સુરત જિલ્લા ગ્રામ્ય પોલીસ દ્વારા 'તેરા તુજકો અર્પણ' કાર્યક્રમનું આયોજન કરવામાં આવ્યું.

સુરત જિલ્લા ગ્રામ્ય પોલીસ દ્વારા 'તેરા તુજકો અર્પણ' કાર્યક્રમનું આયોજન કરવામાં આવ્યું.

સરદાર નગરી બારડોલી નગરપાલિકાના વોર્ડ નં. 1 હેઠળ આવતી નહેર કોલોની અને અલંકાર સિનેમા સામેના સ્લમ વિસ્તારના રહેવાસીઓએ શૌચાલય અને પીવાના પાણી જેવી પાયાની સુવિધાઓના ગંભીર અભાવ અંગે વિરોધ દર્શાવ્યો હતો. તેમણે આ સમસ્યાઓને કારણે ભારે હાલાકીનો સામનો કરવો પડી રહ્યો હોવાનું જણાવી બારડોલી નગરપાલિકા ખાતે મોરચો કાઢ્યો હતો. વિસ્તારની મહિલાઓના જણાવ્યા મુજબ, વસાહતમાં કોઈ જાહેર શૌચાલય ન હોવાથી મહિલાઓ, કિશોરીઓ અને ગર્ભવતી મહિલાઓ સહિત તમામને રાત્રિના સમયે ખુલ્લામાં શૌચક્રિયા કરવા જવાની ફરજ પડે છે. આ પરિસ્થિતિને કારણે તેમની સુરક્ષા, સ્વાસ્થ્ય અને ગૌરવ પર પ્રતિકૂળ અસર પડી રહી છે. રહેવાસીઓએ વધુમાં આક્ષેપ કર્યો હતો કે સરકાર "હર ઘર નળ, ઘર ઘર નળ" જેવા દાવાઓ કરતી હોવા છતાં, તેમના વિસ્તારમાં પૂરતું અને નિયમિત પીવાનું પાણી મળતું નથી. ઉપરાંત, ગંદકી, ગટર અને અસ્વચ્છ વાતાવરણ વચ્ચે જીવન જીવવું પડી રહ્યું હોવાથી લોકોમાં ભારે રોષ જોવા મળી રહ્યો છે. આ ગંભીર પ્રશ્નોને લઈને બારડોલી નગરપાલિકાના કોંગ્રેસના કોર્પોરેટર સ્વાતિબેન પટેલ, કાલુ કરીમ શાહ અને કેયુરીબેન ચૌધરીની આગેવાનીમાં મોટી સંખ્યામાં મહિલાઓ અને સ્થાનિક રહેવાસીઓ બારડોલી નગરપાલિકા કચેરીએ પહોંચ્યા હતા. તેમણે ચીફ ઓફિસર મિલનભાઈ પલસાણાને લેખિત રજૂઆત કરી હતી. તેમની મુખ્ય માંગણીઓમાં તાત્કાલિક જાહેર શૌચાલયનું નિર્માણ, પીવાના પાણીની નિયમિત અને પૂરતી વ્યવસ્થા તથા વિસ્તારની સફાઈ અને સ્વચ્છતા અંગે યોગ્ય કાર્યવાહી કરવાનો સમાવેશ થતો હતો. રજૂઆત દરમિયાન, ચીફ ઓફિસર મિલનભાઈ પલસાણાએ રજૂઆતકારોને આશ્વાસન આપતા જણાવ્યું કે વિસ્તાર માટે કાયમી જાહેર શૌચાલય બનાવવાની પ્રક્રિયા હાથ ધરવામાં આવશે અને ત્યાં સુધી તાત્કાલિક રાહતરૂપે હરતું-ફરતું શૌચાલય (મોબાઇલ ટોયલેટ વાન) ઉપલબ્ધ કરાવવામાં આવશે. તેમણે પીવાના પાણીની સમસ્યાનો પણ ઝડપથી નિકાલ લાવવા જરૂરી કાર્યવાહી કરવાની ખાતરી આપી હતી. ચીફ ઓફિસરના આશ્વાસન બાદ રજૂઆત માટે આવેલા લોકોનો તાત્કાલિક રોષ શાંત પડ્યો હતો. જોકે, સ્થાનિકોએ સ્પષ્ટપણે જણાવ્યું હતું કે જો વહેલી તકે સમસ્યાનો કાયમી ઉકેલ નહીં આવે તો આગામી સમયમાં વધુ ઉગ્ર આંદોલન કરવાની ફરજ પડશે.

