মেঘালয়ত ধাৰাবাহিকভাৱে হৈ থকা প্ৰচণ্ড বৰষুণৰ ফলত শ্বিলং-ডাউকি পথত এক বৃহৎ ভূমিস্খলন হৈছে। পথৰ এক গুৰুত্বপূৰ্ণ অংশ সম্পূৰ্ণৰূপে খহি গহ্বৰত উটি গৈছে। এই পৰিস্থিতিৰ প্ৰতি লক্ষ্য ৰাখি স্থানীয় বাসিন্দা আৰু কৰ্তৃপক্ষই সকলো পৰ্যটক আৰু যাত্ৰীক বৰ্তমান ডাউকিৰ দিশে যাত্ৰা নকৰিবলৈ আহ্বান জনাইছে। বৰ্তমান সক্ৰিয় মৌচুমী বতৰৰ বাবে পথটো অত্যন্ত বিপদজনক হৈ আছে। সেয়ে, সকলোকে সুৰক্ষিত থাকিবলৈ আৰু নিজৰ ভ্ৰমণৰ পৰিকল্পনা সেই অনুসৰি সলনি কৰিবলৈ অনুৰোধ জনোৱা হৈছে।

তিনিচুকীয়া-মাকুম সংযোগী বাইপাছ পথত আজি চাৰিখন গাঁওৰ ৰাইজে কৃত্ৰিম বানপানীৰ সমস্যাৰ বিৰুদ্ধে উত্তাল প্ৰতিবাদ সাব্যস্ত কৰে। বৰগুৰি বাইপাছ চাৰিআলিত পথ অৱৰোধ কৰি বৰগুৰি, বালুপাৰা, হেঙালগুৰি, আৰু জৰিগুৰি গাঁওৰ লোকসকলে দীৰ্ঘদিন ধৰি ভোগ কৰি অহা এই সমস্যাৰ সমাধানৰ দাবী জনায়। উল্লেখ্য যে, পূৰ্বতে এই স্থানত থকা দলং ভাঙি বাইপাছ পথ নিৰ্মাণ কৰাৰ সময়ত তাত কলভাৰ্ট নিৰ্মাণ কৰা নহ'ল, যাৰ ফলত ৰাইজে এই কৃত্ৰিম বানপানীৰ সমস্যাত ভুগিব লগা হৈছে। স্থানীয় লোকসকলে এই সমস্যা সমাধানৰ বাবে বাৰম্বাৰ আবেদন জনোৱাৰ পিছতো কোনো সুফল নোপোৱাত আজি পুনৰ ৰাজপথলৈ ওলাই আহিবলৈ বাধ্য হয়। ইয়াৰ পূৰ্বেও একেই সমস্যা লৈ ৰাইজে তিনিচুকীয়া-মাকুম সংযোগী বাইপাছ পথ অৱৰোধ কৰি প্ৰতিবাদ জনাইছিল। বৰ্তমানৰ প্ৰতিবাদস্থলীত জিলা প্ৰশাসনৰ লগতে বিভাগীয় বিষয়াসকল উপস্থিত হৈ পৰিস্থিতিৰ বুজ লয়।

