இராமநாதபுரம் மாவட்டம், முதுகுளத்தூர் சட்டமன்றத் தொகுதிக்கு உட்பட்ட அ.பழகுளம் கிராமத்தில், தமிழக வெற்றி கழகத்தின் சார்பில் ஒரு நிகழ்ச்சி நடைபெற்றது. இந்த நிகழ்ச்சி, தமிழக முதல்வர் திரு.ஜோசப் விஜய் அவர்களின் பிறந்தநாளை முன்னிட்டு ஏற்பாடு செய்யப்பட்டிருந்தது. இதில் பள்ளி குழந்தைகளுக்கு நோட்டு புத்தகங்கள் மற்றும் இனிப்புகள் வழங்கப்பட்டன. மேலும், பள்ளி குழந்தைகள் குடிநீருக்காக மிகவும் சிரமப்படுவதாக தலைமை ஆசிரியர் குறிப்பிட்டதைத் தொடர்ந்து, அவர்களுக்கு குடிநீர் கிடைப்பதற்கான வசதிகள் விரைவாக செய்து தரப்படும் என தமிழக வெற்றி கழகம் உறுதியளித்துள்ளது. இந்த நலத்திட்ட நிகழ்வில் NPR ரவிகிருஷ்ணன், மீசல் கிளைச் செயலாளர், அ.பழகுளம் கிளைச் செயலாளர் மற்றும் ஏராளமான கிராம பொதுமக்கள் கலந்து கொண்டனர்.

மதுரை மாவட்ட ஆட்சியராக கடந்த ஜூன் 1ஆம் தேதி பொறுப்பேற்ற ஐ.ஏ.எஸ். அதிகாரி ஆகாஷ், வெறும் 20 நாட்களிலேயே சிவகங்கை மாவட்ட ஆட்சியராக இடமாற்றம் செய்யப்பட்டு இன்று பொறுப்பேற்றார். இதேபோல், சிவகங்கை மாவட்ட ஆட்சியராக கடந்த ஜூன் 18ஆம் தேதி பொறுப்பேற்ற நிஷாந்த் கிருஷ்ணா, மூன்று நாட்களிலேயே மதுரை மாவட்ட ஆட்சியராக மாற்றப்பட்டுள்ளார். அடுத்தடுத்து நிகழ்ந்த இந்த நிர்வாக மாற்றங்கள் தற்போது கவனம் பெற்றுள்ளன. 2014ஆம் ஆண்டு ஐ.ஏ.எஸ். பேட்ச் அதிகாரியான ஆகாஷ், தென்காசி மற்றும் நாகப்பட்டினம் மாவட்டங்களில் மாவட்ட ஆட்சியராகப் பணியாற்றிய அனுபவம் கொண்டவர். சிவகங்கை மாவட்ட ஆட்சியர் அலுவலகத்தில் இன்று பொறுப்பேற்ற அவருக்கு மாவட்ட நிர்வாக அதிகாரிகள் வாழ்த்து தெரிவித்தனர். புதிய ஆட்சியர், மாவட்ட வளர்ச்சித் திட்டங்கள், மக்கள் நலப் பணிகள் மற்றும் நிர்வாக நடவடிக்கைகளை விரைவுபடுத்துவதில் கவனம் செலுத்துவார் என எதிர்பார்க்கப்படுகிறது.

திருவாடானையில் திங்கட்கிழமைகளில் வாரந்தோறும் ஒருமுறை நடைபெறும் வாரச்சந்தை இன்று செயல்படுகிறது. இந்தச் சந்தையில் அனைத்து வகையான காய்கறிகளும் பொதுமக்கள் பயன்பாட்டிற்கு கிடைக்கின்றன.

