కరీంనగర్ జిల్లా కలెక్టర్ చిత్రా మిశ్రా సంబంధిత శాఖల అధికారులకు కీలక ఆదేశాలు జారీ చేశారు. ప్రజావాణి దరఖాస్తులకు అధిక ప్రాధాన్యత ఇవ్వాలని, వాటిని క్షేత్రస్థాయిలో పరిశీలించి సత్వరం పరిష్కరించేందుకు కృషి చేయాలని ఆమె స్పష్టం చేశారు. సోమవారం కలెక్టరేట్ ఆడిటోరియంలో అదనపు కలెక్టర్ (రెవెన్యూ) శ్రీనివాస్ రెడ్డితో కలిసి ప్రజల నుంచి నేరుగా అర్జీలు స్వీకరించిన కలెక్టర్, ఈ సందర్భంగా వచ్చిన మొత్తం 188 దరఖాస్తులలో కొన్నింటిని అక్కడికక్కడే పరిష్కరించారు. ప్రజావాణి కార్యక్రమాన్ని ముఖ్యమంత్రి కార్యాలయ (సీఎంఓ) అధికారులు పర్యవేక్షిస్తున్నారని కలెక్టర్ చిత్రా మిశ్రా పేర్కొన్నారు. సిబ్బంది విధిగా నిబంధనలను పాటిస్తూ, ప్రతి అర్జీని క్షేత్రస్థాయిలో పరిశీలించి పరిష్కారానికి కృషి చేయాలని ఆమె నొక్కి చెప్పారు. లోకాయుక్త, ఎన్.హెచ్.ఆర్.సి.తో పాటు వివిధ కోర్టు కేసులకు సంబంధించిన శాఖల వారీగా పెండింగ్ లో ఉన్న కేసులను పరిష్కరించడానికి తక్షణ చర్యలు చేపట్టాలని అధికారులను ఆదేశించారు.

