ডুমডুমা ৰাইদাং চাহ বাগিচাৰ বাইপাছত সংঘটিত হৈছে এক ভয়ংকৰ পথ দুৰ্ঘটনা, য'ত এখন মহিন্দ্ৰা বলেৰো আৰু এখন এম্বুলেন্সৰ মাজত মুখামুখী সংঘৰ্ষ হয়। ঘটনাৰ বিৱৰণ অনুসৰি, AS01RC5579 নম্বৰৰ এম্বুলেন্সখন খোবাং চাহ বাগিচাৰ পৰা মাকুম অভিমুখে আহি থকাৰ সময়ত, আনহাতে AS01DG2445 নম্বৰৰ মহিন্দ্ৰা বলেৰোখন ডিগবৈৰ পৰা চামদাং পথেৰে আহি আছিল। এই সংঘৰ্ষত এম্বুলেন্সখনত থকা পাঁচজন লোক আঘাতপ্ৰাপ্ত হয়, আৰু তেওঁলোক আটাইকে মাকুমস্থিত তিনিচুকীয়া চিকিৎসা মহাবিদ্যালয়ত ভৰ্তি কৰোৱা হৈছে। এই পাঁচজনৰ ভিতৰত এজনৰ অৱস্থা বৰ্তমান সংকটজনক বুলি জানিব পৰা গৈছে। দুৰ্ঘটনাত পতিত হোৱা লোক কেইজন ক্ৰমে তালাপ চাহ বাগিচাৰ ধনেশ্বৰ নায়ক, খোবাং চাহ বাগিচাৰ বিনোদ প্ৰসাদ আৰু সুনিল নায়ক, তালাপ লাইনা চাহ বাগিচাৰ চমাৰি নায়ক আৰু আনন্দ চাহ বাগিচাৰ বাবুল কিষাণ। ঘটনাৰ খবৰ পোৱাৰ লগে লগে ডুমডুমা আৰক্ষীৰ এটা দল ঘটনাস্থলীত উপস্থিত হয়। আৰক্ষীয়ে দুৰ্ঘটনাগ্ৰস্ত দুয়োখন বাহনৰ লগতে মহিন্দ্ৰা বলেৰোৰ চালকজনক থানালৈ লৈ যায়।

চৰাইদেউ জিলাৰ কৃষি বিভাগৰ উদ্যোগত আজি জিলা কৃষি কাৰ্যালয়ত কৃষকসকলৰ মাজত উন্নত মানৰ ধানৰ বীজ বিতৰণ কৰা হৈছে। এই অনুষ্ঠানত সোণাৰিৰ বিধায়ক ধৰ্মেশ্বৰ কোঁৱৰ আৰু কৃষি বিভাগৰ জিলা কৃষি বিষয়া ৰিজবি হাজৰিকাকে ধৰি আন বিষয়াসকল উপস্থিত থাকে। তেওঁলোকে কৃষকসকলক আধুনিক কৃষি পদ্ধতি আৰু উন্নত বীজ ব্যৱহাৰৰ গুৰুত্ব সম্পৰ্কে বিশদভাৱে অৱগত কৰে। অনুষ্ঠানটোত চৰাইদেউ জিলা কৃষাণ মৰ্চাৰ সভাপতি জয়ন্ত বৰুৱা, সাধাৰণ সম্পাদক কৃষ্ণ নেৱাৰ, টাই আহোম উন্নয়ন পৰিষদৰ সদস্য গিৰিণ গগৈ, সোণাৰি আঞ্চলিক পঞ্চায়তৰ সভাপতি কমলজ্যোতি হাজৰিকা, বৰহাটৰ বিশিষ্ট সমাজকৰ্মী মিল্টন গগৈ, ভজো গাঁৱৰ গাওঁ প্ৰধান প্ৰদীপ তাতী আৰু বহু সংখ্যক কৃষক উপস্থিত আছিল।

