আজি চিৰাং জিলাৰ মাদলীপাৰা এল,পি,স্কুলত এক সম্প্ৰীতি ভোজনৰ আয়োজন কৰা হৈছিল। এই কাৰ্যসূচী দিনটোৰ বাবে অঞ্চলটোত এক উল্লেখযোগ্য অনুষ্ঠান হিচাপে পৰিগণিত হৈছে।

বৰপেটা জিলাৰ মন্দিয়া বিধানসভা সমষ্টিৰ অন্তৰ্গত ১ নং ৰছুলপুৰ গাঁৱৰ নৈপৰীয়া ৰাইজে বিশুদ্ধ খোৱাপানীৰ অভাৱত বেকী নৈৰ ঘোলা পানী সেৱন কৰি প্ৰাণ বচাবলগীয়া হৈছে। গাঁওখনত পানী যোগানৰ এটা আঁচনি আছে যদিও ৰাইজে এটুপি পানীও পোৱা নাই। পানীৰ পাইপসমূহ সংযোগ কৰাৰ পিছতেই বেকী নদীৰ খহনীয়াই উটুৱাই লৈ যোৱাৰ ফলত গাঁওবাসী বিশুদ্ধ খোৱাপানীৰ পৰা বঞ্চিত হৈছে। ফলস্বৰূপে, তেওঁলোকে নদীৰ এই লেতেৰা পানীৰে ৰন্ধা-বঢ়া, খোৱা-লোৱা, গা ধোৱা আদি সকলো দৈনন্দিন কাম কাজ সম্পন্ন কৰিবলৈ বাধ্য হৈছে। এই লেতেৰা পানী সেৱন কৰি ১ নং ৰছুলপুৰ গাঁৱৰ নৈপৰীয়া ৰাইজ বিভিন্ন বেমাৰত আক্ৰান্ত হৈছে। ভুক্তভোগী ৰাইজে অভিযোগ কৰিছে যে চৰকাৰৰ জল জীৱন আঁচনি ফুটুকাৰ ফেনত পৰিণত হৈছে। সেয়েহে, তেওঁলোকে চৰকাৰক শীঘ্ৰে খোৱাপানীৰ সু-ব্যৱস্থা কৰিবলৈ দাবী জনাইছে আৰু এই ক্ষেত্ৰত চৰকাৰৰ সুদৃষ্টি কামনা কৰিছে।

বৰপেটা জিলাৰ মন্দিয়া অঞ্চলত হাজাৰ হাজাৰ যুৱকে ধৰ্ষণকাৰীক শাস্তি প্ৰদানৰ দাবীত প্ৰতিবাদ সাব্যস্ত কৰিছে।