కరీంనగర్ కమిషనరేట్ పరిధిలో మోస్ట్ వాంటెడ్ క్రిమినల్‌గా ఉన్న మహ్మద్ అబ్దుల్ వాజిద్ అలియాస్ ఖాలీద్ అలియాస్ ధూమ్ ఖాలీద్‌ను దశాబ్ద కాలంగా తప్పించుకు తిరుగుతుండగా కరీంనగర్ రూరల్ పోలీసులు పట్టుకున్నారు. చనిపోయాడని అందరూ భావిస్తున్న ఈ కరుడుగట్టిన నేరస్తుడిని వలవేసి అదుపులోకి తీసుకున్నారు. గతంలో ఇంజనీరింగ్ విద్యార్థినిపై మానభంగం కేసు తర్వాత గుర్తుతెలియని వ్యక్తులు ధూమ్ ఖాలీద్‌పై దాడి చేసి తీవ్రంగా చితకబాది, కాళ్లపై బండరాళ్లతో మోదారు. ఆసుపత్రిలో అతనికి రెండు కాళ్లు తీసేశారు వైద్యులు. ఈ కేసులో పోలీసులు అరెస్ట్ చేయగా బెయిల్ పై బయటకు వచ్చిన తర్వాత ధూమ్ ఖాలీద్ అప్పటి నుండి పరారీలో ఉన్నాడు. పదేళ్లుగా కరీంనగర్ వైపు కన్నెత్తి చూడకుండా మహారాష్ట్రలోని నాగపూర్, నాందేడ్, చంద్రపూర్, బల్లార్ష తదితర ప్రాంతాల్లో షెల్టర్ తీసుకున్నాడు. రెండు కాళ్లు లేకపోయినా, మహారాష్ట్రలో గ్యాంగులను ఏర్పాటు చేసుకుని ధూమ్ ఖాలీద్ తన నేర ప్రవృత్తిని కొనసాగించాడు. బిక్షగాడి వేషంలో దర్గాల వద్ద షెల్టర్ తీసుకుంటూ, వాహనాల్లో తిరుగుతూ నేరాలకు పాల్పడినట్లు పోలీసుల విచారణలో తేలింది. హైదరాబాద్‌లో పలు క్రిమినల్ కేసుల్లో పాల్గొన్న ధూమ్ ఖాలీద్ కరీంనగర్ పోలీసులకు మోస్ట్ వాంటెడ్‌గా ఉన్నాడు. పలు కేసుల్లో శిక్ష పడిన ఖాలీద్ పై కరీంనగర్ రూరల్ పోలీస్ స్టేషన్‌లో 5, వన్ టౌన్‌లో 2, టూ టౌన్‌లో 1 కేసు నమోదయ్యాయి. మహారాష్ట్రలోని నాందేడ్, నాగపూర్, బల్లార్ష, చంద్రపూర్ లలో కూడా కేసులు నమోదయ్యాయి. చైన్ స్నాచింగ్, గ్యాంగ్ రేప్, దారి దోపిడీలకు పాల్పడే ముఠాలను ఏర్పాటు చేసుకుని యువతను నేరాలకు ఉసిగొల్పేవాడు. కరీంనగర్‌లో ధూమ్ ఖాలీద్ పాల్పడిన దాదాపు వంద ఘటనలపై కేసులు నమోదు కాలేదని, ఫిర్యాదులు ఇవ్వలేదని తెలుస్తోంది. కరీంనగర్‌లోని మూడు పోలీస్ స్టేషన్‌లలో నమోదైన కేసుల్లో ధూమ్ ఖాలీద్‌ను అరెస్ట్ చేసి కోర్టులో హాజరుపరచాలని పోలీసులు గత కొంతకాలంగా ప్రయత్నిస్తున్నారు. అతని గురించి వాకబు చేయగా చనిపోయాడన్న సమాధానమే రావడంతో అతని ఆచూకీ దొరకడం కష్టమేనని అనుకున్నారు. అయితే, హైదరాబాద్ సమీపంలోని మేడిపల్లిలో నివసిస్తున్న ధూమ్ ఖాలీద్ భార్యను గత ఆరు నెలలుగా హత్య చేసేందుకు ప్రయత్నిస్తున్నాడని పోలీసుల విచారణలో వెల్లడైంది. భార్యను హతమార్చేందుకు స్కెచ్ వేయడంలో భాగంగానే ఖాలీద్ కరీంనగర్ పరిసర ప్రాంతాల్లో తిరుగుతున్నాడని పోలీసులు సమాచారం అందుకున్నారు. సోమవారం ధూమ్ ఖాలీద్ కరీంనగర్ వచ్చాడన్న పక్కా సమాచారం మేరకు కరీంనగర్ రూరల్ సీఐ నిరంజన్ రెడ్డి ఆధ్వర్యంలో పోలీసులు అతన్ని అదుపులోకి తీసుకున్నారు. ఇంజనీరింగ్ విద్యార్థిని రేప్ చేసిన కేసులో అరెస్ట్ చేసి కోర్టులో హాజరుపరిచారు. మిగతా కేసుల్లో కూడా అతన్ని అరెస్ట్ చేసేందుకు పోలీసులు రంగం సిద్ధం చేస్తున్నారు, ఇప్పటికే శిక్షలు పడినందున అతను జైలుకే పరిమితం అయ్యే అవకాశాలు ఉన్నాయని తెలుస్తోంది. దశాబ్ద కాలంగా తప్పించుకుంటున్న ధూమ్ ఖాలీద్‌ను పట్టుకోవడంలో సఫలం అయిన కరీంనగర్ రూరల్ సీఐ నిరంజన్ రెడ్డి, పోలీసు సిబ్బందిని కరీంనగర్ సీపీ గౌష్ ఆలం ప్రత్యేకంగా అభినందించారు. ఇలాంటి మోస్ట్ వాంటెడ్ క్రిమినల్స్ పట్టుకునేందుకు కరీంనగర్ రూరల్ పోలీసులను ఆదర్శంగా తీసుకోవాలన్నారు. కరీంనగర్ రూరల్ ఏసీపీ విజయ్ కుమార్ కూడా సీఐ నిరంజన్ రెడ్డి బృందాన్ని అభినందించి, పరారీలో ఉన్న నిందితులను పట్టుకునేందుకు స్పెషల్ టాస్క్ ఏర్పాటు చేయడం ప్రశంసనీయమన్నారు. ఘరానా క్రిమినల్ అయిన ధూమ్ ఖాలీద్‌ను పట్టుకోవడంపై కరీంనగర్ ప్రజల్లో కూడా హర్షం వ్యక్తమవుతోంది. ఇలాంటి కరుడుగట్టిన నేరస్తుడు జైళ్లోనే ఉండేలా చూడాలని, బయటకు వస్తే మరిన్ని దారుణాలకు ఒడిగట్టే ప్రమాదం ఉందని నగరవాసులు డిమాండ్ చేస్తున్నారు. ధూమ్ ఖాలీద్ చేసిన నేరాలను గమనించి కఠిన శిక్షలు పడే విధంగా పోలీసులు చొరవ చూపాలని ప్రజలు కోరుతున్నారు.

