कर्णकर्कश आवाजामुळे नागरिक त्रस्त; कारवाईची गरज:- कारवाई करण्याची मागणी गोंदिया शहरातील वाढत्या ध्वनी प्रदूषणामुळे नागरिकांच्या आरोग्यावर आणि दैनंदिन जीवनावर गंभीर परिणाम होत असून, विशेषतः मॉडिफाइड सायलेंसर असलेल्या बुलेट व इतर दुचाकी वाहनांमुळे होणारा कर्णकर्कश आवाज नागरिकांसाठी मोठा मनस्ताप ठरत आहे. याविरोधात सामाजिक कार्यकर्ते अमर राहुल यांनी प्रशासनाकडे कठोर कारवाईची मागणी केली आहे. काही वाहनचालक आपल्या वाहनांमधील कंपनीचे मूळ सायलेंसर बदलून मोठ्या आवाजाचे मॉडिफाइड सायलेंसर वापरतात. रस्त्यावरून जाताना अचानक होणारे फटाक्यांसारखे आवाज किंवा विनाकारण रेसिंगमुळे वृद्ध, लहान मुले, विद्यार्थी, रुग्ण आणि रात्रपाळी करून विश्रांती घेणार्‍या नागरिकांना प्रचंड त्रास सहन करावा लागत आहे. सततच्या ध्वनी प्रदूषणामुळे चिडचिड, तणाव, निद्रानाश, एकाग्रतेत घट आणि श्रवणशक्तीवर परिणाम यांसारख्या गंभीर समस्या उद्भवत आहेत. त्यामुळे हा प्रश्न केवळ वाहतुकीचा न राहता नागरिकांच्या आरोग्याशी जोडला गेला आहे. शहरातील प्रमुख चौक, शाळा, रुग्णालये आणि निवासी परिसरात रात्रीच्या वेळी पोलिसांनी विशेष तपासणी मोहीम राबवावी. नयमबाह्य मॉडिफाइड सायलेंसर तातडीने जप्त करून मोटार वाहन कायद्यानुसार दंडात्मक कारवाई करण्यात यावी. वाहतूक पोलिस व स्थानिक प्रशासनाने ध्वनी प्रदूषणाविरुद्ध विशेष मोहीम राबवून नागरिकांमध्ये जनजागृती करावी. प्रशासनाने या समस्येची दखल घेऊन ध्वनी प्रदूषण करणार्‍या वाहनांवर सातत्यपूर्ण व कडक कारवाई करावी, अशी मागणी सामाजिक कार्यकर्ता अमर राहुल यांनी केली आहे.