સુરત જિલ્લાના પલસાણા તાલુકામાં કાયદો અને વ્યવસ્થાની પરિસ્થિતિને વધુ મજબૂત કરવા અને ગુનાખોરી પ્રવૃત્તિઓ પર નિયંત્રણ લાવવા માટે પલસાણા પોલીસ સક્રિય બની છે. સુરત જિલ્લા પોલીસ વડાની સૂચના હેઠળ, પલસાણા પોલીસ મથકના પોલીસ ઇન્સ્પેક્ટર (PI) ભગવાનભાઈ ઝીલેરિયાના સીધા માર્ગદર્શન હેઠળ, પોલીસ સબ ઇન્સ્પેક્ટર અજયપાલસિંહ રાઉલજી, નિરંજનાબેન એન. ગામિત અને ડી. એચ. રાઠોડ સહિતના પોલીસ કાફલા દ્વારા જોલવા ગામે એક વ્યાપક અને સઘન કોમ્બિંગ ઓપરેશન હાથ ધરવામાં આવ્યું હતું. આ કાર્યવાહીનો મુખ્ય હેતુ વિસ્તારમાં કોઈ અજાણી કે શંકાસ્પદ વ્યક્તિ આશરો ન મેળવી લે અને શાંતિ ભંગ ન થાય તે સુનિશ્ચિત કરવાનો હતો. આ ઓપરેશન દરમિયાન, પલસાણા પોલીસની જુદી-જુદી ટીમોએ જોલવા ગામના વિવિધ રહેણાંક વિસ્તારો, એપાર્ટમેન્ટ્સ અને હાઈરાઈઝ બિલ્ડિંગોમાં આકસ્મિક તપાસ કરી હતી. ખાસ કરીને, પરપ્રાંતિય શ્રમિકો અને ભાડુઆતો મોટી સંખ્યામાં રહેતા હોય તેવા ફ્લેટ્સમાં પોલીસે રૂબરૂ જઈને તપાસ હાથ ધરી હતી, જેમાં ફ્લેટના દરવાજા ખખડાવી અંદર રહેતા લોકોની ઓળખની ખાતરી કરવામાં આવી હતી. PI ભગવાનભાઈ ઝીલેરિયા અને તેમની ટીમે નાગરિકો પાસે તેમના આધાર કાર્ડ તથા અન્ય સત્તાવાર ઓળખપત્રોની માંગણી કરી કાયદેસરની ચકાસણી કરી હતી. આ ઉપરાંત, સ્થાનિક મકાન માલિકોએ પોતાના ભાડુઆતોની પોલીસ સ્ટેશનમાં સત્તાવાર નોંધણી કરાવી છે કે નહીં તે અંગે પણ ઝીણવટભરી તપાસ હાથ ધરવામાં આવી હતી. મોડી રાત્રે કે વહેલી સવારે પોલીસના અચાનક સોસાયટીઓમાં ઉતરી પડવાથી સ્થાનિક તત્વો અને કાયદાનું ઉલ્લંઘન કરનારાઓમાં ભારે ફફડાટ વ્યાપી ગયો હતો. બીજી તરફ, પોલીસની આ સરાહનીય અને સતર્ક કામગીરીને કારણે જોલવા ગામના સામાન્ય અને કાયદાનું પાલન કરતા નાગરિકોએ સુરક્ષાની ભાવના અનુભવીને રાહતનો શ્વાસ લીધો હતો. પલસાણા પોલીસે જણાવ્યું કે આગામી દિવસોમાં પણ વિસ્તારના અન્ય સંવેદનશીલ વિસ્તારોમાં આ પ્રકારની કડક કાર્યવાહી ચાલુ રાખવામાં આવશે.

