నేడు పొగాకు వ్యతిరేక దినోత్సవాన్ని పాటిస్తున్నారు. పొగాకు వినియోగం వల్ల ఎందరో ప్రాణాలు గాలిలో కలిసిపోతున్నాయని, ముఖ్యంగా పొగ తాగడం వల్ల ఊపిరితిత్తులు పాడై అనేక మంది ప్రాణాలు కోల్పోతున్నారని తీవ్ర ఆందోళన వ్యక్తం అవుతోంది. ప్రపంచ ఆరోగ్య సంస్థ లెక్కల ప్రకారం, పొగ తాగడం వల్లనే ఎక్కువ ప్రాణ నష్టాలు జరుగుతున్నాయి. పొగ తాగే వారితో పాటు, దాని పొగను పీల్చే వారిపై కూడా తీవ్ర ప్రభావం ఉంటుందని హెచ్చరిస్తూ, అందరూ జాగ్రత్తగా ఉండాలని సూచించారు. ఈ పొగాకు వ్యతిరేక దినోత్సవం సందర్భంగా కొన్ని చోట్ల ర్యాలీలు కూడా నిర్వహిస్తున్నారు.

ముఖ్యమంత్రి చంద్రబాబు నాయుడు రాష్ట్రంలో యోగాంధ్ర-2026 కార్యక్రమాన్ని అత్యంత ప్రతిష్టాత్మకంగా, ఘనంగా నిర్వహించాలని సూచించారు. జూన్ 21న అంతర్జాతీయ యోగా దినోత్సవం సందర్భంగా మంత్రులు, అధికారులతో నిర్వహించిన సమీక్షలో సీఎం ఈ ఆదేశాలు ఇచ్చారు. ఈ సందర్భంగా యోగాంధ్ర-2026కు సంబంధించిన కార్యక్రమాలపై అధికారులు ప్రజెంటేషన్ ఇచ్చారు. యోగాంధ్ర కార్యక్రమంలో భాగంగా జూన్ 7 నుండి 14 రోజుల పాటు రాష్ట్ర వ్యాప్తంగా కార్యక్రమాలు నిర్వహించనున్నారు. అన్ని ప్రాంతాల్లో, అన్ని స్థాయిల్లో, అన్ని విభాగాల్లో యోగాంధ్ర నిర్వహించాలని సీఎం సూచించారు. మొత్తంగా కోటి మంది భాగస్వాములు అయ్యేలా కార్యాచరణ సిద్ధం చేశారు. రాజధాని అమరావతిలోని కృష్ణా నదీ వంతెనపై, వెస్ట్ బైపాస్ రోడ్ నిర్మాణంలో భాగంగా నిర్మించిన బ్రిడ్జిపై జూన్ 21న 25 వేల మందితో రాష్ట్ర స్థాయి యోగా కార్యక్రమాన్ని నిర్వహించనున్నారు. ఈ కార్యక్రమంలో ముఖ్యమంత్రి చంద్రబాబు పాల్గొంటారు. అదే రోజు జిల్లా కేంద్రాల్లో 1,000 మందితో నిర్వహించే కార్యక్రమాల్లో మంత్రులు, జిల్లా ఉన్నతాధికారులు పాల్గొంటారు. ప్రస్తుతం రాష్ట్రంలో అందుబాటులో ఉన్న 1.50 లక్షల మంది ట్రైనర్లకు అదనంగా మరో లక్ష మందిని ట్రైనర్లుగా చేసేందుకు అవసరమైన శిక్షణ ఇస్తారు. ప్రతి జిల్లా ఒక థీమ్ తో 14 రోజుల యోగాంధ్రను నిర్వహిస్తుంది. జిల్లాల్లో యోగాంధ్ర నిర్వహణకు ఒక్కో జిల్లాకు రూ. 