କଳାହାଣ୍ଡି ଜିଲ୍ଲା କୋକସରା ଅଞ୍ଚଳରେ ଦିନକୁ ଦିନ ଚୋରି ଏବଂ ଡକାୟତି ମାମଲା ବୃଦ୍ଧି ପାଇବାରେ ଲାଗିଛି। ଡକାୟତମାନେ ଏବେ ବିଶେଷ ଭାବରେ ସ୍ଥାନୀୟ ଅଞ୍ଚଳର ବଡ଼ ବଡ଼ିଆ ଲୋକଙ୍କୁ ନିଜର ଟାର୍ଗେଟ କରୁଛନ୍ତି। ଲଗାତାର ଭାବେ ବଢୁଥିବା ଏହି ଚୋରି ଓ ଡକାୟତି ଘଟଣା ସ୍ଥାନୀୟ ଅଞ୍ଚଳରେ ଭୟ ଏବଂ ଚିନ୍ତାର ପରିବେଶ ସୃଷ୍ଟି କରିଛି।

ନବରଙ୍ଗପୁର ଜିଲ୍ଲା ଉମରକୋଟ ବ୍ଲକ ଏବଂ ଝରିଗାଁ ବ୍ଲକ ଅନ୍ତର୍ଗତ ଅନେକ ଗ୍ରାମରେ ଚୋର ଓ ଲୁଟେରା ଗ୍ୟାଙ୍ଗ ସକ୍ରିୟ ହୋଇ ଗୋଟିଏ ପରେ ଗୋଟିଏ ଗାଁରେ ଚୋରି ଏବଂ ଡକାୟତି ଚଳାଇଛନ୍ତି। ଏହି ଲୁଟେରାମାନେ ସକ୍ରିୟ ରହି ନିରନ୍ତର ଭାବେ ଲୋକଙ୍କ ଧନଜୀବନକୁ ବିପନ୍ନ କରୁଥିବାରୁ ସ୍ଥାନୀୟ ଅଞ୍ଚଳରେ ତୀବ୍ର ଆତଙ୍କ ଖେଳିଯାଇଛି। ଗତ ୨୦୨୫ ଜୁନ୍ ମାସରେ ତେଲଗା ସ୍ଥିତ ଏକ ଘରେ ଏହି ଚୋର ଲୁଟେରା ଗ୍ୟାଙ୍ଗ ପଶି ଅନେକ ଟଙ୍କା, ମୋବାଇଲ୍ ଏବଂ ଅନ୍ୟାନ୍ୟ ଜିନିଷପତ୍ର ଲୁଟି ନେଇଥିଲେ। ଚୋରମାନେ ଖଣ୍ଡା, କାତି ଓ ବନ୍ଧୁକ ଭଳି ମାରାତ୍ମକ ଅସ୍ତ୍ରଶସ୍ତ୍ର ଧରି ଉକ୍ତ ଘରକୁ ଚାରି ଚାରି ଥର ଆକ୍ରମଣ କରିଥିଲେ। ଏହି ସଶସ୍ତ୍ର ଆକ୍ରମଣ ଯୋଗୁଁ ମନରେ ଭୟ ସୃଷ୍ଟି ହେବାରୁ ସେହି ଘରଟି ଏବେ ପରିତ୍ୟକ୍ତ ଅବସ୍ଥାରେ ପଡ଼ି ରହିଛି। ଏହାକୁ ନେଇ ସରକାର ଓ ପ୍ରଶାସନ ନିକଟରେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଜୋରଦାର ଅନୁରୋଧ କରାଯାଇଛି। ଏହି ସକ୍ରିୟ ଚୋର ଲୁଟେରା ଗ୍ୟାଙ୍ଗକୁ ତୁରନ୍ତ ଗିରଫ କରି କୋର୍ଟ ଚାଲାଣ କରାଯାଉ ଏବଂ ଜେଲ୍ ଦଣ୍ଡ ପ୍ରଦାନ କରାଯାଉ। ସେମାନଙ୍କୁ ତୁରନ୍ତ କାବୁ କରାନଗଲେ ଦିନକୁ ଦିନ ଏହି ଲୁଟେରାମାନେ ଚୋରି ଓ ଡକାୟତି ଜାରି ରଖି ଲୋକଙ୍କ ଧନଜୀବନ ନଷ୍ଟ କରିଦେବେ ବୋଲି ଚେତାବନୀ ଦିଆଯାଇଛି।

