కరీంనగర్ జిల్లాలోని గన్నేరువరం మండలంలోని హనుమాజిపల్లి గ్రామ రైతులు స్థానిక డీసీఎంఎస్ కేంద్రంలో వడ్ల కొనుగోళ్లు ఆలస్యం అవుతుండడంపై తీవ్ర ఆవేదన వ్యక్తం చేశారు. జంగపల్లిలోని ఐకేపీ కేంద్రంలో అవసరమైన అన్ని వసతులు ఉన్నప్పటికీ, సిబ్బంది కమీషన్ల కోసం అక్కడ వడ్లు కొనుగోలు చేయవద్దని చెబుతున్నారని రైతులు తీవ్రంగా ఆరోపించారు. ఈ నెల 20న తూకం వేయాల్సిన వడ్లు సైతం ఇప్పటికీ కొలవలేదని, దీనివల్ల వర్షాలు కురిస్తే తమ పంట పూర్తిగా నష్టపోతామని రైతులు వాపోయారు. తమ పంటలకు నష్టం వాటిల్లకముందే వడ్ల కొనుగోళ్లను వెంటనే పూర్తి చేయాలని హనుమాజిపల్లి గ్రామ రైతులు గట్టిగా డిమాండ్ చేశారు.

కరీంనగర్‌లో టీజేఎఫ్ ఆవిర్భావ దినోత్సవాన్ని పురస్కరించుకుని, టీయూడబ్ల్యూజే హెచ్143 కరీంనగర్ జిల్లా శాఖ ఆధ్వర్యంలో అమరవీరుల స్థూపం వద్ద కొవ్వొత్తుల ర్యాలీ నిర్వహించి, అమరవీరుల త్యాగాలను స్మరించుకుంటూ నివాళులర్పించడం జరిగింది. ఈ కార్యక్రమంలో పాల్గొన్న నాయకులు మాట్లాడుతూ తెలంగాణ అస్తిత్వం కోసం మరో పోరాటం అనివార్యమని పిలుపునిచ్చారు. ఈ కార్యక్రమంలో జిల్లా ప్రధాన కార్యదర్శి బోనాల తిరుమల్, కోశాధికారి జేరిపోతుల సంపత్, ఎలక్ట్రానిక్ మీడియా కో కన్వీనర్ హృషీకేష్, అలాగే జిల్లా నాయకులు శ్రీనివాస్, వెంకటరమణ, ప్రశాంత్, సుధాకర్, శ్రీధర్, సురేందర్, దేవేందర్ తదితరులు పాలుపంచుకున్నారు.

ఆదివారం సెలవు దినం మరియు గిరి ప్రదక్షిణ పురస్కరించుకుని కొండగట్టులోని శ్రీ ఆంజనేయస్వామి ఆలయంలో భక్తులు అధిక సంఖ్యలో తరలివచ్చారు. తెల్లవారుజామున కోనేరులో పుణ్యస్నానాలు ఆచరించిన భక్తులు అనంతరం స్వామివారిని దర్శించుకుని మొక్కులు చెల్లించుకున్నారు. భక్తులు క్షేత్రపాలకుడైన శ్రీ బేతలస్వామి వారిని కూడా దర్శించుకున్నారు. ఈ సందర్భంగా సుమారు 25 వేల మంది భక్తులు ఆలయానికి విచ్చేసినట్లు అధికారులు తెలిపారు. భక్తులకు ఎలాంటి అసౌకర్యం కలగకుండా పోలీసులు గట్టి భద్రతా ఏర్పాట్లు చేశారు. ఆలయ ఈఓ ఎస్. అంజనారెడ్డి భక్తులకు అసౌకర్యం కలగకుండా అన్ని ఏర్పాట్లను పర్యవేక్షించారు. ఈ కార్యక్రమాల్లో ఏఈఓ హరిహర్నాథ్, సూపరింటెండెంట్లు చంద్రశేఖర్, సునీల్, టెంపుల్ ఇన్‌స్పెక్టర్లు అశోక్, శ్రీనివాస్ పాల్గొన్నారు.

