கன்னியாகுமரி மாவட்டத்தில் தற்போது தென்மேற்கு பருவக்காற்று தீவிரமாக வீசி வருகிறது. நேற்று நாகர்கோவில் மற்றும் அதன் சுற்று வட்டாரப் பகுதிகளில் காற்றின் வேகம் மிக அதிகமாக இருந்ததால், மரங்கள் வேகமாக அசைந்தன. காற்றின் வேகம் தொடர்ந்து அதிகமாக இருக்கும் என்பதால், பொதுமக்கள் யாரும் மரங்களின் கீழ் நிற்கவோ அல்லது அதன் கீழ் அமரவோ வேண்டாம் என்று எச்சரிக்கை விடுக்கப்பட்டுள்ளது.

கன்னியாகுமரி மாவட்டத்தில் தற்போது தென்மேற்கு பருவக்காற்று தீவிரமாக வீசி வருகிறது. நேற்று நாகர்கோவில் மற்றும் அதன் சுற்று வட்டாரப் பகுதிகளில் காற்றின் வேகம் மிக அதிகமாக இருந்ததால், மரங்கள் வேகமாக அசைந்தன. காற்றின் வேகம் தொடர்ந்து அதிகமாக இருக்கும் என்பதால், பொதுமக்கள் யாரும் மரங்களின் கீழ் நிற்கவோ அல்லது அதன் கீழ் அமரவோ வேண்டாம் என்று எச்சரிக்கை விடுக்கப்பட்டுள்ளது.

தூத்துக்குடி மாவட்டம் திருச்செந்தூர் அருகே குரும்பூரில் பள்ளி மாணவியிடம் தவறான சைகை செய்து, அதனைத் தட்டிக்கேட்ட அவரது தாயாருக்கு கொலை மிரட்டல் விடுத்த வாலிபரை போலீசார் கைது செய்துள்ளனர். செங்கல்பட்டைச் சேர்ந்த குப்பன் மகன் கதிரவன் (33) என்பவர், குரும்பூரில் உள்ள பேக்கரி ஒன்றில் தொழிலாளியாக வேலை பார்த்து வந்தார். நேற்று குரும்பூர் பஜார் வீதியில் சென்று கொண்டிருந்த பத்தாம் வகுப்பு பள்ளி மாணவி ஒருவரிடம் கதிரவன் அநாகரிகமான முறையில் தவறான சைகை காட்டியுள்ளார். இதனை அறிந்த மாணவியின் தாயார் சம்பவ இடத்திற்கு நேரில் சென்று கதிரவனின் செயலைக் கண்டித்துள்ளார். இதனால் ஆத்திரமடைந்த கதிரவன், பொது இடத்தில் வைத்து அந்த மாணவியையும் அவரது தாயாரையும் அவதூறாகப் பேசி கொலை மிரட்டல் விடுத்துள்ளார். இதுகுறித்து குரும்பூர் காவல் நிலையத்தில் அளிக்கப்பட்ட புகாரின் பேரில் போலீசார் வழக்குப்பதிவு செய்து தீவிர விசாரணை நடத்தினர். கதிரவன் செய்த குற்றச்செயல் உறுதி செய்யப்பட்டதைத் தொடர்ந்து, அவரைப் போக்சோ சட்டத்தின் கீழ் போலீசார் கைது செய்தனர். பின்னர் ஸ்ரீவைகுண்டம் நீதிமன்றத்தில் ஆஜர்படுத்தப்பட்ட கதிரவன், நீதிமன்ற உத்தரவின்படி பாளையங்கோட்டை மத்திய சிறையில் அடைக்கப்பட்டார்.