ନବରଙ୍ଗପୁର ଜିଲ୍ଲା କୋଷାଗୁମୁଡ଼ା ଥାନା ପୋଲିସକୁ ମିଳିଛି ଏକ ବଡ଼ ସଫଳତା। ଜଣେ ବାପାଙ୍କ ଲିଖିତ ଅଭିଯୋଗକୁ ଆଧାର କରି ପୋଲିସ ମାଲକାନଗିରି ଜିଲ୍ଲା ସୀମାନ୍ତ ଅଞ୍ଚଳରୁ ୬ ଜଣ ନାବାଳିକା ଦାଦନ ଶ୍ରମିକଙ୍କ ସହ ୨ ଯୁବତୀ ଓ ଜଣେ ବାଳକଙ୍କୁ ସଫଳତାର ସହ ଉଦ୍ଧାର କରିଛି। କୋଷାଗୁମୁଡ଼ା ଥାନାରେ ୪ ଜଣ ନାବାଳିକାଙ୍କ ବାପା ଏକ ଲିଖିତ ଅଭିଯୋଗ କରିବା ପରେ ଥାନାଧିକାରୀ ବାଙ୍ଗି ମାଂଝୀଙ୍କ ନେତୃତ୍ୱରେ ପୋଲିସ ତୁରନ୍ତ ଏହି ଅପରେସନ ଆରମ୍ଭ କରିଥିଲା। ଉଦ୍ଧାର ହୋଇଥିବା ନାବାଳିକାମାନଙ୍କ ମଧ୍ୟରେ କୋଷାଗୁମୁଡ଼ା ଅଞ୍ଚଳର ୪ ଜଣ, ଉମରକୋଟ ଅଞ୍ଚଳର ଜଣେ ଏବଂ କୋଡ଼ିଙ୍ଗା ଅଞ୍ଚଳର ଜଣେ ରହିଛନ୍ତି। ଏହା ସହିତ କୋଡ଼ିଙ୍ଗା ଅଞ୍ଚଳର ଜଣେ ଓ ଉମରକୋଟର ଜଣେ ଯୁବତୀ ଏବଂ ଜଣେ ବାଳକଙ୍କୁ ମଧ୍ୟ ମାଲକାନଗିରି ସୀମାରୁ ପୋଲିସ ଉଦ୍ଧାର କରିଛି। ଏହି ସ୍ପେଶାଲ ଅପରେସନରେ କୋଷାଗୁମୁଡ଼ା ଥାନାଧିକାରୀ ଶ୍ରୀମତୀ ବାଙ୍ଗି, ଏସଆଇ ପର୍ଶୁରାମ ଛତ୍ରୀୟା ଏବଂ ଏଏସଆଇ ଭଗବତ ମାଝୀ ସାମିଲ ଥିଲେ। ପୋଲିସ ଏହି ଘଟଣାରେ ଥାନାରେ ୧୫୧/୨୬ ନମ୍ବରରେ ଏକ ମାମଲା ରୁଜୁ କରିଛି। ଉଦ୍ଧାର ହେବା ପରେ ୬ ନାବାଳିକାଙ୍କର କୋଷାଗୁମୁଡ଼ା ମେଡ଼ିକାଲରେ ସ୍ୱାସ୍ଥ୍ୟ ପରୀକ୍ଷା କରାଯାଇ ଆଜି ନବରଙ୍ଗପୁର ସିଡବ୍ଲୁସି (CWC) କୁ ପଠାଯାଇଛି। ଏହି ନାବାଳିକା, ଯୁବତୀ ଓ ବାଳକଙ୍କୁ ଏକ ବୋଲେରୋ ଗାଡ଼ି (OD 