కోరిన కోర్కెలు తీర్చే కొండగట్టు ఆంజనేయస్వామి సన్నిధిలో 41వ గిరిప్రదక్షిణ కన్నుల పండువలా జరిగింది. ఈ కార్యక్రమంలో సుమారు 45 వేల మంది భక్తులు పాల్గొని అపారమైన భక్తిశ్రద్ధలతో స్వామివారిని దర్శించుకున్నారు. గిరిప్రదక్షిణ, స్వామివారి దర్శనం కోసం తరలివచ్చిన భక్తులతో ఆలయ పరిసరాలు ఆధ్యాత్మిక వాతావరణంతో నిండిపోయి, కొండగట్టు కిటకిటలాడింది. ఈ సందర్భంగా విడుదలైన భక్తి గీతం భక్తులలో మరింత ఆధ్యాత్మిక చైతన్యాన్ని నింపింది. గిరిప్రదక్షిణకు నాయకత్వం వహిస్తున్న సురేష్ ఆత్మరాం మహారాజ్ మాట్లాడుతూ, కులమతాలకు అతీతంగా హిందూ ధర్మం మరియు భక్తి భావనలను పెంపొందించే లక్ష్యంతో ఈ గిరిప్రదక్షిణను నిర్వహిస్తున్నట్లు తెలిపారు. అంతేకాకుండా, రాబోయే పౌర్ణమి జూన్ 29న ఒక ప్రత్యేక కార్యక్రమాన్ని చేపట్టనున్నట్లు ఆయన వెల్లడించారు. ఈ కార్యక్రమంలో భక్తులు మట్టితో చిన్న ముద్దలను తయారు చేసి, వాటిలో వివిధ రకాల పండ్ల విత్తనాలు ఉంచి "స్వీట్ బాక్స్" రూపంలో సిద్ధం చేయాలని సూచించారు. వీటిని కొండగట్టు అటవీ ప్రాంతాలకు వెళ్లే దారిలో విత్తన బంతులుగా విసరాలని కోరారు. ఈ విత్తన బంతుల వల్ల భవిష్యత్తులో చెట్లు మొలకెత్తి పండ్లను కాస్తాయని, అవి హనుమంతుని వానర స్వరూపంగా భావించే కోతులకు ఆహారంగా ఉపయోగపడతాయని సురేష్ ఆత్మరాం మహారాజ్ వివరించారు. భక్తి, పర్యావరణ పరిరక్షణ, జీవజాల సంరక్షణ అనే మూడు లక్ష్యాలతో ఈ కార్యక్రమాన్ని విజయవంతం చేయాలని ఆయన భక్తులకు పిలుపునిచ్చారు. ఈ కొండగట్టు గిరిప్రదక్షిణకు విశేష స్పందన లభించగా, వచ్చే పౌర్ణమి రోజున సీడ్ బాల్స్ వేయాలని నిర్ణయం తీసుకున్నారు.

