दिवंगत उपमुख्यमंत्री अजितदादा पवार यांच्या जयंतीनिमित्त संपूर्ण पवार कुटुंबीयांनी बारामती येथील स्मृतीस्थळी जाऊन अजितदादांना अभिवादन केले. या प्रसंगी उपमुख्यमंत्री सुनेत्रा पवार, खासदार पार्थ पवार आणि युवा नेते जय पवार यांच्यासह संपूर्ण पवार कुटुंबीय बारामतीतील स्मृतीस्थळावर उपस्थित होते.

आज अजितदादांच्या जयंतीनिमित्त उपमुख्यमंत्री सुनेत्रा पवार यांनी सोशल मीडियाच्या माध्यमातून आपल्या भावना व्यक्त केल्या आहेत. या निमित्ताने अत्यंत भावुक झालेल्या सुनेत्रावहिनींनी "आज सगळं हरवून गेलंय, डोळ्यातील अश्रू थांबत नाहीत" असे म्हणत आपल्या भावनांना वाट मोकळी करून दिली आहे. सोशल मीडियावर करण्यात आलेली सुनेत्रा पवार यांची ही पोस्ट अतिशय भावनिक आहे.

पुण्यातील लोहगाव चौकातील मुख्य रस्त्यावर ड्रेनेज चेंबरचे झाकण तुटून अनेक दिवसांपासून उघडे पडले आहे. यामुळे त्या ठिकाणी मोठा जीवघेणा खड्डा निर्माण झाला असून दुचाकीस्वार, चारचाकी चालक तसेच पादचाऱ्यांच्या जीविताला गंभीर धोका निर्माण झाला आहे. स्थानिक नागरिकांच्या म्हणण्यानुसार, चेंबरचे तुटलेले झाकण बाजूला पडून असून त्यावर केवळ तात्पुरता पत्रा ठेवण्यात आला आहे. मात्र तो अपुरा ठरत असल्याने कधीही मोठा अपघात होण्याची शक्यता आहे. दररोज या मार्गावरून हजारो वाहनांची वर्दळ असतानाही संबंधित प्रशासनाने अद्याप दुरुस्ती केलेली नाही. नागरिकांनी अनेक वेळा तक्रारी करूनही पुणे महानगरपालिकेच्या नगर रोड क्षेत्रीय कार्यालयाने याकडे दुर्लक्ष केल्याचा आरोप केला आहे. एखादा गंभीर अपघात झाल्यानंतरच प्रशासन जागे होणार का, असा संतप्त सवाल नागरिक उपस्थित करत आहेत. त्यामुळे संबंधित विभागाने तातडीने चेंबरची दुरुस्ती करून हा जीवघेणा खड्डा कायमस्वरूपी बुजवावा, तसेच जबाबदार अधिकाऱ्यांवर कारवाई करावी, अशी मागणी स्थानिक नागरिकांनी केली आहे.

पुण्यातील हडपसर साडेसतरानळी येथील छत्रपती शिवाजी महाराज चौक ते अमनोरा पार्क आणि मुंढवा या मुख्य रस्त्याची अत्यंत दुरवस्था झाली असून मोठमोठ्या खड्ड्यांमुळे नागरिकांना जीव मुठीत धरून प्रवास करावा लागत आहे. वारंवार तक्रारी करूनही प्रशासनाकडून या समस्येकडे कोणतीही दखल घेतली जात नसल्याचा आरोप नागरिकांनी केला आहे. प्रशासनाच्या या भूमिकेविरोधात क्रांती शेतकरी संघटनेचे संस्थापक अध्यक्ष अमोल नाना तुपे यांच्या नेतृत्वाखाली नागरिकांनी रस्त्यातील खड्ड्यांमध्ये झाडे लावून अनोखे आंदोलन केले. या वेळी प्रशासन व लोकप्रतिनिधींचा निषेध नोंदवण्यात आला असून, हा रस्ता तातडीने दुरुस्त न केल्यास आंदोलन अधिक तीव्र करण्याचा इशारा देण्यात आला आहे.

फलटण तालुक्यातील मंडलनिहाय अहवालानुसार जून महिन्यापासून आतापर्यंत तालुक्यात एकूण सरासरी ८५ मिमी पावसाची नोंद झाली आहे. या कालावधीत संपूर्ण तालुक्यात तरडगाव मंडलात सर्वाधिक १८९ मिमी पावसाची नोंद करण्यात आली आहे. तालुक्यातील इतर मंडळांमधील पावसाची आकडेवारी पाहता, आदर्की मंडलात ११३.७ मिमी, होळ येथे १०९.९ मिमी, वाठार निंबाळकर येथे ८९.८ मिमी, कोळकी येथे ७५.५ मिमी, फलटण मंडलात ६२.२ मिमी, बर्ड येथे ६०.७ मिमी, गिरवी येथे ५१.८ मिमी, राजाळे येथे ५१.६ मिमी आणि आसू मंडलात ४४.५ मिमी पावसाची नोंद झाली आहे.

भोर शहरातील महाडनाका परिसरात ठेकेदाराच्या हलगर्जीपणामुळे पाणीपुरवठ्याची मुख्य पाईपलाईन पुन्हा फुटल्याची घटना घडली आहे. या घटनेमुळे हजारो लिटर पाणी वाया गेले असून परिसरातील अनेक नागरिकांच्या घरांमध्ये पाणी शिरले आहे. एकीकडे नागरिकांना पिण्याच्या पाण्यासाठी संघर्ष करावा लागत असताना दुसरीकडे होत असलेल्या पाण्याच्या या नासाडीमुळे नगरपालिका प्रशासनाविरोधात तीव्र संताप व्यक्त केला जात आहे. प्रशासनाने तातडीने दुरुस्तीचे काम हाती घेऊन यावर कायमस्वरूपी उपाययोजना करावी, अशी ठाम मागणी नागरिकांकडून केली जात आहे.

दिवंगत उपमुख्यमंत्री अजितदादा पवार यांच्या जयंतीनिमित्त पवार कुटुंबीयांनी बारामतीतील गोजुबावी येथील अपघातस्थळी जाऊन त्यांना अभिवादन केले. जिथे अजितदादांचा प्रवास अकस्मात थांबला होता, त्याच काळजाला चिरून टाकणाऱ्या ठिकाणी आज त्यांच्या आठवणींचा महापूर उसळला होता. या वेळी उपमुख्यमंत्री सुनेत्रा पवार, खासदार पार्थ पवार, युवा नेते जय पवार आणि अन्य कुटुंबीयांनी दादांच्या स्मृतींना वंदन केले. या प्रसंगी अजितदादांच्या आठवणींनी पवार कुटुंबीयांना भावना अनावर झाल्याचे पाहायला मिळाले.

बारामती तालुका पोलिसांनी धडाकेबाज कारवाई करत गावठी पिस्तूल बाळगणाऱ्या एका सराईत आरोपीला अटक केली आहे. बेकायदेशीरपणे गावठी पिस्तूल जवळ बाळगल्याप्रकरणी पोलिसांकडून ही धडक कारवाई करण्यात आली आहे.