ଅସ୍ତରଙ୍ଗ ବ୍ଲକ ଅନ୍ତର୍ଗତ ସରିପୁର ପଞ୍ଚାୟତର ସିଦ୍ଧିପୁର ଗ୍ରାମରେ ଏକ ଅଭାବନୀୟ ଘଟଣା ଘଟିଛି। ଏଠାରେ ଜଣେ ଜ୍ୱାଇଁ ନିଜ ଶଶୁରଙ୍କୁ ହତ୍ୟା କରି ଘଟଣାସ୍ଥଳରୁ ଫେରାର ହୋଇଯାଇଛି। ଏହି ହତ୍ୟାକାଣ୍ଡ ସ୍ଥାନୀୟ ଅଞ୍ଚଳରେ ବଡ଼ ଖବର ଭାବରେ ଚର୍ଚ୍ଚାର ବିଷୟ ପାଲଟିଛି।

ଲକ୍ଷ୍ମୀପୁର ଥାନା ଅନ୍ତର୍ଗତ ବୁର୍ଜା ଗ୍ରାମରେ ଜଣେ ବିବାହିତ ପୁରୁଷ ବେକରେ ରଶି ଲଗାଇ ଆତ୍ମହତ୍ୟା କରିଛନ୍ତି। ମିଳିଥିବା ସୂଚନା ଅନୁଯାୟୀ, ପାରିବାରିକ କଳହକୁ ଏହି ଘଟଣାର ମୁଖ୍ୟ କାରଣ ବୋଲି ଜଣାପଡିଛି।

ରେଡ଼ିଓ ମାଲ୍ୟବନ୍ତ ଗୋଷ୍ଠୀ ବେତାର କେନ୍ଦ୍ର ପକ୍ଷରୁ ଶ୍ରୋତା ବନ୍ଧୁମାନଙ୍କୁ ସ୍ୱାଗତ କରାଯାଇଛି। ସ୍ୱାସ୍ଥ୍ୟ ସୂଚନା ବିଭାଗରେ ବିଶ୍ୱ ତମାଖୁ ବର୍ଜନ ଦିବସ ଅବସରରେ ତମାଖୁ ସେବନର କୁପ୍ରଭାବ ସମ୍ପର୍କରେ ଏକ ବିଶେଷ 'ଖୋଲାକଥା' କାର୍ଯ୍ୟକ୍ରମ ଆୟୋଜନ କରାଯାଇଥିଲା। ଏହି ଆଲୋଚନାରେ ଡାକ୍ତର ଦୁର୍ଗା ପ୍ରସାଦ ରାଜ ଅଂଶଗ୍ରହଣ କରିଥିଲେ।

ମାଲକାନଗିରି ଜିଲ୍ଲାରେ ପିଭିଟିଜି ବଣ୍ଡା ସମ୍ପ୍ରଦାୟର ଲୋକଙ୍କୁ ମତଦାତା ତାଲିକା ପରିଗଣନା ଫର୍ମ ବଣ୍ଟନ କରାଯାଇଛି। ୧୪୭-ଚିତ୍ରକୋଣ୍ଡା (ST) ନିର୍ବାଚନ ମଣ୍ଡଳୀରେ ମାନ୍ୟବର ଅତିରିକ୍ତ ଜିଲ୍ଲାପାଳ ତଥା ଇ.ଆର.ଓ ଏବଂ ଖଇରପୁଟ ବି.ଡି.ଓ ତଥା ଏ.ଇ.ଆର.ଓ ଙ୍କ ଉପସ୍ଥିତିରେ ବି.ଏଲ.ଓ. ମାନଙ୍କ ଦ୍ୱାରା ଏହି ଫର୍ମ ବଣ୍ଟାଯାଇଛି। ଏହି ଅଭିଯାନରେ ବଣ୍ଡା ଭାଇଭଉଣୀମାନଙ୍କୁ ବିଶେଷ ଭାବେ ସେମାନଙ୍କ ନିଜ ବଣ୍ଡା ଭାଷାରେ ଫର୍ମର ଉଦ୍ଦେଶ୍ୟ ଏବଂ ଏହାକୁ ପୂରଣ କରିବାର ସହଜ ପ୍ରକ୍ରିୟା ବିଷୟରେ ବୁଝାଯାଇଛି। ଏହାଦ୍ୱାରା ସେମାନେ ସହଜରେ ମତଦାତା ତାଲିକାରେ ସାମିଲ ହୋଇପାରିବେ।