25 లక్షల చొప్పున నిధులు కేటాయించారు. ఆరోగ్య, మానవవనరులు, మునిసిపల్, పంచాయతీ రాజ్, దేవాదాయ, ఐటీ శాఖల సమన్వయంతో ఈ యోగాంధ్ర కార్యక్రమం నిర్వహించబడుతుంది. ప్రతి జిల్లాలోని రెండు ప్రముఖ పర్యాటక ప్రాంతాల్లో (మొత్తం 56 కేంద్రాల్లో) ప్రత్యేక సెషన్స్ నిర్వహిస్తారు. ఒక రోజుకు రెండు జిల్లాల చొప్పున 500 మందితో పర్యాటక ప్రాంతాల్లో యోగా నిర్వహిస్తారు. అలాగే, 14 రోజుల పాటు పార్కులు, విద్యా సంస్థలు, ప్రభుత్వ కార్యాలయాలు, స్వర్ణ వార్డు, స్వర్ణ గ్రామం కార్యాలయాల్లో యోగాంధ్ర కార్యక్రమాలు జరుగుతాయి. యోగాంధ్ర ఈవెంట్లకు గ్రామ, మండల, నియోజకవర్గ, జిల్లా స్థాయి నుండి రాష్ట్ర స్థాయి వరకు అవార్డులు ప్రదానం చేస్తారు. రాష్ట్ర ప్రభుత్వ యోగా, నాచురోపతి విభాగ సలహాదారు మంతెన సత్యనారాయణ రాజు యోగాంధ్ర నిర్వహణకు సంబంధించి రూపొందించిన పోస్టర్‌ను ముఖ్యమంత్రి చంద్రబాబు ఆవిష్కరించారు. యోగాపై అవగాహన, శిక్షణ కోసం తాను చేపట్టిన కార్యక్రమాలను సత్యనారాయణ రాజు సీఎంకు వివరించారు. 90 ఆసనాల వీడియోలు, 21 ఆరోగ్య సమస్యల పరిష్కారానికి ప్రత్యేక ఆసనాల వీడియోలు, రోజు వారీ సాధన కోసం యోగాసనాలు, ప్రాణాయామంపై 7 వీడియోలు, యోగా సందేహాలు ప్రశ్నలు-సమాధానాలపై చేసిన వీడియోలను పబ్లిక్ డొమైనులో పెట్టనున్నట్లు ఆయన తెలిపారు. మీడియా, సోషల్ మీడియా, వివిధ డిజిటల్ ప్లాట్ ఫామ్స్ ద్వారా వీటిని ప్రజల్లోకి తీసుకు వెళ్లేందుకు కార్యాచరణ చేపట్టినట్లు వెల్లడించారు. 8142404888 నెంబర్‌కు 'హాయ్' అని మెసేజ్ పంపడం లేదా క్యూఆర్ కోడ్ స్కాన్ చేయడం ద్వారా ఈ వీడియోలను డౌన్ లోడ్ చేసుకోవచ్చని సత్యనారాయణ రాజు వివరించారు. ఈ సమీక్షా సమావేశంలో మంత్రులు నారాయణ, సత్యకుమార్, ఆనం రామనారాయణ రెడ్డి, కందుల దుర్గేష్ తో పాటు సీఎస్ సాయి ప్రసాద్, ఆరోగ్య కుటుంబ సంక్షేమ శాఖ కార్యదర్శి సౌరభ్ గౌర్, కమిషనర్ వీర పాండియన్ సహా వివిధ శాఖల ఉన్నతాధికారులు పాల్గొన్నారు.

ఈరోజు ఏలూరులోని ఆర్ఆర్ పేట వెంకటేశ్వర స్వామి గుడి భక్తులతో కిటకిటలాడింది. ప్రతి ఒక్క భక్తుడు శ్రీ వెంకటేశ్వర స్వామిని దర్శించుకుని తమ భక్తిని చాటుకున్నారు. మధ్యాహ్నం 12 గంటలకు జరిగిన అన్న సమారాధనలో భక్తులు పెద్ద సంఖ్యలో పాల్గొన్నారు. అన్న సమారాధనలో పాల్గొనేందుకు ప్రతి ఒక్కరూ క్యూలైన్‌ను క్రమశిక్షణతో పాటించారు. ప్రసాదం స్వీకరించిన అనంతరం భక్తులు అక్కడి నుండి వెళ్లిపోయారు. మొత్తంగా, ఈరోజు ఏలూరు ఆర్ఆర్ పేటలోని వెంకటేశ్వర స్వామి ఆలయం భక్తుల సందడితో నిండిపోయింది.

