नांदेड स्थानिक प्राधिकार विधान परिषद निवडणुकीसाठी जिल्हाधिकारी राहुल कर्डिले यांनी सर्व विभागप्रमुखांना आदर्श आचारसंहितेचे काटेकोर पालन करण्याचे कडक निर्देश दिले. १८ मे पासून लागू झालेल्या आचारसंहितेनुसार, शासकीय जाहिराती, नवीन उद्घाटने आणि राजकीय बैठका घेण्यावर निर्बंध असतील. मुक्त व निर्भय वातावरणात निवडणूक पार पडावी यासाठी ही खबरदारी घेण्यात येत आहे.

Post by Nandkumar Motiram Totewad

परभणी जिल्ह्यात पेरणीच्या कामाला वेग आला असून, शेतकऱ्यांची लगबग वाढली आहे. यामुळे स्थानिक बाजारपेठांमध्ये शेतीसाठी आवश्यक असलेल्या साहित्याच्या खरेदीत लक्षणीय वाढ दिसून येत आहे.

परभणी येथे 'संडे ऑन सायकल' हा उपक्रम मोठ्या उत्साहात संपन्न झाला. या उपक्रमातून फिटनेस आणि निरोगी जीवनाचा संदेश देण्यात आला.

उदगीर शहरातील छत्रपती शिवाजी महाराज चौकात वाहतुकीच्या सततच्या कोंडीमुळे सोमवारी पुन्हा एकदा अपघाताची घटना घडली. या घटनेत चौकातून मार्गक्रमण करत असताना एका ट्रकने कारला घासल्याने कारचे नुकसान झाले. याआधी ८ जून रोजीही वाहतूक कोंडीतून मार्ग काढताना ट्रकच्या धडकेने कारच्या बाजूचा भाग नुकसानग्रस्त झाला होता. सुदैवाने या दोन्ही घटनांमध्ये कोणतीही जीवितहानी झाली नसली तरी, वाहनांचे आर्थिक नुकसान झाल्याने वाहनधारकांना मोठा फटका बसत आहे. स्थानिक नागरिकांनी दिलेल्या माहितीनुसार, छत्रपती शिवाजी महाराज चौक हा शहरातील अत्यंत वर्दळीचा भाग असून येथे दिवसभर मोठी वाहतूक कोंडी असते. रस्त्याची अपुरी रुंदी, अव्यवस्थित पार्किंग आणि जड वाहनांची सततची वर्दळ ही या कोंडीची प्रमुख कारणे आहेत, ज्यामुळे वाहनचालकांना तासनतास अडकून राहावे लागते. अशा परिस्थितीत किरकोळ धडक आणि वाहनांना घासणे अशा घटना वारंवार घडत असून, सततच्या कोंडीमुळे वाहनांचे नुकसान होत असल्याने दुरुस्तीसाठी वाहनधारकांना हजारो रुपयांचा आर्थिक भुर्दंड सहन करावा लागत आहे. नागरिकांनी भविष्यात मोठा अपघात होण्याची भीतीही व्यक्त केली आहे. स्थानिक वाहनधारकांनी प्रशासनाकडे वारंवार तक्रारी करूनही चौकातील वाहतूक व्यवस्थेत अपेक्षित सुधारणा होत नसल्याचा आरोप केला आहे. त्यामुळे नागरिकांनी छत्रपती शिवाजी महाराज चौकातील वाहतूक सुरळीत करण्यासाठी वाहतूक पोलिसांची नियमित नियुक्ती, अवैध पार्किंगवर कारवाई आणि जड वाहनांच्या प्रवेशावर नियंत्रण ठेवण्याची मागणी केली आहे. या उपाययोजना न झाल्यास भविष्यात आणखी गंभीर अपघात घडण्याची शक्यता नाकारता येत नसल्याचे नागरिकांचे म्हणणे आहे.

