலில் மூலவர் பிரதிஷ்டை செய்யப்பட்டு, அபிஷேகங்கள் நடத்தப்பட்டு மகாதீப ஆராதனை காட்டப்பட்டது. பின்னர், பக்தர்களின் மீது தீர்த்தங்கள் தெளித்து தீர்த்தவாரி நிகழ்ச்சி நடைபெற்றது. இந்த விழாவில் ஆண்டிபட்டி மற்றும் சுற்றுவட்டாரப் பகுதியைச் சேர்ந்த ஏராளமான பக்தர்கள் கலந்து கொண்டதால், ஆயிரத்திற்கும் மேற்பட்டோருக்கு அன்னதானம் வழங்கப்பட்டதுடன், பாதுகாப்பு கருதி போலீசார் பலத்த பாதுகாப்பு ஏற்பாடுகளைச் செய்திருந்தனர்.

தேனி மாவட்டம் ஆண்டிபட்டி அருகே ரங்கசமுத்திரம் ஊராட்சி ஒன்றிய நிர்வாகத்தின் கீழ் ஜம்புலிப்புத்தூரிலிருந்து ஸ்ரீரங்கபுரம் வரை உள்ள பகுதிகளில், விவசாய விளைநிலங்களுக்கும் பொதுமக்களுக்கும் பயன்படும் வகையில் ₹1.22 கோடி மதிப்பீட்டில் தார் சாலை அமைக்க நிதி ஒதுக்கீடு செய்யப்பட்டது. இப்பகுதியில் வாழ, பருத்தி, மிளகாய் போன்ற பல்வேறு விவசாயப் பொருட்கள் உற்பத்தி செய்யப்படுவதால், விவசாயிகள் தங்கள் விளைபொருட்களை ஏற்றிச் செல்லவும், பொதுமக்கள் போக்குவரத்துக்கும் இந்த இணைப்புச் சாலை மிகவும் முக்கியத்துவம் வாய்ந்தது. சுமார் 8 மாதங்களுக்கு முன்பு ஒப்பந்த அடிப்படையில் சாலை அமைக்கும் பணி தொடங்கப்பட்ட நிலையில், ஜல்லிக்கற்கள் மட்டுமே பரப்பப்பட்டு, அதன் பிறகு பணிகள் முழுமையாக நின்றுவிட்டன. அரைகுறையாக விடப்பட்ட இந்தச் சாலையால் வாகன ஓட்டிகள், விவசாயிகள், பொதுமக்கள் என அனைவரும் பெரும் சிரமத்திற்கு உள்ளாகி வருகின்றனர். ஜல்லிக்கற்கள் மட்டுமே பரப்பப்பட்டிருப்பதால், பாதுகாப்பாக வாகனங்களை ஓட்ட முடியாத நிலை ஏற்பட்டுள்ளது. குறிப்பாக, மருத்துவ சிகிச்சைக்குச் செல்லும் முதியவர்கள் மற்றும் கர்ப்பிணிப் பெண்கள் இந்தச் சாலையில் செல்ல முடியாமல் விபத்து ஏற்படும் அபாயம் உள்ளதுடன், இரவு நேரங்களில் வாகனங்கள் விபத்துக்குள்ளாகி வருவதாகவும் புகார்கள் தெரிவிக்கப்படுகின்றன. இது தொடர்பாக பொதுமக்கள் மற்றும் விவசாயிகள் பலமுறை கோரிக்கை விடுத்தும், ஊராட்சி ஒன்றியம் அலட்சியப் போக்கைக் கடைப்பிடித்து வருவதாகக் குற்றஞ்சாட்டுகின்றனர். இது குறித்து ஊராட்சி ஒன்றிய உதவி செயற்பொறியாளர் நாகராஜன் என்பவரிடம் விளக்கம் கேட்கப்பட்டபோது, நிதி ஒதுக்கீடு செய்யப்பட்டு மூன்று மாதங்களான நிலையில், சாலை போடப் பயன்படுத்தப்படும் தார் விலை அதிகமானதால் தார் சாலை போட முடியவில்லை என்று அலட்சியமாகப் பதிலளித்துள்ளார். மூன்று கிலோமீட்டர் தூரத்திற்கு ₹1.22 கோடி மதிப்பீட்டில் சாலை அமைக்க நிதி ஒதுக்கப்பட்ட நிலையில், இத்தகைய பதில் பொதுமக்களிடையே பெரும் அதிருப்தியையும் அதிர்ச்சியையும் ஏற்படுத்தியுள்ளது. ஆரம்பத்திலேயே சாலை அமைப்பதற்கு திட்டமிட்டுத்தான் நிதி ஒதுக்கீடு செய்யப்பட்டிருக்கும் நிலையில், தார் விலை உயர்ந்ததால் நிதி பற்றவில்லை என்று கூற முடியாது என விவசாயிகள், பொதுமக்கள் மற்றும் சமூக ஆர்வலர்கள் சுட்டிக்காட்டியுள்ளனர். உடனடியாக உள்ளாட்சி நிர்வாகம் உரிய நடவடிக்கை எடுத்து, நிலுவையிலுள்ள தார் சாலைப் பணிகளை விரைந்து முடிக்க வேண்டும் என்றும் அவர்கள் கோரிக்கை விடுத்துள்ளனர்.