కరీంనగర్ జిల్లా గన్నేరువరం మండలంలోని చాకలి వానిపల్లి అనుబంధ గ్రామమైన కూన వానిపల్లికి చెందిన రైతు కూన యాదగిరి, తన పిల్లల ఈత సరదాను తీర్చడానికి ఒక అద్భుతమైన ఆలోచన చేశారు. తన వద్ద ఉన్న ట్రాక్టర్ ట్రాలీని ఉపయోగించి, దానిలో టార్పాలిన్ కవర్‌ను అమర్చి, నీటితో నింపి చిన్నపాటి స్విమ్మింగ్ పూల్‌ను తయారుచేశారు. పనికిరాని వస్తువు అంటూ ఏదీ ఉండదని, ఒక ఐడియా జీవితాన్నే మార్చగలదని నిరూపిస్తూ, ఈ తండ్రి తన పిల్లల కోసం ఈ సృజనాత్మక ఏర్పాటు చేశారు.

ఐపీఎల్ ఫైనల్ మ్యాచ్‌లో రాయల్ ఛాలెంజర్స్ బెంగళూరు (ఆర్సీబీ) విజయం సాధించడంతో కరీంనగర్‌లో అభిమానుల హంగామా శృతి మించింది. కొందరు యువకులు అర్ధరాత్రి బైకులపై నగరంలో తిరుగుతూ వీరంగం సృష్టించారు. వారు వాహనాలను అడ్డుకుని, వాటిపై దాడికి ప్రయత్నించారు. ముఖ్యంగా కమాన్ వద్ద అభిమానం మితిమీరింది. ఈ పరిస్థితిని అదుపులోకి తెచ్చేందుకు పోలీసులు లాఠీ ఛార్జ్ చేసి యువకులను చెదరగొట్టారు. అభిమానం ఉండాలి కానీ, ఇలా హంగామా చేసి వీరంగం సృష్టించడంపై సర్వత్రా ఆందోళన వ్యక్తమవుతోంది.

హుస్నాబాద్ పట్టణంలో వందలాది కోతులు బీభత్సం సృష్టిస్తున్నాయి. ఇళ్లు, పంటపొలాలను ధ్వంసం చేస్తూ పట్టణవాసులను భయభ్రాంతులకు గురిచేస్తున్నాయి. ఈ కోతుల గుంపుల మధ్య జరుగుతున్న భీకర పోరాటాలు ప్రజల్లో మరింత ఆందోళన నింపుతున్నాయి. దీంతో పిల్లలు, పెద్దలు ఒంటరిగా బయటకు రావాలంటే వణికిపోతున్నారు. కిరాణా వ్యాపారులు సైతం తీవ్రంగా నష్టపోతున్నారు. ఈ కోతుల బెడద నుండి తమను రక్షించాలని పట్టణవాసులు అధికారులను వేడుకుంటున్నారు.

మంచిర్యాల జిల్లాలోని శ్రీరాంపూర్ నస్పూర్ మండలంలో గల సింగరేణి కాలరీస్ కంపెనీలో ఉపరితలంపై పనిచేస్తున్న కార్మికుల ఆరోగ్యాన్ని దృష్టిలో ఉంచుకొని, జీఎం శ్రీనివాస్ వారికి ఎండ తీవ్రత నుండి ఉపశమనం కల్పించేందుకు మజ్జిగ ప్యాకెట్లు, ఓఆర్ఎస్ ప్యాకెట్లు, మరియు గొడుగులు అందజేశారు. ఈ చర్య కార్మికులకు వేడి నుండి రక్షణ కల్పించడానికి ఉద్దేశించబడింది. ఈ సందర్భంగా జీఎం శ్రీనివాస్ మాట్లాడుతూ, ఉపరితలంపై పనిచేసే కార్మికులకే కాకుండా, మ్యానువే దగ్గర కూడా ఓఆర్ఎస్ ప్యాకెట్లు అందుబాటులో ఉంచాలని కోరారు. రంజాన్ మాసంలో ఉపరితలంపై పనిచేస్తున్న కార్మికుల కోసం నీటి నిల్వను తగినంతగా ఉంచాలని, కార్మికులు ఎల్లప్పుడూ నీరు తాగుతూ, వారి కోసం ఏర్పాటు చేసిన నీడలో ఉండాలని ఆయన సూచించారు. ఎండ తీవ్రత నుండి కార్మికులు తమ ఆరోగ్యాన్ని జాగ్రత్తగా చూసుకోవాలని శ్రీరాంపూర్ జీఎం శ్రీనివాస్ విజ్ఞప్తి చేశారు.

