ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ କଳାହାଣ୍ଡି ଗସ୍ତ କରି ଜଙ୍ଗଲ ଅଧିକାର ପ୍ରାପ୍ତ ହିତାଧିକାରୀମାନଙ୍କୁ ଜଙ୍ଗଲ ଜମି ପଟ୍ଟା ବଣ୍ଟନ କରିଛନ୍ତି। ଏହି ଅବସରରେ ସେ ସ୍ପଷ୍ଟ କରିଛନ୍ତି ଯେ ଭୂମିହୀନ ଲୋକମାନେ ମଧ୍ୟ ଜାତି ପ୍ରମାଣପତ୍ର ଏବଂ ଅନ୍ୟାନ୍ୟ ପ୍ରମାଣପତ୍ର ପାଇପାରିବେ।

ନୂଆଦିଲ୍ଲୀର ଉଦ୍ୟୋଗ ଭବନ ନିକଟରେ ଥିବା ଶ୍ରମିକ ବସ୍ତି ଅଞ୍ଚଳରେ ୨୦୨୬ ମସିହା ଜୁନ୍ ୨୪ ତାରିଖ ପ୍ରାୟ ୩:୦୨ ସମୟରେ ଏକ ଇଲେକ୍ଟ୍ରିକ୍ ପ୍ୟାନେଲରେ ସର୍ଟ ସର୍କିଟ୍ ଯୋଗୁଁ ଭୟଙ୍କର ଅଗ୍ନିକାଣ୍ଡ ଘଟିଛି। ଅଗ୍ନିକାଣ୍ଡର ଭୟାବହତା ଦେଖି ଅଞ୍ଚଳରେ ଆତଙ୍କ ଖେଳିଯାଇଥିଲା। ସୂଚନା ମିଳିବା ମାତ୍ରେ ଦମକଳ ବିଭାଗର ୨୦ଟି ଗାଡ଼ି, ଯେଉଁଥିରେ ୱାଟର ଟେଣ୍ଡର, ୱାଟର ବ୍ରାଉଜର ଏବଂ ବ୍ରିଦିଂ ଅପରେଟସ୍ ସ୍ମୋକ ଭ୍ୟାନ ସାମିଲ ଥିଲା, ଘଟଣାସ୍ଥଳରେ ପହଞ୍ଚିଥିଲା। ଦମକଳ କର୍ମଚାରୀମାନେ ଅନେକ ଘଣ୍ଟା ଧରି କଠିନ ପରିଶ୍ରମ କରି ନିଆଁକୁ ଆୟତ୍ତ କରିଥିଲେ ଏବଂ ଏହାକୁ ଶ୍ରମିକ ବସ୍ତିକୁ ବ୍ୟାପିବାରୁ ରୋକି ଦେଇଥିଲେ, ଯାହା ଫଳରେ ଏକ ବଡ଼ ଦୁର୍ଘଟଣାକୁ ଟଳାଯାଇଛି। ବର୍ତ୍ତମାନ କୁଲିଂ ଅପରେସନ୍ ଜାରି ରହିଛି। ଆଶ୍ୱସ୍ତିର ବିଷୟ ହେଉଛି, ଏପର୍ଯ୍ୟନ୍ତ କୌଣସି କ୍ଷୟକ୍ଷତି କିମ୍ବା ଆହତ ହେବାର ସୂଚନା ମିଳିନାହିଁ। ଅଗ୍ନିକାଣ୍ଡର କାରଣ ଜାଣିବା ପାଇଁ ତଦନ୍ତ ଚାଲିଛି।