କଳାହାଣ୍ଡି ଜିଲ୍ଲା ଅନ୍ତର୍ଗତ ଲାଞ୍ଜିଗଡ଼ ବ୍ଲକର ଭଟାଙ୍ଗପଦର ପଞ୍ଚାୟତ ପଡ଼ିଆ ପରିସରରେ ଶୁକ୍ରବାର ଦିନ ଏକ ପଞ୍ଚାୟତ ସ୍ତରୀୟ କଂଗ୍ରେସ କର୍ମୀ ସମ୍ମିଳନୀ ଆୟୋଜିତ ହୋଇଯାଇଛି।

ଗଜପତି ଜିଲ୍ଲା ଏକ ଆଦିମ ଅଧୁଷିତ ଜିଲ୍ଲା ଭାବେ ପରିଚିତ। ଏଠାରେ ମନୁଷ୍ୟଙ୍କ ଜୀବନଶୈଳୀରେ ପରିବର୍ତ୍ତନ ଏବଂ ଯାତାୟାତ ବ୍ୟବସ୍ଥା ଉନ୍ନତ କରିବା ପାଇଁ ସରକାର ଦୁର୍ଗମ ଅଞ୍ଚଳରେ ରାସ୍ତାଘାଟ ନିର୍ମାଣ ନିମନ୍ତେ କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି। ତେବେ, ଅଭିଯୋଗ ରହିଛି ଯେ, ସରକାରୀ ବାବୁମାନେ କାର୍ଯ୍ୟାଳୟରେ ବସି ନିର୍ଦ୍ଦେଶ ଦେଇ ଟଙ୍କା ମଞ୍ଜୁର କରନ୍ତି, କିନ୍ତୁ ଏହାର ଫାଇଦା ଠିକାଦାରମାନେ ମନମୁଖୀ କାମ କରି ମାଲେମାଲ ହୁଅନ୍ତି। ଏହାର ଏକ ନଗ୍ନ ଚିତ୍ର ହରଭଙ୍ଗୀରୁ ଗୁରୁଝୁଳି ଏବଂ ଗୁରୁଝୁଳିରୁ ବାଲିବନ୍ଧ ରାସ୍ତାରେ ଦେଖିବାକୁ ମିଳିଛି। ସୂଚନାନୁସାରେ, ଏହି ରାସ୍ତାର ମେଟାଲ କାମ ହୋଇ ପ୍ରାୟ ଚାରି ମାସ ବିତିଲାଣି। କିନ୍ତୁ ଠିକାଦାରଙ୍କୁ ବାରମ୍ବାର କହି କହି ଅଞ୍ଚଳବାସୀ ନୟାନ୍ତ ହୋଇସାରିଲେଣି ଏବଂ ସେହି ଠିକାଦାରଙ୍କ ଦେଖା ନାହିଁ। ଫଳରେ ଏହି ରାସ୍ତା କାମ କେବେ ଶେଷ ହେବ, ତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଏହାକୁ ନେଇ ଅଞ୍ଚଳବାସୀ ଚେତାବନୀ ଦେଇଛନ୍ତି ଯେ, ଆଗାମୀ ଏକ ମାସ ଭିତରେ ଯଦି ପୁରା ପିଚୁ ରାସ୍ତା ନିର୍ମାଣ କରା ନ ଯାଏ, ତେବେ ସେମାନେ ରାଜରାସ୍ତାକୁ ଓହ୍ଲାଇବେ। ଅନେକ ଅଞ୍ଚଳବାସୀ ଦାବି କରିଛନ୍ତି ଯେ, ପ୍ରଶାସନ ତୁରନ୍ତ ଏହାର ସଠିକ୍ ଯାଞ୍ଚ କରି ରାସ୍ତାଟିକୁ ଶୀଘ୍ର ସମ୍ପୂର୍ଣ୍ଣ କରୁ, ଯାହାଦ୍ୱାରା ଲୋକମାନେ ଯିବାଆସିବାର ସୁଯୋଗ ଉପଭୋଗ କରିପାରିବେ। ବୁଦ୍ଧିଜୀବୀ ମହଲରେ ଏବଂ ଜନତାଙ୍କ ମଧ୍ୟରେ ଆଶା କରାଯାଉଛି ଯେ, ଏହି ଖବର ପ୍ରସାରଣ ପରେ ତୁରନ୍ତ କାମଟି ସମ୍ପୂର୍ଣ୍ଣ ହେବ ଏବଂ ଏକ ଖୁସିର ସଂକେତ ମିଳିବ।

