સુરતના હજીરા વિસ્તારમાં L&T બસ અને ટ્રક વચ્ચે ગંભીર અકસ્માત સર્જાયો છે, જેમાં ૨૯ લોકો ઈજાગ્રસ્ત થયા છે. ઘટનાની જાણકારી મળતા જ તમામ ઈજાગ્રસ્તોને તાત્કાલિક સારવાર અર્થે L&T હોસ્પિટલ ખસેડવામાં આવ્યા છે. પ્રાથમિક માહિતી મુજબ, અકસ્માતમાં ઈજાગ્રસ્ત થયેલા લોકોને સામાન્યથી લઈને મધ્યમ પ્રકારની ઈજાઓ પહોંચી છે.

સુરતના ડિંડોલીમાં ભારે વરસાદ બાદ વરસાદી પાણીની ખાડીના કિનારે આવેલી લોખંડની જાળી પર પ્લાસ્ટિક, લાકડા, કપડાં અને અન્ય કચરાનો એક વિશાળ ઢગલો એકઠો થઈ ગયો છે. આ કચરાના ઢગલાને દૂરથી જોતા એવું લાગે છે કે જાણે અહીં કોઈ "કચરાની દિવાલ" ઊભી થઈ ગઈ હોય. આ ગંભીર દૃશ્ય માત્ર ગંદકી જ નથી ફેલાવી રહ્યું, પરંતુ શહેરની ડ્રેનેજ વ્યવસ્થા, કચરા વ્યવસ્થાપન અને નાગરિકોની જાગૃતિ સામે પણ ગંભીર પ્રશ્નો ઊભા કરે છે. જો આ એકઠા થયેલા કચરાને સમયસર દૂર કરવામાં નહીં આવે, તો આગામી વરસાદ દરમિયાન પાણીના પ્રવાહમાં અવરોધ ઊભો થશે અને ફરી એકવાર ભારે પાણી ભરાવા જેવી ગંભીર પરિસ્થિતિ સર્જાઈ શકે છે. આ ગંભીર સ્થિતિને લઈને હવે અનેક સવાલો ઊભા થઈ રહ્યા છે કે આ કચરા માટે આખરે જવાબદાર કોણ છે? શું આ કચરાની સમયસર સફાઈ કરવામાં આવશે? અને શું શહેરને ફરી એકવાર પૂર જેવી મુશ્કેલ પરિસ્થિતિનો સામનો કરવો પડશે? આ મામલે 'વંચિત વાણી' દ્વારા જનહિતમાં સુરત મહાનગર પાલિકાને તાત્કાલિક ધોરણે આ કચરો દૂર કરવા માટે અપીલ કરવામાં આવી છે. સાથે જ નાગરિકોને પણ જાહેર સ્થળોએ કચરો ન ફેંકીને પોતાની જવાબદારી નિભાવવા માટે કહેવામાં આવ્યું છે, કારણ કે સ્વચ્છ શહેર જ ખરેખર સુરક્ષિત શહેર છે.

સુરતના સચિન જીઆઈડીસી રોડ નંબર-૫ સ્થિત પ્લોટ નંબર 546/2 પર કાર્યરત રાનીસતી ક્રિએશન નામની કંપની દ્વારા જાહેર નાળામાં કથિત રીતે કેમિકલયુક્ત ઝેરી પાણી છોડવામાં આવ્યું હોવાનો ગંભીર મામલો સામે આવ્યો છે. એક જાગૃત નાગરિકની સતર્કતાના કારણે આ પર્યાવરણીય નિયમોના ઉલ્લંઘનનો ખુલાસો થયો છે. ઘટનાની જાણ થતાં જ અધિકારીઓની ટીમે સ્થળ પર પહોંચીને નાળામાં વહી રહેલા શંકાસ્પદ રાસાયણિક પાણીનું નિરીક્ષણ કર્યું હતું. મામલાની ગંભીરતાને ધ્યાનમાં રાખીને તપાસ ટીમે સ્થળ પરથી પાણીના લાઈવ સેમ્પલ લીધા છે અને તેને લેબોરેટરીમાં તપાસ માટે મોકલવાની પ્રક્રિયા શરૂ કરી છે. હવે આ તપાસ રિપોર્ટ આવ્યા બાદ જ સ્પષ્ટ થશે કે પાણીમાં પ્રદૂષણનું સ્તર કેટલું છે અને કયા નિયમોનું ઉલ્લંઘન થયું છે. આ સમગ્ર મામલે અધિકારીઓ દ્વારા સેવવામાં આવેલા મૌન બાદ સ્થાનિક લોકોમાં ભારે રોષ અને વિવિધ ચર્ચાઓ શરૂ થઈ ગઈ છે. સ્થાનિક લોકો હવે ઉગ્ર સવાલો ઉઠાવી રહ્યા છે કે શું સરકારી અધિકારીઓ કોઈના દબાણ હેઠળ કામ કરી રહ્યા છે અથવા તો પછી આ ગંભીર ગુનામાં કોઈ ચમરબંધીને બચાવવાનો પ્રયાસ કરવામાં આવી રહ્યો છે.

