హుస్నాబాద్ పట్టణంలో వందలాది కోతులు బీభత్సం సృష్టిస్తున్నాయి. ఇళ్లు, పంటపొలాలను ధ్వంసం చేస్తూ పట్టణవాసులను భయభ్రాంతులకు గురిచేస్తున్నాయి. ఈ కోతుల గుంపుల మధ్య జరుగుతున్న భీకర పోరాటాలు ప్రజల్లో మరింత ఆందోళన నింపుతున్నాయి. దీంతో పిల్లలు, పెద్దలు ఒంటరిగా బయటకు రావాలంటే వణికిపోతున్నారు. కిరాణా వ్యాపారులు సైతం తీవ్రంగా నష్టపోతున్నారు. ఈ కోతుల బెడద నుండి తమను రక్షించాలని పట్టణవాసులు అధికారులను వేడుకుంటున్నారు.

బండి’’ కోసం మండు టెండలో ‘‘సైకిల్ బండి యాత్ర* *బండి సంజయ్ కు మంచి జరగాలని కోరుతూ పెరుగు వెంకటేశ్వర్లు జాతీయవాది సైకిల్ యాత్ర* *తిరుపతి నుండి హైదరాబాద్ దాకా 680 కి.మీల సైకిల్ యాత్ర* *హైదరాబాద్ లో బండి సంజయ్ నివాసానికి చేరుకున్న పెరుగు వెంకటేశ్వర్లు* *వెంకటేశ్వర్లుకు ఆతిథ్యమిచ్చి యాత్ర విశేషాలు తెలుసుకున్న కేంద్ర మంత్రి* *జాతీయ వాది బండి సంజయ్ ఈ దేశానికి అవసరమని చెప్పిన వెంకటేశ్వర్లు* *బండి సంజయ్ బాగుండాలని, కుట్రలను చేధించే శక్తిని ప్రసాదించాలని కోరుతూ సైకిల్ యాత్ర చేపట్టినట్లు వెల్లడి* కేంద్ర హోంశాఖ సహాయ మంత్రి బండి సంజయ్ కుమార్ ను రాజకీయంగా దెబ్బతీసేందుకు జరుగుతున్న కుట్రల నుండి కాపాడటంతోపాటు ఆయనకు మానసిక ప్రశాంతత కల్పించాలని కోరుతూ తిరుపతికి చెందిన 46 ఏళ్ల జాతీయ వాది పెరుగు వెంకటేశ్వర్లు ‘‘సైకిల్ యాత్ర’’ చేపట్టారు. తిరుపతి అలిపిరి వద్ద గంగమ్మకు మొక్కులు చెల్లించుకుని ‘‘శక్తి సంకల్ప యాత్ర’’ పేరుతో గత నెల 25న సైకిల్ యాత్ర ప్రారంభించారు. తిరుపతి మీదుగా మొదలైన సైకిల్ యాత్ర ఒంటిమిట్ట, కడప, నంద్యాల, మైదుకూరు, కర్నూలు మీదుగా తెలంగాణలో అడుగుపెట్టారు. అలంపూర్ మీదుగా పెబ్బేరు, జడ్చర్ల, బాలానగర్, షాద్ నగర్, శంషాబాద్ మీదుగా హైదరాబాద్ చేరుకున్నారు. ప్రతిరోజు సగటున 85 కి.మీల చొప్పున సైకిల్ తొక్కుకుంటూ ఈరోజు హైదరాబాద్ కు చేరుకున్నారు. వాస్తవానికి తిరుపతి నుండి కరీంనగర్ వరకు ‘‘శక్తి సంకల్ప యాత్ర’’ చేపట్టిన పెరుగు వెంకటేశ్వర్లు... బండి సంజయ్ కుమార్ హైదరాబాద్ లోనే ఉన్నారని సమాచారం రావడంతో నేరుగా బంజారాహిల్ష్ లోని కేంద్ర మంత్రి బండి సంజయ్ నివాసానికి చేరుకున్నారు. పెరుగు వెంకటేశ్వర్లు సైకిల్ యాత్ర గురించి బీజేపీ కార్యకర్తల నుండి సమాచారం అందుకున్న బండి సంజయ్ పెరుగు వెంకటేశ్వర్లును తన నివాసానికి సాదరంగా ఆహ్వానించారు. తాను జాతీయ వాదినని, జాతీయ వాదులకు ఏ కష్టం వచ్చినా అండగా ఉండాలనే సంకల్పంతో ఈ యాత్ర చేపట్టానని ఈ సందర్భంగా పెరుగు వెంకటేశ్వర్లు సంజయ్ కు తెలిపారు. మండుటెండను లెక్క చేయకుండా జాతీయ వాదులకు అండగా నిలుస్తూ పెరుగు వెంకటేశ్వర్లు చేస్తున్న ‘‘శక్తి సంకల్ప యాత్ర’’ అభినందనీయమన్నారు. అనంతరం పెరుగు వెంకటేశ్వర్లును శాలువాతో సన్మానించడంతోపాటు భోజన ఆతిథ్యమిచ్చారు. ఈ సందర్భంగా పెరుగు వెంకటేశ్వర్లు మాట్లాడుతూ దేశం కోసం, ధర్మం కోసం, హిందుత్వం కోసం జాతీయవాది బండి సంజయ్ చేస్తున్న పోరాటాన్ని చూసి ఆయన అభిమానిగా మారాననన్నారు. ఇటీవల కాలంలో బండి సంజయ్ పై జరుగుతున్న దుష్ప్రచారాన్ని చూసి తీవ్ర కలత చెందానని వాపోయారు. బండి సంజయ్ లాంటి జాతీయ వాది ఈ దేశానికి ఎంతో అవసరమని, అందుకే బండి సంజయ్ బాగుండాలని ఆయనకు జాతీయ వాదులంతా అండగా నిలవాలని కోరుతూ ‘‘శక్తి సంకల్ప యాత్ర’’ పేరుతో తిరుపతి నుండి హైదరాబాద్ వరకు సైకిల్ యాత్ర చేపట్టినట్లు తెలిపారు. సైకిల్ యాత్రలో భాగంగా ప్రతిరోజు రాత్రి దేవాలయంలో బస చేసేవాడనని, మరుసటి రోజు ఆలయంలో బండి సంజయ్ బాగుండాలని పూజ చేసిన అనంతరం సైకిల్ యాత్ర చేసేవాడనని చెప్పుకొచ్చారు.

