ରାୟଗଡ଼ା ଜିଲ୍ଲାର ମୁନିଗୁଡା ଠାରେ ଗୋ ଚରାଚାଲାଣକୁ ରୋକିବା ପାଇଁ ସ୍ଥାନୀୟ ଲୋକଙ୍କ ଏକ ବିରାଟ ମେଳି ଦେଖିବାକୁ ମିଳିଛି। ଏହି ଅବସରରେ ଉପସ୍ଥିତ ଲୋକମାନେ ଗୋ ଚରାଚାଲାଣ ରୋକିବାରେ ପୋଲିସର ନିଷ୍କ୍ରିୟତାକୁ ନେଇ ପ୍ରଶ୍ନ ଉଠାଇଛନ୍ତି।

ଓଡ଼ିଶାର ମହେନ୍ଦ୍ରତନୟା ନଦୀତଟରେ ଆନ୍ଧ୍ର ପ୍ରଦେଶର ଅଳିଆ ଆବର୍ଜନା ପକାଯାଉଥିବା ନେଇ ଏକ ଗୁରୁତର ଅଭିଯୋଗ ସାମ୍ନାକୁ ଆସିଛି। ଆନ୍ଧ୍ର ପ୍ରଦେଶର ଶ୍ରୀକାକୁଲମ ଜିଲ୍ଲା ପୁରୁଣାପାଟଣା ଏବଂ ପାଥପାଟନମ ଗ୍ରାମରୁ ସଂଗୃହିତ ମଇଳା ଓ ବିଭିନ୍ନ ଅପବ୍ୟବହୃତ ବିଷାକ୍ତ ପର୍ଯ୍ୟବସ୍ତୁ ପ୍ରତିଦିନ ପାରଳା ସହରକୁ ଲାଗିରହିଥିବା ମହେନ୍ଦ୍ରତନୟା ନଦୀରେ ପକାଯାଉଛି। ଏହି କାର୍ଯ୍ୟ ଯୋଗୁଁ ନଦୀର ପାଣି ପ୍ରଦୂଷିତ ହେବା ସହ ପରିବେଶ ଉପରେ ଏହାର କୁପ୍ରଭାବ ପଡ଼ୁଥିବା କୁହାଯାଇଛି। ଆନ୍ଧ୍ର ପ୍ରଦେଶର ଓଡ଼ିଶା ଉପରେ ପୂର୍ବରୁ ହିଁ କୁଦୃଷ୍ଟି ଥିବା ବେଳେ ଏଭଳି ଘଟଣା ସାମ୍ନାକୁ ଆସିଛି। ଏହି ଖବର ପାଇ ମାନ୍ୟବର ପାରଳାଖେମୁଣ୍ଡି ବିଧାୟକ ରୂପେସ ପାଣିଗ୍ରାହୀ ଜିଲ୍ଲାପାଳଙ୍କୁ ଏ ସମ୍ପର୍କରେ ଅବଗତ କରିଛନ୍ତି। ବିଧାୟକ ଜଣାଇଛନ୍ତି ଯେ, ସେ ଆଗାମୀ ୨-୩ ଦିନ ମଧ୍ୟରେ ଆନ୍ଧ୍ର ପ୍ରଦେଶ ଶ୍ରୀକାକୁଲମ ଜିଲ୍ଲାର ପାଥପାଟନମ ବିଧାୟକ ଏବଂ ଆନ୍ଧ୍ର ଜିଲ୍ଲା ପ୍ରଶାସନକୁ ଏ ବିଷୟରେ ଜଣାଇବେ। ଯଦି ଆନ୍ଧ୍ର ପ୍ରଶାସନ ଏହି ବିଷୟରେ କୌଣସି ପଦକ୍ଷେପ ନିଏ ନାହିଁ, ତେବେ ଉଚିତ ଜବାବ ଦିଆଯିବ ବୋଲି ସେ ଚେତାବନୀ ଦେଇଛନ୍ତି।

ସେବା ଓ ସୁରକ୍ଷାର ବଡ଼ ବଡ଼ ଦାବି କରୁଥିବା ଅଗ୍ନିଶମ ବିଭାଗର ଅସଲ ଚେହେରା ପୁଣି ଥରେ ପଦାରେ ପଡ଼ିଛି। ୬ ନମ୍ବର ରାଜ୍ୟ ରାଜପଥରେ ଘଟିଥିବା ଏକ ଭୟାବହ ସଡ଼କ ଦୁର୍ଘଟଣାରେ ଜଣେ ଚାଳକଙ୍କ ମୃତଦେହ ୧୨ ଘଣ୍ଟା ପର୍ଯ୍ୟନ୍ତ ଗାଡ଼ି ଭିତରେ ଚାପି ହୋଇ ରହିଛି, କାରଣ ଉଦ୍ଧାର ପାଇଁ ଆବଶ୍ୟକୀୟ ସାମଗ୍ରୀ ଅଗ୍ନିଶମ ବିଭାଗ ପାଖରେ ନାହିଁ। ମିଳିଥିବା ସୂଚନା ଅନୁଯାୟୀ, ଗତକାଲି ବିଳମ୍ବିତ ରାତିରେ ଭବାନୀପାଟଣା ଓ ରାୟଗଡ଼ାକୁ ସଂଯୋଗ କରୁଥିବା ୬ ନମ୍ବର ରାଜ୍ୟ ରାଜପଥରେ ଏହି ଦୁର୍ଘଟଣା ଘଟିଥିଲା। ଦୁର୍ଘଟଣାରେ ଗାଡ଼ିର ଚାଳକଙ୍କ ଘଟଣାସ୍ଥଳରେ ହିଁ ମୃତ୍ୟୁ ହୋଇଥିଲା ଏବଂ ଗାଡ଼ିଟି ଏଭଳି ଭାବେ ଚୂରମାର ହୋଇଯାଇଛି ଯେ ମୃତଦେହ ଗାଡ଼ି ଭିତରେ ଚାପି ହୋଇ ରହିଛି। ଲାଞ୍ଜିଗଡ଼ ଅଗ୍ନିଶମ ବାହିନୀ ଘଟଣା ସମ୍ପର୍କରେ ଅବଗତ ଥିଲେ ମଧ୍ୟ, ଗାଡ଼ି କାଟି ମୃତଦେହ ବାହାର କରିବା ପାଇଁ ସେମାନଙ୍କ ପାଖରେ ଆଧୁନିକ କଟର କିମ୍ବା ଆବଶ୍ୟକୀୟ ଉଦ୍ଧାର ସାମଗ୍ରୀ ନ ଥିବାରୁ ଖବର ପ୍ରସାରଣ ପର୍ଯ୍ୟନ୍ତ ଘଟଣାସ୍ଥଳରେ ପହଞ୍ଚି ନଥିବା ଜଣାପଡ଼ିଛି। ବିଭାଗର ଏହି ଚରମ ଅବହେଳା ଯୋଗୁଁ ମୃତଦେହ ଦୀର୍ଘ ୧୨ ଘଣ୍ଟା ଧରି ଗାଡ଼ି ଭିତରେ ପଡ଼ି ରହିଛି। ଏହାକୁ ନେଇ ଅଞ୍ଚଳରେ ଅସନ୍ତୋଷ ପ୍ରକାଶ ପାଇଛି ଏବଂ ପ୍ରଶ୍ନ ଉଠିଛି ଯେ, ଯଦି ଜରୁରୀକାଳୀନ ସେବା ଯୋଗାଇବା ପାଇଁ ଉଦ୍ଦିଷ୍ଟ ଅଗ୍ନିଶମ ବିଭାଗ ପାଖରେ ସାଧାରଣ ଉଦ୍ଧାର ସାମଗ୍ରୀ ଟିକକ ନାହିଁ, ତେବେ ଏହି ବିଭାଗ କେଉଁ କାମର? ଜଣେ ମୃତ ବ୍ୟକ୍ତିଙ୍କ ପ୍ରତି ମଧ୍ୟ ପ୍ରଶାସନର ସମ୍ବେଦନଶୀଳତା ନ ଥିବାକୁ ନେଇ ଆଲୋଚନା ଚାଲିଛି।

ରଜ ପର୍ବ ଚାଲିଥିବା ସମୟରେ କାଳବୈଶାଖୀର ତାଣ୍ଡବ ଦେଖିବାକୁ ମିଳିଛି। ଏହି ପ୍ରାକୃତିକ ବିପର୍ଯ୍ୟୟ ଯୋଗୁଁ ମାଳିପୁଟ ରାଜରାସ୍ତା ନିକଟରେ ଥିବା ଏକ ଘର ଭାଙ୍ଗି ଯାଇଛି।

କୋରାପୁଟ BSF ସେକ୍ଟର ହେଡକ୍ୱାଟରରେ ଏକ ରକ୍ତଦାନ ଶିବିର ଆୟୋଜିତ ହୋଇଥିଲା। ଏହି ଶିବିରରେ ମୋଟ ୯୨ ୟୁନିଟ ରକ୍ତ ସଂଗ୍ରହ କରାଯାଇଛି।