ଗତ ଜୁନ ୧୯ ତାରିଖରେ ଏକ ଆକ୍ରମଣରେ ଆହତ ହୋଇ ଡାକ୍ତରଖାନାରୁ ଫେରିଥିବା ମରାକୁଟା ଗ୍ରାମର ବିଜେଡି କର୍ମୀ ବିରଞ୍ଚି ମେହେରଙ୍କୁ ପୂର୍ବତନ ଝାରସୁଗୁଡ଼ା ବିଧାୟିକା ଦୀପାଳି ଦାସ ସାକ୍ଷାତ କରିଛନ୍ତି। ଏହି ସାକ୍ଷାତ ସମୟରେ ଦୀପାଳି ଦାସ ବିରଞ୍ଚି ମେହେରଙ୍କ ସ୍ୱାସ୍ଥ୍ୟାବସ୍ଥା ପଚାରି ବୁଝିବା ସହ ତାଙ୍କର ଶୀଘ୍ର ଆରୋଗ୍ୟ କାମନା କରିଥିଲେ। ଏଥିସହ ସେ ବିରଞ୍ଚି ମେହେରଙ୍କ ପରିବାର ପ୍ରତି ସମବେଦନା ଜଣାଇବା ସହ ସେମାନଙ୍କୁ ସମର୍ଥନ ଦେଇଛନ୍ତି।

ଚଳିତ ବର୍ଷର ପ୍ରଥମ ବର୍ଷାରେ ହିଁ ବେଲପାହାଡ଼ ନିକଟସ୍ଥ ଗୁମାଡେରା ମାଲିପଡ଼ା ଅଞ୍ଚଳର ଅନେକ ପରିବାର ଜଳବନ୍ଦୀ ଅବସ୍ଥାର ସମ୍ମୁଖୀନ ହୋଇଛନ୍ତି। ବର୍ଷା ଜଳ ନିଷ୍କାସନ ପାଇଁ ଉଚିତ ବ୍ୟବସ୍ଥା ନଥିବାରୁ ପାଣି ଘର ଭିତରକୁ ପଶିଯାଇ ଲୋକଙ୍କ ଦୈନନ୍ଦିନ ଜୀବନକୁ ବିପର୍ଯ୍ୟସ୍ତ କରିଦେଇଛି। ସ୍ଥାନୀୟ ବାସିନ୍ଦାଙ୍କ କହିବା ଅନୁସାରେ, ଅଳ୍ପ ସମୟର ବର୍ଷାରେ ମଧ୍ୟ ରାସ୍ତା ଓ ଘର ଆଗରେ ପାଣି ଜମି ରହୁଛି। ଏହି ପରିସ୍ଥିତିରେ କେତେକ ଘରେ ବର୍ଷା ଜଳ ପଶିଯାଇ ଘରୋଇ ସାମଗ୍ରୀ କ୍ଷତିଗ୍ରସ୍ତ ହୋଇଛି। ପ୍ରତିବର୍ଷ ଏଭଳି ସମସ୍ୟା ଦେଖାଦେଉଥିବା ସତ୍ତ୍ୱେ କୌଣସି ସ୍ଥାୟୀ ସମାଧାନ ହୋଇନଥିବାରୁ ଅଞ୍ଚଳବାସୀ ଅସନ୍ତୋଷ ପ୍ରକାଶ କରିଛନ୍ତି। ଅଞ୍ଚଳବାସୀ ପୌର ପ୍ରଶାସନ ଓ ସମ୍ପୃକ୍ତ ବିଭାଗର ଦୃଷ୍ଟି ଆକର୍ଷଣ କରି ତୁରନ୍ତ ଡ୍ରେନେଜ୍ ବ୍ୟବସ୍ଥାର ଉନ୍ନତି ତଥା ଜଳ ନିଷ୍କାସନର ସ୍ଥାୟୀ ସମାଧାନ କରିବାକୁ ଦାବି କରିଛନ୍ତି। ବର୍ଷା ଋତୁ ଆରମ୍ଭରୁ ହିଁ ଏଭଳି ଗମ୍ଭୀର ପରିସ୍ଥିତି ସୃଷ୍ଟି ହୋଇଥିବାରୁ ଆଗାମୀ ଦିନରେ ସମସ୍ୟା ଆହୁରି ଜଟିଳ ହେବା ନେଇ ସ୍ଥାନୀୟ ଲୋକେ ଗଭୀର ଚିନ୍ତା ପ୍ରକାଶ କରିଛନ୍ତି।