1 hr ago

Rekhalal Rahangdale

Journalist तिरोडा, गोंदिया, महाराष्ट्र•

1 hr ago

गोंदिया - अर्जुनी/मोरगाव पोलीस निरीक्षकांना निवेदन,पत्रकारावरील कथित हल्ल्यामुळे संताप, दोषींवर कठोर कारवाईची मागणी,धीरज कसारे प्रकरणी पत्रकार संरक्षण कायद्यांतर्गत गुन्हा दाखल करण्याची मागणी; गोंदिया जिल्हा व्हॉईस ऑफ मीडिया तर्फे मुख्यमंत्र्यांना निवेदन अर्जुनी/मोरगाव पोलीस निरीक्षकांना निवेदन,पत्रकारावरील कथित हल्ल्यामुळे संताप, दोषींवर कठोर कारवाईची मागणी,धीरज कसारे प्रकरणी पत्रकार संरक्षण कायद्यांतर्गत गुन्हा दाखल करण्याची मागणी,गोंदिया जिल्हा व्हॉईस ऑफ मीडिया तर्फे मुख्यमंत्र्यांना निवेदन अर्जुनी मोरगाव - पत्रकारांची सुरक्षा आणि निर्भीड पत्रकारितेच्या अधिकारासाठी गोंदिया जिल्हा व्हॉईस ऑफ मीडिया यांनी पत्रकार धीरज कसारे यांच्यावर झालेल्या कथित हल्ल्याच्या प्रकरणात आक्रमक भूमिका घेतली आहे. कारंजा, जिल्हा वर्धा येथील दैनिक महासागरचे प्रतिनिधी पत्रकार धीरज कसारे यांच्यासोबत कथित मारहाण, धमकी तसेच दबाव आणण्याच्या प्रयत्नाच्या घटनेचा निषेध करत संघटनेने दोषींवर कठोर कायदेशीर कारवाई करण्याची मागणी केली आहे.प्राप्त माहितीनुसार, पत्रकार धीरज कसारे यांनी कारंजा तालुका परिसरातील भेसळखोरी आणि नागरिकांच्या जीविताशी कथित खेळ केला जात असल्यासंदर्भात वृत्त प्रकाशित केले होते. वृत्त प्रकाशित झाल्यानंतर संबंधितांकडून नाराजी व्यक्त करण्यात आल्याचे तसेच पत्रकाराला कथितरीत्या धमकी देण्यात आल्याचा आरोप समोर आला आहे.या प्रकरणी अर्जुनी मोरगाव तालुका व्हॉईस ऑफ मीडिया कमिटी आणि जिल्हा कमिटीच्या वतीने पोलीस निरीक्षकांना निवेदन सादर करण्यात आले.निवेदनात आरोप करण्यात आला आहे की, पोलीस ठाण्याच्या परिसरातच पत्रकार कसारे यांना जीवे मारण्याची धमकी देण्यात आली. एवढेच नव्हे, तर त्यांना कथितरीत्या जबरदस्तीने वाहनात बसविण्याचा प्रयत्न करण्यात आला. एखाद्या पत्रकाराने वृत्त प्रकाशित केल्यामुळे पोलीस ठाण्यासारख्या सार्वजनिक आणि संवेदनशील परिसरातच धमकी किंवा दबावाला सामोरे जावे लागणे, ही स्वतंत्र आणि निर्भीड पत्रकारितेसाठी गंभीर चिंतेची बाब आहे.या घटनेबाबत गोंदिया जिल्हा व्हॉईस ऑफ मीडिया यांनी तीव्र संताप व्यक्त केला असून मुख्यमंत्री देवेंद्र फडणवीस यांच्या नावाने निवेदन सादर केले आहे. हे निवेदन गोंदिया जिल्ह्याच्या पोलीस अधीक्षकांमार्फत शासनाकडे पाठविण्यात आले आहे. संघटनेने मागणी केली आहे की, या प्रकरणातील संबंधित आरोपींविरुद्ध पत्रकार संरक्षण कायद्यांतर्गत गुन्हा दाखल करून निष्पक्ष व सखोल चौकशी करण्यात यावी. तसेच घटनेची सत्यता समोर आणून दोषींवर कठोर कारवाई करण्यात यावी आणि पत्रकार धीरज कसारे यांना आवश्यक सुरक्षा प्रदान करण्यात यावी. व्हॉईस ऑफ मीडियाचे स्पष्ट म्हणणे आहे की, पत्रकार हा लोकशाहीचा महत्त्वाचा प्रहरी आहे. जनहिताचे प्रश्न समाजासमोर मांडणाऱ्या पत्रकारांना धमकी, दबाव अथवा हिंसाचाराला सामोरे जावे लागणे, हे लोकशाही व्यवस्थेसाठी गंभीर आव्हान आहे. त्यामुळे पत्रकारांची सुरक्षा सुनिश्चित करणे आणि अशा प्रकरणांमध्ये तातडीने कारवाई करणे आवश्यक आहे. आता या निवेदनानंतर प्रशासन या प्रकरणात कोणती कारवाई करते आणि आरोपांच्या चौकशीत कोणती तथ्ये समोर येतात, याकडे पत्रकारिता क्षेत्रासह नागरिकांचे लक्ष लागले आहे. जिल्हा कमिटी / अर्जुनी मोरगाव तालुका कमिटीचे पदाधिकारी उपस्थित होते : जिल्हाध्यक्ष – रामलाल शहारे जिल्हा सचिव – अरुण वाय. बन्नाटे जिल्हा उपाध्यक्ष – सूर्यभान ठलाल जिल्हा ग्रामीण अध्यक्ष – दिगंबर नंदेश्वर अर्जुनी मोरगाव तालुका अध्यक्ष – बिंबिसार शहारे तालुका उपाध्यक्ष – गुनाजी शहारे तालुका सचिव – सुरेश जीभकाटे तालुका संघटक – चेतन समरित तालुका कोषाध्यक्ष – प्रशांत ऊके सर्व पदाधिकारी या वेळी उपस्थित होते.

CHETAN SAMRIT

Social worker अर्जुनी मोरगाव, गोंदिया, महाराष्ट्र•

19 hrs ago