দুলীয়াজানৰ নাওহলীয়া অঞ্চলৰ 'নাওহলীয়া ডি-এডিচন কাম ৰিহেবিলিটেচন চেণ্টাৰ'ত সংঘটিত ১৮ বছৰীয়া অমন সোণাৰৰ হত্যাকাণ্ডৰ ন্যায় বিচাৰি আজি দুলীয়াজানৰ ১৬ নম্বৰ তিনিআলিত তীব্ৰ প্ৰতিবাদ সাব্যস্ত কৰা হয়। যোৱা ১৯ জুনত সংঘটিত হোৱা এই হত্যাকাণ্ডৰ পাঁচ দিন উকলি যোৱাৰ পিছতো মূল অভিযুক্ত তথা নিচামুক্তি কেন্দ্ৰটোৰ স্বত্বাধিকাৰী সন্তোষ লিম্বুক আৰক্ষীয়ে কৰায়ত্ত কৰিব নোৱাৰাত এই প্ৰতিবাদ আৰম্ভ হৈছিল। সদৌ অসম গোৰ্খা ছাত্ৰ সন্থা আৰু গোৰ্খা নাৰী পৰিষদৰ দুলীয়াজান আঞ্চলিক সমিতিৰ উদ্যোগত এই প্ৰতিবাদ কাৰ্যসূচী ৰূপায়ণ কৰা হৈছিল। প্ৰতিবাদকাৰীসকলে পথ অৱৰোধ কৰি 'অমন সোণাৰৰ হত্যাক গ্ৰেপ্তাৰ কৰক', 'হত্যাকাৰীক ফাঁচী দিয়ক', আৰু 'আমাক ন্যায় লাগিবই' আদি শ্লোগানেৰে পৰিৱেশ উত্তাল কৰি তোলে। পিছত, জিলা দণ্ডাধীশৰ উপস্থিতিত প্ৰতিবাদস্থলীত এক আলোচনা অনুষ্ঠিত হোৱাৰ পিছতেই প্ৰতিবাদকাৰীসকলে পথ অৱৰোধ প্ৰত্যাহাৰ কৰে।

অল ইণ্ডিয়া জাৰ্নেলিষ্ট ইউনিয়নৰ বঁটা প্ৰদানৰ এক অনুষ্ঠান অনুষ্ঠিত কৰা হয়। এই অনুষ্ঠানত মটক স্বায়ত্ব শাসিত পৰিষদৰ CME ডেভিদ চেতিয়াক সন্মানিত কৰা হয়। তেওঁৰ লগতে সমাজৰ হকে কাম কৰা আন বহুতো ব্যক্তিকো বঁটা প্ৰদান কৰা হয়।

অসমীয়া যুৱ মঞ্চ আৰু অসমীয়া মহিলা মঞ্চই আমগুৰিৰ হালোৱাটিং অঞ্চলৰ বিভিন্ন স্থানত অবৈধ ড্ৰাগছৰ অবাধ প্ৰচলন, সুৰাৰ ৰমৰমীয়া বেহা আৰু অবৈধ গৰুৰ চোৰাং সৰবৰাহৰ বিৰুদ্ধে তীব্ৰ প্ৰতিবাদ সাব্যস্ত কৰিছে। সংগঠন দুটাৰ মতে, ড্ৰাগছৰ কবলত পৰি উঠি অহা যুৱ প্ৰজন্ম ধ্বংসৰ দিশে গতি কৰিছে। ইয়াৰ উপৰি, অঞ্চলটোত দিনে-নিশাই অবৈধ সুৰাৰ বেহা আৰু গৰুৰ চোৰাং সৰবৰাহ চলি আছে। হালোৱাটিং অঞ্চলত এনে ঘটনা দৈনিক বৃদ্ধি পোৱাত প্ৰতিবাদকাৰীসকলে চৰকাৰ আৰু স্থানীয় প্ৰশাসনক এই অবৈধ কাৰ্যকলাপ বন্ধ কৰিবলৈ দাবী জনাইছে। এই প্ৰতিবাদী কাৰ্যসূচীত সংগঠন দুটাৰ অৰ্ধশতাধিক নেতা-কৰ্মীয়ে হালোৱাটিং নগৰত অংশগ্ৰহণ কৰি এক উত্তাল পৰিৱেশ সৃষ্টি কৰে। প্ৰতিবাদকাৰীসকলে হাতে হাতে প্লে-কাৰ্ড লৈ ড্ৰাগছ ব্যৱসায়ী আৰু চৰকাৰক কৰ ফাঁকি দি চোৰাং বেহা চলোৱা চক্ৰৰ বিৰুদ্ধে বিভিন্ন শ্ল'গানেৰে গগণ ফালি তোলে। তেওঁলোকে হুংকাৰ দিছে যে যদি অতি সোনকালে হালোৱাটিং অঞ্চলত ড্ৰাগছ, অবৈধ সুৰা আৰু গৰুৰ চোৰাং চিণ্ডিকেট সম্পূৰ্ণৰূপে বন্ধ কৰা নহয়, তেন্তে অনাগত দিনত ইয়াতকৈও তীব্ৰ গণ-আন্দোলন গঢ়ি তোলা হ'ব।