ଲକ୍ଷ୍ମୀପୁର ରେଳବାଇ ଛକ ଠାରୁ ଘଡ଼ାବନ୍ଦ ପର୍ଯ୍ୟନ୍ତ ବିଜେପି ମହିଳା ପକ୍ଷରୁ ଏକ ବିରାଟ ରାଲି ଆୟୋଜିତ ହୋଇଥିଲା। ଏହି ବିଶାଳ ରାଲିରେ ପାଞ୍ଚ ଶହରୁ ଅଧିକ ମହିଳା ଉପସ୍ଥିତ ରହିଥିଲେ।

ମାଲକାନଗିରି ଜିଲ୍ଲାର ବଦଳି ଏବଂ ଚିତ୍ରାଙ୍ଗପଲ୍ଲୀ ପଞ୍ଚାୟତରେ ଗତ ତିନି ଦିନ ଧରି ବିଦ୍ୟୁତ୍ ସରବରାହ ବାଧାପ୍ରାପ୍ତ ହୋଇଛି, ଯାହା ଫଳରେ ଏହି ଦୁଇ ପଞ୍ଚାୟତର ଲୋକମାନେ ଅନ୍ଧାରରେ ରହିଛନ୍ତି। ଏହି ଦୀର୍ଘ ସମୟର ବିଦ୍ୟୁତ୍ କାଟ ଯୋଗୁଁ ସ୍ଥାନୀୟ ଜନସାଧାରଣଙ୍କ ମଧ୍ୟରେ ପ୍ରବଳ ଅସନ୍ତୋଷ ଓ କ୍ରୋଧ ଦେଖାଦେଇଛି।

ଏକ ସମୟ ଥିଲା ଯେତେବେଳେ ଅବସର ନେବା ପରେ ମଧ୍ୟ ପେନସନ ରାଶି ପାଇବା ପାଇଁ ବର୍ଷ ବର୍ଷ ଧରି ଧା ଦୌଡ଼ କରିବାକୁ ପଡୁଥିଲା। କିନ୍ତୁ ଏବେ ଏହି ପରିସ୍ଥିତିରେ ପରିବର୍ତ୍ତନ ଆସିଛି, ଯାହା ଅନୁସାରେ ଅବସର ଦିନ ହିଁ ସମସ୍ତ ପୂର୍ଣ୍ଣାଙ୍ଗ ପେନସନ କାଗଜପତ୍ର ପ୍ରଦାନ କରାଯାଉଛି। ଏହିକ୍ରମରେ ଆଜି ଶନିବାର ପୂର୍ବାହ୍ନ ଏଗାରଟା ସମୟରେ କଳାହାଣ୍ଡି ଜିଲ୍ଲା ଲାଞ୍ଜିଗଡ଼ ବ୍ଲକ ଶିକ୍ଷା ବିଭାଗ ପକ୍ଷରୁ ଗୋବର୍ଦ୍ଧନପୁର କ୍ଲଷ୍ଟରର ପୋଡ଼ାପଦର ସରକାରୀ ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷୟିତ୍ରୀ ମଞ୍ଜୁଲତା ଦାସଙ୍କୁ ତାଙ୍କ ଅବସରକାଳୀନ ସମ୍ବର୍ଦ୍ଧନା ସହ ପୂର୍ଣ୍ଣାଙ୍ଗ ପେନସନ କାଗଜପତ୍ର ପ୍ରଦାନ କରାଯାଇଛି। ବିଶ୍ୱନାଥପୁର ବିଇଓ ଅଫିସ ପରିସରରେ ଆୟୋଜିତ ଏହି କାର୍ଯ୍ୟକ୍ରମରେ ଗୋଷ୍ଠୀ ଶିକ୍ଷା ଅଧିକାରୀ ରୁଷିଆ ମେହେର ସଭାପତିତ୍ୱ କରିଥିଲେ। ଏହି ଅବସରରେ କାର୍ଯ୍ୟାଳୟର ସମସ୍ତ କର୍ମଚାରୀ ଏବଂ ସମସ୍ତ କ୍ଲଷ୍ଟର ସଂଯୋଜକ ଉପସ୍ଥିତ ରହି ସହଯୋଗ କରିଥିଲେ।