కరీంనగర్ జిల్లాలోని గన్నేరువరం మండలంలోని హనుమాజిపల్లి గ్రామ రైతులు స్థానిక డీసీఎంఎస్ కేంద్రంలో వడ్ల కొనుగోళ్లు ఆలస్యం అవుతుండడంపై తీవ్ర ఆవేదన వ్యక్తం చేశారు. జంగపల్లిలోని ఐకేపీ కేంద్రంలో అవసరమైన అన్ని వసతులు ఉన్నప్పటికీ, సిబ్బంది కమీషన్ల కోసం అక్కడ వడ్లు కొనుగోలు చేయవద్దని చెబుతున్నారని రైతులు తీవ్రంగా ఆరోపించారు. ఈ నెల 20న తూకం వేయాల్సిన వడ్లు సైతం ఇప్పటికీ కొలవలేదని, దీనివల్ల వర్షాలు కురిస్తే తమ పంట పూర్తిగా నష్టపోతామని రైతులు వాపోయారు. తమ పంటలకు నష్టం వాటిల్లకముందే వడ్ల కొనుగోళ్లను వెంటనే పూర్తి చేయాలని హనుమాజిపల్లి గ్రామ రైతులు గట్టిగా డిమాండ్ చేశారు.

ఆదివారం సెలవు దినం మరియు గిరి ప్రదక్షిణ పురస్కరించుకుని కొండగట్టులోని శ్రీ ఆంజనేయస్వామి ఆలయంలో భక్తులు అధిక సంఖ్యలో తరలివచ్చారు. తెల్లవారుజామున కోనేరులో పుణ్యస్నానాలు ఆచరించిన భక్తులు అనంతరం స్వామివారిని దర్శించుకుని మొక్కులు చెల్లించుకున్నారు. భక్తులు క్షేత్రపాలకుడైన శ్రీ బేతలస్వామి వారిని కూడా దర్శించుకున్నారు. ఈ సందర్భంగా సుమారు 25 వేల మంది భక్తులు ఆలయానికి విచ్చేసినట్లు అధికారులు తెలిపారు. భక్తులకు ఎలాంటి అసౌకర్యం కలగకుండా పోలీసులు గట్టి భద్రతా ఏర్పాట్లు చేశారు. ఆలయ ఈఓ ఎస్. అంజనారెడ్డి భక్తులకు అసౌకర్యం కలగకుండా అన్ని ఏర్పాట్లను పర్యవేక్షించారు. ఈ కార్యక్రమాల్లో ఏఈఓ హరిహర్నాథ్, సూపరింటెండెంట్లు చంద్రశేఖర్, సునీల్, టెంపుల్ ఇన్‌స్పెక్టర్లు అశోక్, శ్రీనివాస్ పాల్గొన్నారు.

