ধুবুৰী জিলাৰ ঢেপঢেপী ক্ষুদ্ৰ প্ৰাথমিক স্বাস্থ্য কেন্দ্ৰক কেন্দ্ৰ কৰি একাধিক অভিযোগ উত্থাপিত হৈছে, য'ত ব্যাপক অনিয়ম সংঘটিত হোৱাৰ দাবী কৰা হৈছে। স্থানীয় ৰাইজৰ অভিযোগ অনুসৰি, অসম চৰকাৰে স্বাস্থ্য খণ্ডৰ উন্নয়নৰ বাবে কোটি কোটি টকা ব্যয় কৰি বিভিন্ন আঁচনি ৰূপায়ণ কৰি আহিছে যদিও ঢেপঢেপী ক্ষুদ্ৰ প্ৰাথমিক স্বাস্থ্য কেন্দ্ৰত সেই সুবিধাসমূহৰ সঠিক প্ৰতিফলন দেখা পোৱা নাই।

ধুবুৰীৰ কালাহাটত এগৰাকী ছাত্ৰীৰ সৈতে অসৎ আচৰণৰ অভিযোগত আৰক্ষীয়ে চাৰিজন ব্যক্তিক আটক কৰিছে। এই ঘটনাৰ সৈতে জড়িত হিন্দী বিষয়ৰ শিক্ষক, বিদ্যালয়খনৰ অধ্যক্ষাৰ লগতে আন দুজনকো আৰক্ষীয়ে আটক কৰে। যোৱা নিশা আৰক্ষীয়ে বিতৰ্কিত হিন্দী বিষয়ৰ শিক্ষক আব্দুল মন্নাফ শেখক (৫৫) আটক কৰে। ইয়াৰ উপৰিও, এই ঘটনাৰ মূল অভিযুক্ত হিন্দী শিক্ষকজনক পলাই যোৱাত সহায় কৰাৰ অভিযোগত গৌৰীপুৰ ৰৌৱা তৃতীয় খণ্ড গাঁৱৰ মছিৰুদ্দিন শেখ আৰু গৌৰীপুৰৰ ৱাৰ্ড নম্বৰ ১০ৰ মনিছুৰ ৰহমানক আৰক্ষীয়ে আটক কৰে। ঘটনাটোৰ সৈতে জড়িত মূল অভিযুক্ত সহ মুঠ চাৰিজন ব্যক্তিক আটক কৰাৰ পিছত বৰ্তমান আদালতলৈ প্ৰেৰণ কৰা হৈছে।

ধুবুৰীৰ কালাহাট কিচমত হাচদহ উচ্চ মাধ্যমিক বিদ্যালয়ত শিক্ষক আব্দুল মোন্নাফ সেখৰ বিৰুদ্ধে এগৰাকী হিন্দু ছাত্ৰীক যৌন নিৰ্যাতন চলোৱাৰ অভিযোগ উত্থাপন হৈছে, যাৰ ফলত বিদ্যালয় চৌহদত উত্তপ্ত পৰিস্থিতিৰ সৃষ্টি হৈছে। এই অভিযোগক লৈ ৰাইজ আৰু বিভিন্ন দল-সংগঠনে বিদ্যালয়ৰ প্ৰৱেশদ্বাৰ বন্ধ কৰি প্ৰতিবাদ সাব্যস্ত কৰিছে। ষষ্ঠ শ্ৰেণীৰ ছাত্ৰীগৰাকীৰ সৈতে অশালীন আচৰণ কৰাৰ অভিযোগৰ ভিত্তিত আৰক্ষীয়ে শিক্ষকজনক আটক কৰিছে। অভিযোগ অনুসৰি, শিক্ষকজনে ছাত্ৰীগৰাকীক ঘটনাটো গাপ দিবলৈ হেঁচা প্ৰয়োগ কৰিছিল। অৱশ্যে, ছাত্ৰীগৰাকীয়ে ঘৰলৈ গৈ পৰিয়ালক সমগ্ৰ ঘটনা জনোৱাৰ পিছতে পৰিয়ালৰ লোকে শৈলমাৰী আৰক্ষী পহৰা চকীত এখন এজাহাৰ দাখিল কৰে। আৰক্ষীয়ে এজাহাৰৰ ভিত্তিত তদন্ত আৰম্ভ কৰিছে আৰু আন শিক্ষকসকলকো সোধপোচ চলাই আছে। আক্ৰাছুৱে অভিযুক্ত শিক্ষকজনক নিলম্বন কৰি কঠোৰ শাস্তি প্ৰদানৰ দাবী জনাইছে।

নিউ বঙাইগাঁও ৰেলৱে ষ্টেচনত অসম ৰেল আৰক্ষী আৰু আৰপিএফৰ এক যুটীয়া অভিযানত ২০০০ৰো অধিক নিষিদ্ধ য়াবা টেবলেট জব্দ কৰা হৈছে। জানিব পৰা মতে, ৰাজিলুৰ ৰহমান নামৰ এজন ব্যক্তিয়ে নামনিমুৱা বিবেক এক্সপ্ৰেছ ৰেলেৰে এই টেবলেটখিনি মুৰ্শিদাবাদলৈ কঢ়িয়াই নিয়াৰ সময়তে আৰক্ষীয়ে তেওঁক আটক কৰে। জব্দ কৰা এই নিষিদ্ধ য়াবা টেবলেটখিনিৰ বজাৰ মূল্য কেইবালক্ষাধিক টকা হ'ব বুলি প্ৰকাশ পাইছে।