ఉమ్మడి ఆదిలాబాద్ జిల్లా ఇంచార్జ్ మంత్రి, ఎక్సైజ్ శాఖ మంత్రి జూపల్లి కృష్ణారావు సాధారణ ప్రయాణికుడి మాదిరిగా వందే భారత్ ఎక్స్‌ప్రెస్‌లో ప్రయాణించి అందరి దృష్టిని ఆకర్షించారు. ప్రత్యేక వాహనం లేదా ఆర్భాటం లేకుండా, ఆయన సామాన్య ప్రయాణికుడిలా ట్రైన్‌లో ప్రయాణించడం గమనార్హం. ముఖ్యమంత్రి రేవంత్ రెడ్డి జూన్ 1న కొమురం భీం ఆసిఫాబాద్ జిల్లాలో పర్యటించనున్న నేపథ్యంలో, ఆ పర్యటనకు సంబంధించిన ముందస్తు ఏర్పాట్లను పర్యవేక్షించేందుకు మంత్రి జూపల్లి శనివారం హైదరాబాద్ నుండి వందే భారత్ ట్రైన్‌లో ఆసిఫాబాద్ జిల్లాకు బయలుదేరారు. ప్రయాణం మధ్యలో, మంత్రి తోటి ప్రయాణికులతో కలిసి ట్రైన్‌లో అందించిన భోజనం చేశారు. మంత్రి చూపిన ఈ నిరాడంబరతను చూసి తోటి ప్రయాణికులు ఆశ్చర్యపోగా, కొందరు ఆయనతో సెల్ఫీలు దిగేందుకు ఆసక్తి చూపారు. జిల్లా ఇంచార్జ్ మంత్రి హోదాలో జూపల్లి కృష్ణారావు ఒకరోజు ముందుగానే జిల్లాకు చేరుకుని సీఎం పర్యటన ఏర్పాట్లను పరిశీలించనున్నారు.

సిద్దిపేట జిల్లాలోని గజ్వేల్ పట్టణ సమీకృత కార్యాలయ సముదాయంలో ఆదివారం గజ్వేల్ నియోజకవర్గ మహిళలకు కళ్యాణ లక్ష్మీ మరియు షాదీ ముబారక్ చెక్కులను రాష్ట్ర కార్మిక, ఉపాధి కల్పన, గనుల శాఖ మంత్రి మరియు ఉమ్మడి మెదక్ జిల్లా ఇన్‌చార్జి మంత్రి గడ్డం వివేక్ వెంకటస్వామి పంపిణీ చేశారు. ఈ కార్యక్రమంలో గజ్వేల్ నియోజకవర్గంలోని ఏడు మండలాల నుండి 1053 మంది కళ్యాణ లక్ష్మి, 56 మంది షాది ముబారక్ లబ్ధిదారులకు మొత్తం 11 కోట్ల 9 లక్షల రూపాయల విలువైన చెక్కులను అందజేశారు. దీనితో పాటు, జిల్లా వెనుకబడిన తరగతుల అభివృద్ధి శాఖ ఆధ్వర్యంలో కాటమయ్య కిట్లను కూడా మంత్రి చేతుల మీదుగా లబ్ధిదారులకు అందించారు. ఈ సందర్భంగా జిల్లా ఇన్‌చార్జి మంత్రి మాట్లాడుతూ, ప్రజా పాలన ప్రభుత్వం ఏర్పడిన తర్వాత ఎన్నో సంక్షేమ, అభివృద్ధి కార్యక్రమాలను చేపడుతోందని, ముఖ్యంగా పేదల సంక్షేమం కోసం పని చేస్తుందని స్పష్టం చేశారు. ప్రభుత్వ విద్యను బలోపేతం చేయడానికి కొత్తగా ప్రభుత్వ పాఠశాలల్లో మధ్యాహ్న భోజనంతో పాటు పిల్లలకు ఉదయం అల్పాహారం అందిస్తున్నామని, ఇంటర్ కళాశాలల్లోనూ ఈ పథకాన్ని అమలు చేయనున్నట్లు తెలిపారు. గజ్వేల్ నియోజకవర్గంలో తెలంగాణ పబ్లిక్ స్కూల్‌ను ఏర్పాటు చేయడానికి ముఖ్యమంత్రి