ଝାରସୁଗୁଡ଼ାସ୍ଥିତ ବୀର ସୁରେନ୍ଦ୍ର ସାଏ (VSS) ବିମାନବନ୍ଦରରେ ୨୮ ଜୁନ ୨୦୨୬ ତାରିଖରେ Flight Inspection Unit (FIU) ପକ୍ଷରୁ Instrument Landing System (ILS) ଓ Precision Approach Path Indicator (PAPI) ର ସଫଳ ଫ୍ଲାଇଟ୍ କ୍ୟାଲିବ୍ରେସନ୍ କରାଯାଇଛି। ଏହି କ୍ୟାଲିବ୍ରେସନ୍ ମାଧ୍ୟମରେ ବିମାନ ଅବତରଣ ପାଇଁ ବ୍ୟବହୃତ ନେଭିଗେସନ୍ ସିଗ୍ନାଲର ସଠିକତା ଯାଞ୍ଚ କରାଯିବା ସହ ବେସାମରିକ ବିମାନ ଚଳାଚଳ ମାନଦଣ୍ଡ ଅନୁଯାୟୀ ଏହାର କାର୍ଯ୍ୟକ୍ଷମତା ମଧ୍ୟ ନିଶ୍ଚିତ କରାଯାଇଛି। ବିମାନବନ୍ଦର କର୍ତ୍ତୃପକ୍ଷଙ୍କ କହିବା ଅନୁଯାୟୀ, ଏହି ପ୍ରକ୍ରିୟା ବିମାନ ଯାତ୍ରୀଙ୍କ ସୁରକ୍ଷିତ ଉଡ଼ାଣ ଓ ଅବତରଣକୁ ଅଧିକ ନିରାପଦ ଏବଂ ବିଶ୍ୱସନୀୟ କରିବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ। ଏହି କ୍ୟାଲିବ୍ରେସନ୍ କାର୍ଯ୍ୟ ସଫଳ ଭାବେ ସମ୍ପନ୍ନ ହେବାରେ Flight Inspection Unit (FIU) ଓ ଝାରସୁଗୁଡ଼ା VSS ବିମାନବନ୍ଦରର ସମସ୍ତ ଅଧିକାରୀ ତଥା କର୍ମଚାରୀଙ୍କ ଉଦ୍ୟମକୁ ପ୍ରଶଂସା କରାଯାଇଛି।

ଓଡ଼ିଶା ହାଇକୋର୍ଟ ଆଜି ବେଳପାହାଡ଼ ପୌରପାଳିକା ଅଧ୍ୟକ୍ଷ ନିମାଇଁ ଚରଣ ପଣ୍ଡାଙ୍କ ଦ୍ୱାରା ଦାଖଲ ହୋଇଥିବା ରିଟ୍ ପିଟିସନ୍ (W.P.(C) No. 18643/2026) ଉପରେ ଶୁଣାଣି କରିଛନ୍ତି। କଟକରେ ହୋଇଥିବା ଏହି ଶୁଣାଣି ସମୟରେ ମାମଲାରେ ସଂଶୋଧନ ପାଇଁ ଆବେଦନକାରୀଙ୍କ ପକ୍ଷରୁ ଦାଖଲ ହୋଇଥିବା ଆବେଦନକୁ ବିଚାର ପାଇଁ ଉପସ୍ଥାପନ କରାଯାଇଥିଲା। ଅନ୍ୟପକ୍ଷଙ୍କ ଓକିଲ ଏହି ସଂଶୋଧନ ଆବେଦନ ଉପରେ ଆପତ୍ତି ଦାଖଲ କରିବା ପାଇଁ ସମୟ ମାଗିଥିଲେ। ହାଇକୋର୍ଟ ଏହାକୁ ଗ୍ରହଣ କରି ୮ ଜୁଲାଇ ୨୦୨୬ ସୁଦ୍ଧା ଆପତ୍ତି ଦାଖଲ କରିବାକୁ ସମୟ ଦେଇଛନ୍ତି। ମାମଲାର ପରବର୍ତ୍ତୀ ଶୁଣାଣି ୧୪ ଜୁଲାଇ ୨୦୨୬ ତାରିଖରେ ହେବ। ଏହି ମାମଲାରେ ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ହାଇକୋର୍ଟ ପୂର୍ବରୁ ଜାରି କରିଥିବା ଅନ୍ତରୀଣ ଆଦେଶକୁ ପରବର୍ତ୍ତୀ ଶୁଣାଣି ପର୍ଯ୍ୟନ୍ତ ବଳବତ୍ତର ରଖିଛନ୍ତି। ଫଳରେ ମାମଲାର ପରବର୍ତ୍ତୀ ଶୁଣାଣି ପର୍ଯ୍ୟନ୍ତ ପୂର୍ବରୁ ଲାଗୁଥିବା ସ୍ଥିତି ବଜାୟ ରହିବ। ଏହି ମାମଲା ବେଳପାହାଡ଼ ପୌର ଅଧ୍ୟକ୍ଷ ନିମାଇଁ ଚରଣ ପଣ୍ଡାଙ୍କ ବିରୋଧରେ ଅଣାଯାଇଥିବା ଅନାସ୍ତା ପ୍ରସ୍ତାବ ସହ ଜଡ଼ିତ।

ଓଡ଼ିଶା ହାଇକୋର୍ଟ ବେଲପାହାଡ଼ ପୌରପାଳିକାର ଅନାସ୍ଥା ବିବାଦରେ ନଗରପାଳ ନିମାଇଁ ଚରଣ ପଣ୍ଡାଙ୍କୁ ଅନ୍ତରୀଣ ଆଶ୍ୱସ୍ତି ପ୍ରଦାନ କରିଛନ୍ତି। ଏହି ନିଷ୍ପତ୍ତି ଫଳରେ ଅନାସ୍ଥା ଭୋଟର ଫଳାଫଳ ପ୍ରକାଶ ଉପରେ ଥିବା ରୋକ ଆଉ ଦୁଇ ସପ୍ତାହ ପର୍ଯ୍ୟନ୍ତ ବଳବତ୍ତର ରହିବ। ଏହି ମାମଲାର ପରବର୍ତ୍ତୀ ଶୁଣାଣି ଜୁଲାଇ ୧୪ ରେ ହେବ।

ଝାରସୁଗୁଡ଼ା ଜିଲ୍ଲା ବେଲପାହାଡ଼ରେ ଥିବା 'ବୃକ୍ଷର ବନ୍ଧୁ' ଅନୁଷ୍ଠାନ ପକ୍ଷରୁ ଜୁଲାଇ ୧, ୨୦୨୬, ବୁଧବାର ଦିନ ବନମହୋତ୍ସବ ପାଳନ ଅବସରରେ ଏକ ବୃକ୍ଷରୋପଣ କାର୍ଯ୍ୟକ୍ରମ ଆୟୋଜିତ ହୋଇଯାଇଛି। ଏହି କାର୍ଯ୍ୟକ୍ରମ ବେଲପାହାଡ଼ ଗୁମାଡେରା ସ୍ଥିତ ମିରର ଥିଏଟର ନିକଟରେ ଅନୁଷ୍ଠିତ ହୋଇଥିଲା। ଏହି ଅବସରରେ ମତ ପ୍ରକାଶ ପାଇଛି ଯେ, ଜିଲ୍ଲାରେ ଶିଳ୍ପାୟନ ଏବଂ ଖଣି ଖାଦାନ ବୃଦ୍ଧି ପାଇବା ଦ୍ୱାରା ମାନବ ସମାଜ ଓ ଜୀବଜଗତ ବର୍ତ୍ତମାନ ବିନାଶ ଆଡ଼କୁ ଗତି କରୁଛି। ଧୀରେ ଧୀରେ ଜିଲ୍ଲାରେ ପ୍ରାକୃତିକ ଜଙ୍ଗଲ ହ୍ରାସ ପାଉଥିବା ବେଳେ ଅସଂଖ୍ୟ ବୃକ୍ଷଲତା ବଳି ପଡ଼ି