ৰাজ্যৰ লগতে ধুবুৰী জিলাতো ২০ জুনত কলাগুৰু বিষ্ণুপ্ৰসাদ ৰাভা দিৱস বিশেষ কাৰ্যসূচীৰে পালন কৰা হয়। সদৌ অসম লেখিকা সমাৰোহ সমিতিৰ ধুবুৰী শাখা আৰু ধুবুৰী জাৰ্নালিষ্ট এছ'চিয়েশ্যনৰ যৌথ উদ্যোগত ধুবুৰী গাৰ্লছ একাডেমী হাইস্কুলত এই দিৱস উদযাপন কৰা হয়। দিনজোৰা এই কাৰ্যসূচীত সংগীত, আবৃত্তি, নৃত্য, ভাষণ আৰু বিভিন্ন অনুষ্ঠানৰ মাজেৰে কলাগুৰুক স্মৰণ কৰা হয়। দিনৰ ১২ বজাত স্কুলৰ প্ৰেক্ষাগৃহত ৰাভা দিৱসৰ শুভাৰম্ভ কৰা হয়। অনুষ্ঠানৰ আৰম্ভণিতে সভাৰ সভানেত্ৰী ড০ লাবণ্য ভক্তই কলাগুৰুৰ প্ৰতিকৃতিৰ সন্মুখত বন্তি প্ৰজ্বলন কৰে। ধুবুৰী জাৰ্নালিষ্ট এছ'চিয়েশ্যনৰ সভাপতি প্ৰনৱাশীষ ৰয় আৰু লেখিকা সমাৰোহৰ কাৰ্যকৰী সভানেত্ৰী ৰৌছানাৰা আহমেদে প্ৰতিকৃতিত মাল্যাৰ্পণ কৰে, আনহাতে ধুবুৰী গাৰ্লছ একাডেমী হাইস্কুলৰ প্ৰধান শিক্ষক হেমেন্দ্ৰ নাথ ৰায়ে পুষ্পাঞ্জলি অৰ্পণ কৰে। লেখিকা সমাৰোহ সমিতিৰ সম্পাদিকা চুলতানা চেলিমা আহমেদে সভাৰ উদ্দেশ্য ব্যাখ্যা কৰে। ধুবুৰী গাৰ্লছ একাডেমী হাইস্কুলৰ প্ৰধান শিক্ষক হেমেন্দ্ৰ নাথ ৰায়ে বিশিষ্ট অতিথি হিচাপে ভাষণ প্ৰদান কৰে। সভাত ৰৌছানাৰা আহমেদ, প্ৰনৱাশীষ ৰয়, তিলোত্তমা ৰাভা আৰু অঞ্জলি শৰ্মাইও ভাষণ দিয়ে। এই অনুষ্ঠানতে লিপিকা ৰায় চৌধুৰীৰ দ্বাৰা লিখিত 'মহাভাৰতৰ কাহিনী' শীৰ্ষক এখন গ্ৰন্থ উন্মোচন কৰা হয়। সভাত উপস্থিত থকা বিশিষ্ট অতিথিসকলক আৰু ধুবুৰী জাৰ্নালিষ্ট এছ'চিয়েশ্যনৰ সদস্যসকলক ফুলাম গামোচাৰে সন্মানিত কৰা হয়। স্কুলৰ বিভিন্ন ছাত্ৰীয়ে কবিতা পাঠ আৰু নৃত্য পৰিৱেশন কৰি অনুষ্ঠানটো আকৰ্ষণীয় কৰি তোলে। সভাৰ সামৰণিত 'অ মোৰ আপোনাৰ দেশ' শীৰ্ষক গীতটো পৰিৱেশন কৰা হয়।

বাক্সা জিলাৰ শিলবাৰীত বিষ্ণুপ্ৰসাদ ৰাভাৰ সহযোগী হিচাপে পৰিচিত প্ৰয়াত থিৰো জহলাওৰ পত্নী ৰঞ্জনী জহলাও আৰু প্ৰয়াত গৌৰীকান্ত ব্ৰহ্মৰ পত্নী জাথুবি ব্ৰহ্মৰ মনত আজিও কমৰেড বিষ্ণু ৰাভাৰ ছবি জিলিকি আছে।

অসম সাহিত্য সভাৰ স্বৰ্ণ শাখা স্বীকৃতিপ্ৰাপ্ত ছয়গাঁও সাহিত্য সভাৰ উদ্যোগত আৰু কুকুৰমাৰাস্থিত শঙ্কৰদেৱ বিদ্যা মন্দিৰৰ সহযোগত আজি বিষ্ণু ৰাভা দিৱসৰ আয়োজন কৰা হয়।

সমজিলা আৰক্ষী অধীক্ষক জানকিশোৰ গগৈৰ নেতৃত্বত সোণতলীৰ এক চাইবাৰ জালিয়াতি আৰু অনলাইন বেটিং নেটৱৰ্কৰ চক্ৰ উৎখাত কৰা হৈছে। এই অভিযানত নগদ ধন, বেংক পাচবুক, মোবাইল হেণ্ডছেট, এটিএম কাৰ্ড, চেক বুক, আৰু আন আপত্তিজনক নথিপত্ৰসহ চাৰিজন অভিযুক্তক গ্ৰেপ্তাৰ কৰা হয়। গ্ৰেপ্তাৰ হোৱা অভিযুক্তসকল হ'ল মোল্লা জাকিৰ হুছেইন, জাহিদুল ইচলাম, মাতিনুল হক আৰু হাছানুৰ ৰহমান। তেওঁলোকক জেল হাজোতলৈ প্ৰেৰণ কৰা হৈছে।