33 P 1403) ଯୋଗେ କୋଡ଼ିଙ୍ଗା ଏବଂ ପାପଡାହାଣ୍ଡି ଅଞ୍ଚଳର ଦୁଇ ଜଣ ଡ୍ରାଇଭର ତ୍ରିପୁରା ଚାଲାଣ କରୁଥିଲେ ବୋଲି ଜଣାପଡ଼ିଛି। ବର୍ତ୍ତମାନ ପୋଲିସ ଉକ୍ତ ଦୁଇ ଜଣ ଡ୍ରାଇଭରଙ୍କୁ ଅଟକ ରଖି ଥାନାରେ ଅଧିକ ପଚରାଉଚରା ଜାରି ରଖିଥିବା ନେଇ ଥାନାଧିକାରୀ ଶ୍ରୀମତୀ ବାଙ୍ଗି ସୂଚନା ଦେଇଛନ୍ତି।

ନୂଆପଡ଼ା ଜିଲ୍ଲା ଖଡ଼ିଆଳ ସ୍ଥିତ ଇଣ୍ଡୋର ଷ୍ଟାଡିୟମରେ ଆଜି ସନ୍ଧ୍ୟା ୬ ଟା ସମୟରେ ଜିଲ୍ଲାସ୍ତରୀୟ ବ୍ୟାଡମିଣ୍ଟନ ପ୍ରତିଯୋଗିତା ଉଦଘାଟିତ ହୋଇଯାଇଛି। ଖଡ଼ିଆଳ ଇଣ୍ଡୋର ଷ୍ଟାଡିୟମ ପରିସରରେ ଏହି ବ୍ୟାଡମିଣ୍ଟନ ପ୍ରତିଯୋଗିତାର ଆୟୋଜନ କରାଯାଇଛି।

କଳାହାଣ୍ଡି ଜିଲ୍ଲା ଲାଞ୍ଜିଗଡ଼ ବ୍ଲକର ଲାଞ୍ଜିଗଡ଼ ଥାନା ପରିସରରେ ଗୁଣ୍ଡିଚାଯାତ୍ରା ଓ ବାହୁଡ଼ା ଯାତ୍ରାକୁ ଶାନ୍ତିଶୃଙ୍ଖଳାର ସହ ସମାପନ କରିବା ପାଇଁ ଶୁକ୍ରବାର ଦିନ ଏକ ଶାନ୍ତି କମିଟିର ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି। ଏହି ବୈଠକ ଲାଞ୍ଜିଗଡ଼ ତହସିଲଦାର ବନମାଳୀ ମେହେରଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଥିଲା। ବୈଠକରେ ଲାଞ୍ଜିଗଡ଼ର ଗୁଣ୍ଡିଚାଯାତ୍ରା ଏବଂ ବାହୁଡ଼ା ଯାତ୍ରାକୁ କିପରି ସୁରୁଖୁରୁରେ ଏବଂ ଶାନ୍ତିଶୃଙ୍ଖଳା ସହିତ ସମାପନ କରାଯାଇପାରିବ, ସେ ନେଇ ବିସ୍ତୃତ ଆଲୋଚନା କରାଯାଇ ପ୍ରସ୍ତୁତି କରାଯାଇଛି।