ଓଡ଼ିଶା ସରକାରଙ୍କ ଦୁଇ ବର୍ଷ ପୂର୍ତ୍ତି ଅବସରରେ ବରଗଡ଼ ଜିଲ୍ଲାର ଗାଇସିଲେଟ୍ ବ୍ଲକ ପରିସରରେ 'ବିକାଶର ଧାରା ଓଡ଼ିଶାସାରା' କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ବିଜେପୁର ବିଧାୟକ ସନତ କୁମାର ଗଡତିଆ ପ୍ରଦୀପ ପ୍ରଜ୍ୱଳନ କରି ଏହି କାର୍ଯ୍ୟକ୍ରମର ଶୁଭାରମ୍ଭ କରିଥିଲେ। ଏହି ଅବସରରେ ସ୍ଥାନୀୟ ଅଧିକାରୀ, ଜନପ୍ରତିନିଧି ଏବଂ ବହୁ ସଂଖ୍ୟକ ଲୋକ ଉପସ୍ଥିତ ଥିଲେ। କାର୍ଯ୍ୟକ୍ରମରେ ବିଭିନ୍ନ ସରକାରୀ ବିଭାଗ ପକ୍ଷରୁ ଷ୍ଟଲ୍‌ ସଜା ଯାଇଥିଲା, ଯେଉଁଥିରେ ଶିକ୍ଷା, ସ୍ୱାସ୍ଥ୍ୟ, କୃଷି, ପଞ୍ଚାୟତିରାଜ, ପାନୀୟ ଜଳ, ମହିଳା ଓ ଶିଶୁ ବିକାଶ ଆଦି ବିଭାଗର ଯୋଜନା ସମ୍ପର୍କିତ ତଥ୍ୟ ଉପଲବ୍ଧ କରାଯାଇଥିଲା। ଲୋକମାନେ ଏହି ଷ୍ଟଲ୍‌ଗୁଡ଼ିକୁ ଦେଖି ସରକାରୀ ସୁବିଧା ବିଷୟରେ ସଚେତନ ହୋଇଥିଲେ। ଉଦ୍‌ଯାପନୀ ସଭାରେ ବିଧାୟକ ତାଙ୍କ ଅଭିଭାଷଣରେ କହିଥିଲେ ଯେ, ସରକାରଙ୍କ ଲକ୍ଷ୍ୟ ହେଉଛି ଗ୍ରାମାଞ୍ଚଳର ଶେଷ ଲୋକ ପର୍ଯ୍ୟନ୍ତ ବିକାଶ ପହଞ୍ଚାଇବା। ସେ ଆଶ୍ୱାସନ ଦେଇଥିଲେ ଯେ, ଗାଇସିଲେଟ୍ ବ୍ଲକରେ ରାସ୍ତା, ପାନୀୟ ଜଳ, ବିଦ୍ୟୁତ, ଶିକ୍ଷା ଓ ସ୍ୱାସ୍ଥ୍ୟ ସେବାରେ ଯେଉଁ ଉନ୍ନତି ହେଉଛି, ତାହା ଆଗାମୀ ଦିନରେ ଆହୁରି ତ୍ୱରାନ୍ୱିତ ହେବ। ବିଧାୟକ ଲୋକଙ୍କୁ ସରକାରୀ ଯୋଜନାଗୁଡ଼ିକର ସଠିକ୍ ଲାଭ ଉଠାଇବାକୁ ପରାମର୍ଶ ଦେବା ସହ କହିଥିଲେ ଯେ, ଅନେକ ସମୟରେ ସୂଚନା ଅଭାବରୁ ଲୋକେ ସୁବିଧାରୁ ବଞ୍ଚିତ ହୋଇଯାଆନ୍ତି ଏବଂ ଏହି ପ୍ରକାର କାର୍ଯ୍ୟକ୍ରମ ମାଧ୍ୟମରେ ସଚେତନତା ବୃଦ୍ଧି ପାଇବା ସହ ସମସ୍ତେ ଉନ୍ନତିର ସାଥୀ ହେବେ। ଅନ୍ୟ ଅତିଥିମାନେ ମଧ୍ୟ ମତ ପ୍ରକାଶ କରିଥିଲେ ଯେ, ଗ୍ରାମୀଣ ଅଞ୍ଚଳରେ ବିକାଶକୁ ତ୍ୱରାନ୍ୱିତ କରିବା ପାଇଁ ଜନସହଭାଗିତା ଅତ୍ୟନ୍ତ ଜରୁରୀ। ସରକାରୀ ଯୋଜନା ଓ ଲୋକଙ୍କ ସହଯୋଗ ଏକାଠି ହେଲେ ହିଁ ଉନ୍ନତି ସମ୍ଭବ ବୋଲି ସେମାନେ କହିଥିଲେ।

ଏକ ଛିଡା ହୋଇଥିବା ଟ୍ରକ ହଠାତ୍ ଆଗକୁ ବଢ଼ି ପାଞ୍ଚୋଟି ବାଇକକୁ ସମ୍ପୂର୍ଣ୍ଣ ଚୁରମାର କରିଦେଇଛି। ଏହି ଘଟଣାରେ ସ୍ଥାନୀୟ ଲୋକେ ଅଳ୍ପକେ ବର୍ତ୍ତି ଯାଇଥିବା ସୂଚନା ମିଳିଛି।

ସୁବର୍ଣ୍ଣପୁର ଜିଲ୍ଲାର ଉଲୁଣ୍ଡା ବ୍ଲକର କ୍ଷେମାଲୋଏ ଗ୍ରାମ ପଞ୍ଚାୟତ କାର୍ଯ୍ୟାଳୟରେ ଏକ ଯୁଗ୍ମ ଅଭିଯୋଗ ଶୁଣାଣି ଓ ଉପଶମ ଶିବିର ଅନୁଷ୍ଠିତ ହୋଇଯାଇଛି। ଏହି ଶିବିରରେ ଜିଲ୍ଲାପାଳ ଡ. ନୃପରାଜ ସାହୁ ଏବଂ ସୁବର୍ଣ୍ଣପୁର ଅତିରିକ୍ତ ଆରକ୍ଷୀ ଅଧିକ୍ଷକ ଶ୍ରୀ ପ୍ରତାପ କୁମାର ରଣା ଯୋଗଦେଇ ଜନସାଧାରଣଙ୍କ ବିଭିନ୍ନ ଅଭିଯୋଗ ଓ ସମସ୍ୟା ଶୁଣିଥିଲେ। ଶିବିରରେ ମୋଟ ୭୧ଟି ଅଭିଯୋଗ ଦରଖାସ୍ତ ଗ୍ରହଣ କରାଯାଇଥିଲା, ଯେଉଁଥିରୁ ୫୬ଟି ବ୍ୟକ୍ତିଗତ ଏବଂ ୧୫ଟି ସାମୂହିକ ଦରଖାସ୍ତ ଥିଲା। ସମସ୍ତ ଦରଖାସ୍ତଗୁଡ଼ିକୁ ନିର୍ଦ୍ଧାରିତ ସମୟସୀମା ମଧ୍ୟରେ ସମାଧାନ ପାଇଁ ସମ୍ପୃକ୍ତ ବିଭାଗୀୟ ଅଧିକାରୀମାନଙ୍କ ନିକଟକୁ ପ୍ରେରଣ କରାଯାଇଛି। ଏହି ଅବସରରେ ଜିଲ୍ଲା ସ୍ୱାସ୍ଥ୍ୟ ବିଭାଗ ଦ୍ୱାରା ଅଭିଯୋଗ ପାଇଁ ଆସିଥିବା ସମସ୍ତ ଲୋକଙ୍କର, ଛୁଆଠୁ ନେଇ ବୃଦ୍ଧ ପର୍ଯ୍ୟନ୍ତ, ମାଗଣାରେ ସ୍ୱାସ୍ଥ୍ୟ ପରୀକ୍ଷା କରାଯାଇଛି। ଉଲୁଣ୍ଡା ଗୋଷ୍ଠୀ ଉନ୍ନୟନ ଅଧିକାରୀ ଶ୍ରୀ ଦିଲ୍ଲୀପ ବାଡାଙ୍କ ଦ୍ୱାରା ଆୟୋଜିତ ଏହି ଶିବିରରେ ମୁଖ୍ୟ ଉନ୍ନୟନ ଅଧିକାରୀ ତଥା ନିର୍ବାହୀ ଅଧିକାରୀ, ଜିଲ୍ଲା ପରିଷଦ, ସୁବର୍ଣ୍ଣପୁର ଶ୍ରୀ ଅଶ୍ୱିନୀ ମେହେର, ଉପ ଜିଲ୍ଲାପାଳ ଶ୍ରୀ ସୁରେନ୍ଦ୍ର ମେହେର, ଉଲୁଣ୍ଡା ଅତିରିକ୍ତ ତହସିଲଦାର ଶ୍ରୀ ନିରଞ୍ଜନ ଧଳ ଏବଂ କ୍ଷେମାଲୋଏ ସରପଞ୍ଚ ଶ୍ରୀ ଯଶୋବନ୍ତ ପଣ୍ଡା ପ୍ରମୁଖ ମଞ୍ଚାସୀନ ଥିଲେ। ଜିଲ୍ଲା ମୁଖ୍ୟ ଚିକିତ୍ସା ଓ ଜନସ୍ୱାସ୍ଥ୍ୟ ଅଧିକାରୀ ଶ୍ରୀମତୀ ଉଷାରାଣୀ ଦାସ, ସହକାରୀ କଲେକ୍ଟର (ଅଭିଯୋଗ) ସୁଶ୍ରୀ ପ୍ରିୟଦର୍ଶିନୀ ସାହୁ ଏବଂ ଅନ୍ୟାନ୍ୟ ଜିଲ୍ଲାସ୍ତରୀୟ ଅଧିକାରୀମାନେ ମଧ୍ୟ ଏଥିରେ ଉପସ୍ଥିତ ଥିଲେ।

ପଦ୍ମ ପୁରସ୍କାର ପ୍ରସଙ୍ଗରେ, ଗାୟିକା ଅଲକା ୟାଗ୍ନିକ୍‌ଙ୍କୁ ପଦ୍ମଭୂଷଣରେ ସମ୍ମାନିତ କରାଯାଇଥିବା ବେଳେ, ୩ ଜଣ ଓଡ଼ିଆ – ମହେନ୍ଦ୍ର କୁମାର ମିଶ୍ର, ସୀମାଞ୍ଚଳ ପାତ୍ର ଏବଂ ଚରଣ ହେମ୍ବ୍ରମ – ପଦ୍ମଶ୍ରୀ ପୁରସ୍କାର ଗ୍ରହଣ କରିଛନ୍ତି। ହାଇକୋର୍ଟ ଏକ ଐତିହାସିକ ରାୟ ପ୍ରଦାନ କରିଛନ୍ତି ଯେ ବିବାହିତ ଝିଅମାନେ ମଧ୍ୟ ଅନୁକମ୍ପାମୂଳକ ନିଯୁକ୍ତି ପାଇବାକୁ ଯୋଗ୍ୟ। ତାମିଲନାଡୁ ଗ୍ୟାସ୍ ଟ୍ରାଜେଡିରେ ଓଡ଼ିଆ ଶ୍ରମିକଙ୍କ ମୃତ୍ୟୁ ସଂଖ୍ୟା ୭କୁ ବୃଦ୍ଧି