రేవంత్ రెడ్డి చేతుల మీదుగా భూమి పూజ చేయించామని, అలాగే 200 కోట్ల రూపాయలతో యంగ్ ఇండియా స్కూల్‌ను స్థాపించి నిరుపేద పిల్లలకు కార్పొరేట్ స్థాయి విద్యను అందించనున్నామని పేర్కొన్నారు. వైద్యం విషయంలో, 10 లక్షల రాజీవ్ ఆరోగ్యశ్రీ మరియు సీఎంఆర్‌ఎఫ్ చెక్కుల ద్వారా రోగులకు భరోసా కల్పించామని తెలిపారు. ప్రభుత్వ ఉద్యోగాలను కల్పించడానికి ప్రతి నియోజకవర్గానికి ఒక అడ్వాన్స్ టెక్నాలజీ సెంటర్‌ను ఏర్పాటు చేసి, అక్కడ చదువుతున్న పిల్లలకు 2000 రూపాయల స్టైఫండ్ అందిస్తున్నామని, మంచి శిక్షణతో పాటు జర్మన్ భాష నేర్పించి ఆయా దేశాల్లో ఉద్యోగాలు చేయించాలనే లక్ష్యంతో ఈ కార్యక్రమాన్ని చేపట్టినట్లు వివరించారు. పేదల సొంతింటి కలను నెరవేర్చడానికి ఇందిరమ్మ ఇళ్ల పథకం కింద 3500 స్లాబ్ లెవెల్ నిర్మాణాలు మంజూరయ్యాయని, ఈ ప్రగతి విజయవంతంగా కొనసాగుతోందని అధికారులను అభినందించారు. వచ్చే నెల రోజుల్లో నియోజకవర్గానికి మరో 2500 ఇళ్లను మంజూరు చేయనున్నట్లు ప్రకటించారు. ప్రజాపాలన ప్రభుత్వం విద్య, వైద్యానికి అధిక ప్రాధాన్యత ఇస్తూ నిరుపేద కుటుంబాలకు మేలు చేసేందుకు సంక్షేమ పథకాలన్నీ సమర్థవంతంగా పని చేస్తున్నాయని తెలిపారు. రబీ సీజన్‌లో ఊహించిన దానికంటే 30% ఎక్కువ ధాన్యం రావడంతో కొనుగోలు సమస్యలు తలెత్తాయని, అయితే అన్ని సమస్యలను పరిష్కరించి, రైతులు పండించిన పంటను చివరి గింజ వరకు కొనుగోలు చేస్తామని హామీ ఇచ్చారు, ఎవరూ ఆందోళన చెందవద్దని కోరారు. జిల్లాలో ఇందిరమ్మ చీరలు పంపిణీ చేయడం జరిగిందని, ప్రభుత్వ కార్యక్రమాలకు హాజరయ్యే మహిళలు ఇందిరమ్మ చీరలు ధరించి రావాలని సూచించారు. ఈ కార్యక్రమంలో పాల్గొన్న జిల్లా కలెక్టర్ కె హైమావతి మాట్లాడుతూ, జిల్లాలో ప్రభుత్వం అందిస్తున్న సంక్షేమ పథకాలను ప్రజలకు చేరవేయడానికి అధికార యంత్రాంగం నిరంతరం కృషి చేస్తోందని, అర్హులైన లబ్ధిదారులకు పథకాలు అందజేయనున్నట్లు తెలిపారు. ఇందిరమ్మ ఇళ్ల నిర్మాణంలో రాష్ట్రంలోనే జిల్లా ముందు వరుసలో ఉందని, మంజూరైన ప్రతి ఇంటిని పూర్తి చేసేలా అధికారులు పని చేస్తున్నారని ఆమె అన్నారు. ప్రభుత్వ విద్యాసంస్థల్లో విద్యను బలోపేతం చేయడానికి మధ్యాహ్న భోజనంతో పాటు ఉదయం అల్పాహారం పథకం కూడా అమలు చేస్తుందని తెలిపారు. ఏంఎల్ సీ యాదవ రెడ్డి