କଳାହାଣ୍ଡି ଜିଲ୍ଲା ଲାଞ୍ଜିଗଡ଼ ବ୍ଲକର ଶିକ୍ଷା ବ୍ୟବସ୍ଥାରେ ବ୍ୟାପକ ସୁଧାର ଆଣିବା ପାଇଁ ପ୍ରୟାସ ଜାରି ରହିଛି। ଏହି କ୍ରମରେ ଗୋଷ୍ଠୀ ଶିକ୍ଷା ଅଧିକାରୀ (BEO) ରୁଷିଆ ମେହେର ବିଭିନ୍ନ ବିଦ୍ୟାଳୟ ଗସ୍ତ କରି ଶିକ୍ଷାଦାନ ସହିତ ଅନ୍ୟାନ୍ୟ ବ୍ୟବସ୍ଥାର ଅନୁଧ୍ୟାନ କରିଛନ୍ତି। ସେ ଲାଞ୍ଜିଗଡ଼ ବ୍ଲକ ଅନ୍ତର୍ଗତ ହତମୁଣ୍ଡା, କାରକରଟା ଏବଂ କିଡିଙ୍ଗ ବିଦ୍ୟାଳୟ ହଠାତ୍ ପରିଦର୍ଶନ କରିଥିବା ଜଣାପଡ଼ିଛି। ଏହି ପରିଦର୍ଶନ ସମୟରେ ସେ ବିଦ୍ୟାଳୟଗୁଡ଼ିକରେ ଚାଲିଥିବା ଶିକ୍ଷାଦାନ ଶୈଳୀର ପ୍ରତ୍ୟକ୍ଷ ସମୀକ୍ଷା କରିବା ସହ ଛାତ୍ରଛାତ୍ରୀମାନଙ୍କ ସହ ଆଲୋଚନା କରିଥିଲେ। ଏହା ସହିତ ସରକାରଙ୍କ ଦ୍ଵାରା ଯୋଗାଇ ଦିଆଯାଉଥିବା ମଧ୍ୟାହ୍ନ ଭୋଜନ (MDM) ର ଗୁଣବତ୍ତା ଏବଂ ସ୍ୱଚ୍ଛତାର ମଧ୍ୟ ବିଧିବଦ୍ଧ ତଦନ୍ତ କରିଛନ୍ତି। ବିଦ୍ୟାଳୟଗୁଡ଼ିକରେ ଶିକ୍ଷାଦାନ ପ୍ରକ୍ରିୟାକୁ ଅଧିକ ସରସ ସୁନ୍ଦର କରିବା ଏବଂ ପିଲାମାନଙ୍କୁ ସ୍ୱାସ୍ଥ୍ୟକର ମଧ୍ୟାହ୍ନ ଭୋଜନ ଯୋଗାଇଦେବା ଦିଗରେ ସେ ସମ୍ପୃକ୍ତ ବିଦ୍ୟାଳୟର ପ୍ରଧାନଶିକ୍ଷକ ଓ ଶିକ୍ଷକ ଶିକ୍ଷୟିତ୍ରୀମାନଙ୍କୁ ଆବଶ୍ୟକୀୟ ନିର୍ଦ୍ଦେଶ ଦେଇଛନ୍ତି। ଗୋଷ୍ଠୀ ଶିକ୍ଷା ଅଧିକାରୀ ଭାବେ ରୁଷିଆ ମେହେର ଦାୟିତ୍ୱ ଗ୍ରହଣ କରିବା ପରଠାରୁ ଲାଞ୍ଜିଗଡ଼ ବ୍ଲକର ଶିକ୍ଷା ବ୍ୟବସ୍ଥାରେ ଉଲ୍ଲେଖନୀୟ ସୁଧାର ଆସିଥିବା ଦେଖିବାକୁ ମିଳିଛି। ତାଙ୍କର ନିୟମିତ ବିଦ୍ୟାଳୟ ପରିଦର୍ଶନ ଏବଂ କଡ଼ା ଆଭିମୁଖ୍ୟ ଯୋଗୁଁ ଶିକ୍ଷକ ଶିକ୍ଷୟିତ୍ରୀ ଓ କର୍ମଚାରୀମାନଙ୍କ ମଧ୍ୟରେ ସମୟାନୁବର୍ତ୍ତିତା ଏବଂ ଦାୟିତ୍ୱବୋଧ ବୃଦ୍ଧି ପାଇଛି। ଶିକ୍ଷା ଅଧିକାରୀଙ୍କ ଏଭଳି ସକ୍ରିୟ ପଦକ୍ଷେପ ଯୋଗୁଁ ଆଗାମୀ ଦିନରେ ସ୍ଥାନୀୟ ଅଞ୍ଚଳରେ ଶିକ୍ଷା ବ୍ୟବସ୍ଥା ଆହୁରି ସଦୃଢ଼ ହେବ ବୋଲି ବୁଦ୍ଧିଜୀବୀ ଓ ଅଭିଭାବକ ମହଲରେ ଚର୍ଚ୍ଚା ହେଉଛି।