ପାଇଛି ଏବଂ ସହାୟତା ରାଶି ₹୧୦ ଲକ୍ଷକୁ ବଢ଼ାଯାଇଛି। କୋଲକାତାରେ ଗଙ୍ଗା ନଦୀରେ ଏକ ଡଙ୍ଗା ଉପରେ ବଜ୍ରପାତ ହେବା ଫଳରେ ୪ ଜଣଙ୍କର ମୃତ୍ୟୁ ଘଟିଛି। ଏଲ୍ ନିନୋ ଭୟକୁ ପଛରେ ପକାଇ ଚାଷୀମାନେ ବମ୍ପର ଖରିଫ ଚାଷ କରିଛନ୍ତି, ଏପର୍ଯ୍ୟନ୍ତ ୧୨୦ ଲକ୍ଷ ହେକ୍ଟର ଜମିରେ ବୁଣାବୁଣି ସରିଲାଣି। ଚଳିତବର୍ଷ ପୁରୀ ରଥଯାତ୍ରା ପାଇଁ ୨୦୦ ପ୍ଲାଟୁନ ଫୋର୍ସ ମୁତୟନ ହେବେ ଏବଂ ସମଗ୍ର ସହର ସିସିଟିଭି ନଜରରେ ରହିବ। ପୁରୀ ସହରବାସୀଙ୍କ ପାଇଁ ଦର୍ଶନ ବ୍ୟବସ୍ଥା ସହଜ ହେବ, ସେମାନେ ନିଜର ଆଧାର କାର୍ଡ ସ୍କାନ କରି ଲମ୍ୱା ଧାଡ଼ିରେ ନ ଛିଡ଼ା ହୋଇ ମନ୍ଦିର ଭିତରକୁ ପ୍ରବେଶ କରିପାରିବେ। ଭୁବନେଶ୍ୱରରେ RI/Amin ପରୀକ୍ଷା ୨୮ ତାରିଖରେ ହେବାକୁ ଥିବା ବେଳେ OTET ଜୁଲାଇ ୫କୁ ଘୁଞ୍ଚିଛି ଏବଂ TET ଉତ୍ତୀର୍ଣ୍ଣ ଅବଧି ୩ ବର୍ଷକୁ ବୃଦ୍ଧି କରାଯାଇଛି। ନୟାଗଡ଼ର ଉପଜିଲ୍ଲାପାଳ କଡ଼ା ଚେତାବନୀ ଦେଇଛନ୍ତି ଯେ ବାପା-ମାଆଙ୍କ ସେବା ନକଲେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ମୈାସୁମି ସାରା ଓଡ଼ିଶା ଛୁଇଁ ସାରିଛି ଏବଂ ଆସନ୍ତା ୪ ଦିନ ଯାଏଁ ରାଜ୍ୟର ବିଭିନ୍ନ ଅଂଚଳରେ ବର୍ଷା ସମ୍ଭାବନା ରହିଛି। ରାଜଧାନୀରେ ତ୍ରୁଟିପୂର୍ଣ୍ଣ ପାଠ୍ୟପୁସ୍ତକ ବିବାଦ ଘନଉଛି, ସଂଶୋଧିତ ପୁସ୍ତକରେ ମଧ୍ୟ ଭୁଲ୍ ବାହାରୁଛି। ଭୁବନେଶ୍ୱରରେ ୪ ଦିନ ଧରି ଚାଲିବ ଫିଲ୍ମ ଫେଷ୍ଟିଭାଲ୍। ଝାରପଡ଼ା ଜେଲରେ ୭ କଏଦୀ ଅସୁସ୍ଥ ହୋଇପଡ଼ିଛନ୍ତି, ସେମାନେ ନିଶା ଔଷଧ ଖାଇଥିବା ସନ୍ଦେହ କରାଯାଉଛି। ପାଟକୁରା ରାଜନୀତିରେ ବିଜେଡି ଓ ଅରବିନ୍ଦ ମହାପାତ୍ର ମୁହାଁମୁହିଁ ହୋଇଛନ୍ତି। 