અરવલ્લી જિલ્લાના મોડાસા શહેરમાં એક ગ્રાહકે માલપુર રોડ પરના વેદા પાર્લર પરથી ખરીદેલી હોક્કો બ્રાન્ડની આઈસ્ક્રીમમાં જીવાત મળી હોવાનો ગંભીર આક્ષેપ કર્યો છે. આ ઘટનાએ ખાદ્ય પદાર્થોની ગુણવત્તા અને ગ્રાહકોના આરોગ્ય અંગે અનેક સવાલો ઉભા કર્યા છે. ગ્રાહકે આઈસ્ક્રીમ ખોલતા જ તેમાં જીવાત જોવા મળતા તેઓ ચોંકી ઉઠ્યા હતા.

અરવલ્લી જિલ્લામાં ખરીફ સીઝનમાં વરસાદ ખેંચાવાને કારણે ધરતીપુત્રો ભારે ચિંતામાં મુકાયા છે. મોંઘા ભાવે બિયારણ લાવીને વાવેતર કર્યા બાદ પણ વરસાદ ન આવતા પાણી વિના પાક સુકાઈ રહ્યા છે, જેનાથી ખેડૂતો મુશ્કેલીમાં છે અને તેઓ કાગડોળે વરસાદની રાહ જોઈ રહ્યા છે. ખેડૂતોએ મગફળી, સોયાબીન, કપાસ સહિતના પાકોનું વાવેતર વહેલો વરસાદ આવશે તેવી આશાએ કર્યું હતું. વાવેતર બાદ છેલ્લા દસ દિવસથી વરસાદ ખેંચાતા વાવેલો પાક સુકાઈ રહ્યો છે. જે ખેડૂતો પાસે સિંચાઈની સુવિધા છે, તેઓ ફુવારા અને ડ્રિપનો ઉપયોગ કરીને પાકને બચાવવા મથામણ કરી રહ્યા છે. પરંતુ આકાશી ખેતી પર આધારિત ખેડૂતો માટે આ એક મોટી ચિંતા બની ગઈ છે. ખેડૂતોએ એક વીઘા પાછળ ₹20,000 થી ₹25,000નો ખર્ચ કરીને ₹3,500 પ્રતિ કિલોના ભાવે મગફળી અને ₹2,400 પ્રતિ કિલોના ભાવે સોયાબીનનું વાવેતર કર્યું છે. આવનારા દસ દિવસમાં જો વરસાદ નહીં થાય તો જિલ્લાના અનેક ખેડૂતોનું બિયારણ માથે પડે તેવી સ્થિતિ ઊભી થવાના એંધાણ વર્તાઈ રહ્યા છે. આવા સંજોગોમાં ખેડૂતો સરકાર દ્વારા સહાય મળે તેવી માંગ કરી રહ્યા છે અને મગફળીના ટેકાના ભાવ ઊંચા બાંધવામાં આવે જેથી તેમને ફાયદો થઈ શકે તેવી અપેક્ષા રાખી રહ્યા છે. ખાસ કરીને મેઘરજ તાલુકાના ગ્રામ્ય વિસ્તારોમાં કેટલાક તળાવો આજે પણ સૂકાભટ્ટ છે, જેના કારણે પાણીના સ્તર ઉપર આવી શકતા નથી. ખેડૂતો માંગ કરી રહ્યા છે કે તળાવોમાં નર્મદાનું પાણી આપવામાં આવે તો આવી મુશ્કેલીમાં પાણીના સ્તર ઉપર આવી શકે છે, પરંતુ હાલ વરસાદ ખેંચાતા ખેડૂતોનો પાક નિષ્ફળ જવાની ભીતિ સેવાઈ રહી છે.

શામળાજી ખાતે આમ આદમી પાર્ટી (આપ)ની જિલ્લા તેમજ વિધાનસભા ટીમ દ્વારા એક પદયાત્રાનું આયોજન કરવામાં આવ્યું હતું. આ પદયાત્રા લોકપ્રિય ધારાસભ્ય ચૈતરભાઈ વસાવાના સમર્થનમાં યોજવામાં આવી હતી.

અરવલ્લી એલસીબીને એક મોટી સફળતા મળી છે, જ્યાં મહિલાઓને નિશાન બનાવતી એક ચેઈનચોર ગેંગના બે આરોપીઓને ઝડપી પાડવામાં આવ્યા છે. આ કાર્યવાહી દરમિયાન, પોલીસે તેમની પાસેથી ₹97,600ની કિંમતની સોનાની રણી કબજે કરી છે.