ఖమ్మం జిల్లాలోని వి. వెంకటాయపాలెం సహకార సంఘం ఆధ్వర్యంలో రాష్ట్ర ముఖ్యమంత్రి రేవంత్ రెడ్డి మరియు వ్యవసాయ శాఖ మంత్రి తుమ్మల నాగేశ్వరరావు చిత్రపటాలకు పాలాభిషేకం నిర్వహించారు. ఈ కార్యక్రమంలో పాల్గొన్న రైతులు, రాష్ట్ర ప్రభుత్వం పండించిన ప్రతి గింజ ధాన్యాన్ని కొనుగోలు చేసి తమకు అండగా నిలిచినందుకు సీఎం మరియు వ్యవసాయ శాఖ మంత్రికి కృతజ్ఞతలు తెలియజేశారు. తెలంగాణ వ్యాప్తంగా రైతులు తీసుకొచ్చిన ధాన్యాన్ని ఒక్క గింజ కూడా మిగలకుండా కొనుగోలు చేయడం అభినందనీయమని రైతులు ప్రశంసించారు. రైతు సంక్షేమం కోసం ప్రభుత్వం తీసుకుంటున్న చర్యలు సంతోషకరమని వారు తెలిపారు. ఈ సందర్భంగా ముఖ్యమంత్రి రేవంత్ రెడ్డి మరియు మంత్రి తుమ్మల నాగేశ్వరరావు నాయకత్వంలో వ్యవసాయ రంగానికి మరింత ప్రాధాన్యం లభిస్తోందని రైతులు పేర్కొన్నారు. ప్రభుత్వం ఇదే విధంగా రైతులకు అండగా నిలవాలని వారు ఆకాంక్షించారు.

తల్లాడ మండల కేంద్రంలో గత 9 రోజులుగా విలేజ్ ఆర్గనైజేషన్ అసిస్టెంట్స్ (VOA) చేస్తున్న దీక్షా శిబిరాన్ని AITUC ఖమ్మం జిల్లా నాయకులు మంకెన కృష్ణ సందర్శించి సంఘీభావం తెలిపారు. ఈ సందర్భంగా ఆయన మాట్లాడుతూ, ప్రభుత్వం VOAల న్యాయమైన డిమాండ్లను తక్షణమే పరిష్కరించాలని డిమాండ్ చేశారు. VOAలకు నెలకు రూ.26,000 వేతనం, పీఎఫ్ సౌకర్యం, అలాగే రూ.20 లక్షల ప్రమాద బీమా కల్పించాలని మంకెన కృష్ణ కోరారు. ఈ కార్యక్రమంలో మండల VOA అధ్యక్షురాలు సుజాతతో పాటు భానుశ్రీ, కళావతి మరియు ఇతర VOA నాయకులు పాల్గొన్నారు.

అమ‌రావ‌తి అభివృద్ధి సంస్థ‌(ఏడీసీ) సీఎండీ శ్రీ‌మ‌తి డి.ల‌క్ష్మీపార్థ‌సార‌థి, ఉండవల్లి పంపింగ్ స్టేషన్ వద్ద నీటిపారుదల శాఖ అధికారులు వేసిన అడ్డుక‌ట్ట‌ను త‌క్ష‌ణం తొల‌గించాలని ఏడీసీ ఇంజినీరింగ్ అధికారులకు ఆదేశాలు జారీచేశారు. స్లూయీజ్ గేట్ల లీకేజీ ద్వారా కృష్ణాన‌దిలోని నీటి ప్ర‌వాహం కొండ‌వీటివాగులోనికి