સચિન પોલીસ સ્ટેશનના પોલીસ ઇન્સ્પેક્ટર શ્રી પી.એન. વાઘેલાના માર્ગદર્શન હેઠળ, પોલીસ સબ ઇન્સ્પેક્ટર શ્રી એન.ડી. ડામોર અને કનકપુર પોલીસ ચોકી પ્રભારી પોલીસ સબ ઇન્સ્પેક્ટર શ્રી એસ.ડી. સિંહના નેતૃત્વમાં સર્વેલન્સ સ્ટાફ દ્વારા ગુપ્ત માહિતીના આધારે કાર્યવાહી કરવામાં આવી. આ પોલીસ ટીમે સચિન વિસ્તારના પારડી-કણદે, અંબિકાનગરમાં આવેલા મકાન નંબર-240માંથી ત્રણ મહિલા આરોપીઓની ધરપકડ કરી. પોલીસે આરોપીઓ પાસેથી 42.02 કિલોગ્રામ ગેરકાયદેસર ગાંજાનો જથ્થો જપ્ત કર્યો છે, જેની અંદાજિત કિંમત ₹21,01,000/- (એકવીસ લાખ એક હજાર રૂપિયા) જણાવવામાં આવી છે. આ મામલે NDPS એક્ટ હેઠળ ગુનો નોંધી આગળની કાયદેસરની કાર્યવાહી શરૂ કરવામાં આવી છે.

સુરતમાં એક ધોખાધડીના કેસમાં છેલ્લા ત્રણ વર્ષથી ફરાર ચાલી રહેલા આરોપીને સ્પેશિયલ ઓપરેશન ગ્રુપ (SOG) દ્વારા ધરપકડ કરવામાં આવી છે. આ કાર્યવાહીને કારણે SOG ને એક મોટી સફળતા મળી છે.

સુરત જિલ્લાની કડોદરા GIDC પોલીસે એક મોબાઈલ સ્નેચિંગ ગેંગનો પર્દાફાશ કરવામાં સફળતા મેળવી છે. આ કાર્યવાહી દરમિયાન પોલીસે ₹3.20 લાખની કિંમતના 25 મોબાઈલ ફોન અને એક બાઈક જપ્ત કરી છે. આ પર્દાફાશથી કુલ 7 ગુના ઉકેલવામાં આવ્યા છે.

સુરત જિલ્લાના પલસાણા તાલુકામાં કાયદો અને વ્યવસ્થા વધુ મજબૂત કરવા તથા ગુનાખોરી અને અસામાજિક પ્રવૃત્તિઓ પર નિયંત્રણ લાવવાના હેતુથી પલસાણા પોલીસે જોલવા સહિતના વિસ્તારોમાં મેગા કોમ્બિંગ ઓપરેશન હાથ ધર્યું હતું. સુરત જિલ્લા પોલીસ વડાની સૂચના હેઠળ, પલસાણા પોલીસ મથકના પોલીસ ઇન્સ્પેક્ટર (PI) ભગવાનભાઈ ઝીલેરિયાના માર્ગદર્શનમાં આ ઓપરેશન યોજાયું હતું, જેમાં પોલીસ સબ ઇન્સ્પેક્ટર અજયપાલસિંહ રાઉલજી, નિરંજનાબેન એન. ગામિત, ડી. એચ. રાઠોડ સહિતના અધિકારીઓ અને સ્ટાફ જોડાયા હતા. પોલીસની જુદી-જુદી ટીમોએ જોલવા ગામના રહેણાંક વિસ્તારો, એપાર્ટમેન્ટ્સ, હાઈરાઈઝ બિલ્ડિંગો અને મોટી સંખ્યામાં પરપ્રાંતીય શ્રમિકો રહેતા ફ્લેટ્સમાં અચાનક ચેકિંગ હાથ ધર્યું હતું. પોલીસ કર્મચારીઓએ રૂબરૂ પહોંચી રહેવાસીઓની ઓળખની ખાતરી કરી આધાર કાર્ડ સહિતના જરૂરી ઓળખપત્રોની ચકાસણી કરી હતી. આ કોમ્બિંગ દરમિયાન, પોલીસે શંકાસ્પદ જણાતા 20થી વધુ વાહનો ડિટેઇન કર્યા અને તેમની માલિકી, દસ્તાવેજો તથા અન્ય વિગતોની તપાસ શરૂ કરી હતી. આ ઉપરાંત, મકાન માલિકોએ ભાડુઆતોની ફરજિયાત પોલીસ નોંધણી કરાવી છે કે નહીં તેની પણ સઘન તપાસ કરવામાં આવી હતી. જ્યાં નિયમ મુજબ ભાડુઆતોનું રજિસ્ટ્રેશન નહોતું અથવા જરૂરી દસ્તાવેજી પુરાવાઓ ઉપલબ્ધ નહોતા, ત્યાં સંબંધિત મકાન માલિકો સામે કાયદેસરની કાર્યવાહી હાથ ધરવામાં આવી હતી. પલસાણા પોલીસે પરપ્રાંતીય શ્રમિકોની વધુ વસતી ધરાવતા કારેલી, દસ્તાન, બગુમરા અને જોલવા સહિતના વિસ્તારોમાં આ વિશેષ ઝુંબેશ ચલાવી હતી. આ અભિયાનનો મુખ્ય ઉદ્દેશ ચોરી, શરીર સંબંધિત ગુનાઓ, સાયબર ફ્રોડ સહિતના વિવિધ ગુનાઓને અટકાવવાનો તેમજ સ્થાનિક નાગરિકો અને શ્રમિકોમાં કાયદાકીય જાગૃતિ લાવવાનો હતો. પોલીસે એક સાથે વિવિધ વિસ્તારોમાં કોમ્બિંગ ઓપરેશન યોજી ગુનાખોરી સામે કડક સંદેશો આપ્યો હતો. પોલીસના જણાવ્યા મુજબ, વિસ્તારમાં કોઈ અજાણી કે શંકાસ્પદ વ્યક્તિ આશરો ન મેળવી શકે તેમજ કાયદો અને વ્યવસ્થાનો ભંગ ન થાય તે માટે આવા સરપ્રાઈઝ કોમ્બિંગ ઓપરેશન આગામી દિવસોમાં પણ ચાલુ રહેશે. મોડી રાત્રે અને વહેલી સવારે પોલીસની અચાનક કાર્યવાહીના કારણે અસામાજિક તત્વોમાં ફફડાટ વ્યાપ્યો હતો, જ્યારે કાયદાનું પાલન કરતા સ્થાનિક નાગરિકોએ પોલીસની આ કામગીરીને આવકારી સુરક્ષાની લાગણી વ્યક્ત કરી હતી. પલસાણા પોલીસનું આ મેગા કોમ્બિંગ ઓપરેશન માત્ર ચેકિંગ પૂરતું મર્યાદિત ન રહેતા, ગુનાખોરી રોકવા, કાયદાનું પાલન સુનિશ્ચિત કરવા અને લોકોમાં પોલીસ પ્રત્યે વિશ્વાસ વધારવાની દિશામાં એક મહત્વપૂર્ણ પગલું સાબિત થયું છે.