சர்வதேச போதைப்பொருள் ஒழிப்பு தினத்தை முன்னிட்டு, தமிழகம் முழுவதும் இளைஞர் நலன் மற்றும் விளையாட்டு மேம்பாட்டுத் துறை சார்பில் மாரத்தான் போட்டிகள் நடைபெற்றன. இதன் ஒரு பகுதியாக, போதைப் பொருள் இல்லாத தமிழகத்தை உருவாக்குவோம் என்ற நோக்கத்தை வலியுறுத்தி தேனி மாவட்டத்திலும் மாரத்தான் போட்டி ஏற்பாடு செய்யப்பட்டிருந்தது. 300-க்கும் மேற்பட்டோர் கலந்துகொண்ட இந்த மாரத்தான் போட்டியை மாவட்ட ஆட்சியர் வைத்தியநாதன் கொடியசைத்து துவக்கி வைத்தார். இருப்பினும், இப்போட்டிக்காக ஏற்பாடு செய்யப்பட்ட விளம்பரப் போஸ்டர்களில், மாரத்தான் போட்டிகள் மதுவிலக்கு மற்றும் ஆயத்தீர்வைத் துறை சார்பில் நடைபெறுவதாக அச்சிடப்பட்டிருந்ததால் குழப்பம் ஏற்பட்டது. மாவட்ட ஆட்சியர் உட்பட அரசு அலுவலர்கள் மற்றும் போட்டியில் கலந்துகொண்ட பொதுமக்கள் அனைவரும் இதனால் குழப்பமடைந்தனர். கடந்த ஆண்டு மதுவிலக்குத் துறை சார்பில் நடைபெற்ற போதைப்பொருள் விழிப்புணர்வு பேரணிக்காக அச்சிடப்பட்ட பழைய விளம்பரப் போஸ்டர்களை மாற்றாமல், விளையாட்டுத் துறை சார்பில் நடைபெற்ற இன்றைய நிகழ்ச்சிக்கும் பயன்படுத்தப்பட்டதே இந்தக் குழப்பத்திற்குக் காரணம் என பின்னர் தெரியவந்தது. குழப்பங்களுக்கு மத்தியிலும் மாரத்தான் போட்டி திட்டமிட்டபடி நடைபெற்றது.

திண்டுக்கல் மாவட்டம், வடமதுரையில் உள்ள உதவி மின் பொறியாளர் அலுவலகத்தில், யாரும் இல்லாத நிலையிலும் மின்விசிறிகள் உள்ளிட்ட மின்சாரப் பொருள்கள் இயங்கிக்கொண்டிருக்கின்றன. அலுவலகத்தில் ஆள் இல்லாதபோதும் மின்சாரம் தொடர்ந்து விரயமாகி வருவதாகக் குற்றச்சாட்டு எழுந்துள்ளது. அரசு அலுவலர்கள் அவரவர் வீடுகளில் மின்சாரத்தைச் சேமிக்காமல் இவ்வாறு செயல்படுவார்களா என்ற கேள்வியும் முன்வைக்கப்பட்டுள்ளது. இது பொதுமக்களிடையே அதிருப்தியை ஏற்படுத்தியுள்ளது.

மதுரை தெப்பக்குளம் கிழக்குப் பகுதியில் உள்ள ஒரு தனியார் திருமண மகாலில், சென்னையைச் சேர்ந்த மிக்கி ஃபேஷன் நிறுவனம் சிறப்புத் தள்ளுபடி விற்பனையை ஏற்பாடு செய்துள்ளது. தொடர் விடுமுறை தினங்களான ஜூன் 26, 27, 28 ஆகிய மூன்று நாட்களுக்கு நடைபெறும் இந்த விற்பனையில், பெண்களுக்கான அனைத்து வகை ஆடைகளும் ₹35 முதல் ₹500 வரையிலான விலைகளில் காட்சிப்படுத்தப்பட்டுள்ளன. இன்று காலை முதலே ஏராளமான பெண்கள் இந்த தள்ளுபடி ஆடைகளை வாங்குவதற்காகக் குவிந்து வருகின்றனர். இந்நிறுவனத்தைச் சேர்ந்த தினேஷ் என்பவர் தெரிவித்த தகவலின்படி, சுமார் பத்து லட்சம் ரூபாய் மதிப்பிலான துணிமணிகள் தற்போது விற்பனைக்குக் கொண்டுவரப்பட்டுள்ளன. விற்பனை சிறப்பாகத் தொடரும் பட்சத்தில், மேலும் அதிக துணிமணிகள் சென்னையிலிருந்து வரவழைக்கப்பட உள்ளதாகவும் அவர் குறிப்பிட்டுள்ளார்.