ଗଜପତି ଜିଲ୍ଲା ପାରଳାଖେମୁଣ୍ଡି ସ୍ଥିତ ପେଲେସ ସାହିରେ ଜଳ ଯୋଗାଣ ମିଟର ଚୋରି ହେବା ନେଇ ଅଭିଯୋଗ ହୋଇଛି। ଜନ ସ୍ୱାସ୍ଥ୍ୟ ବିଭାଗ ପକ୍ଷରୁ ସହରର ହିତାଧିକାରୀଙ୍କ ଦ୍ୱାରା ବ୍ୟବହୃତ ଜଳର ପରିମାଣ ଜାଣିବା ପାଇଁ ମିଟର ଲଗାଯାଇଥିବା ବେଳେ, ଗତ କିଛି ମାସ ହେଲା ଏହି ମିଟରଗୁଡ଼ିକ ଚୋରି ହେଉଥିବା ଜଣାପଡ଼ିଛି। ଗତ ବିଳମ୍ବିତ ରାତିରେ ପେଲେସ ସାହିରୁ ପ୍ରାୟ ଦଶ ଗୋଟି ପାଣି ମିଟର ଚୋରି ହୋଇଥିବା ଶୁଣିବାକୁ ମିଳିଛି। ସହରରେ କ୍ୟାମେରା ଲାଗିବା ସହ ରାଜ ନହର ଏବଂ କଲେଜ ଛକ ଠାରେ ପୋଲିସ ପହରା ରହୁଥିବା ବେଳେ ଏବଂ ପୋଲିସ ପେଟ୍ରୋଲିଂ ଗାଡ଼ି ବୁଲୁଥିବା ସତ୍ତ୍ୱେ ଏପରି ଚୋରି ଘଟଣା ପୋଲିସ ପ୍ରତି ଏକ ଚ୍ୟାଲେଞ୍ଜ ସୃଷ୍ଟି କରିଛି। ଚୋରି ହୋଇଥିବା ଏହି ଜଳ ମିଟରଗୁଡ଼ିକୁ ଆନ୍ଧ୍ରରେ କଳାବଜାରୀ କରାଯାଉଥିବା ନେଇ ମଧ୍ୟ ଶୁଣାଯାଉଛି। ତେଣୁ ଏହି ଚୋରି ଘଟଣାର ତଦନ୍ତ ଆରମ୍ଭ କରାଗଲେ ସମ୍ପୃକ୍ତ ଗ୍ୟାଙ୍ଗ ଧରାପଡ଼ିବ ବୋଲି ସାଧାରଣରେ ଚର୍ଚ୍ଚା ହେଉଛି।

ଗଜପତି ଜିଲ୍ଲା ରାୟଗଡ଼ ବ୍ଲକ୍ ଅନ୍ତର୍ଗତ ଖାରିସାହି ଗ୍ରାମରେ ଗତ ଦୁଇ ଦିନ ହେଲା ଏକ ଗଛ ପଡ଼ିଯିବା ଯୋଗୁଁ ବିଦ୍ୟୁତ୍ ସଂଯୋଗ ବିଚ୍ଛିନ୍ନ ହୋଇଯାଇଛି। ଫଳରେ ଗ୍ରାମବାସୀମାନେ ଅନ୍ଧାରରେ ରହି ଅନେକ ଅସୁବିଧାର ସମ୍ମୁଖୀନ ହେଉଥିବା ଅଭିଯୋଗ କରିଛନ୍ତି। ଗ୍ରାମବାସୀମାନେ ଏହି ସମସ୍ୟା ସମ୍ପର୍କରେ ବହୁଥର ବିଭାଗୀୟ ଅଧିକାରୀମାନଙ୍କୁ ଯୋଗାଯୋଗ କରିଥିଲେ ମଧ୍ୟ ସେମାନଙ୍କ ସହିତ ଯୋଗାଯୋଗ ସମ୍ଭବ ହୋଇପାରିନାହିଁ। ଏଭଳି ଅସୁବିଧା ସତ୍ତ୍ୱେ ବ୍ଲକ୍ ପ୍ରଶାସନ ଉକ୍ତ ସ୍ଥାନରେ ପହଞ୍ଚି ପାରି ନ ଥିବା ନେଇ ଦଣ୍ଡିଆ ଭୂୟାଁ, ଦାଉଦ ଭୂୟାଁ, ପ୍ରିୟଙ୍କା ନାୟକ, ନୟମି ରାଇତ, ସୁବାଷିନୀ ନାୟକ, ଆୟୁବ ଭୂୟାଁ ଏବଂ ଯିହୁଦା ଘଣ୍ଟ ପ୍ରମୁଖ ଗ୍ରାମବାସୀମାନେ ଅଭିଯୋଗ କରିଛନ୍ତି।