ଧୂଳିସାତ୍ ହେଉଛି। ଆଗାମୀ ସମୟରେ ଅଞ୍ଚଳରେ ଆହୁରି ଅଧିକ ଶିଳ୍ପ ଓ ଖଣି ପ୍ରତିଷ୍ଠା ହେବା ନିଶ୍ଚିତ ହୋଇସାରିଛି, କିନ୍ତୁ ତୁଳନାତ୍ମକ ଭାବେ ବୃକ୍ଷରୋପଣକୁ ପ୍ରାଧାନ୍ୟ ଦିଆଯାଇ ନାହିଁ। ଏଣୁ, ଅଧିକରୁ ଅଧିକ ବୃକ୍ଷରୋପଣ କରିବା ଦ୍ୱାରା ହିଁ ଆଗକୁ ମାନବ ସମାଜ ଓ ଜୀବଜଗତକୁ ବିନାଶରୁ ବଞ୍ଚାଯାଇ ପାରିବ। ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ବେଲପାହାଡ଼ ରେଞ୍ଜର ପ୍ରଦୀପ ନାଏକ ଏବଂ ସମ୍ମାନିତ ଅତିଥି ଭାବେ ପ୍ରକୃତି ବନ୍ଧୁ ପୁରସ୍କାର ପ୍ରାପ୍ତ ବେଲପାହାଡ଼ ଜୁନିୟର କଲେଜର ଅଧ୍ୟକ୍ଷ ସୁରେନ୍ଦ୍ର କୁମାର ଭୋଇ, ବର୍ଷିୟାନ୍ ନାଗରିକ ସଚ୍ଚିଦାନନ୍ଦ ପଣ୍ଡା, ପୀତବାସ ପ୍ରଧାନ, ରମାକାନ୍ତ ମଲ୍ଲିକ, ଗଜେନ୍ଦ୍ର ନାଏକ, ମିରର ଥିଏଟରର ନିର୍ଦ୍ଦେଶକ ଡଃ ସୁବାସ ଚନ୍ଦ୍ର ପ୍ରଧାନ ଓ ପୌର କର୍ମଚାରୀ ଶୈଳେଶ ବହିଦାର ପ୍ରମୁଖ ଯୋଗ ଦେଇଥିଲେ। ଏହି ଅବସରରେ ସମାଜସେବା ଓ ପରିବେଶ ସଚେତନତା କ୍ଷେତ୍ରରେ ଅବଦାନ ପାଇଁ ସୁରେନ୍ଦ୍ର ଭୋଇଙ୍କୁ ଏବଂ ଜାତୀୟ ନାଟ୍ୟ ବିଦ୍ୟାଳୟ (ଏନ୍‌ଏସ୍‌ଡି)ରେ ଚୟନିତ ଅଭିନେତ୍ରୀ ସୋନିଆ ବେହେରାଙ୍କୁ ସମ୍ମାନିତ କରାଯାଇଥିଲା। କାର୍ଯ୍ୟକ୍ରମର ଆୟୋଜନରେ 'ବୃକ୍ଷର ବନ୍ଧୁ'ର ପ୍ରତିଷ୍ଠାତା ଜେନାମଣି ସେଠଙ୍କ ସମେତ ରଞ୍ଜିତା ବିଶ୍ୱାଳ, ଲାଲୁ କିଶାନ, ବବିତା ପଟ୍ଟନାୟକ, ପ୍ରିୟମ୍ବଦା କିଶାନ, ସୁକାନ୍ତି ମିର୍ଦ୍ଧା, ବବିତା ପଟ୍ଟନାୟକ, ବନଜା ସାହୁ, ପୂର୍ଣ୍ଣିମା ନାଥ, ସାରିକା ମହାନ୍ତି, ନିବେଦିତା ଖଣ୍ଡା, ସୁନିତା ନାଏକ, ମୀନା କିଶାନ, ଗୀତା ପଟେଲ, ନିରୂପମା ଶାସ୍ମଲ ଓ ରୁବି ବେଜ୍ ପ୍ରମୁଖ ସହଯୋଗ କରିଥିଲେ। ସଭାକୁ ରଞ୍ଜିତା ବିଶ୍ୱାଳ ପରିଚାଳନା କରିଥିବା ବେଳେ ବୃକ୍ଷର ବନ୍ଧୁର ଜେନାମଣି ସେଠ କାର୍ଯ୍ୟକ୍ରମର ଉଦ୍ଦେଶ୍ୟ ସମ୍ପର୍କରେ ସୂଚନା ଦେଇଥିଲେ।