நேற்று (ஜூன் 21, 2026) இரவு 8.30 மணியளவில், தொண்டி துணை மின் நிலைய ஊழியர்களான அஜித் மற்றும் அழகுமலை கண்ணன் இருவரும் மதுபோதையில் தொண்டி அரசு மருத்துவமனைக்கு அருகே ஜப்ரான் என்ற நபரிடம் தகாத வார்த்தைகளில் பேசி தாக்க முயன்றனர். இந்த சம்பவத்தை அப்பகுதியில் ரோந்து பணியில் இருந்த தொண்டி காவல் ஆய்வாளர் கனகராஜ் விசாரித்தபோது, முழு மதுபோதையில் இருந்த மின்வாரிய ஊழியர்கள் காவல் ஆய்வாளரையும் தகாத வார்த்தைகளில் திட்டி தாக்க முயற்சித்தது அப்பகுதி மக்களிடையே பெரும் அதிர்ச்சியை ஏற்படுத்தியது. மேலும், தொண்டி மின்வாரிய ஊழியர்கள் அனைவரும் சுமார் இரண்டு மணி நேரமாக வேண்டுமென்றே மின்சாரத்தை துண்டித்து, இடையூறு ஏற்படுத்தி அராஜகப் போக்கில் ஈடுபட்டனர். இந்தச் செயல் தொண்டி மக்கள் அனைவரிடமும் பெரும் கொந்தளிப்பையும், அதிர்ச்சியையும் ஏற்படுத்தியுள்ளது. இந்தச் சம்பவத்தை வன்மையாகக் கண்டித்த பொதுமக்கள் மற்றும் அரசியல் கட்சி நிர்வாகிகள், தொண்டி காவல் நிலையத்தில் ஒன்றுகூடி சம்பந்தப்பட்ட ஊழியர்கள் மீது கடும் நடவடிக்கை எடுக்கக் கோரிக்கை விடுத்தனர். மதுபோதையில் ஊழியர்கள் பொதுமக்கள் மற்றும் காவல் துறையினரை தாக்க முயன்று அராஜகப் போக்கில் ஈடுபட்ட இச்செயல் கடும் கண்டனத்திற்குரியது என்றும் வலியுறுத்தப்பட்டது.

தமிழக முதல்வர் விஜய் பிறந்தநாளை முன்னிட்டு, விருதுநகர் மாவட்டம் சாத்தூரில் விருதுநகர் மத்திய மாவட்ட கழகம் சார்பில் பல்வேறு நிகழ்ச்சிகள் நடைபெற்று வருகின்றன. இதன் ஒரு பகுதியாக, சாத்தூரில் 108 பால்குடம் எடுக்கும் நிகழ்ச்சி வெகு விமர்சையாக நடைபெற்றது. சாத்தூர் பேருந்து நிலையம் முன்பு நூற்றுக்கணக்கான பெண்கள் மற்றும் தவெக நிர்வாகிகள், தொண்டர்கள் கூடி, பால்குடம் எடுத்து ஊர்வலமாகச் சென்றனர். இந்நிகழ்ச்சியை விருதுநகர் மத்திய மாவட்ட செயலாளர் சின்னப்பர் தொடங்கி வைத்தார். பேருந்து நிலையம் தொடங்கி முக்கிய வீதிகள் வழியாக ஊர்வலமாக எடுத்துச் செல்லப்பட்ட பால்குடங்கள், சாத்தூர் அருள்மிகு சுப்ரமணிய சுவாமி திருக்கோவிலில் உள்ள மூலவருக்கு அபிஷேகம் செய்யப்பட்டன. அதனைத் தொடர்ந்து, உலக நன்மைக்காகவும், தமிழக முதல்வர் விஜய் நீண்ட நாள் நலமுடன் வாழவும், தமிழகம் அனைத்து துறைகளிலும் மேன்மை அடையவும் வேண்டி சுப்பிரமணிய சுவாமிக்கு சிறப்பு அபிஷேகம் மற்றும் பூஜைகள் நடைபெற்றன. தமிழக முதல்வர் விஜய் பிறந்தநாளை முன்னிட்டு நடைபெற்ற இந்த சிறப்பு பூஜையில் சமூக நலன் மற்றும் மகளிர் மேம்பாட்டுத்துறை அமைச்சர் ஜெகதீஸ்வரி கலந்துகொண்டார். கோவிலுக்கு வந்த அமைச்சருக்கு கோவில் நிர்வாகம் சார்பில் பூரண கும்ப மரியாதை வழங்கப்பட்டது. நிகழ்ச்சியில் கலந்துகொண்டு பால்குடம் எடுத்து வந்த மகளிர் அணியினர், குழவை இட்டு “அரோகரா” கோஷத்துடன் அருள்மிகு சுப்ரமணிய சுவாமியை வணங்கினர். இந்நிகழ்வில் தமிழக கட்சி கழகம் விருதுநகர் மத்திய மாவட்ட நிர்வாகிகள், மகளிர் அணி மாவட்ட நிர்வாகிகள், தொண்டர்கள், சாத்தூர் நகர ஒன்றிய நிர்வாகிகள் எனப் பலரும் பங்கேற்றனர்.