বঙাইগাঁও জিলাৰ ভাৰতীয় জনতা পাৰ্টীৰ উদ্যোগত আজিৰ পৰা বঙাইগাঁও ৱৰ্কিং জনতাত তিনিদিনীয়া চিত্ৰ প্ৰদৰ্শনী অনুষ্ঠিত হ'ব। এই প্ৰদৰ্শনীৰ জৰিয়তে ভাৰতৰ প্ৰধানমন্ত্ৰীৰ কাৰ্যকালত ভাৰতৰ বিকাশ আৰু জনকল্যাণৰ যোৱা ১২ বছৰৰ কাৰ্যসূচীসমূহ উপস্থাপন কৰা হ'ব। ইফালে, এক গোপন সূত্ৰৰ ভিত্তিত চিৰাং জিলাৰ কাজলগাঁৱত আটটাকৈ বিলুপ্তপ্ৰায় সোণালী বান্দৰ উদ্ধাৰ কৰা হৈছে। এই অভিযান কাজলগাঁও থানাৰ আৰক্ষী, চিদলী থানাৰ আৰক্ষী আৰু গুৱাহাটীৰ পৰা অহা STF বাহিনীয়ে যৌথভাৱে চলাই কেইবাজনো চোৰাংচিকাৰীক আটক কৰে। এই চোৰাংচিকাৰীসকলে অসম চৰকাৰে বন্যপ্ৰাণী সুৰক্ষাৰ বাবে প্ৰণয়ন কৰা আইনক আওকাণ কৰি সংৰক্ষিত উল্টাপানী বনাঞ্চলৰ পৰা এই বিলুপ্তপ্ৰায় সোণালী বান্দৰকেইটা আনিছিল। আটক কৰা চোৰাংচিকাৰীসকলৰ ভিতৰত এজন বাংলাদেশৰ নাগৰিক, যাৰ নাম জামাল বুলি জানিব পৰা গৈছে। আন কেইজন চোৰাংচিকাৰী ক্ৰমে আলমগীৰ মোল্লা, ফকিৰচান মণ্ডল, খালেক মণ্ডল, লতিবুল শেইখ আৰু ইমজামুল হক পশ্চিম বংগৰ নাগৰিক। পিংকুশ নাৰ্জাৰী, জেকছন বিশ্বকৰ্মা আৰু ৰঞ্জিত নাৰ্জাৰী চিৰাং জিলাৰ বাসিন্দা বুলি উল্লেখ কৰা হৈছে। উদ্ধাৰ হোৱা বিলুপ্তপ্ৰায় সোণালী বান্দৰকেইটাক চিৰাং জিলা আৰক্ষী প্ৰশাসন আৰু STF বাহিনীয়ে পুনৰ বনাঞ্চলত মুকলি কৰি দিয়াৰ বাবে লৈ গৈছে। আনহাতে, এই ঘটনাত জড়িত চোৰাংচিকাৰী কেইজনক আটক কৰি STF বাহিনীয়ে অধিক তথ্যৰ বাবে তদন্ত অব্যাহত ৰাখিছে।

নতুন মন্ত্ৰীসভাৰ সম্প্ৰসাৰণ সন্দৰ্ভত সাংবাদিকৰ প্ৰশ্নৰ উত্তৰ দি অখিল গগৈয়ে মুখ্যমন্ত্ৰী আৰু পীযুষ হাজৰিকাৰ মাজত বিসম্বাদ বৃদ্ধি পোৱা বুলি মন্তব্য কৰিছে।

বাক্সা জিলাৰ কাহিতামাত যাতায়তৰ ক্ষেত্ৰত জনসাধাৰণে চৰম দুৰ্ভোগ ভুগিবলগীয়া হৈছে। কাহিতামাত থকা হাকুৱা নদীৰ ওপৰত নিৰ্মিত বাক্সা আৰু চিৰাং সংযোগী কালভাৰ্টটো ভঙা হোৱাৰ বাবেই ৰাইজে এই দুৰ্ভোগ ভুগিবলগীয়া হৈছে।