ములుగు జిల్లాలోని గోదావరి లోయ, నక్సల్‌బరీ ఉద్యమానికి పురుడు పోసి, అజ్ఞాత సాయుధ దళాలకు ఆశ్రయం ఇచ్చిన చారిత్రక జ్ఞాపకాలను నెమరు వేసుకుంటోంది. ఈ సందర్భంలో, జిల్లా కేంద్రంలో సీపీయూఎస్ఐ అమరుల స్మారకంగా నిర్మించిన అమరుల స్తూపం దాదాపు 20 ఏళ్ల తర్వాత పూర్తి ఎరుపు రంగులోకి మారింది. ఇన్నాళ్లు తెలుపు రంగులో ఉన్న ఈ స్తూపం, తాజాగా జరిగిన పరిణామాల నేపథ్యంలో ‘అరుణ వర్ణం’ దాల్చింది. అయితే, స్తూపంపై ఉన్న సుత్తి–కొడవలి గుర్తులపై ఉన్న ముసుగు ఇంకా తొలగించబడలేదని స్థానికంగా చర్చ జరుగుతోంది.

సిద్దిపేట జిల్లాలోని గజ్వేల్ పట్టణ సమీకృత కార్యాలయ సముదాయంలో ఆదివారం గజ్వేల్ నియోజకవర్గ మహిళలకు కళ్యాణ లక్ష్మీ మరియు షాదీ ముబారక్ చెక్కులను రాష్ట్ర కార్మిక, ఉపాధి కల్పన, గనుల శాఖ మంత్రి మరియు ఉమ్మడి మెదక్ జిల్లా ఇన్‌చార్జి మంత్రి గడ్డం వివేక్ వెంకటస్వామి పంపిణీ చేశారు. ఈ కార్యక్రమంలో గజ్వేల్ నియోజకవర్గంలోని ఏడు మండలాల నుండి 1053 మంది కళ్యాణ లక్ష్మి, 56 మంది షాది ముబారక్ లబ్ధిదారులకు మొత్తం 11 కోట్ల 9 లక్షల రూపాయల విలువైన చెక్కులను అందజేశారు. దీనితో పాటు, జిల్లా వెనుకబడిన తరగతుల అభివృద్ధి శాఖ ఆధ్వర్యంలో కాటమయ్య కిట్లను కూడా మంత్రి చేతుల మీదుగా లబ్ధిదారులకు అందించారు. ఈ సందర్భంగా జిల్లా ఇన్‌చార్జి మంత్రి మాట్లాడుతూ, ప్రజా పాలన ప్రభుత్వం ఏర్పడిన తర్వాత ఎన్నో సంక్షేమ, అభివృద్ధి కార్యక్రమాలను చేపడుతోందని, ముఖ్యంగా పేదల సంక్షేమం కోసం పని చేస్తుందని స్పష్టం చేశారు. ప్రభుత్వ విద్యను బలోపేతం చేయడానికి కొత్తగా ప్రభుత్వ పాఠశాలల్లో మధ్యాహ్న భోజనంతో పాటు పిల్లలకు ఉదయం అల్పాహారం అందిస్తున్నామని, ఇంటర్ కళాశాలల్లోనూ ఈ పథకాన్ని అమలు చేయనున్నట్లు తెలిపారు. గజ్వేల్ నియోజకవర్గంలో తెలంగాణ పబ్లిక్ స్కూల్‌ను ఏర్పాటు చేయడానికి ముఖ్యమంత్రి రేవంత్ రెడ్డి చేతుల మీదుగా భూమి పూజ చేయించామని, అలాగే 200 కోట్ల రూపాయలతో యంగ్ ఇండియా స్కూల్‌ను స్థాపించి నిరుపేద పిల్లలకు కార్పొరేట్ స్థాయి విద్యను అందించనున్నామని పేర్కొన్నారు. వైద్యం విషయంలో, 10 లక్షల రాజీవ్ ఆరోగ్యశ్రీ మరియు సీఎంఆర్‌ఎఫ్ చెక్కుల ద్వారా రోగులకు భరోసా కల్పించామని తెలిపారు. ప్రభుత్వ ఉద్యోగాలను కల్పించడానికి ప్రతి నియోజకవర్గానికి ఒక అడ్వాన్స్ టెక్నాలజీ సెంటర్‌ను ఏర్పాటు చేసి, అక్కడ చదువుతున్న పిల్లలకు 2000 రూపాయల స్టైఫండ్ అందిస్తున్నామని, మంచి శిక్షణతో పాటు జర్మన్ భాష నేర్పించి ఆయా దేశాల్లో ఉద్యోగాలు చేయించాలనే