मराठा आरक्षण आंदोलनाला पाठिंबा देण्यासाठी अंतरवाली सराटी येथे गेलेल्या इंदापूर तालुक्यातील मराठा बांधवांच्या वाहनाला परतीच्या प्रवासात मांजरसुंभा परिसरात भीषण अपघात झाला आहे. या दुर्घटनेत मराठा सेवक रामचंद्र शंकर जमदाडे यांचा दुर्दैवी मृत्यू झाला. संतोष पांडुरंग माने आणि बिपिन नारायण मोरे हे गंभीर जखमी झाले असून, त्यांच्यावर बीड येथील रुग्णालयाच्या अतिदक्षता विभागात उपचार सुरू आहेत.

मराठा आरक्षणासह विविध प्रलंबित मागण्यांसाठी संघर्षयोद्धा मनोज जरांगे पाटील यांनी अंतरवाली सराटी येथे सुरू केलेले आमरण उपोषण सरकारच्या लेखी आश्वासनानंतर मध्यरात्री मागे घेतले आहे. पाटील यांनी ३० मेपासून भर उन्हात हे उपोषण सुरू केले होते, ज्याची प्रमुख मागणी सरकारकडून यापूर्वी दिलेल्या आश्वासनांची अंमलबजावणी व्हावी अशी होती. सरकारने मान्य केलेल्या प्रमुख मागण्यांमध्ये न्या. शिंदे समितीला एक वर्षाची मुदतवाढ देणे, ५८ लाख नोंदींमधील पात्रांना कुणबी प्रमाणपत्र व वैधता प्रमाणपत्र वितरित करणे, तसेच प्रमाणपत्र वितरणात दिरंगाई करणाऱ्या अधिकाऱ्यांवर कारवाई करणे यांचा समावेश आहे. याशिवाय, हैदराबाद गॅझेटिअरनुसार प्रमाणपत्र वाटपासाठी एसओपी (SOP) लागू करणे, जात पडताळणी प्रमाणपत्र वितरण पुन्हा सुरू करून दर १५ दिवसांनी त्याचा आढावा घेणे, आणि सातारा संस्थानबाबतचा जीआर (GR) एका महिन्यात जारी करणे या मागण्यांनाही सरकारने मान्यता दिली आहे. मराठा-कुणबी समाजासाठी स्वतंत्र मंत्रालय कक्ष स्थापन करणे, आंदोलनात बलिदान दिलेल्या कुटुंबांना १५ दिवसांत मदत देणे, कुणबी प्रमाणपत्र वितरणाचा दर आठ दिवसांनी आढावा घेऊन हेल्पलाईन सुरू करणे, आणि ग्रामस्तरीय समित्यांच्या कामकाजाचा दर १५ दिवसांनी आढावा घेणे हे देखील मान्य करण्यात आले आहे. तसेच, अण्णासाहेब पाटील महामंडळाला निधी उपलब्ध करून देणे, सारथीच्या बंद झालेल्या योजना पुन्हा सुरू करणे, आणि मराठा आंदोलकांवरील गुन्हे मागे घेण्याची प्रक्रिया गतिमान करणे या मागण्यांवरही सरकारने सकारात्मक प्रतिसाद दिला आहे. सरकारकडून लेखी आश्वासन मिळाल्यानंतर मनोज जरांगे पाटील यांनी उपोषण तात्पुरते स्थगित करत आंदोलनाला सध्या विराम दिला आहे.

जालना जिल्ह्यातील नवीन मोंढा येथील देवांश हॉटेलवर छापा टाकण्यात आला आहे. केवायसी अंघोळ करणे आणि त्यांच्या पथकाने ही धडक कारवाई केली. या कारवाईत २१ हजार रुपयांची दारू जप्त करण्यात आली.

२९ मे रोजी मानवत येथे एक भीषण अपघात घडला, ज्यात मानवतचे चार नागरिक जागीच ठार झाले. ही दुर्दैवी घटना ट्रॅव्हल वाहन आणि मोटरसायकल यांच्यात समोरासमोर झालेल्या जोरदार धडकेमुळे घडली.