କେନ୍ଦ୍ର ସ୍ଵରାଷ୍ଟ୍ର ମନ୍ତ୍ରୀ ଅମିତ ଶାହଙ୍କ ଆସନ୍ତା ୪ ତାରିଖରେ ବରଗଡ଼ ଗସ୍ତକୁ ଦୃଷ୍ଟିରେ ରଖି, ଏହି ଗସ୍ତକୁ ସଫଳ କରିବା ପାଇଁ ବରଗଡ଼ ଜିଲ୍ଲା ବରପାଲି ଥାନା ନିକଟରେ ଏକ 'ଚା'ପେ ଚର୍ଚା' କାର୍ଯ୍ୟକ୍ରମ ଆୟୋଜିତ ହୋଇଛି। ଏହି ବୈଠକ ଆଗଲପୁର ବିଜେପି ମଣ୍ଡଳ ସଭାପତି ପ୍ରଦୀପ ପଧାନଙ୍କ ତତ୍ତ୍ଵାବଧାନରେ ଅନୁଷ୍ଠିତ ହୋଇଥିଲା। ବୈଠକରେ କୁଂଭାରି ମଣ୍ଡଳ ସଭାପତି ପ୍ରଶାନ୍ତ ସାହୁଙ୍କ ସମେତ ବିଜେପି ନେତା ଧିରୋଜ ପଧାନ, ମାନସ ବାରିକ, ଗଙ୍ଗା ଦାଶ ଏବଂ ଚତୃଭୂଜ ମେହେର ଯୋଗ ଦେଇଥିଲେ। ଗସ୍ତକୁ ସଫଳ କରିବା ପାଇଁ ଏହି ବୈଠକରେ ନିଷ୍ପତ୍ତି ନିଆଯାଇଥିବା ସୂଚନା ଦିଆଯାଇଛି।

ସତଲମା ଉଚ୍ଚ ବିଦ୍ୟାଳୟରେ ଏକ ଅବସରକାଳୀନ ସମ୍ବର୍ଦ୍ଧନା ସମାରୋହ ଆୟୋଜିତ ହୋଇଥିଲା। ଏହି କାର୍ଯ୍ୟକ୍ରମରେ ଅବସରପ୍ରାପ୍ତ ପୂର୍ବତନ ପ୍ରଧାନ ଶିକ୍ଷକ ଡୋଳାମାଣି ପଟେଲ ଏବଂ ଶିକ୍ଷକ ଜୟନ୍ତ କୁମାର ଦର୍ଜୀଙ୍କୁ ଅତିଥି ଓ ବିଦ୍ୟାଳୟ ପକ୍ଷରୁ ସମ୍ବର୍ଦ୍ଧିତ କରାଯାଇଥିଲା। ସେମାନଙ୍କୁ ଉତ୍ତରୀୟ, ପୁଷ୍ପଗୁଚ୍ଛ, ମାନପତ୍ର ଏବଂ ସ୍ମାରକ ପ୍ରଦାନ କରାଯାଇଥିଲା।

ତଲସରା ଥାନା ପରିସରରେ 'ଆମ ପୋଲିସ ସମିତି' ପକ୍ଷରୁ 'ନିଶା ମୁକ୍ତ ଓଡିଶା' ସଚେତନା କାର୍ଯ୍ୟକ୍ରମ ଆୟୋଜିତ ହୋଇଛି।

ଝାରସୁଗୁଡା ବନଖଣ୍ଡ ପକ୍ଷରୁ ଗତକାଲି ମଙ୍ଗଳବାର, 30-06-2026 ରେ ବ୍ରଜରାଜନଗରରେ ଏକ ସାମୁହିକ ବୃକ୍ଷରୋପଣ କାର୍ଯ୍ୟକ୍ରମ ଆୟୋଜିତ ହୋଇଥିଲା। ଏହି ଅବସରରେ ପ୍ରକୃତି ସଂରକ୍ଷଣ ଓ ପରିବେଶ ସୁରକ୍ଷା କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ବେଲପାହାଡ଼ କନିଷ୍ଠ ମହାବିଦ୍ୟାଳୟର ଅଧ୍ୟକ୍ଷ ସୁରେନ୍ଦ୍ର କୁମାର ଭୋଇଙ୍କୁ 'ପ୍ରକୃତି ବନ୍ଧୁ 2026' ପୁରସ୍କାରରେ ସମ୍ମାନିତ କରାଯାଇଛି। ବୃକ୍ଷରୋପଣ କ୍ଷେତ୍ରରେ ଉଲ୍ଲେଖନୀୟ ଅବଦାନ ଥିବା ଅନ୍ୟ କିଛି ବ୍ୟକ୍ତିବିଶେଷଙ୍କୁ ମଧ୍ୟ ଏହି କାର୍ଯ୍ୟକ୍ରମରେ ସମ୍ମାନିତ କରାଯାଇଥିଲା। ଓଡ଼ିଶା ସରକାରଙ୍କ ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତ୍ତନ ବିଭାଗ ପକ୍ଷରୁ ଏହି ପୁରସ୍କାର ପ୍ରଦାନ କରାଯାଇଥିଲା। ଏହି ଅବସରରେ ରାଜସ୍ୱ ଏବଂ ବିପର୍ଯ୍ୟୟ ପରିଚାଳନା ବିଭାଗର ମାନ୍ୟବର ମନ୍ତ୍ରୀ ସୁରେଶ ପୂଜାରୀ ଶ୍ରୀ ଭୋଇଙ୍କୁ ମାନପତ୍ର ଏବଂ ପ୍ରୋତ୍ସାହନ ସ୍ୱରୂପ 10,000 ଟଙ୍କାର ଏକ ଚେକ୍ ପ୍ରଦାନ କରି ସମ୍ମାନିତ କରିଥିଲେ।

ରାୟପୁର ଟୋଲ ଗେଟ୍ ନିକଟରେ ଜଣେ ଯୁବକ ଓ ଜଣେ ଯୁବତୀଙ୍କ ମଧ୍ୟରେ ଏକ ସଡ଼କ ଦୁର୍ଘଟଣା ଘଟିଛି। ପ୍ରତ୍ୟକ୍ଷଦର୍ଶୀଙ୍କ ସୂଚନା ଅନୁଯାୟୀ, ଯୁବତୀ ଜଣକ ନିଜ ରାସ୍ତାରେ ଯାଉଥିବା ସମୟରେ ପଛ ପଟୁ ତୀବ୍ର ବେଗରେ ବାଇକ୍ ଚଳାଉଥିବା ଯୁବକ ତାଙ୍କୁ ଧକ୍କା ଦେଇଥିଲେ। ଏହି ଦୁର୍ଘଟଣାରେ ଯୁବକଙ୍କ ମୁଣ୍ଡରେ ଗୁରୁତର ଆଘାତ ଲାଗିଥିବା ବେଳେ ଯୁବତୀଙ୍କ ହାତ ଓ ଗୋଡ଼ରେ ମଧ୍ୟ ବହୁତ ଚୋଟ ଲାଗିଛି। ଘଟଣା ପରେ ସ୍ଥାନୀୟ ଲୋକେ ତୁରନ୍ତ ମାନବିକତା ପ୍ରଦର୍ଶନ କରି ଟୋଲ ଗେଟ୍ର ଜରୁରୀକାଳୀନ ଦଳକୁ ସୂଚନା ଦେଇଥିଲେ। ପାଖାପାଖି ୧୫ ମିନିଟ୍ ମଧ୍ୟରେ ଆମ୍ବୁଲାନ୍ସ ଘଟଣାସ୍ଥଳରେ ପହଞ୍ଚି ଉଭୟ ଆହତଙ୍କୁ ନିକଟସ୍ଥ ଡାକ୍ତରଖାନାକୁ ପଠାଇଥିଲା। ବର୍ତ୍ତମାନ ମିଳିଥିବା ସୂଚନା ଅନୁଯାୟୀ ଯୁବକଙ୍କ ଅବସ୍ଥା ସ୍ଥିର ରହିଛି। ପୋଲିସ ଏହି ମାମଲାର ତଦନ୍ତ ଜାରି ରଖିଛି।