କଳାହାଣ୍ଡି ଜିଲ୍ଲାରେ ପ୍ରଚଣ୍ଡ ତାପ ପ୍ରବାହ ଜାରି ରହିଥିବାବେଳେ ଜଳ ସଙ୍କଟ ଏକ ପ୍ରମୁଖ ସମସ୍ୟା ଭାବେ ଉଭା ହୋଇଛି। ଏହି ପରିସ୍ଥିତିରେ 'ବସୁଧା' ଯୋଜନା ଅଧୀନରେ ପିଇବା ପାଣି ପାଇଁ କୋଟି କୋଟି ଟଙ୍କା ଖର୍ଚ୍ଚ କରାଯାଇଥିଲେ ମଧ୍ୟ ଲୋକଙ୍କ ପାଖରେ ପାଣି ପହଞ୍ଚିପାରୁନାହିଁ, ଯାହା ଫଳରେ ଲୋକମାନେ ରାଜରାସ୍ତାକୁ ଓହ୍ଲାଇବାକୁ ବାଧ୍ୟ ହେଉଛନ୍ତି। ଏପରି ଏକ ଘଟଣା ଆଜି କଳାହାଣ୍ଡି ଜିଲ୍ଲା ଲାଞ୍ଜିଗଡ଼ ବ୍ଲକ ମୁଖ୍ୟାଳୟ ବିଶ୍ୱନାଥପୁର ପଞ୍ଚାୟତ ଅନ୍ତର୍ଗତ କଲୋନୀ ଠାରେ ଦେଖିବାକୁ ମିଳିଛି। ଟାଏଁ ଟାଏଁ ଖରାରେ ବିଶ୍ୱନାଥପୁର ଓ ଲାଞ୍ଜିଗଡ଼କୁ ସଂଯୋଗ କରୁଥିବା ରାସ୍ତାକୁ ଅବରୋଧ କରି ମହିଳାମାନେ ସେମାନଙ୍କ ମୌଳିକ ଅଧିକାର – ପିଇବା ପାଣି – ପାଇଁ ସଂଘର୍ଷ କରିଥିଲେ। ଏହି ରାସ୍ତାରୋକ ଆନ୍ଦୋଳନ ସମ୍ପର୍କରେ ଖବର ପାଇ ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ ପ୍ରମୋଦ କୁମାର ସାହୁ ଘଟଣାସ୍ଥଳରେ ପହଞ୍ଚିଥିଲେ। ତାଙ୍କ ପ୍ରତିଶ୍ରୁତି ପରେ ଆଜି ଶନିବାର ଅପରାହ୍ନ ତିନିଟା ସମୟରେ ରାସ୍ତାରୋକ ଆନ୍ଦୋଳନ ହଟିଥିଲା। ଗ୍ରାମବାସୀଙ୍କ ପିଇବା ପାଣି ପାଇଁ କରିଥିବା ରାସ୍ତାରୋକ ପ୍ରତିଶ୍ରୁତି ପରେ ଶେଷ ହୋଇଥିବାବେଳେ ଯାତାୟତ ସ୍ୱାଭାବିକ ହୋଇଥିଲା।