विद्याधरने तबल्याच्या तिन्ही परीक्षा यशस्वीरीत्या दिल्या असून, आता त्याच्या तिसऱ्या परीक्षेचा निकाल जाहीर झाला आहे. या परीक्षेत त्याने पहिला क्रमांक पटकावून आपले कौशल्य सिद्ध केले आहे. विशेष म्हणजे, त्याला यापूर्वीच्या दोन्ही परीक्षांमध्येही प्रथम स्थान मिळाले होते, त्यामुळे त्याने तबल्याच्या परीक्षेत सलग तिसऱ्यांदा अव्वल स्थान मिळवले आहे. तबला वाजवण्याची त्याला खूप आवड असून, त्याची ही परीक्षा बीडमध्ये पार पडली होती.

विद्याधरने तबल्याच्या तिन्ही परीक्षा यशस्वीरीत्या दिल्या असून, आता त्याच्या तिसऱ्या परीक्षेचा निकाल जाहीर झाला आहे. या परीक्षेत त्याने पहिला क्रमांक पटकावून आपले कौशल्य सिद्ध केले आहे. विशेष म्हणजे, त्याला यापूर्वीच्या दोन्ही परीक्षांमध्येही प्रथम स्थान मिळाले होते, त्यामुळे त्याने तबल्याच्या परीक्षेत सलग तिसऱ्यांदा अव्वल स्थान मिळवले आहे. तबला वाजवण्याची त्याला खूप आवड असून, त्याची ही परीक्षा बीडमध्ये पार पडली होती.

ओबीसी नेते लक्ष्मण हाके यांनी बीडमध्ये पत्रकार परिषद घेत कुणबी दाखल्यांना आव्हान देणार असल्याचे जाहीर केल्यानंतर मराठा समाजात तीव्र संताप व्यक्त झाला आहे. या पत्रकार परिषदेत हाके यांनी कुणबी दाखले रद्द करण्याची आणि चुकीचे कुणबी दाखले देणाऱ्यांवर कारवाई करण्याची मागणी केली. या मागणीनंतर मराठा समाज आक्रमक झाला असून, मराठा आंदोलक मनोज जरांगे पाटील यांचे सहकारी गंगाधर काळकुटे यांनी लक्ष्मण हाके यांच्यावर जोरदार निशाणा साधला आहे. काळकुटे यांनी म्हटले आहे की, लक्ष्मण हाके यांना मानसोपचार तज्ञाची गरज असून, त्यांची बुद्धी भ्रष्ट झाली आहे. हाकेंना मराठा द्वेशाचा 'कावीळ' झाला असून, त्यांनी बीडमधील बागलाने व मोगले यांची भेट घेऊन उपचार घेतला पाहिजे. डॉक्टरांच्या सल्ल्याची त्यांना नितांत गरज असल्याचेही काळकुटे यांनी ठामपणे सांगितले. हाके यांना प्रत्युत्तर देण्यासाठी आम्ही रस्त्यावरची तसेच संवैधानिक लढाई लढायलाही तयार आहोत, असे गंगाधर काळकुटे यांनी स्पष्ट केले.

मंठा शहरातील बसस्थानक परिसरात रविवारी रात्री सुमारे ८ वाजण्याच्या सुमारास एका अनोळखी व्यक्तीला अचानक हृदयविकाराचा झटका आल्याने त्याचा मृत्यू झाला. या घटनेमुळे परिसरात काही काळ हळहळ व्यक्त करण्यात आली. घटनेची माहिती मिळताच मंठा पोलिसांनी तात्काळ घटनास्थळी धाव घेत त्या व्यक्तीला उपचारासाठी मंठा ग्रामीण रुग्णालयात दाखल केले. मात्र, तपासणीनंतर डॉक्टरांनी त्याला मृत घोषित केले. मृत व्यक्तीच्या जवळ सापडलेल्या मोबाईल फोन व आधार कार्डावरून त्याची ओळख जनार्धन बेळजी नादरे (वय ३९ वर्षे) अशी पटली. ते हिंगोली जिल्ह्यातील वसमत तालुक्यातील माळवटा येथील रहिवासी असल्याचे समोर आले आहे. पोलिसांनी या घटनेची नोंद घेतली असून पुढील तपास सुरू आहे.

