यवतमाळ जिल्ह्यातील वणी येथे उद्या 'कावडे हॉस्पिटल'चे भव्य उद्घाटन होणार आहे. या रुग्णालयात रुग्णांसाठी हाडे, सांधे आणि नेत्ररोग उपचारांची अत्याधुनिक सुविधा उपलब्ध करून देण्यात आली आहे.

नागपूरच्या लकडगंज पोलीस ठाण्याच्या तपासी पथकाने घरफोडीच्या गंभीर प्रकरणाचा अवघ्या २४ तासांत पर्दाफाश करत एका सराईत आरोपीला अटक केली आहे. पोलिसांनी आरोपीकडून चोरीला गेलेला १०० टक्के मुद्देमाल जप्त करून फरियादीला परत सोपवत धडाकेबाज कामगिरी केली आहे. भंडारा रोड, पाडी येथील रहिवासी आदित्य गौरव आर्य (वय २१) यांच्या 'वन क्लिकी एंटरप्रायझेस' या दुकानाचे शटर उचकटून अज्ञात चोराने रोख रकमेसह साहित्य लांबवले होते. या तक्रारीवरून लकडगंज पोलीस ठाण्यात गुन्हा क्रमांक ४५०/२०२६ अंतर्गत भारतीय न्याय संहितेच्या (बीएनएस) कलम ३०५(अ) आणि ३३१(४) नुसार गुन्हा दाखल करण्यात आला. घटनेचे गांभीर्य ओळखून पोलिसांनी घटनास्थळाची पाहणी केली आणि गुप्त बातमीदार तसेच गुन्ह्याच्या विशिष्ट पद्धतीचा (मोडस ऑपरेंडी) अभ्यास करून तपास सुरू केला. तपासादरम्यान मिळालेल्या गोपनीय माहितीच्या आधारे पोलिसांनी जाळे विणून ओमप्रकाश पुनम लहरे (वय २६, रा. मिनीमाता नगर, पाचपावली, नागपूर) याला ताब्यात घेतले. चौकशीदरम्यान त्याने या चोरीची कबुली दिली. पोलीस तपासात आरोपी हा गुन्हेगारी अभिलेखावरील शातिर गुन्हेगार असल्याचे आणि त्याच्यावर यापूर्वीही मालमत्तेसंबंधी अनेक गुन्हे दाखल असल्याचे समोर आले आहे. रात्रीच्या वेळी बंद दुकाने व घरांचे शटर उचकटून सहज नेता येईल असा मौल्यवान माल चोरणे ही त्याची गुन्हे करण्याची पद्धत होती. नागपूर शहर पोलीस आयुक्त, सह पोलीस आयुक्त, अपर पोलीस आयुक्त (उत्तर विभाग), अपर पोलीस आयुक्त (गुन्हे) आणि पोलीस उपायुक्त (परिमंडळ ३) यांच्या मार्गदर्शनाखाली लकडगंज पोलीस ठाण्याच्या पथकाने ही कारवाई पार पाडली.

चंद्रपूर येथे बोलताना आमदार सुधीर मुनगंटीवार यांनी लोकनेते स्व. गोपीनाथराव मुंडे यांच्याबद्दल गौरवद्गार काढले असून, संघर्षाचा समानार्थी शब्द म्हणजे लोकनेते स्व. गोपीनाथराव मुंडे असे प्रतिपादन त्यांनी केले आहे. अन्यायाविरुद्ध अखंड लढा, सर्वसामान्यांच्या हक्कांसाठी अविरत संघर्ष आणि जनतेच्या विश्वासाला कधीही तडा जाऊ न देणारे नेतृत्व हीच त्यांची खरी ओळख असल्याचे आमदार मुनगंटीवार यांनी नमूद केले.

एक सच्चा गुरू नेहमी हीच इच्छा बाळगतो की त्याचा प्रत्येक शिष्य ज्ञान, संस्कार आणि यशाच्या बाबतीत त्याच्यापेक्षाही पुढे निघून जावा.