চৰাইদেউ জিলা কৃষি বিভাগে NFSM আঁচনিৰ অধীনত আজি আনুষ্ঠানিকভাৱে কৃষকসকলক অধিক উৎপাদনক্ষম ৰঞ্জিত ছাব-১ ধানৰ বীজ বিতৰণ কৰে। কৃষকৰ উৎপাদন বৃদ্ধিৰ প্ৰতি লক্ষ্য ৰাখি কৃষি বিভাগে এই পদক্ষেপ গ্ৰহণ কৰিছে। এই অনুষ্ঠানত কৃষি বিভাগৰ মন্ত্ৰীৰ আহ্বানৰ প্ৰতি সঁহাৰি জনাই সোণাৰি সমষ্টিৰ বিধায়ক ধৰ্ম্মেশ্বৰ কোঁৱৰ উপস্থিত থাকে। বিধায়কগৰাকীয়ে উপস্থিত কৃষকসকলক কৃষি কৰ্মৰ প্ৰতি উৎসাহিত কৰাৰ লগতে কৃষি বিভাগৰ বিভিন্ন আঁচনিৰ সা-সুবিধা গ্ৰহণ কৰিবলৈ আহ্বান জনায়। তেওঁ লগতে বিভাগক পৰৱৰ্তী সময়ত কৃষকৰ সময় আৰু সুবিধা অনুসৰি কৃষি সামগ্ৰী লাভ কৰাত গুৰুত্ব দিবলৈ আৰু আধুনিক কৃষি পদ্ধতিৰ লগতে উন্নত বীজ ব্যৱহাৰত মনোনিৱেশ কৰিবলৈও পৰামৰ্শ আগবঢ়ায়। এই অনুষ্ঠানত জিলা কৃষি বিষয়া ৰীজবি হাজৰিকা, চৰাইদেউ জিলা কৃষাণ মৰ্চাৰ সভাপতি জয়ন্ত বৰুৱা, সাধাৰণ সম্পাদক কৃষ্ণ নেৱাৰ, টাই আহোম উন্নয়ন পৰিষদৰ সদস্য গিৰিণ গগৈ, সোণাৰি আঞ্চলিক পঞ্চায়তৰ সভাপতি কমলজ্যোতি হাজৰিকা, বৰহাটৰ বিশিষ্ট সমাজকৰ্মী মিল্টন গগৈ, ভজো গাঁৱৰ গাওঁ প্ৰধান প্ৰদীপ তাঁতিৰ লগতে বহুসংখ্যক কৃষক আৰু বিভাগীয় বিষয়া-কৰ্মচাৰীসকল উপস্থিত আছিল।

অহা ২২ জুনৰ পৰা আৰম্ভ হ'বলগীয়া মহাঅম্বুবাচী মেলাৰ প্ৰতি লক্ষ্য ৰাখি বিশিষ্ট জ্যোতিষী ড০ নয়নজ্যোতি শৰ্মাই এক আহ্বান জনাইছে।

লখিমপুৰ জিলাৰ কণানদীত এগৰাকী মহিলাক অৰ্ধ উলংগ কৰা ঘটনাটোক লৈ লখিমপুৰ জিলা মহিলা কংগ্ৰেছে তীব্ৰ প্ৰতিক্ৰিয়া ব্যক্ত কৰিছে। এই সন্দৰ্ভত দলটোৰ কৰ্মীসকলে চাউলধোৱা আৰক্ষী চকীত উপস্থিত হৈ ঘটনাটোৰ ওপৰত নিজৰ বক্তব্য দাঙি ধৰে।

আউনীআটী সত্ৰৰ পৰম পূজনীয় সত্ৰাধিকাৰ আৰু বৈষ্ণৱ সংস্কৃতিৰ এগৰাকী পুৰোধা ব্যক্তি শ্ৰীশ্ৰীপীতাম্বৰ দেৱ গোস্বামী প্ৰভুৰ দিকদৰ্শন আৰু আধ্যাত্মিক চিন্তাধাৰাই সমাজক সদায় আলোকিত কৰি আহিছে। তেখেতে ব্রিটিছ সংগ্ৰহালয়ত সংৰক্ষিত হৈ থকা অমূল্য ঐতিহ্য 'বৃন্দাবনী বস্ত্ৰ' দৰ্শন কৰা মুহূৰ্তটো সকলোৰে বাবে অতি গৌৰৱৰ। এই ঐতিহাসিক যাত্ৰাৰ ফলশ্ৰুতিত, অতি সোনকালেই অসমৰ জনসাধাৰণে এই অতুলনীয় ঐতিহ্য স্বচক্ষে দৰ্শন কৰাৰ সৌভাগ্য লাভ কৰিব। অসমৰ বৈষ্ণৱ পৰম্পৰা আৰু সাংস্কৃতিক গৌৰৱৰ সৈতে জড়িত এই ঐতিহাসিক ঘটনাটোৱে প্ৰতিজন অসমীয়াৰ হৃদয় গৌৰৱেৰে ভৰাই তুলিছে।