मराठीपत्रने सकाळी ११ वाजून ५२ मिनिटांनी एका कार्यालयात केलेल्या ग्राउंड रिपोर्टनुसार, गटशिक्षण अधिकारी तिथे अनुपस्थित आढळले. केवळ अधिकारीच नव्हे, तर कार्यालयाचे रजिस्टरही गायब असल्याचे समोर आले. या घटनेमुळे कार्यालयाच्या संपूर्ण कामकाजावर आणि कारभारावर प्रश्नचिन्ह निर्माण झाले आहे.

परळी शहरातील साठेनगर परिसरात विषारी हातभट्टी दारू प्यायल्याने एका युवकाचा मृत्यू झाल्याची धक्कादायक घटना समोर आली आहे. पुण्यात नुकत्याच घडलेल्या विषारी हातभट्टी दारू प्रकरणातील मृत्यूंची घटना ताजी असतानाच, परळीतही अशाच प्रकारची घटना घडल्याने नागरिकांमध्ये तीव्र संतापाची भावना व्यक्त होत आहे. या घटनेनंतर संतप्त नातेवाईक आणि स्थानिक नागरिकांनी परळी शहर पोलीस ठाण्यासमोर ठिय्या आंदोलन करत संबंधित दारू विक्रेत्यावर मनुष्यवधाचा गुन्हा दाखल करण्याची मागणी केली आहे. मृत युवकाच्या नातेवाईकांचा आरोप आहे की, साठेनगर भागात गेल्या अनेक वर्षांपासून खुलेआम हातभट्टी दारूची विक्री सुरू आहे. याबाबत वारंवार तक्रारी, निवेदने आणि मोर्चे काढूनही पोलिसांनी प्रभावी कारवाई केली नाही, असा त्यांचा दावा आहे. आंदोलकांनी पोलीस ठाण्यासमोर ठिय्या मांडत, “परळीत संपूर्ण दारूबंदी करा, अन्यथा मृतदेह पोलीस ठाण्यात आणून ठेवू” असा थेट इशारा दिला. यावेळी माजी नगराध्यक्ष वैजनाथ तात्या जगतकर, नगरसेवक नितीन रोडे, रतन आदोडे, भैय्यासाहेब आदोडे, बालाजी मस्के, नवनाथ मस्के, नागनाथ मस्के, दीपक लोंढे, ऋषिकेश क्षीरसागर, आनंद कांबळे, दर्शन लोंढे, बाळू मस्के, संजय कुमार शिंदे, बाबुराव मस्के, सोमनाथ मस्के यांच्यासह मोठ्या संख्येने महिला व नागरिक उपस्थित होते. नागरिकांनी दिलेल्या निवेदनात म्हटले आहे की, साठेनगर परिसरातील हातभट्टी दारू विक्रीबाबत अनेकदा पोलीस प्रशासनाला माहिती देण्यात आली होती, परंतु संबंधितांवर कठोर कारवाई न झाल्याने हा दुर्दैवी प्रकार घडला. त्यामुळे या मृत्यूस जबाबदार असलेल्या दारू विक्रेत्यांवर तसेच निष्काळजीपणा करणाऱ्या संबंधितांवर कठोर कारवाई करण्याची मागणी करण्यात आली आहे. पुणे विषारी दारू प्रकरणात ज्या पद्धतीने दारू विक्रेत्यांवर मनुष्यवधाचे गुन्हे दाखल करण्यात आले, त्याच धर्तीवर परळीतील या प्रकरणातही संबंधित दारू विक्रेत्यावर मनुष्यवधाचा गुन्हा दाखल करावा, अशी नातेवाईक व नागरिकांची मागणी आहे. दरम्यान, मृत्यूचे नेमके कारण वैद्यकीय तपासणी व अधिकृत अहवालानंतर स्पष्ट होणार असून, पोलीस या प्रकरणाचा पुढील तपास करत आहेत. या घटनेमुळे परळी शहरात खळबळ उडाली असून अवैध हातभट्टी दारूविरोधात कठोर कारवाईची मागणी जोर धरू लागली आहे.

