दिल्लीतील जंतर-मंतर येथे शांततापूर्ण आंदोलन करणाऱ्या विद्यार्थी आणि तरुणांवर झालेल्या पोलीस लाठीचार्जच्या विरोधात आज भारतीय कम्युनिस्ट पक्षाच्या वतीने सिल्लोडमध्ये मोठे 'जेल भरो आंदोलन' करण्यात आले. दिल्लीत शांततेत निदर्शने करणाऱ्या विद्यार्थ्यांवर झालेल्या या कारवाईचा तीव्र निषेध व्यक्त करण्यासाठी सिल्लोडमध्ये हे आंदोलन करण्यात आले.

फुलंब्री पोलिसांनी २७ गोवंश जनावरांची सुटका केली आहे. या प्रकरणी पोलिसांनी दोन आरोपींवर गुन्हा दाखल केला आहे.

जालना लोकसभा मतदारसंघाचे काँग्रेस खासदार डॉ. कल्याण काळे यांचा नुकताच वाढदिवस उत्साहात साजरा झाला असला, तरी त्यांच्या दोन वर्षांच्या कार्यकाळावर नागरिक आणि मतदारांनी गंभीर प्रश्न उपस्थित केले आहेत. काँग्रेस कार्यकर्ते विविध सामाजिक उपक्रमांतून शुभेच्छांचा वर्षाव करत असताना, दुसरीकडे शहर व जिल्हाभरात खासदारांच्या विकासकामांवरून जोरदार चर्चा रंगली आहे. खासदार म्हणून दोन वर्षांचा कालावधी उलटूनही मतदारसंघात कोणते ठोस विकासकाम उभे राहिले, असा थेट सवाल आता नागरिक विचारत आहेत. नागरिकांच्या मते, गेल्या दोन वर्षांत खासदारांनी केवळ निवेदने देण्याचे काम केले आहे. लोकसभेत निवडून दिल्यानंतर केंद्र सरकारकडून निधी आणणे, नवीन प्रकल्प मंजूर करून घेणे आणि पायाभूत सुविधा उभारणे ही जनतेची अपेक्षा होती. मात्र, प्रत्यक्ष मैदानात एकाही मोठ्या कामाची सुरुवात, भूमिपूजन किंवा उद्घाटन झालेले नाही. त्यामुळे "निवेदनांचा पाऊस, पण विकासाचा दुष्काळ" अशी संतप्त भावना लोक व्यक्त करत आहेत. जालना शहरातील संपर्क कार्यालयात शेतकरी, बेरोजगार तरुण, महिला आणि ज्येष्ठ नागरिक आपल्या समस्या घेऊन येतात, परंतु खासदार जालन्यात उपलब्ध नसल्याने त्यांना निराश होऊन परतावे लागते. स्थानिक पातळीवर खासदार "अमावस्या-पौर्णिमेलाच दिसतात" अशी उपरोधिक चर्चा सुरू असून, त्यांच्याभोवती नेहमी ठराविक लोकांचाच गराडा असतो, असा आरोपही केला जात आहे. मतदारसंघात पीकविमा, खत-बियाणे, सिंचन, बेरोजगारी, शिक्षण, आरोग्य, रस्ते आणि पाणीपुरवठ्याचे प्रश्न प्रलंबित असताना खासदारांनी आक्रमक भूमिका न घेतल्याने नागरिक त्रस्त आहेत. दोन वर्षांच्या कालावधीनंतर आता जालन्यातील जनतेला केवळ निवेदने किंवा आश्वासने नको असून प्रत्यक्षात विकासकामे दिसावीत, अशी अपेक्षा आहे. जालना मतदारसंघाला मोठे प्रकल्प आणि प्रभावी नेतृत्व कधी मिळणार, हा प्रश्न आता अधिक तीव्र झाला असून, आगामी काळात खासदार डॉ. कल्याण काळे यावर काय पावले उचलतात, याकडे संपूर्ण जालना जिल्ह्याचे लक्ष लागले आहे.

छत्रपती संभाजीनगरमध्ये वंचित बहुजन आघाडीचे कार्यकर्ते थेट रस्त्यावर उतरले असून महाराष्ट्र बंदच्या अनुषंगाने आंदोलन सुरू आहे. वंचितच्या कार्यकर्त्यांनी पैठण गेट आणि हर्सूल परिसरातील व्यावसायिकांना या महाराष्ट्र बंदमध्ये सहभागी होण्याचे आवाहन केले आहे. याशिवाय कार्यकर्त्यांनी शहरातील मुख्य बाजारपेठेत रस्ता बंद केला आहे. छत्रपती संभाजीनगरमध्ये वंचित बहुजन आघाडीच्या या बंदला प्रतिसाद मिळत आहे. आंदोलनाच्या आणि बंदच्या अनुषंगाने परिसरात पोलिसांचा मोठा बंदोबस्त तैनात करण्यात आला आहे.

औरंगाबादच्या प्रभाग क्रमांक एकमधील एकता नगर, जटवाडा रोड येथील रहिवासी संतोष दाभाडे यांनी ड्रेनेज लाईनच्या कामामुळे होणाऱ्या समस्येकडे लक्ष वेधले आहे. गेल्या १० तारखेपासून या परिसरात ड्रेनेजची लाईन खोदून ठेवण्यात आली असून त्यामुळे नागरिकांना खूप त्रास सहन करावा लागत आहे. जाण्या-येण्यासाठी कोणताही दुसरा पर्याय उपलब्ध नसल्याने रहिवाशांची मोठी अडचण झाली आहे. या समस्येची तत्काळ दखल घेऊन हे काम लवकरात लवकर मार्गी लावावे, अशी आग्रही विनंती त्यांनी केली आहे.

दिल्लीतील जंतर-मंतर येथे आपल्या मागण्यांसाठी आंदोलन करणाऱ्या निर्दोष विद्यार्थ्यांवर पोलिसांनी केलेल्या अमानुष लाठीहल्ल्याच्या आणि राहुल गांधींवरील अटकेच्या कारवाईच्या निषेधार्थ आज जालन्यात काँग्रेस पक्षाच्या वतीने तीव्र निदर्शने करण्यात आली. शहरातील महात्मा गांधी चौक येथे काँग्रेसचे पदाधिकारी आणि कार्यकर्ते मोठ्या संख्येने एकत्र आले असून त्यांनी या कारवाईविरोधात जोरदार धरणे आंदोलन छेडले आहे.

दिल्लीतील जंतर-मंतरवर शांततेच्या मार्गाने निदर्शने करणाऱ्या विद्यार्थी आणि तरुणांवर झालेल्या पोलिस लाठीचाराच्या विरोधात आज 'सिल्लोड बंद'ची हाक देण्यात आली आहे. दिल्लीत विद्यार्थ्यांवर झालेल्या या पोलिस लाठीचार्जच्या तीव्र निषेधार्थ सिल्लोड बंद पाळण्याचे आवाहन करण्यात आले आहे.

मंगळवारी रात्री आणि बुधवारी झालेल्या मुसळधार पावसामुळे जगप्रसिद्ध वेरूळ लेणीतील लेणी क्रमांक २९ वरील 'सीताची नहाणी' धबधबा दिमाखात ओसंडून वाहू लागला आहे. धबधब्याखालील सातही कुंड तुडुंब भरल्याने या परिसराला अत्यंत मनमोहक आणि नयनरम्य रूप प्राप्त झाले आहे. या निसर्गरम्य दृश्याचा प्रत्यक्ष आनंद घेण्यासाठी पर्यटकांनी वेरूळ लेणीकडे मोठी गर्दी केली असून, परिसरात उत्साहाचे वातावरण पाहायला मिळत आहे.

जालन्यातील झोपडपट्टीधारकांची वर्षानुवर्षांची प्रतीक्षा अखेर संपली असून प्रशासनाने पहिल्या टप्प्यात २५ पात्र लाभार्थ्यांना पीआर (Permanent Rights) कार्ड देण्याचा मोठा निर्णय घेतला आहे. या निर्णयामुळे दीर्घकाळापासून प्रलंबित असलेल्या प्रकरणांचा मार्ग मोकळा झाला असून शहरातील नूतन वसाहत आणि राहूल नगर परिसरातील पात्र लाभार्थ्यांना लवकरच पीआर कार्डांचे वितरण करण्यात येणार आहे. झोपडपट्टीधारकांना कायमस्वरूपी हक्काचे दस्तऐवज मिळावेत यासाठी अनेक वर्षांपासून प्रयत्न सुरू होते. कागदपत्रांची पूर्तता, पडताळणी आणि प्रशासकीय प्रक्रियेमुळे अनेक प्रकरणे रखडली होती, मात्र आता प्रशासनाने या कामाला गती दिली आहे. उर्वरित प्रकरणांमधील आवश्यक कागदपत्रांची छाननी पूर्ण करून इतर सर्व पात्र लाभार्थ्यांनाही टप्प्याटप्प्याने वेगाने पीआर कार्ड देण्याची प्रक्रिया सुरू असल्याचे प्रशासनाकडून स्पष्ट करण्यात आले आहे. पीआर कार्ड मिळाल्यामुळे लाभार्थ्यांना शासकीय योजनांचा लाभ घेणे, मालमत्तेच्या हक्कांबाबतची प्रक्रिया पूर्ण करणे आणि आर्थिकदृष्ट्या सक्षम होण्यासाठी मोठी मदत होणार आहे. प्रशासनाच्या या निर्णयामुळे झोपडपट्टीधारकांमध्ये समाधानाचे वातावरण निर्माण झाले असून उर्वरित पात्र नागरिकांनाही लवकरात लवकर न्याय मिळण्याची अपेक्षा व्यक्त होत आहे.

छत्रपती संभाजीनगरमधील गुलमंडी रोडवर असलेल्या 'उत्तम उपहार गृह'वर अन्न व औषध प्रशासनाने (FDA) 'सेफ फूड, सेफ महाराष्ट्र' मोहिमेअंतर्गत धडक तपासणी करत ही कारवाई केली आहे. तपासणीदरम्यान उपहार गृहात पुनर्वापर केलेले खाद्यतेल व वनस्पती तूप वापरले जात असल्याचे समोर आले. याशिवाय स्वयंपाकघर अत्यंत अस्वच्छ असल्याचे, परिसरात कीटकांचा वावर असल्याचे आणि कर्मचाऱ्यांकडे आवश्यक वैद्यकीय फिटनेस प्रमाणपत्रे नसल्याचेही उघडकीस आले. अन्नसुरक्षा व मानके कायद्याचे गंभीर उल्लंघन झाल्याने प्रशासनाने आस्थापनाचा परवाना तात्काळ निलंबित करून हॉटेल बंद केले आहे. तपासणीदरम्यान घेतलेले पुनर्वापर केलेल्या खाद्यतेल व वनस्पती तुपाचे नमुने प्रयोगशाळेत तपासणीसाठी पाठवण्यात आले असून, अहवाल प्राप्त झाल्यानंतर संबंधितांवर नियमानुसार पुढील कायदेशीर कारवाई केली जाईल. 'सेफ फूड, सेफ महाराष्ट्र' मोहिमेअंतर्गत शहरात अशा तपासण्या पुढेही सुरूच राहणार असल्याचे अन्न व औषध प्रशासनाने स्पष्ट केले आहे.