ঐতিহাসিক গৌৰীসাগৰ বৰপুখুৰী বৰ্তমান চৰম অস্তিত্বৰ সংকটত ভুগিছে, যি গৌৰৱময় ইতিহাসৰ অন্যতম অনন্য চানেকি। প্ৰায় ৪০০ বিঘা মাটিত খন্দাই উলিওৱা আৰু তিনিটাকৈ ৰজাদিনীয়া ঐতিহাসিক দ’ল সম্বলিত এই ঐতিহ্যমণ্ডিত পুখুৰীটো সংৰক্ষণৰ অভাৱত এতিয়া এক ডাষ্টবিনতহে পৰিণত হৈছে। দেশী-বিদেশী পৰ্যটকৰ অন্যতম আকৰ্ষণৰ কেন্দ্ৰবিন্দু এই বৰপুখুৰীটো সম্পূৰ্ণৰূপে মেটেকা, কচু আৰু ঘাঁহ-বনেৰে আগুৰি ধৰি এক শোচনীয় ৰূপ ধাৰণ কৰিছে। এই শোচনীয় পৰিস্থিতিৰ বাবে শিৱসাগৰৰ বিধায়ক আৰু কেন্দ্ৰীয় পুৰাতত্ত্ব বিভাগক তীব্ৰ সমালোচনা কৰি কোৱা হৈছে যে তেওঁলোক যেন কুম্ভকৰ্ণ নিদ্ৰাত মগ্ন হৈ আছে।

লখিমপুৰ জিলাৰ ৰূপহী ৰাজগড়ত অনুষ্ঠিত হোৱা ভাওনা প্ৰদৰ্শনত কণমাণিসকলৰ অভিনয়ে দৰ্শকসকলক বিশেষভাৱে মুগ্ধ কৰিবলৈ সক্ষম হয়।

মাজুলীৰ শিক্ষাখণ্ডৰ বিভিন্ন সমস্যা সমাধানৰ দাবীত সদৌ মাজুলী জিলা কোচ ৰাজবংশী ছাত্ৰ সন্থাই (Sadou Majuli Jila Koch Rajbanshi Chatra Santha) মুখ্যমন্ত্ৰী ডঃ হিমন্ত বিশ্ব শৰ্মালৈ এক স্মাৰক পত্ৰ প্ৰেৰণ কৰিছে। এই স্মাৰক পত্ৰত শিক্ষাখণ্ডৰ চাৰিটা মূল দাবী উত্থাপন কৰা হৈছে। ছাত্ৰ সন্থাৰ প্ৰথম দাবীটো হৈছে যে শিক্ষাবৰ্ষৰ প্ৰায় ছমাহ উকলি যোৱাৰ পিছতো বহু ছাত্ৰ-ছাত্ৰীয়ে এতিয়ালৈকে পাঠ্যপুথি লাভ কৰা নাই, সেয়ে তেওঁলোকক অতি শীঘ্ৰে পাঠ্যপুথি যোগান ধৰিব লাগে। দ্বিতীয়তে, বিদ্যালয়সমূহত ছাত্ৰ-ছাত্ৰীক দিয়া ইউনিফৰ্মৰ মানদণ্ড অতি নিম্ন। অভিযোগ অনুসৰি, ৪০০-৬০০ টকাত যোগান ধৰা দুযোৰ ইউনিফৰ্ম পিন্ধাৰ বাবে উপযোগী নহয়। ইউনিফৰ্ম যোগানকাৰী সংস্থাসমূহে নিজৰ মুনাফাৰ বাবে নিম্ন মানৰ কাপোৰ যোগান ধৰাৰ ফলত গ্ৰীষ্মকালত ইয়াক পৰিধান কৰিলে ছাত্ৰ-ছাত্ৰীৰ স্বাস্থ্যৰ প্ৰতি ভাবুকি আহিব বুলি ছাত্ৰ সন্থাই দৃঢ়তাৰে উল্লেখ কৰিছে। ইয়াৰ উপৰিও, বহু বিদ্যালয়ৰ ছাত্ৰ-ছাত্ৰীয়ে আজিলৈকে ইউনিফৰ্ম নোপোৱাটো এক গুৰুত্বপূৰ্ণ সমস্যা বুলি কোৱা হৈছে, আৰু ইয়াৰ উচিত সমাধান বিচৰা হৈছে। তৃতীয় দাবী হিচাপে, মেধাবী ছাত্ৰ-ছাত্ৰীক যোগান ধৰা চাইকেলসমূহো অতি নিম্ন মানদণ্ডৰ বুলি অভিযোগ উত্থাপন কৰা হৈছে, যিবোৰ ছাত্ৰ-ছাত্ৰীয়ে মাত্ৰ এসপ্তাহো ভালদৰে চলাব নোৱাৰে বা বিদ্যালয়লৈ লৈ যাব নোৱাৰে। ভৱিষ্যতে চৰকাৰে এনে আঁচনি আনিলে মাজুলীত বিতৰণ কৰিবলগা চাইকেলৰ নিবিদা যাতে নিৰ্ভৰযোগ্য প্ৰতিষ্ঠানে পায় তাৰ প্ৰতি গুৰুত্ব দিবলৈ ছাত্ৰ সন্থাই আহ্বান জনাইছে। চতুৰ্থতে, মহাবিদ্যালয়সমূহত উচ্চতৰ মাধ্যমিকৰ ছাত্ৰ-ছাত্ৰীক আগতে বিনামূলীয়া পাঠ্যপুথি যোগান ধৰিছিল যদিও বৰ্তমান যোগান নধৰাত তেওঁলোক সমস্যাৰ সন্মুখীন হৈছে। বিশেষকৈ Education, Geography আৰু Sociology বিষয়ত পাঠ্যপুথিৰ অভাৱে ছাত্ৰ-ছাত্ৰীৰ শিক্ষা গ্ৰহণত বাধাৰ সৃষ্টি কৰিছে। এই সকলো বিষয়ত বিহিত ব্যৱস্থা গ্ৰহণৰ বাবে ছাত্ৰ সন্থাই মাজুলী জিলা আয়ুক্তৰ জৰিয়তে মুখ্যমন্ত্ৰীলৈ এই স্মাৰক পত্ৰ প্ৰেৰণ কৰে, যিখন সহকাৰী জিলা আয়ুক্তগৰাকীয়ে জিলা আয়ুক্তৰ হৈ গ্ৰহণ কৰে।