தூத்துக்குடி நகரப் பணிமனையில் உள்ள தமிழ்நாடு அரசு போக்குவரத்து கழக அலுவலகத்தில், தமிழக வெற்றிக் கழக தொழிற்சங்கம் சார்பில், தமிழக முதல்வர் ஜோசப் விஜய்யின் பிறந்தநாள் விழா மிகவும் சிறப்பாக கொண்டாடப்பட்டது. இந்த நிகழ்வில், தமிழக வெற்றிக் கழகத்தின் மத்திய மாவட்ட செயலாளர் SDR. சாமுவேல் ராஜ் கலந்துகொண்டு விழாவிற்கு சிறப்பளித்தார். அவருக்கு தொழிற்சங்கம் சார்பில் சிறப்பான வரவேற்பு அளிக்கப்பட்டது. மேலும், இந்த விழாவில் பணிமனை தலைவர் V. மாடசாமி, செயளாலர் G. தங்கராஜ், பொருளாளர் S. தொப்பைகணபதி, துணை தலைவர் M. ராஜசங்கரன், துணை செயலாளர் B. சிவசுப்பிரமணியன், இணை செயலாளர் N. சுரேஷ்குமார் மற்றும் பிற தொழிற்சங்க நிர்வாகிகள் பலரும் கலந்துகொண்டனர். விழாவை முன்னிட்டு, அங்கு வந்த பயணிகள் மற்றும் பொதுமக்களுக்கு இனிப்புகள் வழங்கப்பட்டு, பிறந்தநாள் கொண்டாட்டம் மேலும் சிறப்பிக்கப்பட்டது.

தூத்துக்குடி மாவட்டம் கோவில்பட்டி பல்லாக்கு சாலை முத்து நகரில் அமைந்துள்ள ஸ்ரீ முத்துமாரியம்மன் கோயிலின் முதலாம் ஆண்டு வருஷாபிஷேக விழா இன்று வெகு விமரிசையாக நடைபெற்றது. இவ்விழாவையொட்டி, இன்று காலை 4 மணிக்கு கோயில் நடை திறக்கப்பட்டு, திருப்பள்ளியெழுச்சி பூஜையும் நித்திய பூஜையும் நடத்தப்பட்டது. அதனைத் தொடர்ந்து, காலை 6.25 மணிக்கு கணபதி பூஜை, சங்கல்பம், புண்ணியாக வாசனம், கும்ப பூஜை, கணபதி ஹோமம், அம்பாள் மூல மந்திர ஹோமம், பூர்ணாஷுதி மற்றும் தீபாராதனை போன்ற சிறப்பு பூஜைகள் நடைபெற்றன. விழாவின் ஒரு பகுதியாக, ஸ்ரீ மகா கணபதி கோயிலில் இருந்து பால் குடம் ஊர்வலமாக எடுத்துவரப்பட்டது. யாக சாலையில் வைக்கப்பட்ட புனித நீரால் கோபுர கலசத்திற்கு அபிஷேகம் செய்யப்பட்டு தீபாராதனை காட்டப்பட்டது. தொடர்ந்து, மூலவர் முத்துமாரியம்மனுக்கு மஞ்சள் பொடி, மாப்பொடி, திரவியம், பால், தயிர், இளநீர், தேன், சந்தனம், வாசனை திரவியங்கள் மற்றும் கும்ப கலச நீரால் சிறப்பு அபிஷேகம் செய்யப்பட்டது. பின்னர், அம்பாள் அழகிய அலங்காரத்தில் பக்தர்களுக்குக் காட்சியளித்தார்; சோடச தீபாராதனையும் நடைபெற்றது. இந்த விழாவில் திரளான பக்தர்கள் கலந்துகொண்டு பஜனைப் பாடல்களைப் பாடி அம்பாளை தரிசித்தனர். நிறைவாக, பக்தர்களுக்குப் பிரசாதம் வழங்கப்பட்டது.