बीड जिल्ह्यातील पाटोदा तालुक्यातील श्री क्षेत्र मीराबाई आईसाहेब संस्थान महासांगवी येथे मुलांसाठी शालेय शिक्षणासोबतच आध्यात्मिक शिक्षणही सुरू करण्यात आले आहे. या संस्थेमध्ये राहण्याची आणि जेवणाची उत्तम व्यवस्था असून, शाळेत जाण्यासाठी बसची सोय देखील उपलब्ध आहे. संस्थेचे परिसर अत्यंत निसर्गरम्य वातावरणात असून, येथे विद्यार्थ्यांना गायन, वादन, हरिपाठ, गीता आणि कीर्तनाचे धडे दिले जातील. श्री संत मिराबाई आईसाहेब संस्थानच्या महंत राधाताई महाराज (आईसाहेब) यांनी ज्या मुलांना प्रवेश घ्यायचा आहे, त्यांनी लवकरात लवकर संपर्क साधण्याचे आवाहन केले आहे. यासाठी संपर्क क्रमांक 9763980777 आणि विठ्ठल महाराज सांगळे यांचा संपर्क क्रमांक 9403039322 उपलब्ध करून देण्यात आला आहे.

ओबीसी नेते प्रा. लक्ष्मण हाके यांनी सरकारला गंभीर इशारा दिला आहे. त्यांच्या म्हणण्यानुसार, जर ओबीसी आरक्षणाला धक्का लागला, तर साठ टक्के जनता एकत्र येण्याची शक्यता आहे. या परिस्थितीमध्ये काय परिणाम होतील, याचा सरकारने गांभीर्याने विचार करावा, अशी मागणी प्रा. हाके यांनी केली आहे.

जालना येथील सिंधी बाजारमध्ये रविवार, दिनांक २४ मे २०२६ रोजी सायंकाळी साडेचार वाजता शिवशक्ती-लहूशक्ती-भीमशक्ती अभियानाच्या वतीने मा. आमदार अमितजी गोरखे साहेबांना ‘झेड-प्लस’ सुरक्षा देण्याच्या मागणीसाठी तीव्र निदर्शने करण्यात आली. तळपत्या ४२ डिग्री तापमानात 'जिगरबाज लहू सैनिकांनी' हा एल्गार पुकारला. सर्वोच्च न्यायालयाच्या निर्णयानंतर डॉ. बाबासाहेब आंबेडकरांनी संविधानात केलेल्या तरतुदीनुसार अनुसूचित जातींचे उपवर्गीकरण व्हावे, या मागणीसाठी आमदार अमितजी गोरखे शासन दरबारी अभ्यासपूर्ण मांडणी करत असताना, काही समाजकंटक सोशल मीडियावर त्यांना ट्रोल करून अपशब्द वापरत असल्याने त्यांच्या संरक्षणाची ही मागणी करण्यात आली. या आंदोलनादरम्यान, "आमदार अमित गोरखे आगे बढो-हम तुम्हारे साथ है", "आमदार अमित गोरखे से जो टकरायेगा वह मिट्टी मे मिल जायेगा", आणि "आरक्षण वर्गीकरण झालंच पाहीजे" या घोषणांनी परिसर दणाणून गेला. राज्य समन्वयक रविकांत जगधने यांच्या नेतृत्वात हे आंदोलन यशस्वी करण्यासाठी डॉ. मनोहर जाधव, छगन वाघमारे, देविदास जाधव, सचिन साने, बंडू निकाळजे, दत्ता घोडे, अशोक लोखंडे, प्रकाश काका साळवे, सतीष खंडागळे, नरेश जगधने, शाम खंदारे, सुधाकर तुपसौन्दर, सुदाम दाभाडे, अभिनेते अरुण गाढे, प्रदीप पडूळ, अनिल लोखंडे, रमेश कासार, राहुल गोफने, मनोज बॉबी, सोमेश कांबळे, विजय आठवले यांसह अनेक 'जिगरबाज लहू सैनिकांची' प्रमुख उपस्थिती होती. या प्रकरणी विद्यमान मुख्यमंत्री आणि पोलीस महासंचालक यांना निवेदन सादर करण्यात येणार असल्याचे आयोजकांनी सांगितले.