వెళ్ల‌కుండా నిరోధించేందుకు ఈ అడ్డుక‌ట్ట వేయబడిందని ఆమె పేర్కొన్నారు. పంపింగ్ స్టేష‌న్‌కు మ‌ర‌మ‌తులు చేసే క్రమంలో, నీటిపారుద‌ల శాఖ అధికారులు కొండ‌వీటివాగులో నీరు ఇన్‌టేక్ పాండ్‌లో క‌ల‌వ‌కుండా ఈ అడ్డుక‌ట్ట వేశారని వివరణ లభించింది. నీటిపారుదల హెడ్ రెగ్యులేటర్‌లో లీకేజీ మరియు ఈ కట్ట కారణంగా కృష్ణా నది నుండి పెనుమాక రిజర్వాయర్‌కు నీటి ప్రవాహం వెనక్కి ప్రవహించిందని ఏడీసీ ఛీఫ్ ఇంజినీరు బి.న‌ర‌సింహ‌మూర్తి సీఎండీకి వివరించారు. ఉండ‌వ‌ల్లి పంపింగ్ స్టేష‌న్ వ‌ద్ద కృష్ణాన‌దిలో కొండ‌వీటివాగు నీటి ప్ర‌వాహం కలుస్తుంది. ఇక్కడ అడ్డుకట్ట వేయడం వల్ల కృష్ణాన‌దిలో నీరు వెనక్కి వచ్చి, పెనుమాకలో అభివృద్ధి పనులలో ఉన్న రిజర్వాయర్‌లోనికి చేరి నిలిచిందని ఆయన నివేదించారు. ఈ అడ్డుక‌ట్ట బ‌కింగ్‌హాం కెనాల్‌లో వెళ్లాల్సిన కొండ‌వీటివాగు నీరు సైతం నిలిచిపోవడానికి కారణమైంది. ఈ పరిస్థితిపై శ‌నివారం ఏడీసీ ఇంజినీరింగ్ అధికారుల‌తో పంపింగ్ స్టేష‌న్ ప్రాంతాన్ని ప‌రిశీలించిన సీఎండీ, వెంటనే నీటిపారుద‌ల శాఖ అధికారుల‌తో మాట్లాడి, అడ్డుక‌ట్ట‌ను త‌క్ష‌ణ‌మే తొల‌గించాల‌ని ఖ‌చ్చిత‌మైన ఆదేశాలు జారీచేశారు. అనంతరం ఆమె పెనుమాక రిజర్వాయర్‌కు చేరిన కృష్ణా నీటి ప్ర‌వాహాన్ని పరిశీలించారు. వర్షాలు కురుస్తున్నందున, రాజ‌ధాని అమ‌రావ‌తి గుండా ప్ర‌వ‌హిస్తున్న కొండ‌వీటివాగు, పాల‌వాగుల మ‌ధ్య నిర్మిస్తున్న ర‌హ‌దార్ల వంతెన‌ల వ‌ద్ద నీటి ప్ర‌వాహానికి ఆటంకం లేకుండా అధికారులు వెంటనే చ‌ర్య‌లు చేప‌ట్టాలని కూడా ఆమె ఆదేశించారు. అలాగే, పాల‌వాగు ప్రారంభ‌మ‌య్యే రాయ‌పూడి వ‌ద్ద ఉన్న డైవ‌ర్ష‌న్ ఛానెల్‌ను మరింత లోతుగా తవ్వకం చేయాలని సూచించారు. ఈ ప‌ర్య‌ట‌న‌లో ఏడీసీ ఛీఫ్ ఇంజినీర్లు ఆర్‌.గోపాల‌కృష్ణారెడ్డి, సీహెచ్‌. ధ‌నుంజ‌య‌, ఎస్ఈ రామ‌మోహ‌న‌రావుతో పాటు ఇతర ఇంజినీరింగ్ అధికారులు పాల్గొన్నారు.