ஓட்டப்பிடாரம் அருகே உள்ள புதியம்புத்தூர் ஸ்ரீ குலசேகர வள்ளி அம்பாள் உடனுறை குலசேகர நாதர் திருக்கோவிலில், திருமஞ்சனத்தை முன்னிட்டு இன்று இரவு ஆனந்த நடராஜர் மற்றும் சிவகாமி அம்பாளுக்கு சிறப்பு அபிஷேகம் நடைபெற்றது. இந்த சிறப்பு அபிஷேகம் பால், மஞ்சள், இளநீர், சந்தனம், தேன், பஞ்சாமிர்தம், திரவிய பொடி, விபூதி, பன்னீர், பழச்சாறு உள்ளிட்ட 18 வகையான பொருட்களால் செய்யப்பட்டது. அபிஷேகத்தைத் தொடர்ந்து, ஆனந்த நடராஜர் மற்றும் சிவகாமி அம்பாள் பட்டு வஸ்திரம், வண்ண பூக்கள், ஆபரணங்கள் கொண்டு அலங்கரிக்கப்பட்டு, சிறப்பு அர்ச்சனைகள் மற்றும் மகா தீபராதனை நிகழ்ச்சியும் நடத்தப்பட்டது. இந்த வழிபாட்டு நிகழ்ச்சியில் ஏராளமான பக்தர்கள் கலந்துகொண்டு, தேவாராம் மற்றும் திருவாசகம் பாடல்களைப் பாடி இறைவனை வழிபட்டனர்.

விருதுநகர் மாவட்டம் சாத்தூர் அருகே உள்ள சமத்துவபுரம் கிராமத்தில், தமிழக முதல்வர் விஜய் பிறந்தநாளை முன்னிட்டு சிறப்பு பொதுநல மருத்துவ முகாம் நடைபெற்றது. இந்த முகாமை தமிழக வெற்றி கழகத்தின் விருதுநகர் மத்திய மாவட்டம் சார்பில் ஏற்பாடு செய்திருந்தது. இந்த மருத்துவ முகாமிற்கு விருதுநகர் மத்திய மாவட்ட செயலாளர் சின்னப்பர் தலைமை தாங்கினார். சாத்தூர் தெற்கு ஒன்றிய செயலாளர் தங்கமுனியராஜா ஏற்பாட்டில் நடைபெற்ற இம்முகாமில், பல்வேறு நோய்களுக்கான சிறப்பு மருத்துவர்கள் பங்கேற்று பொதுமக்களுக்கு மருத்துவ சேவைகளை வழங்கினர். அத்துடன், தேவையான மருந்துகளும் வழங்கப்பட்டன. சமத்துவபுரம், முள்ளிச்செவல், பெருமாள்பட்டி உள்ளிட்ட பல கிராமங்களைச் சேர்ந்த ஏராளமான பொதுமக்கள் இம்முகாமில் கலந்து கொண்டு மருத்துவ உதவிகளைப் பெற்றனர். மருத்துவக் குழுவினர் அளித்த தகவலின்படி, 300க்கும் மேற்பட்ட பயனாளிகள் இந்த முகாமில் கலந்துகொண்டு பயனடைந்துள்ளனர்.