વિશ્વમાં શાંતિનો સંદેશ આપનાર હઝરત મોહમ્મદ પયગમ્બર સાહેબના નવાસા હઝરત ઈમામ હુસૈનની શહાદતની યાદમાં મનાવાતો મહોરમનો પવિત્ર મહિનો વિજાપુરમાં સૌહાર્દપૂર્ણ માહોલમાં શાંતિપૂર્ણ રીતે સંપન્ન થયો છે. આ પર્વ દરમિયાન શહેરની ગલીએ ગલીએ 'હુસેન જિંદાબાદ'ના નારા ગુંજ્યા હતા. કરબલાના મેદાનમાં ક્રૂર અને જાલિમ યઝીદે સત્તાના મદમાં અંધ બનીને ઈમામ હુસૈન અને તેમના પરિવારજનો પર અસહ્ય ઝુલ્મ ગુજાર્યો હતો. નાના બાળકો અને મહિલાઓ સહિત સમગ્ર કાફલાને ત્રણ દિવસ સુધી પાણીની સખત તકલીફ વેઠવી પડી હતી. આવા ઝુલ્મ સામે માત્ર ૭૨ જાંબાઝ સાથીઓ સાથે ઈમામ હુસૈને સત્ય માટે લડીને શહાદત વહોરી હતી, પરંતુ યઝીદના અન્યાય સામે ન ઝૂક્યા અને સત્યનો ધ્વજ ઊંચો રાખ્યો હતો. આ પર્વને ત્યાગ અને બલિદાનનું પ્રતિક મનાય છે. આ પવિત્ર મહિના નિમિત્તે ગુરુવારે, ૯મી મોહરમની ચાંદરાતે, રાત્રિના સમયે શહેરમાં તાજિયાના જુલૂસ નીકળ્યા હતા. ત્યારબાદ શુક્રવારે આશુરાના દિવસે સવારે શહેરની કસ્બા મસ્જિદ, મોમનવાડા મસ્જિદ, કસાઈવાડા મસ્જિદ સહિતની વિવિધ મસ્જિદોમાં આશુરાની ખાસ નમાજ અદા કરવામાં આવી હતી. શુક્રવારે બપોરે તાજિયા અને જુલ્ફીકાર સાથે એક ભવ્ય જુલૂસનું આયોજન થયું હતું. હુસૈની ચોક ખાતે એકત્ર થયેલા તાજિયા સાંથ બજાર, ઉંડી શેરી, સૈયદવાડા, વ્હોરવાડ, અશરફી ચોક સહિતના વિસ્તારોમાં ફર્યા હતા. આ દરમિયાન 'યા હુસૈન યા હુસૈન'ના ગગનભેદી નારા વચ્ચે ઠેર ઠેર પાણીની પરબો, શરબત, ઠંડા પીણાં અને નિયાઝ-પ્રસાદીનું વિતરણ કરી જુલૂસનું સ્વાગત કરવામાં આવ્યું હતું. જુલૂસ પૂરું થતા અંતે હુસૈની ચોક ખાતે સલામ ફાતેહા પઢી દેશ-વિશ્વમાં શાંતિ માટે દુઆ કરવામાં આવી હતી. આ સમગ્ર આયોજન દરમિયાન વિજાપુર પોલીસની કામગીરી અત્યંત પ્રશંસનીય રહી હતી. પોલીસ ઇન્સ્પેક્ટર રવિન્દ્રસિંહ ચૌહાણ સહિતનો સમગ્ર પોલીસ કાફલો દિવસ-રાત ખડેપગે રહીને ફરજ બજાવી હતી. જુલૂસના રૂટ પર કોઈ અનિચ્છનીય બનાવ ન બને તે માટે શહેરના સંવેદનશીલ વિસ્તારોમાં સઘન પેટ્રોલિંગ અને ચુસ્ત બંદોબસ્ત ગોઠવવામાં આવ્યો હતો. હિંદુ-મુસ્લિમ બંને સમાજના આગેવાનોએ એકબીજાને સહકાર આપીને કોમી એકતાનું ઉદાહરણ પૂરું પાડ્યું હતું. મસ્જિદો અને ઈમામબાડાઓમાં મજલિસોનું પણ આયોજન થયું હતું, જ્યાં ઈમામ હુસેનની કરબલા કથા અને તેમની શહાદતની અમર ગાથા સાંભળીને લોકો ભાવવિભોર બન્યા હતા.