क्रांतीज्योती सावित्रीबाई फुले यांनी स्त्री शिक्षणाची मुहूर्तमेढ रोवलेल्या पुण्यातील ऐतिहासिक भिडे वाड्याच्या प्रतिकृतीचे प्रदर्शन आणि ज्येष्ठ नेते छगन भुजबळ यांच्या संकल्पनेतून सुरू असलेल्या समता यात्रेच्या आगमनामुळे आज मंठा शहर सामाजिक जागृतीच्या वातावरणाने भारावून गेले. पुण्यातील ऐतिहासिक भिडे वाड्यात १ जानेवारी १८४८ रोजी सावित्रीबाई फुले यांनी मुलींसाठी भारतातील पहिली शाळा सुरू केली होती. स्त्री शिक्षणाच्या या ऐतिहासिक वारशाचे स्मरण व्हावे आणि तो नव्या पिढीपर्यंत पोहोचावा या उद्देशाने भिडे वाड्याची आकर्षक प्रतिकृती उभारण्यात आली होती. या प्रदर्शनाद्वारे सावित्रीबाई फुले आणि महात्मा ज्योतिराव फुले यांच्या कार्याचा व विचारांचा जागर करण्यात आला. या प्रतिकृतीला नागरिक, विद्यार्थी आणि महिलांनी मोठी गर्दी केली, अनेकजणांनी महापुरुषांच्या कार्याची माहिती जाणून घेत सामाजिक परिवर्तनाच्या या चळवळीला पाठिंबा दर्शविला. दरम्यान, राज्याचे माजी उपमुख्यमंत्री छगन भुजबळ यांच्या संकल्पनेतून महापुरुषांच्या विचारांचा प्रचार-प्रसार करण्यासाठी निघालेली “समता यात्रा” मंठा तालुक्यात दाखल झाली. या यात्रेचे शहरात विविध ठिकाणी ढोल-ताशांच्या गजरात, जयघोष आणि घोषणाबाजी करत उत्साहात स्वागत करण्यात आले. छत्रपती शिवाजी महाराज, महात्मा ज्योतिराव फुले, राजर्षी शाहू महाराज आणि डॉ. बाबासाहेब आंबेडकर यांच्या विचारांचा संदेश देणारी ही यात्रा शहरातील प्रमुख मार्गांवरून फिरली. सामाजिक समता, शिक्षण, बंधुता आणि संविधानिक मूल्यांचा प्रचार करणाऱ्या या यात्रेमुळे नागरिकांमध्ये मोठा उत्साह पाहायला मिळाला. एकूणच, भिडे वाड्याच्या प्रतिकृतीचे प्रदर्शन आणि समता यात्रेचे उत्स्फूर्त स्वागत या दुहेरी सामाजिक प्रबोधन पर्वामुळे मंठा शहरात उत्साहपूर्ण आणि शांततेत महापुरुषांच्या विचारांचा जागर करणारा कार्यक्रम पार पडला.

मराठा आरक्षणाच्या मागणीसाठी सुरू केलेले उपोषण मागे घेतल्यानंतर मराठा आंदोलनाचे नेते मनोज जरांगे पाटील यांची प्रकृती खालावली आहे. त्यांना छत्रपती संभाजीनगर येथील एका खाजगी रुग्णालयात दाखल करण्यात आले असून, मध्यरात्रीपासून त्यांच्यावर वैद्यकीय उपचार सुरू आहेत. डॉक्टरांचे एक पथक त्यांच्या प्रकृतीवर बारकाईने लक्ष ठेवून आहे. मिळालेल्या माहितीनुसार, अनेक दिवस चाललेल्या उपोषणामुळे शरीरात अशक्तपणा, पाण्याची कमतरता आणि इतर आरोग्यविषयक तक्रारी निर्माण झाल्याने त्यांना उपचारासाठी रुग्णालयात हलवावे लागले. उपोषण मागे घेतल्याबद्दल कार्यकर्ते व समर्थकांनी समाधान व्यक्त केले असले तरी, त्यांच्या खालावलेल्या प्रकृतीबद्दल चिंता व्यक्त केली जात आहे. दरम्यान, डॉक्टरांकडून आवश्यक वैद्यकीय तपासण्या केल्या जात असून, प्राथमिक माहितीनुसार त्यांची प्रकृती स्थिर असल्याचे समोर येत आहे. मनोज जरांगे पाटील यांच्या प्रकृतीत लवकर सुधारणा व्हावी, अशी अपेक्षा त्यांच्या समर्थकांकडून व्यक्त करण्यात येत आहे.