સુરતના અડાજણ વિસ્તારમાં સ્માર્ટ મીટર બદલવાના મુદ્દે ભારે હોબાળો થયો છે, જેમાં મહિલાઓ સાથે ઝપાઝપી થયાના ગંભીર આક્ષેપો કરવામાં આવ્યા છે. ડીજીવીસીએલની કામગીરી સામે સ્થાનિકોમાં પ્રચંડ રોષ જોવા મળી રહ્યો છે અને આ વિવાદ અડાજણ પોલીસ સ્ટેશન સુધી પહોંચ્યો છે. અડાજણની ઓમ શિવમ સોસાયટીમાં સ્માર્ટ મીટર લગાવવા ગયેલી ટીમ અને રહિશો વચ્ચે તંગદિલીભર્યો માહોલ સર્જાયો હતો. રહિશોનો આક્ષેપ છે કે ડીજીવીસીએલના કર્મચારીઓએ તેમની મંજૂરી વિના મીટરના સીલ તોડીને બળજબરીથી મીટર બદલ્યા છે. આ ઘટનાક્રમમાં થયેલી ઝપાઝપીમાં એક મહિલાને ઇજા પહોંચી હોવાનો દાવો કરવામાં આવ્યો છે, જેમને સારવાર માટે સિવિલ હોસ્પિટલ ખસેડવામાં આવ્યા હતા. જોકે, સ્માર્ટ મીટર લગાવવા ગયેલી ટીમ સામે ગાળાગાળી અને મારપીટના આરોપો પણ લગાડવામાં આવ્યા છે. ફરિયાદ નોંધવામાં વિલંબ થતાં પોલીસની કામગીરી પર પણ સવાલો ઉઠી રહ્યા છે. સ્માર્ટ મીટર મુદ્દે સર્જાયેલા આ વિવાદે ઉગ્ર સ્વરૂપ ધારણ કર્યું છે અને સ્થાનિકોમાં ભારે આક્રોશ વ્યાપી ગયો છે. આગામી દિવસોમાં આ મુદ્દે વધુ ઘર્ષણ થવાની શક્યતા પણ વ્યક્ત કરવામાં આવી છે.