Post by Eresha Nayaka

கடலூர் மாவட்டம், சிதம்பரத்தில் சிங்கப்பெண் சிறப்பு அதிரடிப்படை உதவி ஆய்வாளர் உத்திராம்பாள் தலைமையில் போலீசார், சிதம்பரம் பேருந்து நிலையத்தில் பொதுமக்களிடையே பெண்கள் மற்றும் குழந்தைகள் பாதுகாப்பு குறித்து இன்று விழிப்புணர்வு ஏற்படுத்தினர். பெண்கள் தங்களின் பாதுகாப்பில் விழிப்புணர்வுடன் செயல்பட வேண்டும் என்றும், ஏதேனும் பிரச்சினைகள் ஏற்பட்டால் உடனடியாக காவல்துறையை அணுக வேண்டும் என்றும் போலீசார் அறிவுறுத்தினர்.

உலகப் புகழ்பெற்ற வேளாங்கண்ணி மாதா பேராலயத்திற்கு தினமும் ஆயிரக்கணக்கான பக்தர்கள் பல்வேறு வாகனங்களில் வந்து செல்கின்றனர். பேராலயத்திற்குச் செல்லும் முக்கிய சாலையான ஆர்ச் பகுதி கிழக்கு கடற்கரைச் சாலையில் அமைந்துள்ளது. மூன்று வழி சந்திப்பான இந்தப் பகுதியில் அடிக்கடி விபத்துகள் ஏற்படுவதால், ஆர்ச் பகுதியில் வேகத்தடை அமைக்க வேண்டும் என வாகன ஓட்டிகள் கோரிக்கை விடுத்துள்ளனர்.

கரூர் மாவட்டம் குளித்தலை முத்து பூபாலசமுத்திரத்தில் அமைந்துள்ள அருள்மிகு ஸ்ரீ நீலமேகப் பெருமாள் கோவிலின் உப சன்னதியான அருள்மிகு ஸ்ரீ ஆஞ்சநேயர் கோவிலில் மகா கும்பாபிஷேக விழா இன்று விமர்சையாக நடைபெற்றது. இந்த விழாவில் ஏராளமான பக்தர்கள் கலந்துகொண்டு சுவாமி தரிசனம் செய்தனர். கும்பாபிஷேக நிகழ்வுகள் சிறப்பாக நடைபெற்றன.

திருச்சி மாவட்டம் மணப்பாறையை அடுத்த வாகைக்குளம் விஸ்தரிப்பு தெருவில் வசித்து வரும் 68 வயதான ஜெயலெட்சுமி, தனது இளைய மகள் புவனேஸ்வரியுடன் வசித்து வருகிறார். மாலை நேரத்தில் மூத்த மகள் கார்த்தியாவைப் பார்ப்பதற்காக விராலிமலை சாலையில் உள்ள அவரது வீட்டிற்குச் சென்றுவிட்டு, இளைய மகளுடன் வீடு திரும்பி உள்ளார். விராலிமலை சாலையிலிருந்து வாகைக்குளம் விஸ்தரிப்பு தெருவுக்குத் திரும்பிக்கொண்டிருந்தபோது, பின்னால் வந்த இளைஞர் ஒருவர் மூதாட்டியின் கழுத்தில் இருந்த 5 சவரன் எடையுள்ள கல் முகப்பு சங்கிலியைப் பறித்துக்கொண்டு, அருகில் இருசக்கர வாகனத்தில் காத்திருந்த மற்றொருவருடன் தப்பி ஓடிவிட்டார். சம்பவம் குறித்து தகவல் அறிந்ததும், எஸ்ஐ கதிரவன் தலைமையிலான போலீசார் சம்பவ இடத்திற்கு விரைந்து சென்று அப்பகுதியில் பொருத்தப்பட்டிருந்த சிசிடிவி காட்சிகளைச் சேகரித்து, தப்பி ஓடியவர்களை அடையாளம் காணும் முயற்சியில் ஈடுபட்டுள்ளனர். மணப்பாறை போலீசார் இச்சம்பவம் குறித்து விசாரணை நடத்தி வருகின்றனர்.

திருச்சி மாவட்டம் திருப்பராய்த்துறை ஊராட்சியில் கடந்த சில நாட்களாக குடிநீர் சரியாக விநியோகிக்கப்படவில்லை என்று கூறப்படுகிறது. இது குறித்து பலமுறை புகார் அளித்தும் எந்த நடவடிக்கையும் எடுக்கவில்லை எனக் கூறி பொதுமக்கள் இன்று திருப்பராய்த்துறையில் சாலை மறியலில் ஈடுபட்டு வருகின்றனர். இந்த சாலை மறியலால் போக்குவரத்து பாதிக்கப்பட்டுள்ளது. தகவலறிந்து சம்பவ இடத்திற்கு வந்த காவல்துறையினரும், அதிகாரிகளும் பொதுமக்களுடன் பேச்சுவார்த்தை நடத்தி வருகின்றனர்.

நாகப்பட்டினம் கீழ்வேளூர் மற்றும் அதன் சுற்றுவட்டாரப் பகுதிகளில் இன்று காலை முதல் வானம் மேகமூட்டமாக காணப்பட்டது. இந்த நிலையில், மதியம் ஒரு மணிக்கு மேல் நாகப்பட்டினம் புத்தூர், அந்தணப்பேட்டை, மஞ்சக்கொல்லை, பாப்பாக்கோவில் உள்ளிட்ட சுற்றுப்புறப் பகுதிகளில் சிறிது நேரம் பரவலான கோடை மழை பெய்தது. கடந்த சில நாட்களாக நாகப்பட்டினத்தில் வெயில் 100 டிகிரி பாரன்ஹீட்டைத் தாண்டி பதிவாகி வந்த நிலையில், தற்போது பெய்துள்ள இந்த கோடை மழை அப்பகுதி மக்களுக்கு ஆறுதலை அளித்துள்ளது.

சேலம் மாவட்டம், கெங்கவல்லியில் வட்டார வளர்ச்சி அலுவலராகப் பணிபுரியும் இளங்கோ மீது, அதே பகுதியில் செவிலியராகப் பணிபுரியும் திராவிடமணி என்பவரிடம் தகாத முறையில் நடந்து கொண்டதாகப் புகார் எழுந்துள்ளது. இந்தப் புகாரின் அடிப்படையில், திராவிடமணியின் சகோதரர் மணிகண்டன், இன்று வட்டார வளர்ச்சி அலுவலர் அலுவலகத்தில் இளங்கோவிடம் வாக்குவாதம் செய்து அவரது கன்னத்தில் அறைந்ததாகத் தெரிவிக்கப்பட்டுள்ளது. இந்தச் சம்பவம் தொடர்பாக, வட்டார வளர்ச்சி அலுவலர் இளங்கோ மணிகண்டன் மீது காவல் நிலையத்தில் புகார் அளித்துள்ளார். அதேநேரத்தில், செவிலியர் திராவிடமணியும் வட்டார வளர்ச்சி அலுவலர் இளங்கோ மீது புகார் அளித்துள்ளார். இந்தப் புகார்களின் பேரில், வட்டார வளர்ச்சி அலுவலர் இளங்கோ மீது வழக்குப் பதிவு செய்யப்பட்டுள்ளது.