రాష్ట్ర ప్రభుత్వ గౌరవ సలహాదారు వి.హెచ్. హనుమంతరావు, బిజెపిపై తీవ్ర స్థాయిలో విరుచుకుపడ్డారు. ఎస్సీ, ఎస్టీ, ముస్లిం, క్రిస్టియన్ వర్గాల ఓట్లను "SIR" ద్వారా తొలగించి, కేవలం RSS భావజాలం ఉన్నవారి ఓట్లను మాత్రమే ఉంచి రాజకీయ లబ్ధి పొందడానికి బిజెపి నీతిమాలిన చర్యలకు పాల్పడుతోందని ఆయన ఆగ్రహం వ్యక్తం చేశారు. ఇది రాజ్యాంగ నిర్మాత బాబాసాహెబ్ అంబేద్కర్ ను అవమానించడమే అవుతుందని ప్రభుత్వ గౌరవ సలహాదారు, సీనియర్ నేత వి.హెచ్. హనుమంతరావు ఖమ్మంలోని సంజీవరెడ్డి భవన్ లో నిర్వహించిన మీడియా సమావేశంలో స్పష్టం చేశారు. ఈ సందర్భంగా ఆయన మాట్లాడుతూ, చివరిసారిగా 1930లో కుల గణన, జనగణన జరిగిందని గుర్తుచేశారు. అప్పటి నుంచి ఇప్పటివరకు ఎవరి సంఖ్య ఎంతో వెల్లడించాలని పార్లమెంటులో తాను ప్రశ్నించగా, బిజెపి "SIR"ను తీసుకొచ్చి బిజెపియేతర ఓట్లను తొలగించే కార్యక్రమం చేపడుతోందని ఆరోపించారు. తమకు అనుకూలంగా ఉండే RSS భావజాలం కలిగిన వారి ఓట్లను తొలగించకుండా రాజకీయంగా లబ్ధి పొందే కుట్ర చేస్తున్నారని ఆయన అన్నారు. కేంద్ర ఎన్నికల సంఘానికి ఎన్నిసార్లు తెలియజేసినా అది మొద్దు నిద్రపోతోందని ఆయన మండిపడ్డారు. గతంలో జరిగిన ఎన్నికల్లో మహారాష్ట్ర, బెంగాల్, హర్యానా వంటి రాష్ట్రాల్లో లక్షల్లో ఓట్లు తొలగించారని, తద్వారా ఆ రాష్ట్రాలలో బిజెపి అధికారంలోకి వచ్చిందని వి.హెచ్. హనుమంతరావు ఆరోపించారు. కాశ్మీర్ నుండి కన్యాకుమారి వరకు జోడో యాత్ర చేసి ఓటు హక్కు యొక్క ప్రాముఖ్యతను రాహుల్ గాంధీ ప్రజలకు తెలియజేశారని ఆయన గుర్తుచేశారు. రాహుల్ గాంధీ ఆదేశాల మేరకు బూతుల్లోకి వెళ్లి ప్రజల ఓటు హక్కును కాపాడాలని కార్యకర్తలకు విజ్ఞప్తి చేశారు. కేంద్ర ప్రభుత్వం జనగణనలో అందరికీ అవకాశం ఇస్తామని చెప్పినా, ఆ దిశగా ఎటువంటి చర్యలు లేవని కూడా ఆయన వ్యాఖ్యానించారు.

సత్తుపల్లి పట్టణంలోని 18వ వార్డులో ఉన్న డాల్ఫిన్స్ స్విమ్మింగ్ పూల్‌లో జరిగిన స్విమ్మింగ్ పోటీల విజేతలకు బహుమతులు ప్రధానం చేశారు. సత్తుపల్లి నియోజకవర్గ ఎమ్మెల్యే డాక్టర్ మట్టా రాగమయి దయానంద్ ఈ కార్యక్రమానికి హాజరై విజేతలకు బహుమతులు అందజేశారు. ఈ కార్యక్రమంలో సత్తుపల్లి మున్సిపల్ చైర్మన్ మహమ్మద్ రెహనా కమల్ పాషా, సత్తుపల్లి మున్సిపల్ వైస్ చైర్మన్ బొంతు సుమలత వేణు, వార్డు కౌన్సిలర్, కాంగ్రెస్ నాయకులు, కార్యకర్తలు పాల్గొన్నారు.

ఖమ్మం జిల్లా తల్లాడ మండలంలోని గ్రీన్‌ఫీల్డ్ హైవేపై ఘోర రోడ్డు ప్రమాదం చోటుచేసుకుంది. ఈ ఘటనలో తెలంగాణ పోలీసు శాఖలో బొల్లారం కానిస్టేబుల్‌గా పనిచేస్తున్న హైదరాబాద్‌కు చెందిన స్వర్ణకంటి జస్వంత్ (36) అక్కడికక్కడే మృతి చెందారు. జస్వంత్ 2021 బ్యాచ్‌కు చెందిన కానిస్టేబుల్‌గా సమాచారం. అన్నవరం దేవస్థానం దర్శనం చేసుకుని హైదరాబాద్‌కు తిరుగు ప్రయాణం చేస్తున్న జస్వంత్ కుటుంబం ప్రయాణిస్తున్న కారు రామానుజవరం గ్రామ సమీపంలో అదుపుతప్పి హైవే ఎడమ వైపున ఉన్న రేకు బారికేడును ఢీకొట్టి పల్టీలు కొట్టింది.