राज्यात गुटखा विक्रीवर बंदी असतानाही, लातूर शहरातील अनेक पानटपऱ्या आणि किरकोळ विक्री केंद्रांवर 'विमल'सह विविध नावांचे गुटखा आणि तत्सम तंबाखूजन्य पदार्थ सहज उपलब्ध असल्याची माहिती नागरिकांकडून समोर आली आहे. यामुळे गुटखा बंदीच्या अंमलबजावणीवरच मोठे प्रश्नचिन्ह निर्माण झाले असून, शहरातील अनेक भागांतील पानटपऱ्या गुटख्याच्या पुड्यांनी अक्षरशः गच्च भरल्याचा दावा स्थानिक करत आहेत. बंदी असताना हा माल नेमका कुठून येतो, त्याचे वितरण कोण करते आणि संबंधित यंत्रणा याकडे दुर्लक्ष का करत आहेत, असे अनेक प्रश्न उपस्थित केले जात आहेत. अन्न व औषध प्रशासन, पोलीस आणि स्थानिक प्रशासनाने वेळोोवेळी कारवाई केल्याचे सांगितले जात असले तरी, प्रत्यक्षात गुटख्याची विक्री थांबलेली दिसत नसल्याची नागरिकांची तीव्र भावना आहे. त्यामुळे आरोग्यासाठी घातक मानल्या जाणाऱ्या या गुटख्याची विक्री रोखण्यासाठी आता संबंधित विभागाचे मंत्री मुंडे साहेब आणि प्रशासन नेमकी कोणती भूमिका घेणार, याकडे सर्वांचे लक्ष लागले आहे. नागरिकांनी मोठ्या प्रमाणावर धाडी, पुरवठा साखळीचा शोध आणि दोषींवर कठोर कारवाईची मागणी केली असून, लातूरमधील या परिस्थितीवर प्रशासन कधी आणि किती प्रभावीपणे अंकुश आणते, हे पाहणे महत्त्वाचे ठरणार आहे.

राज्यमाता पुण्यश्लोक अहिल्याबाई होळकर यांच्या ३०१ व्या जयंतीनिमित्त त्यांचे जन्मस्थान असलेल्या चौंडी (अहिल्यानगर) येथे मुख्यमंत्री देवेंद्र फडणवीस यांनी दि. ३१ मे रोजी अभिवादन केले. यावेळी मुख्यमंत्री फडणवीस यांनी अहिल्याबाई होळकर यांच्या स्मारकास भेट देऊन पुष्पहार अर्पण केला आणि त्यांच्या कार्याला विनम्र अभिवादन केले. याप्रसंगी मुख्यमंत्री फडणवीस यांनी अहिल्याबाई होळकर यांच्या लोककल्याणकारी, न्यायप्रिय आणि विकासाभिमुख कार्याचा गौरव केला. ते म्हणाले की, अहिल्याबाईंचे जीवन हे सुशासन, जनसेवा आणि स्त्रीशक्तीचे प्रेरणादायी उदाहरण आहे. त्यांनी राज्यकारभारात जनहिताला सर्वोच्च स्थान देत समाजाच्या सर्व घटकांच्या विकासासाठी उल्लेखनीय कार्य केले. देशभरातील अनेक तीर्थक्षेत्रांचा जीर्णोद्धार, मंदिरे, घाट, धर्मशाळा आणि पायाभूत सुविधांची उभारणी करून अहिल्याबाईंनी भारतीय संस्कृतीच्या जतनासाठी मोलाचे योगदान दिले, असे मुख्यमंत्र्यांनी नमूद केले. त्यांचे कार्य आजही समाजाला दिशा देणारे आणि प्रेरणा देणारे आहे, असेही ते म्हणाले. मुख्यमंत्री देवेंद्र फडणवीस यांनी, "लोककल्याण, न्याय आणि सेवाभावाचा आदर्श निर्माण करणाऱ्या राज्यमाता पुण्यश्लोक अहिल्याबाई होळकर यांना ३०१ व्या जयंतीनिमित्त विनम्र अभिवादन," अशा शब्दांत आपल्या भावना व्यक्त केल्या. या जयंतीनिमित्त आयोजित कार्यक्रमात विविध मान्यवर, लोकप्रतिनिधी, अधिकारी, समाजबांधव आणि नागरिक मोठ्या संख्येने उपस्थित होते. चौंडी नगरीत जयंतीनिमित्त विविध सांस्कृतिक, सामाजिक आणि प्रबोधनपर कार्यक्रमांचे आयोजन करण्यात आले होते. यावेळी उपस्थितांनी राज्यमाता अहिल्याबाई होळकर यांच्या विचारांचा वारसा पुढील पिढ्यांपर्यंत पोहोचविण्याचा संकल्प केला आणि त्यांच्या कार्यातून प्रेरणा घेत समाजहित व राष्ट्रहितासाठी कार्य करण्याचे आवाहनही करण्यात आले.