চিত্ৰ শিল্পী মাৰ্শ্বেল বৰুৱাৰ আত্মগোপনক কেন্দ্ৰ কৰি শিৱসাগৰৰ বিধায়ক তথা ‘ৰাইজৰ দল’ৰ সভাপতি অখিল গগৈয়ে চৰকাৰক তীব্ৰ ভাষাৰে আক্ৰমণ কৰিছে। সংবাদ মাধ্যমৰ আগত এক বিস্ফোৰক মন্তব্য কৰি বিধায়ক গগৈয়ে স্পষ্ট কৰিছে যে মাৰ্শ্বেল বৰুৱা বৰ্তমান পলাই আছে। ইয়াৰোপৰি, তেওঁ চৰকাৰ আৰু প্ৰশাসনক একপ্ৰকাৰ প্ৰত্যাহ্বান জনাই হুংকাৰ দিছে যে যদিহে আৰক্ষীয়ে মাৰ্শ্বেল বৰুৱাক গ্ৰেপ্তাৰ কৰে, তেন্তে তেওঁ প্ৰতিবাদস্বৰূপে পোনপটীয়াকৈ মুখ্যমন্ত্ৰীৰ চৰকাৰী বাসগৃহত উপস্থিত হ’বগৈ। বিধায়কগৰাকীৰ এই মন্তব্যই ৰাজ্যৰ ৰাজনৈতিক মহলত তীব্ৰ চাঞ্চল্যৰ সৃষ্টি কৰিছে।

লালুক উচ্চতৰ মাধ্যমিক বিদ্যালয়ৰ অৱসৰপ্ৰাপ্ত বিষয় শিক্ষক তথা সমাজহিতৈষী শ্ৰদ্ধাৰ টুনিৰাম শৰ্মা ছাৰৰ বিয়োগত সমগ্ৰ লালুকবাসী গভীৰভাৱে মৰ্মাহত হৈছে। তেখেতৰ বিদেহ আত্মাৰ চিৰশান্তি কামনা কৰা হৈছে আৰু শোকসন্তপ্ত পৰিয়ালবৰ্গলৈ গভীৰ সমবেদনা জ্ঞাপন কৰা হৈছে।

উমৰাংছ’স্থিত খান্দং বান্ধৰ ৭খন গেট পুনৰ খুলি দিয়া হৈছে। অতিৰিক্ত পানী মোকলাই দিয়াৰ বাবেই বান্ধটোৰ গেটসমূহ খোলা হয়। বান্ধৰ গেটসমূহ খুলি দিয়াৰ ফলত কপিলী নৈৰ পানী যথেষ্ট বৃদ্ধি পাইছে। ইয়াৰ পৰিপ্ৰেক্ষিতত প্ৰশাসনে নামনিৰ ৰাইজক সতৰ্ক কৰি দিছে।

দুলীয়াজান আৰু নাহৰকটীয়া সংযোগী একমাত্ৰ প্ৰথমখন উৰণীয়া সেঁতুক লৈ দুলীয়াজানৰ স্থানীয় ৰাইজে গভীৰ ইতিবাচক মনোভাৱ প্ৰকাশ কৰিছে। অঞ্চলটোৰ ৰাইজে এই উৰণীয়া সেঁতুখনৰ বাবে ধন্যবাদ জ্ঞাপন কৰিছে।

অল ইণ্ডিয়া জাৰ্নেলিষ্ট ইউনিয়নে এক বঁটা প্ৰদান অনুষ্ঠানৰ আয়োজন কৰে, য'ত বহু সংখ্যক ব্যক্তিক সন্মানিত কৰা হয়। এই অনুষ্ঠানত নিউজ লাইভৰ সাংবাদিক প্ৰাঞ্জল গগৈকো বঁটা প্ৰদান কৰা হয়। তেওঁৰ লগতে সমাজৰ হকে কাম কৰি অহা আন বহু ব্যক্তিকো এই বিশেষ বঁটাৰে বিভূষিত কৰা হয়।