ఒత్తిడి, ఆందోళనల కారణంగా తొమ్మిదేళ్ల అనుభవంతో కూడిన ఐటీ మేనేజర్ ఉద్యోగాన్ని వదిలేసిన ఓ మహిళ, ప్రస్తుతం ఆటో డ్రైవర్‌గా జీవనం సాగిస్తూ అందరినీ ఆశ్చర్యపరుస్తోంది. లేడీ ఎంట్రప్రెన్యూయర్ మిథ్లాజ్ తన ఇన్‌స్టాగ్రామ్ ద్వారా పంచుకున్న వివరాల ప్రకారం, ఆమె తన కెరీర్ మార్చుకోవడంపై ఎంతో సంతోషం వ్యక్తం చేశారు. ప్రస్తుతం ఆమె నెలకు రూ.60 వేల వరకు సంపాదిస్తూ, మానసిక ప్రశాంతతతో సాఫీగా జీవిస్తున్నట్లు తెలిపారు. పని ఒత్తిడి కంటే సంతోషమే ముఖ్యమని ఆమె నిరూపించారు.

కరీంనగర్ జిల్లా కేంద్రంలోని బ్యాంకు కాలనీలో గల స్వయం హోటల్‌లో సోమవారం స్థానిక బీఆర్ఎస్ నాయకులతో కలిసి మీడియా సమావేశం ఏర్పాటు చేసిన చొప్పదండి మాజీ ఎమ్మెల్యే సుంకె రవి శంకర్, ఎమ్మెల్యే మేడిపల్లి సత్యంపై తీవ్ర ఆరోపణలు చేశారు. రైతు ప్రభుత్వం అంటే రైతులపై కేసులు పెట్టడమేనా అని ప్రభుత్వాన్ని ప్రశ్నించిన ఆయన, చొప్పదండి ఎమ్మెల్యే సత్యం రైతులపై పగపడుతున్నారని ఆరోపించారు. ధైర్యం ఉంటే ధాన్యం కొనుగోలుపై చర్చకు రావాలని ఎమ్మెల్యే సత్యంకు రవి శంకర్ సవాల్ విసిరారు. ఎమ్మెల్యే పగటిపూట ధాన్యం కొనుగోలు కేంద్రాలకు వస్తే రైతులు నిలదీస్తారని, అందుకే ఆయన రాత్రివేళ దొంగల మాదిరిగా వచ్చి కొనుగోలు కేంద్రాలను సందర్శిస్తున్నారని సుంకె రవి శంకర్ ఆరోపించారు. కేవలం రీల్స్ కోసం మాత్రమే ధాన్యం కొనుగోలు కేంద్రాలను సందర్శిస్తున్నారని ఎద్దేవా చేసిన ఆయన, లారీలు ఎక్కి స్టంట్లు చేయడం తప్ప రైతులకు ఒరిగేదేమీ లేదని అన్నారు. ధాన్యం కొనుగోలు చేయమని విజ్ఞప్తి చేస్తున్న రైతులను ఎమ్మెల్యే బెదిరింపులకు గురి చేస్తున్నారని, రౌడీలా వ్యవహరిస్తున్నారని పేర్కొంటూ, చొప్పదండిలో నియంత పాలన కొనసాగుతోందని ధ్వజమెత్తారు. అన్నాడి దామోదర్ రెడ్డి, మహిపాల్ అనే రైతులపై కేసులు నమోదు అయ్యాయని, మొత్తం 8 మందిపై అక్రమ కేసులు పెట్టారని ఆవేదన వ్యక్తం చేశారు. స్తంభంపల్లి కరుణాకర్ అనే యువకునిపై అక్రమ కేసులు పెట్టి 14 రోజులు జైల్లో ఉంచారని తెలిపారు. ధైర్యం ఉంటే తనపై కేసు పెట్టాలని, కానీ అన్నం పెట్టే అమాయక రైతులపై కేసులు పెట్టవద్దని పోలీసులకు విజ్ఞప్తి చేశారు. చొప్పదండి నియోజకవర్గ రైతులపై అక్రమ కేసులు నమోదు చేయించి వారిని ఏడిపిస్తున్న ఎమ్మెల్యే మేడిపల్లి సత్యం అని ఆయన స్పష్టం చేశారు. ఈ సమావేశంలో ఎమ్మెల్యేతో పాటు మాజీ గ్రంథాలయ సంస్థ చైర్మన్ ఏనుగు రవీందర్ రెడ్డి, పలువురు బీఆర్ఎస్ నాయకులు తదితరులు పాల్గొన్నారు.

రాజన్న సిరిసిల్ల జిల్లాలోని తంగళ్లపల్లి మండలంలోని ఎల్లమ్మ టెంపుల్ సమీపంలో ఉన్న ఈత వనంలో ప్రమాదవశాత్తు మంటలు చెలరేగాయి. ఈదురు గాలుల కారణంగా అగ్ని మరింత వేగంగా వ్యాపించింది. మంటల గురించి సమాచారం అందుకున్న వెంటనే అగ్నిమాపక సిబ్బంది ఘటనాస్థలికి చేరుకుని మంటలను విజయవంతంగా అదుపులోకి తీసుకువచ్చారు.