उदगीर शहरात पुण्यश्लोक अहिल्यादेवी होळकर यांच्या जयंतीनिमित्त काढण्यात आलेल्या मिरवणुकीदरम्यान ध्वनीमर्यादेचे उल्लंघन केल्याप्रकरणी उदगीर शहर पोलिसांनी तिघांविरुद्ध गुन्हा दाखल केला आहे. मिळालेल्या माहितीनुसार, ३१ मे रोजी छत्रपती शिवाजी महाराज चौकात जयंती मिरवणुकीत डीजेचा आवाज शासनाने निर्धारित केलेल्या मर्यादेपेक्षा जास्त असल्याचे पोलिसांच्या निदर्शनास आले होते. त्यावेळी पोलिसांनी संबंधित व्यक्तींना आवाज कमी करण्याच्या सूचना दिल्या होत्या, मात्र नियमांचे पालन झाले नाही. सार्वजनिक कार्यक्रमांमध्ये ध्वनीप्रदूषण रोखण्यासाठी जिल्हाधिकारी यांच्या आदेशाचे वारंवार उल्लंघन होत असल्याचे दिसून आल्याने, पोलीस अधिकारी रविंद्र शंकर काळे यांच्या फिर्यादीवरून उदगीर शहर पोलीस ठाण्यात शेषराव नाईक, गणेश नागनाथ म्हैत्रे आणि सुनील पांडुरंग कसबे यांच्यावर गुन्हा नोंदवण्यात आला आहे. या प्रकरणाचा अधिक तपास पोलीस उपनिरीक्षक पाटील हे करत आहेत. प्रशासनाने नागरिकांना सार्वजनिक कार्यक्रम, मिरवणुका आणि उत्सवांमध्ये ध्वनीप्रदूषणासंदर्भातील नियमांचे पालन करण्याचे आवाहन केले आहे.

अनुसूचित जाती आरक्षणाचे तात्काळ उपवर्गीकरण करण्यात यावे, या प्रमुख मागणीसाठी लोकस्वराज्य आंदोलन संघटनेने वज्रमुठ महाआंदोलनाची हाक दिली आहे. हे आंदोलन २७ एप्रिल २०२६ पासून मुंबईतील आझाद मैदानावर धरणे आंदोलनाच्या स्वरूपात सुरू आहे. याच आंदोलनाच्या अनुषंगाने आज नांदेड येथे लोकस्वराज्य आंदोलन नांदेडच्या वतीने एक बैठक आयोजित करण्यात आली होती, जी नुकतीच संपन्न झाली. या बैठकीला लोकस्वराज्य आंदोलन संघटनेचे संस्थापक अध्यक्ष प्रा. डॉ. रामचंद्र भरांडे सर यांच्यासह अनेक कार्यकर्ते उपस्थित होते.

परभणी जिल्ह्यातील खळी येथे अहिल्यादेवी होळकर यांची ३०१ वी जयंती साजरी करण्यात आली.