સુરત શહેરમાં તાજેતરમાં પડેલા ભારે વરસાદ અને તેનાથી પ્રભાવિત લોકોની પીડાને શબ્દો તેમજ સંગીતના માધ્યમથી રજૂ કરવાનો પ્રયાસ કરવામાં આવ્યો છે. શહેરના વરિષ્ઠ તબીબ ડૉ. નિર્મલ વાણિયાવાલા દ્વારા લખાયેલા એક પ્રેરણાદાયી ગીતને પારસ મ્યુઝિક સ્ટુડિયોમાં સંગીતબદ્ધ અને મિક્સ કરવામાં આવ્યું છે. ત્યારબાદ, આ ગીતને વરસાદ સાથે જોડાયેલા દ્રશ્યો સાથે તૈયાર કરીને લોકો વચ્ચે જાહેર કરવામાં આવ્યું છે. પારસ મ્યુઝિક સ્ટુડિયોમાં તૈયાર થયેલું આ ગીત લોકોની લાગણીઓનો અવાજ બન્યું છે અને તેના દ્વારા સેવાનો સંદેશ આપવામાં આવ્યો છે.

સુરત શહેરમાં અખિલ ભારતીય કોંગ્રેસ કમિટી (AICC) દ્વારા યોજાયેલી પત્રકાર પરિષદમાં કોંગ્રેસના રાષ્ટ્રીય સચિવ અભિષેક દત્તે રામ મંદિર નિર્માણ માટે એકત્ર કરાયેલા ચંદા અને ચઢાવામાં થયેલી કથિત ગેરરીતિઓનો મુદ્દો ઉઠાવ્યો છે. મીડિયાને સંબોધતા તેમણે કેન્દ્ર સરકાર અને શ્રી રામ જન્મભૂમિ તીર્થ ક્ષેત્ર ટ્રસ્ટ પર અનેક સવાલો ઉભા કર્યા છે અને સમગ્ર મામલાની સુપ્રીમ કોર્ટની દેખરેખ હેઠળ સ્વતંત્ર તપાસ કરાવવાની માંગ કરી છે. અભિષેક દત્તે જણાવ્યું કે કરોડો શ્રદ્ધાળુઓની આસ્થા સાથે જોડાયેલા આ મામલામાં સંપૂર્ણ પારદર્શિતા સાથે સત્ય સામે આવવું જોઈએ. તેમણે પ્રહાર કરતા કહ્યું કે જો ટ્રસ્ટની કામગીરીમાં કોઈ ગેરરીતિ થઈ નથી, તો સ્વતંત્ર તપાસથી ડરવાની કોઈ જરૂર નથી. ટ્રસ્ટના કેટલાક હોદ્દેદારોના રાજીનામાનો ઉલ્લેખ કરીને તેમણે ગંભીર સવાલો ઉઠાવ્યા હતા અને વડાપ્રધાન નરેન્દ્ર મોદી પાસે સમગ્ર મામલે જવાબ આપવાની માંગ કરી છે. આ સાથે જ તેમણે રામ મંદિર માટે મળેલા ચંદા, ચઢાવા, જમીનની ખરીદી, નિર્માણ કાર્ય અને અન્ય ખર્ચાઓનું સ્વતંત્ર ફોરેન્સિક ઓડિટ કરાવવાની માંગ પણ કરી છે. કોંગ્રેસે દોષિતો સામે નિષ્પક્ષ કાર્યવાહી કરવા અને જરૂર પડ્યે ટ્રસ્ટની પુનઃરચના કરવાની હિમાયત કરી છે, કારણ કે ભગવાન શ્રીરામ કરોડો દેશવાસીઓની આસ્થાના પ્રતીક હોવાથી આ દાનના ઉપયોગમાં સંપૂર્ણ પારદર્શિતા અને જવાબદારી સુનિશ્ચિત થવી જોઈએ. આ પત્રકાર પરિષદમાં સુરત શહેર કોંગ્રેસ પ્રમુખ વિપુલ ઉધનાવાલા, પ્રદેશ પ્રવક્તા નૈષધ દેસાઈ, સંગઠન મહામંત્રી રોહિત સાવલિયા, પાર્ષદ અરશદ જરીવાલા અને સેવાદળ પ્રમુખ સંતોષ પાટીલ સહિત કોંગ્રેસના અનેક હોદ્દેદારો હાજર રહ્યા હતા.