આજરોજ તેરાપંથ ભવન ખાતે ધી રાજસ્થાન નાગરિક સહકારી શરાફી મંડળીની 31મી જનરલ સભા સંસ્થાના ચેરમેન શંકરલાલ શાહના અધ્યક્ષસ્થાને મળી હતી. આ સભામાં મેનેજર યોગેશભાઈ સુથારે વર્ષ 2025 અને 2026ના મંડળીએ કરેલા નફા-નુકસાનના હિસાબો રજૂ કર્યા હતા, જેને વ્યવસ્થાપક કમિટીએ મંજૂર કર્યા બાદ સભાએ બહાલી આપી હતી. આ ઉપરાંત, ગત વાર્ષિક કાર્યવાહી વંચાણે લઈ તેને પણ બહાલી આપવામાં આવી હતી અને વર્ષ 2025-2026ના નફા-નુકસાનની ફાળવણીને પણ મંજૂરી મળી હતી. સભા દરમિયાન, વર્ષ 2024-2025ના ઓડિટનો મેમો વંચાણે લેવામાં આવ્યો હતો અને વર્ષ 2026-2027 માટે ભરતભાઈ ચૌહાણની આંતરિક ઓડિટર તરીકે નિમણૂક કરવામાં આવી હતી. તારીખ 30 મેના રોજ વ્યવસ્થાપક કમિટીના ચૂંટાયેલા સભ્યોની બહાલી પણ મેળવવામાં આવી હતી. આ બેઠકમાં રૂપિયા 50,000ની સભાસદ વ્યક્તિગત લોનનો મુદ્દો ખાસ ચર્ચાનો વિષય બન્યો હતો, જેના બાદ લોન અંગેનો ઠરાવ પસાર કરવામાં આવ્યો હતો. જનરલ સભાના અંતે, સભાના પ્રમુખ શંકરલાલ શાહ દ્વારા સંસ્થાની 31 વર્ષની પ્રગતિનો અહેવાલ રજૂ કરવામાં આવ્યો હતો.

Post by Rohit kirtanbhai

જિલ્લા એલસીબીએ મહિલાઓના ગળામાંથી સોનાની ચેઈન ચોરી કરતી એક ગેંગનો પર્દાફાશ કર્યો છે. આ ગેંગ રિક્ષામાં વૃદ્ધ અને એકલી મહિલાઓને નિશાન બનાવીને ચેઈન ચોરીની ઘટનાઓને અંજામ આપતી હતી. પોલીસે આ મામલે બે આરોપીઓને ઝડપી પાડ્યા છે અને તેમની પાસેથી ₹97,600ની કિંમતની 10.500 ગ્રામ સોનાની રણી કબજે કરી છે. આ કાર્યવાહીના પગલે ભિલોડા અને મોડાસામાં નોંધાયેલા ચેઈન ચોરીના બે ગુનાઓ ઉકેલાઈ ગયા છે, જોકે આ ગેંગના અન્ય બે આરોપીઓ હજુ પણ ફરાર છે.

ખેડબ્રહ્મા નગરપાલિકાના વોર્ડ નં. 1ના ચીખલી આદિવાસી વિસ્તારમાં પીવાના પાણીની પાઇપલાઇનના કામને લઈને સ્થાનિકોમાં ભારે અસંતોષ પ્રવર્તી રહ્યો છે. આ મામલે એક વીડિયો સોશિયલ મીડિયામાં વાયરલ થતાં વિકાસકામની ગુણવત્તા પર ગંભીર સવાલો ઊભા થયા છે. આ વાયરલ વીડિયોને કારણે ખેડબ્રહ્મા નગરપાલિકાના વિકાસકામો સામે પણ પ્રશ્નાર્થ સર્જાયા છે. સ્થાનિકોના આક્ષેપ મુજબ, ચીખલી આદિવાસી વિસ્તારમાં નંખાયેલી પાઇપલાઇન અત્યંત હલકી ગુણવત્તાની છે. તેમનું કહેવું છે કે લાઇનનું ટેસ્ટિંગ કરીને કામ પૂર્ણ થયાનું દર્શાવીને સરકાર પાસેથી બિલની રકમ ઉપાડી લેવામાં આવી છે, જ્યારે વાસ્તવિક કામ ગુણવત્તાના ધોરણો મુજબ થયું નથી. સ્થાનિક રહેવાસીઓ બુબડિયા બિરબલભાઈ કાનજીભાઈ અને બુબડિયા લક્ષ્મણભાઈ રૂપાભાઈએ આક્ષેપ કર્યો છે કે કોન્ટ્રાક્ટર, સંબંધિત અધિકારીઓ અને નગરપાલિકાના કેટલાક કોર્પોરેટરોની કથિત મિલીભગતને કારણે સરકારી નાણાંનો દુરુપયોગ થયો છે અને લોકોને નબળી ગુણવત્તાનું કામ અપાયું છે. વાયરલ થયેલા વીડિયોમાં પણ પાઇપલાઇનના કામની ગુણવત્તા અંગે ગંભીર પ્રશ્નો ઉઠાવવામાં આવ્યા હોવાનું જણાવાઈ રહ્યું છે. આ સમગ્ર મામલે સ્થાનિકોએ ઉચ્ચ કક્ષાની નિષ્પક્ષ તપાસ કરવા, જવાબદારો સામે કાયદેસરની કાર્યવાહી કરવા અને ગુણવત્તાયુક્ત કામગીરી ફરીથી કરવા માટેની માંગણી કરી છે. હાલ આ બાબતે નગરપાલિકા કે સંબંધિત અધિકારીઓ તરફથી કોઈ સત્તાવાર પ્રતિક્રિયા પ્રાપ્ત થઈ નથી.