'ରାତ୍ରିଚର ଓ କୁକୁର' ପ୍ରସଙ୍ଗରେ ସ୍ବର୍ଣ୍ଣ ମହଲ ଉପଦେଷ୍ଟାଙ୍କ ବୟାନକୁ ନେଇ ଯାତ୍ରାଜଗତରେ ଝଡ଼ ସୃଷ୍ଟି ହୋଇଛି। ଭଦ୍ରକରେ ଏକ ଲାଟିନ୍ ଭିତରୁ ବଡ଼ ନାଗ ସହିତ ୨୯ଟି ଛୋଟ ସାପ ଉଦ୍ଧାର କରାଯାଇଛି। ଜଗତସିଂହପୁରରେ ଜାଲ୍ ଜାତିଗତ ପ୍ରମାଣ ଦେଇ ଚାକିରୀ କରିବା ଅଭିଯୋଗରେ ବୃନ୍ଦାବନ ବିହାରୀ ହାଇସ୍କୁଲର ଶିକ୍ଷକ ସୁଶାନ୍ତ କୁମାର ମଣ୍ଡଳଙ୍କୁ ବହିଷ୍କୃତ କରାଯାଇଛି। ଏକାଧିକ ଭୋଟର ପରିଚୟ ପତ୍ର ରଖିବା ଅଭିଯୋଗରେ ଅଭିନେତା ପ୍ରକାଶ ରାଜଙ୍କ ବିରୋଧରେ ଜାମିନ ବିହୀନ ଗିରଫ ପରୱାନା ଜାରି ହୋଇଛି। କୋଲକାତାରେ ମମତା ବାନାର୍ଜୀ ୮ ବିଦ୍ରୋହୀ ନେତାଙ୍କୁ ଦଳରୁ ବହିଷ୍କୃତ କରିଛନ୍ତି। ଭାଙ୍କ୍ୟୁଭରରେ ଖେଳାଯାଇଥିବା ଫୁଟବଲ ବିଶ୍ୱକପ୍ ଇତିହାସରେ ଇଜିପ୍‌ଟ ନ୍ୟୁଜିଲାଣ୍ଡକୁ ୩-୧ ଗୋଲରେ ପରାସ୍ତ କରି ନିଜର ପ୍ରଥମ ବିଜୟ ହାସଲ କରିଛି।

କେନ୍ଦ୍ରୀୟ ସାମାଜିକ ନ୍ୟାୟ ଏବଂ ଅଧିକାରିତା ରାଷ୍ଟ୍ର ମନ୍ତ୍ରୀ ରାମଦାସ ଆଠୱାଲେ ଓଡ଼ିଶା ଗସ୍ତ କରି ବିଭିନ୍ନ କଲ୍ୟାଣକାରୀ ଯୋଜନାର କାର୍ଯ୍ୟକାରିତା ସମୀକ୍ଷା କରିଛନ୍ତି। ଏହି ବୈଠକରେ ଅନୁସୂଚିତ ଜାତି, ଅନୁସୂଚିତ ଜନଜାତି ଏବଂ ଅନ୍ୟାନ୍ୟ ପଛୁଆ ବର୍ଗ (OBC) ପାଇଁ ଛାତ୍ରବୃତ୍ତି, ଉଚ୍ଚଶିକ୍ଷାରେ ସଂରକ୍ଷଣ ତଥା ନିଯୁକ୍ତି ସମ୍ବନ୍ଧୀୟ ପ୍ରାବଧାନ ଉପରେ ବିସ୍ତୃତ ଆଲୋଚନା କରାଯାଇଥିଲା।