ଭବାନୀପାଟଣା ଓ ରାୟଗଡ଼ାକୁ ସଂଯୋଗ କରୁଥିବା ୬ ନମ୍ବର ରାଜ୍ୟ ରାଜପଥରେ ଏକ ବଲକର ଦୁର୍ଘଟଣାଗ୍ରସ୍ତ ହୋଇଛି, ଯେଉଁଥିରେ ଚାଳକଙ୍କର ମୃତ୍ୟୁ ହୋଇଛି। ସୂଚନା ଅନୁସାରେ, ଆଜି ରବିବାର ରାତି ପ୍ରାୟ ୧୦ଟା ସମୟରେ ଏହି ଦୁର୍ଘଟଣା ଘଟିଛି। କାକିନାଡ଼ା ବନ୍ଦରରୁ ଆଲୁମିନିୟମ ପାଉଡର ନେଇ କୋରବା ବାଲକୋ ଅଭିମୁଖେ ଯାଉଥିବା ବେଳେ ଢେପଗୁଡ଼ା ଠାରେ ବଲକରଟି ଭାରସାମ୍ୟ ହରାଇ ଦୁର୍ଘଟଣାର ଶିକାର ହୋଇଥିଲା। ଏହି ଦୁର୍ଘଟଣାରେ ଚାଳକ ଇଞ୍ଜିନ ବଡି ଭିତରେ ଚାପି ହୋଇ ପ୍ରାଣ ହରାଇଥିଲେ। ଏହି ଖବର ପାଇ ବିଶ୍ୱନାଥପୁର ଥାନା ଅଧିକାରୀ ତୁଳସୀ ରାମ ଶବର ଏବଂ ଏସଆଇ ପ୍ରବୀଣ ରଥଙ୍କ ସମେତ ପୋଲିସ ବଳ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ପୋଲିସ ପକ୍ଷରୁ ମିଳିଥିବା ପ୍ରାଥମିକ ସୂଚନା ଅନୁଯାୟୀ, ମୃତ ଚାଳକ ଉତ୍ତର ପ୍ରଦେଶ ରାଜ୍ୟର ରାମଭଦ୍ର ବୋଲି ଜଣାପଡିଛି।

ପ୍ରଥମ ବର୍ଷାରେ ହିଁ ଜୟପୁର ସହର ଜଳମଗ୍ନ ହୋଇଯାଇଛି। ରାସ୍ତା ଉପରେ ଆଣ୍ଠୁଏଁ ପାଣି ଲହଡ଼ି ମାରୁଥିବା ଦେଖିବାକୁ ମିଳିଛି। ଏହି ଘଟଣାକୁ ନେଇ ପ୍ରଶ୍ନ ଉଠିଛି ଯେ, ପୌରପାଳିକା ପୁଣି ଥରେ ଫେଲ୍ ମାରିଲା କିମ୍ବା ପୁଣି ହାତ ଟେକିଦେବ କି?

ଲାଞ୍ଜିଗଡ଼-ସିକେରକୁଫା ରାସ୍ତାରେ ଏକ ବଡ଼ ଦୁର୍ଘଟଣା ଘଟିଛି, ଯେଉଁଥିରେ ଜଣେ ଡ୍ରାଇଭରଙ୍କ ମୃତ୍ୟୁ ହୋଇଛି। ସୂଚନା ଅନୁଯାୟୀ, ଆଲୁମିନିୟମ ଟ୍ରକ ତଳେ ଚାପି ହୋଇ ଡ୍ରାଇଭର ପ୍ରାଣ ହରାଇଛନ୍ତି। ଦୁର୍ଘଟଣା ଘଟିବାର ପ୍ରାୟ ୧୨ ଘଣ୍ଟା ବିତିଯାଇଥିଲେ ମଧ୍ୟ ଏପର୍ଯ୍ୟନ୍ତ ମୃତ ଡ୍ରାଇଭରଙ୍କ ଶରୀରକୁ ଉଦ୍ଧାର କରାଯାଇପାରି ନାହିଁ।