खुलताबाद येथे सोशल मीडियावरील एका पॉडकास्टमध्ये इस्लाम धर्म, पवित्र कुरआन, पैगंबर मोहम्मद (स.) आणि इस्लामी इतिहासाबाबत आक्षेपार्ह व धार्मिक भावना दुखावणारी वक्तव्ये केल्याचा आरोप करत पोलिसांत तक्रार दाखल करण्यात आली आहे. खुलताबाद येथील शेख इक्बाल अहमद व विविध मुस्लिम समाज प्रतिनिधींनी खुलताबाद पोलीस ठाण्यात ही तक्रार नोंदवली आहे. सादर केलेल्या निवेदनात, नाझिया इलाही खान आणि कंटेंट क्रिएटर दिव्या सिंह यांनी सोशल मीडिया प्लॅटफॉर्मचा वापर करून धार्मिक तेढ निर्माण करण्याचा प्रयत्न केल्याचा आरोप करण्यात आला आहे. संबंधित पॉडकास्टमधील वक्तव्यांमुळे मुस्लिम समाजाच्या भावना दुखावल्या गेल्या असून देशातील सामाजिक सलोखा आणि धार्मिक सौहार्द बिघडण्याची शक्यता तक्रारीत नमूद करण्यात आली आहे. तक्रारदारांनी भारतीय न्याय संहिता (BNS) तसेच माहिती तंत्रज्ञान कायद्यातील संबंधित कलमान्वये गुन्हा दाखल करून, संबंधित सोशल मीडिया अकाउंट्स व चॅनेल्सवर कारवाई करण्याची मागणी केली आहे. या प्रकरणाची सखोल चौकशी करून दोषींवर कठोर कारवाई करण्याचीही मागणी करण्यात आली आहे. शेख इक्बाल अहमद यांच्यासह अजाज अहमद, शरफुद्दीन रमजानी, मौलाना तौहीद, अॅड. कासिमुद्दीन, अयाज बेग, अलीमुद्दीन अब्दुल करीम, शेख अजहर, शेख सादिक यांच्यासह अनेक समाजप्रतिनिधींच्या स्वाक्षऱ्या या निवेदनावर आहेत. खुलताबाद पोलिसांनी तक्रार स्वीकारून पुढील कार्यवाही सुरू केली असल्याची माहिती मिळाली आहे.

बीड जिल्ह्यातील धोकादायक जिल्हा परिषद शाळांच्या वर्गखोल्यांच्या बांधकाम आणि दुरुस्तीसाठी ६९ कोटी ५० लाख रुपयांच्या निधीच्या मागणीसाठी सामाजिक कार्यकर्ते डॉ. गणेश ढवळे लिंबागणेशकर यांच्या नेतृत्वाखाली २२ ऑगस्ट रोजी जिल्हा परिषद कार्यालयासमोर लक्ष्यवेधी आंदोलन करण्यात आले. या आंदोलनादरम्यान सादर केलेल्या निवेदनात नमूद केल्यानुसार, बीड जिल्ह्यातील जिल्हा परिषदेच्या शाळांची अवस्था अत्यंत दयनीय आहे, अनेक इमारती धोकादायक स्थितीत आहेत, ज्यामुळे विद्यार्थ्यांच्या जीवितास धोका निर्माण झाला आहे. जिल्ह्यात एकूण ५८ शाळा इमारतींविना आहेत, तर १७४ शाळांमधील ३१३ वर्गखोल्या मोडकळीस आलेल्या आहेत. वाढत्या विद्यार्थी संख्येमुळे ७० शाळांमध्ये ९८ अतिरिक्त वर्गखोल्यांची तातडीने आवश्यकता आहे. या सर्व कामांसाठी जिल्हा वार्षिक नियोजन समितीच्या माध्यमातून शाळा इमारतींसाठी ५७ कोटी रुपये आणि २९० वर्गखोल्यांच्या दुरुस्तीसाठी १२ कोटी ५० लाख रुपये, असा एकूण ६९ कोटी ५० लाख रुपयांचा निधी तातडीने मंजूर करण्याची मागणी आंदोलकांनी केली. याशिवाय, पाटोदा तालुक्यातील चिंचोली, केज तालुक्यातील तरनळी येथील सानप वस्ती शाळा आणि माजलगाव तालुक्यातील गेवराई मतदारसंघातील काळेगाव थडी केंद्र टाकरवण येथील जिल्हा परिषद शाळांसाठीही तातडीने निधी उपलब्ध करून देण्याची मागणी करण्यात आली. आंदोलनानंतर मुख्यमंत्री, पालकमंत्री बीड आणि शिक्षणमंत्री यांना शिक्षणाधिकारी (प्राथमिक) जिल्हा परिषद बीड, भगवान सोनावणे यांच्यामार्फत निवेदन सादर करण्यात आले. या आंदोलनात शेख युनुस, माजी सैनिक अशोक येडे, किष्किंधा पांचाळ, सादेक सय्यद, रामधन जमाले, प्राचार्य डी.जी. तांदळे (मार्गदर्शक मराठवाडा शिक्षक संघ), बाजीराव ढाकणे, प्राचार्य ॲड. राजकुमार यादव, डॉ. संजय तांदळे, हनुमंत घोडके, कृष्णा साळुंके, शिवशर्मा शेलार, नितीन पिसाळ महाराज, हिरामण तांदळे, रविंद्र मुंडे, प्रा. विठ्ठल सवासे, तुकाराम पवार आदी सामाजिक कार्यकर्ते आणि शिक्षक सहभागी झाले होते. शिक्षणाधिकारी (प्राथमिक) जिल्हा परिषद बीड, भगवान सोनावणे यांनी या आंदोलनाची तात्काळ दखल घेतली. त्यांनी नवीन वर्गखोल्यांच्या बांधकामासाठी २२ कोटी रुपये आणि वर्गखोल्यांच्या दुरुस्तीसाठी ६ कोटी रुपये, असा एकूण २८ कोटी रुपयांच्या निधीची तरतूद केल्याचे लेखी पत्र आंदोलकांना दिले.