बीड तालुक्यातील बालाघाट परिसरातील बेळगाववस्ती येथील एका शेतकरी कुटुंबावर दुःखाचा डोंगर कोसळला आहे, जिथे सर्पदंशामुळे त्यांच्या दहा वर्षीय मुलाचा मृत्यू झाला. या दुर्दैवी घटनेनंतर बीड जिल्हा रुग्णालयातील संबंधित वैद्यकीय अधिकाऱ्यांनी प्रकरणाची कोणतीही नोंद न घेतल्याने हे कुटुंब शासनाच्या 'राजीव गांधी विद्यार्थी अपघात सानुग्रह' अनुदान योजनेपासून वंचित राहिल्याचा गंभीर आरोप सामाजिक कार्यकर्ते डॉ. गणेश ढवळे यांनी केला आहे. बेळगाववस्ती येथील शेतकरी रोहिदास कोळपे आपल्या कुटुंबासह घरासमोरील अंगणात झोपले असताना पहाटे सुमारे चार वाजण्याच्या सुमारास, इयत्ता चौथी उत्तीर्ण झालेल्या त्यांचा मुलगा सोहम रोहिदास कोळपे झोपेतच किंचाळला. त्याने उजव्या पायावर साप चावल्याचे सांगितल्यावर, पिंडरीवर दातांच्या खुणा व रक्त दिसले. घाबरलेल्या कुटुंबीयांनी तातडीने सोहमला बीडकडे उपचारासाठी नेले. प्रथम एका खासगी रुग्णालयात उपचार न मिळाल्याने त्याला जिल्हा रुग्णालयात दाखल करण्यात आले, जिथे सकाळी साडेपाच वाजण्याच्या सुमारास ओपीडीतील डॉक्टरांनी त्याला मृत घोषित केले. कुटुंबीयांच्या म्हणण्यानुसार, कोणतीही वैद्यकीय नोंद, पोलिस माहिती अथवा आवश्यक प्रक्रिया न करता त्यांना मृतदेह घेऊन जाण्यास सांगितले गेले. निरक्षर व आर्थिकदृष्ट्या दुर्बल असलेल्या या शेतकरी कुटुंबाने मुलाचा मृतदेह गावी नेऊन अंत्यसंस्कार केले. ही गंभीर बाब डॉ. गणेश ढवळे यांनी कुटुंबीयांची सांत्वनपर भेट घेतली असता उघडकीस आली. डॉ. ढवळे यांनी स्पष्ट केले की, 'राजीव गांधी विद्यार्थी अपघात सानुग्रह' योजनेअंतर्गत इयत्ता पहिली ते बारावीपर्यंत शिक्षण घेणाऱ्या विद्यार्थ्यांचा सर्पदंशाने मृत्यू झाल्यास दीड लाख रुपयांचे सानुग्रह अनुदान दिले जाते. मात्र, यासाठी एफआयआर, पंचनामा, शवविच्छेदन अहवाल, मृत्यू दाखला आणि शाळेचे प्रमाणपत्र आवश्यक असते. जिल्हा रुग्णालयातील अधिकाऱ्यांनी प्रकरणाची नोंदच घेतली नसल्यामुळे, या गरीब कुटुंबाला शासनाच्या या महत्त्वाच्या मदतीपासून वंचित राहावे लागत आहे. या संपूर्ण प्रकरणाची सखोल चौकशी करून संबंधित जबाबदार अधिकारी व कर्मचाऱ्यांची जबाबदारी निश्चित करावी, तसेच सोहम कोळपे यांच्या कुटुंबाला न्याय मिळवून देण्यासाठी आवश्यक ती कार्यवाही करून सानुग्रह अनुदान मिळवून द्यावे, अशी मागणी डॉ. गणेश ढवळे यांनी जिल्हा शल्यचिकित्सक डॉ. सतीशकुमार सोळंकी यांच्याकडे केली आहे. जिल्हा रुग्णालयातील वैद्यकीय अधिकाऱ्यांच्या निष्काळजीपणामुळे एका गरीब शेतकरी कुटुंबाचे मुलाच्या मृत्यूसह शासनाच्या आर्थिक मदतीपासून वंचित राहण्याचे दुहेरी नुकसान झाले असून, दोषींवर कारवाई करण्याची मागणी डॉ. ढवळे यांनी लावून धरली आहे.

संबोधी अकादमीने आयोजित केलेल्या रौप्य महोत्सवी सर्वधर्मीय सामूहिक विवाह सोहळ्यात एकूण 110 जोडपी विवाहबद्ध झाली.

शहादा तालुक्यातील बोराळे गावात शनिवारी पहाटे अज्ञात चोरट्यांनी धाडसी घरफोड्या करून पोलिसांना खुले आव्हान दिले आहे. या घटनेत गावातील दोन घरांचे कुलूप तोडून चोरट्यांनी सोने-चांदीचे दागिने आणि रोख रक्कम असा एकूण ६ लाख १५ हजार रुपयांचा ऐवज लंपास केला. या धाडसी चोरीमुळे गावात भीतीचे वातावरण निर्माण झाले असून नागरिकांमध्ये संतापाची लाट उसळली आहे. मिळालेल्या माहितीनुसार, युवराज माळी आणि किशोर पाटील यांच्या घरांच्या मागील दरवाजांचे कुलूप तोडून चोरट्यांनी आत प्रवेश केला. घरातील कपाटे फोडून मौल्यवान दागिने व रोख रक्कम चोरून नेण्यात आली. चोरीचा हा प्रकार सकाळी उघडकीस आल्यानंतर परिसरात एकच खळबळ उडाली. घटनेची माहिती मिळताच सारंगखेडा पोलिसांनी घटनास्थळी धाव घेत पंचनामा केला, तर उपविभागीय पोलीस अधिकारी दत्त पवार यांनीही भेट देऊन तपासाबाबत आवश्यक सूचना दिल्या. अज्ञात चोरट्यांच्या शोधासाठी श्वानपथकाच्या मदतीने तपास सुरू करण्यात आला आहे. विशेष म्हणजे, गेल्या महिनाभरात तोरखेडा, फेस आणि आता बोराळे येथे झालेल्या सलग घरफोड्यांमुळे नागरिकांमध्ये असुरक्षिततेची भावना वाढली आहे. परिसरात गेल्या वर्षभरात अनेक चोरीच्या घटना घडल्या असल्या तरी, बहुतांश गुन्ह्यांचा तपास अद्याप लागलेला नसल्याने पोलीस प्रशासनाच्या कार्यक्षमतेवर प्रश्नचिन्ह निर्माण झाले आहे. या पार्श्वभूमीवर ग्रामस्थ आता थेट प्रश्न विचारत आहेत की, "चोरटे मोकाट, नागरिक धास्तावले; पोलिसांचा धाक संपला का?".