లక్ష్యంతో ఈ కార్యక్రమాన్ని చేపట్టినట్లు వివరించారు. పేదల సొంతింటి కలను నెరవేర్చడానికి ఇందిరమ్మ ఇళ్ల పథకం కింద 3500 స్లాబ్ లెవెల్ నిర్మాణాలు మంజూరయ్యాయని, ఈ ప్రగతి విజయవంతంగా కొనసాగుతోందని అధికారులను అభినందించారు. వచ్చే నెల రోజుల్లో నియోజకవర్గానికి మరో 2500 ఇళ్లను మంజూరు చేయనున్నట్లు ప్రకటించారు. ప్రజాపాలన ప్రభుత్వం విద్య, వైద్యానికి అధిక ప్రాధాన్యత ఇస్తూ నిరుపేద కుటుంబాలకు మేలు చేసేందుకు సంక్షేమ పథకాలన్నీ సమర్థవంతంగా పని చేస్తున్నాయని తెలిపారు. రబీ సీజన్‌లో ఊహించిన దానికంటే 30% ఎక్కువ ధాన్యం రావడంతో కొనుగోలు సమస్యలు తలెత్తాయని, అయితే అన్ని సమస్యలను పరిష్కరించి, రైతులు పండించిన పంటను చివరి గింజ వరకు కొనుగోలు చేస్తామని హామీ ఇచ్చారు, ఎవరూ ఆందోళన చెందవద్దని కోరారు. జిల్లాలో ఇందిరమ్మ చీరలు పంపిణీ చేయడం జరిగిందని, ప్రభుత్వ కార్యక్రమాలకు హాజరయ్యే మహిళలు ఇందిరమ్మ చీరలు ధరించి రావాలని సూచించారు. ఈ కార్యక్రమంలో పాల్గొన్న జిల్లా కలెక్టర్ కె హైమావతి మాట్లాడుతూ, జిల్లాలో ప్రభుత్వం అందిస్తున్న సంక్షేమ పథకాలను ప్రజలకు చేరవేయడానికి అధికార యంత్రాంగం నిరంతరం కృషి చేస్తోందని, అర్హులైన లబ్ధిదారులకు పథకాలు అందజేయనున్నట్లు తెలిపారు. ఇందిరమ్మ ఇళ్ల నిర్మాణంలో రాష్ట్రంలోనే జిల్లా ముందు వరుసలో ఉందని, మంజూరైన ప్రతి ఇంటిని పూర్తి చేసేలా అధికారులు పని చేస్తున్నారని ఆమె అన్నారు. ప్రభుత్వ విద్యాసంస్థల్లో విద్యను బలోపేతం చేయడానికి మధ్యాహ్న భోజనంతో పాటు ఉదయం అల్పాహారం పథకం కూడా అమలు చేస్తుందని తెలిపారు. ఏంఎల్ సీ యాదవ రెడ్డి మాట్లాడుతూ, నియోజకవర్గంలోని ఏడు మండలాల్లో కళ్యాణ లక్ష్మీ, షాది ముబారక్ చెక్కులను పంపిణీ చేస్తున్నామని, ఈ కార్యక్రమాన్ని ప్రతి ఆరు నెలలకు ఒకసారి నిర్వహించాలని లబ్ధిదారులు చాలా కాలంగా ఎదురుచూస్తున్నారని తెలిపారు. కళ్యాణ లక్ష్మి, షాది ముబారక్ లబ్ధిదారుల ఎంపికలో పారదర్శకత వహించి, అసలైన లబ్ధిదారులను ఎంపిక చేయాలని అధికారులను ఆదేశించారు. ఈరోజు గజ్వేల్ పట్టణంలో బస్ బేను మంత్రి చేతుల మీదుగా ప్రారంభించుకున్నామని, ప్రజ్ఞాపూర్ బస్ స్టాండ్‌ను కూడా పూర్తి చేయించాలని మంత్రిని కోరారు. ఈ కార్యక్రమంలో జిల్లా అదనపు కలెక్టర్ లక్ష్మీ కిరణ్, ఆర్డీఓ చంద్రకళ, మున్సిపల్ చైర్మన్ చందన, మార్కెట్ కమిటీ చైర్మన్ నరేందర్ రెడ్డి, ఇతర ప్రజాప్రతినిధులు పాల్గొన్నారు. ఈ వివరాలను జిల్లా పౌర సంబంధాల అధికారి కార్యాలయం, సిద్దిపేట జిల్లా వారు జారీ చేశారు.