କୋଟପାଡ଼ ସୀମାନ୍ତ ଚିର୍ମା ଗ୍ରାମର ଇନ୍ଦ୍ରାବତୀ ନଦୀରୁ ଜଣେ ନିଖୋଜ ବ୍ୟକ୍ତିଙ୍କ ଗଳିତ ଶବ ଉଦ୍ଧାର କରାଯାଇଛି। ମୃତକ ବ୍ୟକ୍ତି ଜଣକ ହେଉଛନ୍ତି ସେହି ଗ୍ରାମର ଲକିନାଥ ଗୌଡ଼।

କୋଷାଗୁମୁଡ଼ା ସଦର ଜଗନ୍ନାଥ ମନ୍ଦିର ପ୍ରାଙ୍ଗଣରେ କୋଷାଗୁମୁଡ଼ା ବ୍ଲକ କଂଗ୍ରେସ ଏବଂ ବିଜେଡ଼ି ପକ୍ଷରୁ ଏକ ମିଳିତ ସାମ୍ବାଦିକ ସମ୍ମିଳନୀ ଅନୁଷ୍ଠିତ ହୋଇଯାଇଛି। ନବରଙ୍ଗପୁର ବିଧାୟକ ଗୌରୀ ମାଝୀ ଏବଂ ତାଙ୍କ ଦଳୀୟ କର୍ମୀମାନେ କୋଷାଗୁମୁଡ଼ା ଲେମ୍ପସରେ ପଶି ସଭାପତି ମହେଶ୍ବର ଭଣ୍ଡାରୀ ଏବଂ ଏମଡିଙ୍କୁ ଦୁର୍ବ୍ୟବହାର କରିବା ସହ ହୋହଲ୍ଲା କରିଥିବା ଅଭିଯୋଗରେ ଦୁଇ ଦଳ ପକ୍ଷରୁ ଏହି ପ୍ରତିବାଦ କରାଯାଇଛି। ବିଧାୟକଙ୍କ କର୍ମୀମାନେ ଲେମ୍ପସ ସଭାପତି ମଦ୍ୟପାନ କରିଥିବା କହି ପୋଲିସ ଦ୍ୱାରା ଯାଞ୍ଚ କରିବାକୁ କହିବା ସହ ଏମଡିମାନଙ୍କୁ ଚୋର ବୋଲି ଆକ୍ଷେପ କରିଥିଲେ, ଯାହାକୁ ଦୁଇ ଦଳର କର୍ମୀମାନେ ମିଛ ଓ ଭିତ୍ତିହୀନ ବୋଲି କହି ଦୃଢ଼ ନିନ୍ଦା କରିଛନ୍ତି। ଏହି ସାମ୍ବାଦିକ ସମ୍ମିଳନୀରେ କଂଗ୍ରେସ ବ୍ଲକ ସଭାପତି ପଦ୍ମ ସାଇ ମାଳି, ମଝିଧନୁଆ ସମିତି ସଭ୍ୟ ଯୁଗଧର ହରିଜନ, ଯୁବ କଂଗ୍ରେସ କର୍ମୀ ବାବୁଲି ବାଘ, ଶୁଭାଶିଷ ପଟନାୟକ (ଟିକିନା), ରଘୁ ମାଝୀ ଏବଂ ବିଜେଡି ପକ୍ଷରୁ ପ୍ରଶାନ୍ତ ବକ୍ସି, ବ୍ଲକ ଉପାଧ୍ୟକ୍ଷ ଯୋଗେନ୍ଦ୍ର ସ୍ୱାଇଁ, ଭି-ପ୍ରସାଦ ରାଓ, ଲେମ୍ପସ ସଭାପତି ହରିହର ଭଣ୍ଡାରୀ ଓ ଡାଇରେକ୍ଟର ମଧୁସୂଦନ ଭତ୍ରା ପ୍ରମୁଖ ଉପସ୍ଥିତ ଥିଲେ। ବ୍ଲକ ଉପାଧ୍ୟକ୍ଷ ଯୋଗେନ୍ଦ୍ର ସ୍ୱାଇଁ କହିଛନ୍ତି