বৰপেটা জিলাৰ কলগাছিয়াৰ বৰটাৰী গাঁৱত সংঘটিত এক হত্যাকাণ্ডৰ সন্দৰ্ভত প্ৰশাসনে আজি ঘটনাস্থলীত গ্ৰেপ্তাৰ কৰা দুজন অভিযুক্তক উপস্থিত কৰোৱাই হত্যাকাণ্ডৰ ডেমো প্ৰদৰ্শন কৰে। এই ডেমো প্ৰদৰ্শন কলগাছিয়া ৰাজহ চক্ৰৰ চক্ৰ বিষয়াৰ উপস্থিতিত কৰা হৈছিল। উল্লেখ্য যে, যোৱা ১ জুন তাৰিখে বৰপেটা জিলাৰ কলগাছিয়া আৰক্ষী থানাৰ অন্তৰ্গত বৰটাৰী গাঁৱত এক শিহৰণকাৰী হত্যাকাণ্ড সংঘটিত হৈছিল। অভিযোগ অনুসৰি, বঙাইগাঁও জিলাৰ মেৰেৰচৰ আৰক্ষী থানাৰ অন্তৰ্গত ঘোৰামাৰা গাঁৱৰ ইছমাইল হোছেইন নামৰ এজনক বৰটাৰী গাঁৱৰ বৰকত আলী মণ্ডল আৰু তেওঁৰ দুই পুত্ৰ নজৰুল ইছলাম আৰু ৰকিবুল ইছলামে লাঠিৰে কোবাই হত্যা কৰিছিল। এই ঘটনাৰ পিছতে কলগাছিয়া আৰক্ষীয়ে নজৰুল ইছলাম আৰু ৰকিবুল ইছলামক গ্ৰেপ্তাৰ কৰিছিল। আন কেইবাজনো অভিযুক্ত এতিয়াও পলাতক হৈ আছে বুলি জানিব পৰা গৈছে। এই হত্যাকাণ্ডৰ সৈতে জড়িত দোষীসকলক ফাঁচী দিয়াৰ দাবী জনাইছে ইছমাইল হোছেইনৰ পত্নীৰ লগতে স্থানীয় ৰাইজে।

বজালী জিলাৰ কাৱৈমাৰী ১ নং ব্লকত বিষপান কৰি আত্মহত্যাৰ এক ঘটনা সংঘটিত হৈছে।

বৰপেটা চহৰৰ গায়নহাটীত সংঘটিত হোৱা এক হ*ত্যা*কাণ্ডৰ সৈতে জড়িত তিনিজন অভিযুক্তক গ্ৰেপ্তাৰ কৰা হৈছে। ধৃত অভিযুক্তসকল হৈছে সমীৰণ গায়ন, গনেন দাস আৰু জিতুল ভূঞা।

কামৰূপ জিলাৰ বকোৰ ১ নং উত্তৰ চেখাদাৰীত এক ভূমি বিবাদৰ ঘটনা সংঘটিত হৈছে। এই সন্দৰ্ভত গণপতি ৰাভা নামৰ এজন ব্যক্তিয়ে এক গুৰুতৰ অভিযোগ উত্থাপন কৰিছে। তেওঁৰ নামত ভূমিৰ শুদ্ধ নথি-পত্ৰ থকাৰ পিছতো কামৰাজ ৰাভাই সেই ভূমি বেদখল কৰিবলৈ অপচেষ্টা চলাই আহিছে আৰু তেওঁক নিৰন্তৰ হাৰাশাস্তি কৰি আহিছে বুলি অভিযোগত উল্লেখ আছে।

মংগলবাৰে দিনৰ ১২ বজাত ছিপনছিলাত বন বিভাগ আৰু স্থানীয় ৰাইজে বনাঞ্চল সুৰক্ষাৰ স্বাৰ্থত এক ব্যতিক্ৰমী তথা প্ৰশংসনীয় পদক্ষেপ গ্ৰহণ কৰিছে। এই পদক্ষেপৰ অংশ হিচাপে, সংৰক্ষিত বনাঞ্চলৰ পৰা চোৰাংকৈ গছ কটাৰ অপৰাধত ধৃত পাঁচগৰাকী যুৱকক কাৰাগাৰলৈ নপঠিয়াই এক অনবদ্য 'সেউজ শাস্তি' প্ৰদান কৰা হৈছে। এই শাস্তিৰ অধীনত পাঁচ যুৱকক ১৫০০ গছপুলি ৰোপণ কৰাৰ লগতে সেইবোৰ ডাঙৰ-দীঘল কৰি সম্পূৰ্ণৰূপে ৰক্ষণাবেক্ষণ দিয়াৰ গুৰু দায়িত্ব অৰ্পণ কৰা হৈছে। ছিপনছিলা গাঁৱৰ স্থানীয় ৰাইজৰ সহযোগত বন বিভাগে গ্ৰহণ কৰা এই ব্যতিক্ৰমী কাৰ্যই বনাঞ্চল সংৰক্ষণৰ দিশত এক নতুন দৃষ্টান্ত স্থাপন কৰিছে।