ओडिशातील पुरीच्या धर्तीवर नागपुरातील जुनी मंगळवारी येथील प्राचीन मंदिरापासून भगवान जगन्नाथ, बलभद्र आणि सुभद्रा यांची रथावरून शोभायात्रा काढण्यात येत आहे. आमदार प्रवीण दटके यांच्या हस्ते पूजा अर्चा करून या रथयात्रेचा प्रारंभ करण्यात आला. ही शोभायात्रा जुनी मंगळवारी घास बाजार येथून निघून हरिहर मंदिराकडे जात आहे. या रथयात्रेत विविध आकर्षक झाक्या सहभागी झाल्या असून टाळ-मृदुंगाच्या गजरात भजने गात ही यात्रा पुढे जात आहे. संपूर्ण परिसरात भक्तिमय वातावरण निर्माण झाले असून 'जय जगन्नाथ'च्या जयघोषात मोठ्या संख्येने नागरिक आणि भाविक या सोहळ्यात सहभागी झाले आहेत.

महाराष्ट्रात स्व. अजितदादा पवार यांच्या स्मृतिप्रीत्यर्थ २२ ते २८ तारखेपर्यंत ठिकठिकाणी विविध कार्यक्रमांचे आयोजन करण्यात आले आहे. राष्ट्रवादी काँग्रेस पार्टीच्या कार्यकर्त्यांनी या कार्यक्रमांचे आयोजन केले आहे।

नागपूर जिल्ह्यातील भिवापूर येथे विद्यार्थ्यांच्या भविष्याशी खेळणाऱ्या भ्रष्ट व्यवस्थेविरोधात आणि दिल्लीतील जंतर मंतर मैदानावर सुरू असलेल्या सोनम वांगचुक यांच्या आंदोलनाच्या समर्थनार्थ विविध राजकीय पक्षांचे पदाधिकारी, सामाजिक कार्यकर्ते आणि विद्यार्थ्यांच्या उपस्थितीत तीव्र आंदोलन करण्यात आले. विद्यार्थ्यांवर झालेल्या लाठीमाराच्या अन्यायकारक घटनेचा निषेध करण्यासाठी हे आंदोलन करण्यात आले. या आंदोलनादरम्यान तहसीलदार यांच्यामार्फत राष्ट्रपतींना निवेदन पाठवण्यात आले. परीक्षा प्रक्रियेतील गैरप्रकार, पेपरफुटी, भ्रष्टाचार आणि विद्यार्थ्यांवर होणाऱ्या अन्यायाविरोधात आंदोलनकर्त्यांनी जोरदार घोषणाबाजी केली. यावेळी सरकारच्या मनमानी कारभाराविषयी तीव्र नाराजी व्यक्त करण्यात आली. विद्यार्थ्यांच्या न्याय्य हक्कांसाठी आणि पारदर्शक परीक्षा व्यवस्थेसाठी हा लढा उभारण्यात आल्याचे सांगण्यात आले. या आंदोलनात विद्यार्थ्यांची मोठी उपस्थिती होती. तसेच बहुजन समाज पक्षाचे नेते डॉ. वसंत खवास, शिवसेना नेते मिथुन माटे, माजी जिल्हा परिषद सदस्य शंकर डडमल, माजी नगराध्यक्ष लव जनबंधू, नगरसेवक किरण नागरीकर, कैलास कोमरेल्लीवार, माजी नगरपरिषद उपाध्यक्ष वर्षा ठाकरे, माजी नगरसेवक मिनाक्षी उमरेडकर, निशा जांभुळे, मंजुषा समर्थ, बलवंत जांभुळकर, अभिजित बन्सोड, विजय लांजेवार, भोजराज जांभुळकर, प्रेमनाथ सोरदे, सुनिल लांजेवार, प्रफुल्ल बार्बोडे, कैलास रामटेके, प्रफुल्ल गजभिये, जितेंद्र सवाईकर, दिलीप श्रीरामे, गणेश फुलबांधे, विशाल खंडारे यांच्यासह मोठ्या संख्येने नागरिक उपस्थित होते.