ଯେ, ବିଧାୟକ କାହିଁକି ଚାଷୀମାନଙ୍କୁ ଦଳୀୟ ଭିତ୍ତିରେ ଭାଗ କରୁଛନ୍ତି? କାହା କପାଳରେ କେଉଁ ଦଳର ନାଁ ଲେଖାଅଛି କି ବୋଲି ସେ ପ୍ରଶ୍ନ କରିଛନ୍ତି। ସେହିପରି ଯୁବ କଂଗ୍ରେସ କର୍ମୀ ଶୁଭାଶିଷ ପଟନାୟକ ବିଧାୟକ ଗୌରୀ ମାଝୀ ସରକାରୀ ନିୟମଠାରୁ ଉର୍ଦ୍ଧ୍ୱରେ କି ବୋଲି ପ୍ରଶ୍ନ କରିବା ସହ ଲେମ୍ପସରେ କ୍ୟାସଲେସ ପେମେଣ୍ଟ ନିୟମ ଥିବାବେଳେ ବିଧାୟକ କିପରି ନଗଦ ଟଙ୍କା ଦେବାକୁ ଫୋନ୍‌ରେ କହିଲେ ବୋଲି ସମ୍ପୃକ୍ତ କର୍ତ୍ତୃପକ୍ଷଙ୍କୁ ଘେରିଛନ୍ତି। ଚାଷୀମାନଙ୍କୁ ବିଜେଡି, କଂଗ୍ରେସ ଓ ବିଜେପି ନାମରେ ନ ବାଣ୍ଟିବାକୁ ଉଭୟ ଦଳ ଚେତାବନୀ ଦେଇଛନ୍ତି। ବିଧାୟକ ଗୌରୀ ମାଝୀ ତୁରନ୍ତ ଏଥିପାଇଁ ସାମ୍ବାଦିକ ସମ୍ମିଳନୀ କରି କ୍ଷମା ପ୍ରାର୍ଥନା କରନ୍ତୁ ବୋଲି କଂଗ୍ରେସ ଓ ବିଜେଡି ପକ୍ଷରୁ ଦୃଢ଼ ଦାବି କରାଯାଇଛି।

କୋରାପୁଟରେ ଶିକ୍ଷା ବ୍ୟବସ୍ଥା ସମ୍ପୂର୍ଣ୍ଣ ଭାବେ ଭୁଶୁଡ଼ି ପଡ଼ିଥିବା ବେଳେ ଏହାକୁ ନେଇ କଂଗ୍ରେସ ପକ୍ଷରୁ ତୀବ୍ର ଅସନ୍ତୋଷ ପ୍ରକାଶ ପାଇଛି। ଜିଲ୍ଲାରେ ଶିକ୍ଷା ବ୍ୟବସ୍ଥାର ସୁଧାର ପାଇଁ ତୁରନ୍ତ ଜିଲ୍ଲା ଭିତ୍ତିକ ନିଯୁକ୍ତି ପ୍ରଦାନ କରିବାକୁ କଂଗ୍ରେସ ଦାବି କରିଛି। ଏହି ପ୍ରସଙ୍ଗରେ ଲକ୍ଷ୍ମୀପୁର ବିଧାୟକ ପବିତ୍ର ସାଉନ୍ତା ଏବଂ କଂଗ୍ରେସ ପକ୍ଷରୁ ଜିଲ୍ଲାର ଶିକ୍ଷା ବ୍ୟବସ୍ଥାରେ ସୁଧାର ଆଣିବା ପାଇଁ ସ୍ୱର ଉତ୍ତୋଳନ କରାଯାଇଛି।

କୋରାପୁଟ ଜିଲ୍ଲା ଲକ୍ଷ୍ମୀପୁରରେ ଦୁଇଟି ମଟର ସାଇକଲ ମଧ୍ୟରେ ମୁହାଁମୁହିଁ ଧକ୍କା ହୋଇଛି। ଏହି ଭୟଙ୍କର ସଡ଼କ ଦୁର୍ଘଟଣାରେ ଅକାଳରେ ଦୁଇଟି ମୂଲ୍ୟବାନ ଜୀବନ ଚାଲିଯାଇଛି।