শৈক্ষিক নগৰী হিচাপে খ্যাত যোৰহাট চহৰত পুনৰ এক লজ্জাজনক তথা ঘৃণনীয় ঘটনা পোহৰলৈ আহিছে, য'ত এখন বিলাসী হোটেলত দীৰ্ঘদিন ধৰি চলি থকা নাৰী দেহৰ বৃহৎ ব্যৱসায় আৰক্ষীয়ে উৎখাত কৰিছে। আৰক্ষীৰ এই সফলতাই সমগ্ৰ অঞ্চলটোতে তীব্ৰ চাঞ্চল্যৰ সৃষ্টি কৰিছে। জানিব পৰা মতে, যোৰহাটৰ এখন বিখ্যাত হোটেলত এই অনৈতিক কাৰ্য চলি আছিল। এক গোপন সূত্ৰৰ পম খেদি যোৰহাট আৰক্ষীৰ এটা দলে যোৱা মাজনিশা হোটেলখনত এক আকস্মিক অভিযান চলায়। এই অভিযানকালত আৰক্ষীয়ে হোটেলখনৰ বিভিন্ন কোঠাৰ পৰা অনৈতিক কাৰ্যত লিপ্ত থকা অৱস্থাতে ১৫ গৰাকী যুৱক-যুৱতীক আটক কৰিবলৈ সক্ষম হয়। ইয়াৰ উপৰিও, অভিযানকাৰী দলটোৱে কোঠাসমূহৰ পৰা বুজন পৰিমাণৰ আপত্তিজনক সামগ্ৰীও উদ্ধাৰ কৰে। স্থানীয় সূত্ৰই সদৰী কৰা অনুসৰি, পেগু উপাধিৰ এগৰাকী মহিলাৰ নেতৃত্বত এই বিলাসী হোটেলখনত সুপৰিকল্পিতভাৱে দীৰ্ঘদিনৰ পৰা নাৰী দেহৰ এই ৰমৰমীয়া ব্যৱসায়টো পৰিচালিত হৈ আছিল। আৰক্ষীয়ে বৰ্তমান আটক কৰা আটাইকেইগৰাকী যুৱক-যুৱতীক অধিকোধিক সোধা-পোছা অব্যাহত ৰাখিছে আৰু এই ঘটনাৰ সৈতে হোটেল কৰ্তৃপক্ষ অথবা অন্য কোনো প্ৰভাৱশালী চক্ৰ জড়িত আছে নেকি, সেই সন্দৰ্ভত এক গভীৰ তদন্ত আৰম্ভ কৰিছে।