आमदार सुधीर मुनगंटीवार यांनी कृतज्ञता व्यक्त करताना सांगितले आहे की, ज्या नेत्यांचे त्यांच्यावर मोठे ऋण आहे, त्यामध्ये पहिले नाव केंद्रीय मंत्री मा. नितीनजी गडकरी आणि दुसरे नाव लोकनेते स्व. गोपीनाथराव मुंडे यांचे आहे. लोकनेते गोपीनाथराव मुंडे यांच्या विशेष प्रयत्नांमुळेच बल्लारशा तहसीलच्या निर्मितीचा ऐतिहासिक निर्णय शक्य झाला, अशी आठवण त्यांनी यावेळी करून दिली. मुनगंटीवार यांच्या मते, हा निर्णय केवळ एक प्रशासकीय बदल नसून जनतेच्या अनेक वर्षांच्या स्वप्नाला मिळालेला खरा न्याय होता. या ज्येष्ठ नेत्यांच्या ऋणाची जाणीव आणि त्यांच्याबद्दलची कृतज्ञता आपल्या मनात आयुष्यभर कायम राहील, अशा भावना त्यांनी व्यक्त केल्या आहेत।

नागपूरच्या लकडगंज पोलीस ठाण्याच्या तपास पथकाने दुकानाचे शटर उचकटून झालेल्या घरफोडीचा गंभीर गुन्हा अवघ्या २४ तासांच्या आत उघडकीस आणला आहे. गुप्त माहिती आणि आरोपीच्या गुन्ह्यांच्या पद्धतीचा अभ्यास करून पोलिसांनी सराईत आरोपीला अटक केली असून, चोरीस गेलेला १०० टक्के मुद्देमाल जप्त करून फिर्यादीला परत मिळवून दिला आहे. दिनांक २०/०७/२०२६ रोजी भंडारा रोड, पाडी येथील रहिवासी २१ वर्षीय फिर्यादी आदित्य गौरव आर्य यांच्या 'वन क्लिकी इंटरप्रायझेस' या दुकानाचे शटर उचकटून अज्ञात चोरट्याने दुकानातील कॅश व साहित्य चोरून नेले होते. या तक्रारीवरून लकडगंज पोलिसांत भारतीय न्याय संहितेच्या कलम ३०५(अ), ३३१(४) अन्वये गुन्हा क्र. ४५०/२०२६ दाखल करण्यात आला. तपासादरम्यान गोपनीय माहितीच्या आधारे पोलिसांनी सापळा रचून मिनीमाता नगर, पाचपावली येथील २६ वर्षीय आरोपी ओमप्रकाश पुनम लहरे याला ताब्यात घेतले. कडक चौकशीत त्याने गुन्ह्याची कबुली दिली असून तो पोलिसांच्या क्राईम चार्टवरील सराईत गुन्हेगार असल्याचे निष्पन्न झाले आहे. वरिष्ठ पोलीस अधिकाऱ्यांच्या मार्गदर्शनाखाली पोलीस निरीक्षक मुकुंद कवाडे, पोलीस निरीक्षक मनोज चौधरी, पीएसआय दीपक पोफळे, देवेंद्र शेलुकर, ईश्वर मोहेकर आणि आशिष बांते यांच्या पथकाने ही धडाकेबाज कामगिरी बजावली. नागरिकांच्या मालमत्तेच्या सुरक्षेसाठी अशा गुन्हेगारांवर कठोर कारवाई यापुढेही सुरूच राहील, असे पोलिसांनी स्पष्ट केले आहे.

नागपूरच्या उमरेड तालुक्यातील किन्हाळा (सिर्सी) येथे शेतशिवारात बकऱ्या चारण्यासाठी गेले असता अचानक विजेची तार तुटून पडल्याने तीन बकऱ्या आणि एका बोकडाचा जागीच मृत्यू झाला. किन्हाळा येथील बंडूजी मोहतकर हे आपल्या बकऱ्या चरण्यासाठी घेऊन गेले असता सायंकाळी साडेचार वाजताच्या सुमारास ही घटना घडली. विजेच्या तारेत करंट असल्याने शॉक लागून प्राण्यांचा मृत्यू झाला, ज्यामुळे बंडूजी मोहतकर यांचे ५० हजार रुपयांचे आर्थिक नुकसान झाले आहे. या घटनेची माहिती बेला पोलिस स्टेशनला देण्यात आल्यानंतर ठाणेदार नासरे यांनी घटनास्थळी भेट देऊन पंचनामा केला असून पोलिस पुढील तपास करत आहेत. या घटनेला कारणीभूत असलेल्या महावितरण कंपनीने मरण पावलेल्या बकऱ्यांची नुकसान भरपाई द्यावी, अशी मागणी करण्यात आली आहे.