महाराष्ट्र शासनाने जनतेच्या आरोग्याच्या दृष्टीने गुटखा, पानमसाला आणि सुगंधित तंबाखूजन्य पदार्थांच्या उत्पादन, साठवणूक, विक्री व वाहतुकीवर बंदी घातलेली असतानाही काही व्यक्तींकडून या आदेशांचे उल्लंघन करत चोरट्या मार्गाने अवैध वाहतूक व विक्री सुरू असल्याचे निदर्शनास येत आहे. यावर कठोर भूमिका घेत, पोलीस अधीक्षक अमोल तांबे यांच्या निर्देशांवर आणि अपर पोलीस अधीक्षक मंगेश चव्हाण व उपविभागीय पोलीस अधिकारी गजानन भातलवंडे यांच्या मार्गदर्शनाखाली उदगीर ग्रामीण पोलिसांनी मोठी कारवाई केली आहे. या कारवाईत तब्बल ११ लाख ६८ हजार रुपयांचा प्रतिबंधित गुटखा, तंबाखूजन्य पदार्थ आणि वाहतुकीसाठी वापरलेले वाहन जप्त करण्यात आले असून, दोन आरोपींविरुद्ध गुन्हा दाखल करण्यात आला आहे. दिनांक ६ जून २०२६ रोजी रात्री ९:३० वाजण्याच्या सुमारास, उदगीरहून लातूरकडे जाणाऱ्या मार्गावर बावलगाव पाटीजवळ पोलीस पथक गस्त व तपासणी करत असताना एका संशयित वाहनाची तपासणी करण्यात आली. या तपासणीत वाहनामध्ये मोठ्या प्रमाणात प्रतिबंधित गुटखा आणि सुगंधित तंबाखूजन्य पदार्थांची वाहतूक केली जात असल्याचे निष्पन्न झाले. पोलिसांनी वाहनातून 'विमल पान मसाला' ब्रँडचे एकूण ३,१२० पुडे जप्त केले, ज्यांची किंमत सुमारे ३ लाख २७ हजार ६०० रुपये आहे. तसेच, 'व्ही-१ सुगंधित तंबाखू' या प्रकारचे ३,१२० पुडे आढळून आले, ज्यांची किंमत १ लाख ४० हजार ४०० रुपये इतकी आहे. याशिवाय, वाहतुकीसाठी वापरण्यात आलेली महिंद्रा कंपनीची कार (एमएच-१२-पीक्यू-१२०९) देखील जप्त करण्यात आली, जिची अंदाजे किंमत ७ लाख रुपये आहे. अशा प्रकारे एकूण ११ लाख ६८ हजार रुपयांचा मुद्देमाल पोलिसांनी ताब्यात घेतला आहे. या प्रकरणी, सलीम बाबुमिया शेख (वय ४३ वर्षे, रा. स्वराज नगर, पाखरसांगवी, ता. लातूर) आणि अल्ताफ शफीक सय्यद (वय २९ वर्षे, रा. साळेगाव, ता. केज, जि. बीड) यांच्याविरुद्ध उदगीर ग्रामीण पोलीस स्टेशनमध्ये गु.र.नं. ३५९/२०२६ अन्वये भारतीय न्याय संहिता कलम १२३, २२३, २७४, २७५, ३(५) तसेच अन्न सुरक्षा व मानके अधिनियम २००६ चे कलम ५९(१)(२) प्रमाणे गुन्हा दाखल करण्यात आला आहे. प्राथमिक तपासात आरोपी हे प्रतिबंधित पदार्थ विक्रीच्या उद्देशाने बेकायदेशीररीत्या वाहतूक करत असल्याचे निष्पन्न झाले आहे. या गुन्ह्याचा पुढील तपास पोलीस उपनिरीक्षक कुलकर्णी हे करत आहेत. सदरची कारवाई पोलीस ठाणे उदगीर ग्रामीणचे पोलीस निरीक्षक दिलीप गाडे यांच्या नेतृत्वाखालील पथकातील पोलीस अंमलदार नामदेव चेवले, सचिन नाडागुडे, राजकुमार डबेटवार, संदिप केंद्रे, अभिजीत लोखंडे यांनी केली आहे.

परभणी जिल्ह्यात झालेल्या वादळी पावसामुळे मोठा फटका बसला आहे. या नुकसानीची पाहणी करण्यासाठी आमदार राजेश विटेकर यांनी स्वतः बांधावर जाऊन परिस्थितीचा आढावा घेतला. आमदार विटेकर यांच्या पाहणीनंतर कृषी मंत्र्यांनी तात्काळ दखल घेत, अधिकाऱ्यांना वादळी पावसाने झालेल्या नुकसानीचे पंचनामे लवकरात लवकर करण्याचे आदेश दिले आहेत.

जिंतूर-परभणी मार्गावर एक भीषण अपघात घडला असून, यामध्ये एसटी महामंडळाच्या बसने एका मोटरसायकलला चिरडले. या दुर्घटनेत मोटरसायकलवरील तिघांचा घटनास्थळीच मृत्यू झाला आहे.