ఢిల్లీలో “శివమ్ ఫార్మసీ” పేరుతో మెడికల్ షాపును నడుపుతున్న షారుఖ్ ఖాన్‌ను కొందరు హిందూ సంస్థల సభ్యులు కలిశారు. తన అసలు పేరుతోనే వ్యాపారం చేయాలని వారు షారుఖ్ ఖాన్‌ను కోరగా, ఈ ఘటన ఇప్పుడు చర్చనీయాంశమైంది. ఈ సందర్భంగా హిందూ సంస్థల సభ్యులు మాట్లాడుతూ, తమకు ఏ మతంపైనా అభ్యంతరం లేదని, అయితే వినియోగదారులను తప్పుదారి పట్టించే విధంగా ఇతర మతాలకు చెందిన పేర్లను ఉపయోగించడం సరైనది కాదని స్పష్టం చేశారు. ఈ ఘటనకు సంబంధించిన వీడియోలు సోషల్ మీడియాలో విస్తృతంగా వైరల్ అవుతుండగా, దీనిపై ప్రజల నుండి భిన్నాభిప్రాయాలు వ్యక్తమవుతున్నాయి.

జనసేన అధినేత పవన్ కళ్యాణ్ పై ప్రొఫెసర్ నాగేశ్వరరావు అనుచిత వ్యాఖ్యలు చేశారంటూ కరీంనగర్ లో జనసేన కార్యకర్తలు తీవ్ర ఆందోళనకు దిగారు. తెలంగాణ చౌక్ లో ప్రొఫెసర్ నాగేశ్వరరావు చిత్రపటాలను ప్రదర్శించి, చెప్పులతో కొట్టి, అనంతరం దహనం చేశారు. నాగేశ్వరరావుపై కఠిన చర్యలు తీసుకోవాలని, వెంటనే అరెస్ట్ చేయాలని నిరసనకారులు డిమాండ్ చేశారు. పవన్ కళ్యాణ్ పై వివాదాస్పద వ్యాఖ్యలు మానుకోకపోతే రాష్ట్రవ్యాప్త ఆందోళనలు చేపడతామని జనసేన పార్లమెంట్ నియోజకవర్గ కో ఆర్డినేటర్ బేతి మహేందర్ రెడ్డి ఈ సందర్భంగా హెచ్చరించారు.

కరీంనగర్ జిల్లాలోని ఈదులగట్టపల్లి గ్రామస్తులు తమ గ్రామం మీదుగా వెళ్తున్న కరీంనగర్-వరంగల్ జాతీయ రహదారిపై సర్వీస్ రోడ్డు నిర్మించాలని డిమాండ్ చేస్తూ కరీంనగర్ కలెక్టరేట్ ఎదుట ధర్నా చేపట్టారు. జాతీయ రహదారి పనుల్లో భాగంగా సర్వీస్ రోడ్డును గ్రామానికి చాలా దూరంలో ఏర్పాటు చేయడంతో, నిత్యం గ్రామానికి చేరుకోవడానికి తీవ్ర ఇబ్బందులు ఎదురవుతున్నాయని గ్రామస్తులు ఆవేదన వ్యక్తం చేశారు. తక్షణమే తమ గ్రామం వద్దే సర్వీస్ రోడ్డును నిర్మించాలని వారు డిమాండ్ చేశారు. అక్కడికి చేరుకున్న అదనపు కలెక్టర్ శ్రీనివాస్‌రెడ్డి గ్రామస్తుల నుంచి ఫిర్యాదు స్వీకరించారు. ఈ సమస్యను ప్రభుత్వం దృష్టికి తీసుకెళ్లి పరిష్కరిస్తామని వారికి హామీ ఇచ్చారు.

ములగు జిల్లాలోని వాజేడు మండలంలో చేరుకూరు–ధర్మవరం రహదారి నిర్మాణానికి అటవీ శాఖ అడ్డంకులు తొలగించాలని డిమాండ్ చేస్తూ సీపీఐ ఆధ్వర్యంలో రాస్తారోకో నిర్వహించారు. ఈ నిరసన కార్యక్రమంలో నాయకులు, ప్రజాప్రతినిధులు, గ్రామస్థులు పెద్ద సంఖ్యలో పాల్గొన్నారు. రహదారి నిర్మాణం ఆలస్యమవడంతో ప్రజలు తీవ్ర ఇబ్బందులు ఎదుర్కొంటున్నారని వారు ఆవేదన వ్యక్తం చేశారు. వెంటనే అటవీ శాఖ అనుమతులు మంజూరు చేసి రహదారి పనులు ప్రారంభించాలని నిరసనకారులు కోరారు.