સુરતના તાતીથૈયામાંથી ચોરી થયેલી રોયલ એનફિલ્ડ મોટરસાઇકલ સાથે આરોપીની ધરપકડ કરવામાં આવી છે. આ સાથે જ આરોપી પાસેથી ₹90 હજારની કિંમતનો મુદ્દામાલ પણ બરામદ કરવામાં આવ્યો છે.

સુરત શહેરમાં વરસાદના પાણી ભરાવાને કારણે ખટોદરા પોલીસની સરાહનીય કામગીરી સામે આવી છે. વિસ્તારમાં પાણી ભરાઈ જતાં ખટોદરા પી આઇ શ્રી એન વી ભરવાડ સાહેબ દ્વારા લોકોને સલામત સ્થળે સ્થળાંતર કરવામાં આવ્યું છે. આ કપરી પરિસ્થિતિમાં પોલીસ દ્વારા કરવામાં આવેલી આ કામગીરીની ભારે પ્રશંસા થઈ રહી છે.

સુરત શહેરમાં એક અત્યંત ગંભીર અને શરમજનક ઘટના સામે આવી છે, જેમાં ૬ વર્ષની નાબાલીક બાળકી સાથે દુષ્કર્મ આચરનારા ૮૨ વર્ષના વૃદ્ધ આરોપીને સલાબતપુરા પોલીસે તાત્કાલિક કાર્યવાહી કરીને ઝડપી પાડ્યો છે. પકડાયેલા આરોપીની ઓળખ મુસા મોહમદ મંસુરી (ઉંમર ૮૨ વર્ષ) તરીકે થઈ છે. સલાબતપુરા પોલીસ ટીમ દ્વારા આરોપી વિરૂદ્ધ પોક્સો એક્ટ હેઠળ ગુનો દાખલ કરીને આગળની કાયદેસરની કાર્યવાહી હાથ ધરવામાં આવી છે. પોલીસ તપાસમાં સામે આવ્યું છે કે આરોપી હાલ સુરત શહેરના સલાબતપુરા વિસ્તારમાં આવેલી ઉમરવાડાની બેઠી કોલોનીમાં રહેતો હતો, જ્યારે તેનું મૂળ વતન ભરૂચ જિલ્લાનું સંખવાડ છે. આ કમકમાટીભરી ઘટનાને પગલે સમગ્ર વિસ્તારના લોકોમાં ભારે રોષનો માહોલ જોવા મળી રહ્યો છે. હાલ પોલીસ દ્વારા આ મામલે આગળની કડક તપાસ ચલાવવામાં આવી રહી છે અને આરોપી સામે કડક કાયદેસરના પગલાં ભરવાની ખાતરી આપવામાં આવી છે.