தூத்துக்குடி மாவட்ட கலெக்டர் அலுவலகக் கூட்டரங்கில், நாடாளுமன்ற உறுப்பினர் கனிமொழி தலைமையில் மற்றும் மாவட்ட கலெக்டர் விஷுமகாஜன் முன்னிலையில் மாவட்ட வளர்ச்சி ஒருங்கிணைப்பு மற்றும் கண்காணிப்புக் குழுக் கூட்டம் நடைபெற்றது. இக்கூட்டத்தில், மாவட்டத்தில் பல்வேறு அரசுத் துறைகளின் கீழ் செயல்படுத்தப்பட்டு வரும் முக்கிய திட்டப்பணிகளின் தற்போதைய நிலவரம் மற்றும் அவற்றின் முன்னேற்றம் குறித்து விரிவான ஆய்வு மேற்கொள்ளப்பட்டது. கூட்டத்தில், மகாத்மாகாந்தி தேசிய ஊரக வேலை உறுதிதிட்டம், ஜல்ஜீவன் மிஷன், பிரதம மந்திரி கிராமச்சாலைகள் திட்டம், பிரதம மந்திரி குடியிருப்பு திட்டம், தூய்மை பாரத இயக்கம், சுயஉதவிக் குழுக்களுக்கான நிதி உதவிகள், சீர்மிகு நகரத்திட்டம் (ஸ்மார்ட் சிட்டி), அம்ரூத் திட்டம், பாதாள சாக்கடைத் திட்டப்பணிகள், மின்விநியோகத் திட்டங்கள், மகளிர் மற்றும் குழந்தைகளுக்கான ஊட்டச்சத்து திட்டங்கள், டாக்டர் முத்துலட்சுமி ரெட்டி மகப்பேறு நிதியுதவித் திட்டம் மற்றும் மாற்றுத்திறனாளிகள் நலத்திட்டங்கள் உள்ளிட்ட பல்வேறு துறை சார்ந்த திட்டப்பணிகள் குறித்து விரிவாக விவாதிக்கப்பட்டது. மேலும், வேளாண் மற்றும் தோட்டக்கலைத் துறைகளின் சார்பில் செயல்படுத்தப்படும் நுண்ணீர் பாசனம் மற்றும் பயிர்க்காப்பீட்டுத் திட்டங்களின் செயல்பாடுகளும் இக்கூட்டத்தில் ஆய்வு செய்யப்பட்டன. மாவட்டத்தில் தற்போது நிலுவையில் உள்ள பல்வேறு திட்டப்பணிகளை அரசு அதிகாரிகள் அனைவரும் ஒருங்கிணைந்து விரைந்து முடித்து, பொதுமக்களின் பயன்பாட்டிற்கு கொண்டு வர வேண்டும் என்று கனிமொழி எம்.பி அதிகாரிகளுக்கு அறிவுறுத்தினார். இந்த ஆய்வுக் கூட்டத்தில் சட்டமன்ற உறுப்பினர்கள் அனிதா ராதாகிருஷ்ணன், மார்க்கண்டேயன், கருணாநிதி, மாநகராட்சி மேயர் ஜெகன் பெரியசாமி, மாவட்ட வருவாய் அலுவலர் குருச்சந்திரன், மாநகராட்சி ஆணையர் பிரியங்கா, மாவட்ட ஊரக வளர்ச்சி முகமை திட்ட இயக்குநர் சரவணன் மற்றும் அரசுத் துறை சார்ந்த உயர் அதிகாரிகள் பலர் கலந்து கொண்டனர்.

தென்காசி மாவட்டம் குற்றாலத்தில் இன்றைய இரவு நிலவரப்படி தண்ணீர் சீராக விழுந்து வருகிறது. இன்று விடுமுறை தினம் என்பதால், அங்கு சுற்றுலா பயணிகள் கூட்டம் கூட்டமாக காணப்படுகின்றனர்.

தூத்துக்குடி மாவட்டம் கயத்தாறு அருகேயுள்ள கட்டாலங்குளத்தில், வீரன் அழகுமுத்துக்கோனின் 316-வது பிறந்த தின விழா நடைபெற்றது. இந்த நிகழ்வில், அவரது நேரடி வாரிசுதாரர்களான மீனாட்சி தேவி, ராஜேஸ்வரி, ராம்பிசாத், ராம் விஷ்ணுபெருமாள், வாணி, அழகு சுப்பையா, புவனேஸ்வரி மற்றும் வெங்கடேஷ்வயன் ஆகியோர் கலந்துகொண்டு வீரன் அழகுமுத்துக்கோனின் திருவுருவச் சிலைக்கு மாலை அணிவித்து மரியாதை செலுத்தினர். இந்த பிறந்த நாள் விழாவையொட்டி கட்டாலங்குளத்தில் நடைபெற்ற நிகழ்ச்சியில், சுற்றுவட்டார கிராமங்களைச் சேர்ந்த ஆயிரக்கணக்கான பொதுமக்கள் திரளாகக் கலந்து கொண்டு மரியாதை செலுத்தினர்.

தமிழகத்தில் உள்ள அரசு மருத்துவமனைகளில் பிறக்கும் பச்சிளம் குழந்தைகளுக்குத் தங்க மோதிரம் வழங்கும் புதிய நலத்திட்டத்தை முதல்வர் விஜய் அறிவித்துள்ளார். கரூரில் நடைபெற்ற பிரம்மாண்ட பொதுக்கூட்டத்தில் கலந்துகொண்டு பேசிய அவர், இத்திட்டம் வரும் செப்டம்பர் மாதம் 15-ஆம் தேதி முதல் மாநிலம் முழுவதும் அதிகாரப்பூர்வமாகச் செயல்படுத்தப்படும் என்று தெரிவித்தார். இந்த அறிவிப்பை வெளியிடும்போது, தான் வெறும் சினிமாக்களில் நடிக்கும் 'ரீல் தாய்மாமன்' மட்டுமல்ல, நிஜ வாழ்க்கையிலும் மக்களுக்காகக் கடமையாற்றும் 'ரியல் தாய்மாமன்' என்பதை நிரூபிப்பேன் என்று அவர் நெகிழ்ச்சியுடன் குறிப்பிட்டார். மேலும், முந்தைய ஆட்சிக் காலத்தைப் போலப் பெண்களின் பாதுகாப்பு மற்றும் நலன் சார்ந்த விஷயங்களில் நாடகம் ஆடாமல், தற்போதைய அரசு பெண்களின் உரிமைகளுக்கும் பாதுகாப்புக்கும் வலுவான அரணாகத் திகழும் என்றும் பொதுமேடையில் உறுதியளித்தார். முதல்வரின் இந்த அதிரடி அறிவிப்பு தமிழக மக்களிடையே பெரும் வரவேற்பைப் பெற்றுள்ளது.