మాట్లాడుతూ, నియోజకవర్గంలోని ఏడు మండలాల్లో కళ్యాణ లక్ష్మీ, షాది ముబారక్ చెక్కులను పంపిణీ చేస్తున్నామని, ఈ కార్యక్రమాన్ని ప్రతి ఆరు నెలలకు ఒకసారి నిర్వహించాలని లబ్ధిదారులు చాలా కాలంగా ఎదురుచూస్తున్నారని తెలిపారు. కళ్యాణ లక్ష్మి, షాది ముబారక్ లబ్ధిదారుల ఎంపికలో పారదర్శకత వహించి, అసలైన లబ్ధిదారులను ఎంపిక చేయాలని అధికారులను ఆదేశించారు. ఈరోజు గజ్వేల్ పట్టణంలో బస్ బేను మంత్రి చేతుల మీదుగా ప్రారంభించుకున్నామని, ప్రజ్ఞాపూర్ బస్ స్టాండ్‌ను కూడా పూర్తి చేయించాలని మంత్రిని కోరారు. ఈ కార్యక్రమంలో జిల్లా అదనపు కలెక్టర్ లక్ష్మీ కిరణ్, ఆర్డీఓ చంద్రకళ, మున్సిపల్ చైర్మన్ చందన, మార్కెట్ కమిటీ చైర్మన్ నరేందర్ రెడ్డి, ఇతర ప్రజాప్రతినిధులు పాల్గొన్నారు. ఈ వివరాలను జిల్లా పౌర సంబంధాల అధికారి కార్యాలయం, సిద్దిపేట జిల్లా వారు జారీ చేశారు.

కామారెడ్డి జిల్లాకేంద్రం శివారులోని లింగాపూర్‌లో బండారి రాజరెడ్డి (56) అనే వ్యక్తి దారుణహత్యకు గురయ్యారు. కొద్దిరోజులుగా అదృశ్యమైన ఆయన మృతదేహం శనివారం రాత్రి పాడుబడ్డ బావిలో లభ్యమైంది. రాజిరెడ్డి ఈ నెల 29న రాత్రి 7 గంటల ప్రాంతంలో అదే కాలనీకి చెందిన మంచాల ఎల్లయ్య అనే వ్యక్తి ఇంటి వద్ద కనిపించి, ఆ తర్వాత కనిపించకుండా పోయారు. ఆందోళనకు గురైన కుటుంబ సభ్యులు రాజిరెడ్డి ఆచూకీ కోసం వెతకగా, ఓ ఫంక్షన్ హాల్ సమీపంలో ఆయన ద్విచక్రవాహనం, సెల్ ఫోన్ కనిపించాయి. దీంతో కుటుంబ సభ్యులు దేవునిపల్లి పోలీసులకు సమాచారం అందించారు. పోలీసులు ద్విచక్రవాహనాన్ని, సెల్ ఫోన్‌ను స్వాధీనం చేసుకుని, దర్యాప్తు ప్రారంభించారు. సెల్ ఫోన్ ఆధారంగా పోలీసులు విచారణ చేపట్టగా, రాజిరెడ్డిని మంచాల ఎల్లయ్య, అతని కొడుకు ప్రణీత్‌లు కలిసి హత్య చేసినట్లు తేలింది. అనుమానితులిద్దరినీ అదుపులోకి తీసుకుని విచారించగా, రాజిరెడ్డిని తామే హత్య చేసి బావిలో పూడ్చిపెట్టినట్లు వారు అంగీకరించారు. రాజిరెడ్డి-ఎల్లయ్య కలిసి కొనుగోలు చేసిన భూమిలో నెలకొన్న వివాదమే ఈ హత్యకు దారి తీసినట్లు పోలీసులు తెలిపారు. శనివారం రాత్రి 11:30 గంటల ప్రాంతంలో నిందితులు పూడ్చిపెట్టిన రాజిరెడ్డి మృతదేహాన్ని పోలీసులు బయటకు తీశారు. కామారెడ్డి డీఎస్పీ మధుసూధన్ సంఘటనా స్థలంలో ఉండి విచారణను పర్యవేక్షించారు.