बीड शहराची जीवनवाहिनी असलेल्या बिंदुसरा नदीचे प्रदूषण दिवसेंदिवस वाढत असून नदीपात्रात सांडपाणी, कचरा आणि जैविक कचरा टाकल्यामुळे तिचे अस्तित्व धोक्यात आले आहे. या गंभीर स्थितीकडे लक्ष वेधत सामाजिक कार्यकर्ते डॉ. गणेश ढवळे लिंबागणेशकर यांनी पर्यावरण व वातावरणीय बदल तथा पशुसंवर्धन मंत्री पंकजाताई मुंडे यांच्याकडे लेखी निवेदनाद्वारे बिंदुसरा नदी प्रदूषणमुक्त करून तिचे पुनरुज्जीवन करण्याची मागणी केली आहे. डॉ. ढवळे यांनी खंत व्यक्त केली की, बीड नगर परिषद निवडणुकीत बिंदुसरा नदी प्रदूषणमुक्त करण्याचे आश्वासन देण्यात आले होते; मात्र आजही नदीपात्रातील परिस्थिती 'जैसे थे' असून दिलेले आश्वासन हवेतच विरले आहे. नदीपात्रात मोठ्या प्रमाणावर अतिक्रमित बांधकामे, कचरा आणि जैविक कचरा टाकल्याने प्रदूषण वाढले असून, याचा थेट परिणाम बीडकरांच्या आरोग्यावर होत आहे. नदी संवर्धन हा सार्वजनिक हित, पर्यावरण संरक्षण, आपत्ती व्यवस्थापन आणि नागरिकांच्या जीवित व मालमत्तेच्या सुरक्षिततेशी संबंधित गंभीर विषय असल्याने प्रशासनाने तातडीने उपाययोजना कराव्यात, अशी मागणी करण्यात आली आहे. निवेदनात बिंदुसरा नदी प्रकल्पाचा तातडीने आढावा घेण्याची, नदीपात्रातील अतिक्रमणे हटवण्याची आणि नगर परिषद कर्मचारी नदीपात्रात कचरा टाकत असल्यास संबंधितांवर कारवाई करण्याची मागणी करण्यात आली आहे. तसेच, नदीपात्रासाठी फ्लड झोन, ग्रीन झोन, रेड झोन व यलो झोन निश्चित करून संरक्षणात्मक उपाययोजना कराव्यात असे म्हटले आहे. भविष्यात १९८९ सारखी पूरस्थिती निर्माण झाल्यास मोठ्या प्रमाणावर जीवित व वित्तहानी होऊ शकते, त्यामुळे पूररेषेतील अतिक्रमणांबाबत दुर्लक्ष करणाऱ्या संबंधित अधिकाऱ्यांवर प्रशासकीय कारवाई करण्यात यावी, अशी मागणीही डॉ. गणेश ढवळे यांनी केली आहे.