திருச்செந்தூர் அருகே ஆத்தூர் தாமிரபரணி ஆற்றுப்படுகையில் தொல்லியல் அகழ்வாராய்ச்சி பணிகளை மேற்கொள்ளக் கோரி எழுத்தாளர் தொடர்ந்த வழக்கில், மத்திய தொல்லியல் துறையினர் உள்ளிட்டோர் பதிலளிக்க மதுரை உயர்நீதிமன்றம் உத்தரவிட்டுள்ளது. ஸ்ரீவைகுண்டம் அருகே உள்ள செய்துங்கநல்லூரைச் சேர்ந்த எழுத்தாளர் முத்தாலங்குறிச்சி காமராசு, கடந்த 12.10.2020 அன்று மதுரை உயர் நீதிமன்றத்தில் இந்த மனுவைத் தாக்கல் செய்திருந்தார். மனுதாரர் தனது மனுவில், தூத்துக்குடி மாவட்டம் திருச்செந்தூர் வட்டம் ஆத்தூர் ஆற்றுப்படுகையில் உள்ள தொல்லியல் எச்சங்களைப் பார்வையிடவும், வறண்ட ஆற்றுப்படுகையில் காணப்படும் கல் கட்டமைப்புகளில் நவீன அறிவியல் முறைகளைப் பயன்படுத்தி தொல்லியல் அகழ்வாராய்ச்சி பணிகளை மேற்கொள்ளவும் நிபுணத்துவம் வாய்ந்த தொல்லியல் ஆய்வாளர்கள் அடங்கிய குழுவை நியமிக்க வேண்டும் என்று கோரியிருந்தார். இந்த வழக்கை மனுதாரர் சார்பில் வழக்கறிஞர் டாக்டர் அழகுமணி தாக்கல் செய்திருந்தார். இந்த மனுவை விசாரித்த மதுரை உயர் நீதிமன்ற நீதிபதிகள் ஜெயச்சந்திரன், ராமகிருஷ்ணன் ஆகியோர் அடங்கிய அமர்வு, தமிழ்நாடு அரசு தொல்லியல் துறை முதன்மைச் செயலாளர், தொல்லியல் துறை ஆணையர், திருச்சி இந்திய தொல்லியல் துறை கண்காணிப்பாளர் மற்றும் தூத்துக்குடி மாவட்ட ஆட்சியர் ஆகியோர் அடுத்த விசாரணை தேதிக்குள் இந்த மனுவின் மீது எடுக்கப்பட்ட நடவடிக்கைகள் குறித்த அறிக்கையை நீதிமன்றத்தில் தாக்கல் செய்ய வேண்டும் என்று உத்தரவிட்டுள்ளது.

தூத்துக்குடி மாவட்டத்தில் பள்ளி மாணவர்கள் பேருந்துகளில் பயணிக்கும்போது விபத்துகளைத் தடுப்பதற்காகப் பின்பற்ற வேண்டிய முக்கியமான பாதுகாப்பு நடைமுறைகள் குறித்து விழிப்புணர்வு ஏற்படுத்த வலியுறுத்தப்பட்டுள்ளது. பள்ளி அமர்வுகளின் போது மாணவர்களுக்கு இது குறித்துக் கல்வி கற்பிக்குமாறும், அனைத்துப் பள்ளி நிர்வாகங்களுக்கும் இந்தச் செய்தியை அனுப்பி வைக்குமாறும் கேட்டுக் கொள்ளப்பட்டுள்ளது. மேலும், வீடுகளிலும் இந்த பாதுகாப்பு நடைமுறையைக் கடைப்பிடிப்பதை பெற்றோர்கள் வலியுறுத்தி ஊக்குவிக்க வேண்டும் என்றும் கூறப்பட்டுள்ளது. மாணவர்கள் பேருந்தில் இருந்து இறங்கும்போது எப்பொழுதும் மிகவும் கவனமாக இறங்க வேண்டும். பேருந்திலிருந்து இறங்கியவுடன் உடனடியாகச் செல்லாமல், சிறிது நேரம் அங்கேயே நின்று விட்டு, அதன் பிறகே பேருந்தின் பின்புறமாகச் செல்ல வேண்டும். விபத்துகளைத் தவிப்பதற்காக எப்போதும் பின்பற்ற வேண்டிய இந்த முக்கியமான பேருந்து பாதுகாப்பு நடைமுறை குறித்து அனைவரும் பகிர்ந்து, விழிப்புணர்வை ஏற்படுத்த வேண்டும் என்று கேட்டுக்கொள்ளப்பட்டுள்ளது.