శాతవాహన విశ్వ విద్యాలయ అంబేద్కర్ లైబ్రరీ ఆడిటోరియంలో డిగ్రీ కోర్సులకు సంబంధించి కొత్త సిలబస్, కోర్సుల రూపకల్పనపై ఒక అవగాహన కార్యక్రమం నిర్వహించబడింది. రిజిస్ట్రార్ ఆచార్య సతీష్ కుమార్ అధ్యక్షతన జరిగిన ఈ కార్యక్రమంలో, రానున్న కొత్త తరానికి అనుగుణంగా నూతన కోర్సులను రూపొందించి, అధ్యాపకులకు కార్యశాలలు నిర్వహించి, డిగ్రీ కోర్సులలో ఒక కొత్త ఒరవడికి శ్రీకారం చుట్టాల్సిన అవసరం ఉందని ఆయన నొక్కి చెప్పారు. ఈ కార్యక్రమానికి ముఖ్యఅతిథిగా హాజరైన తెలంగాణ ఉన్నత విద్యా మండలి చైర్మన్ ఆచార్య బాలకిష్టారెడ్డి మాట్లాడుతూ, నేటి కాలంలో మెరుగైన విద్య కోసం నూతన సిలబస్, పాఠ్యాంశాలను రూపొందించుకోవాలని అన్నారు. రాబోయే విద్యా సంవత్సరంలో ఉపాధి అవకాశాలను మెరుగుపరచడానికి, పరిశ్రమలకు, విద్యాలయాలకు మధ్య సంబంధాలను బలోపేతం చేయడానికి, ఇంటర్నషిప్ ద్వారా సాంకేతిక అవగాహనను పెంచుకునే విధంగా కొత్త కోర్సులను తీసుకొస్తున్నట్లు ఆయన తెలియజేశారు. దీనివల్ల విద్యలో సమూలమైన మార్పులు వస్తాయని, విద్యార్థులకు ప్రత్యక్ష అనుభవం ద్వారా నేర్చుకునే అభ్యాసాలను రూపకల్పన చేస్తున్నామని, తద్వారా సమాజంలో నూతన మార్పులు తీసుకురావచ్చని పేర్కొన్నారు. ఉన్నత విద్యా మండలి ఈ కొత్త పాఠ్యాంశాలకు సంబంధించిన మెటీరియల్‌ను కూడా అందిస్తుందని, ఇది అధ్యాపకులకు బోధనను, విద్యార్థులకు అభ్యసనాన్ని సులభతరం చేస్తుందని తెలిపారు. నేటి పోటీ ప్రపంచంలో సూపర్ స్కిల్స్‌తో కూడిన అనేక ఉద్యోగాలు వస్తున్నాయని, వాటికి తగ్గట్టు యువత నూతన నైపుణ్యాలను, కొత్త కోర్సులను అభ్యసించాల్సిన అవసరం ఉందన్నారు. నౌక, విమానయాన, ఆరోగ్య రంగాలలో ఈ కొత్త పాఠ్యాంశాల సహాయంతో సొంతంగా ఉపాధి అవకాశాలను సృష్టించుకోవచ్చని చెబుతూ, కళాశాలల మేనేజ్‌మెంట్లు, అధ్యాపకులు ఈ నూతన ఒరవడిని సృష్టించడానికి ప్రణాళికలు రూపొందించాలని ఆయన సూచించారు. కొత్త కోర్సుల రూపకల్పనపై ఆయన కళాశాలల మేనేజ్‌మెంట్లు, అధ్యాపకులతో విస్తృతమైన చర్చా గోష్ఠిని కూడా నిర్వహించారు. విశిష్ట అతిథిగా విచ్చేసిన ఉపకులపతి ఆచార్య ఉమేష్ కుమార్ మాట్లాడుతూ, నూతన పాఠ్యాంశాలు, మల్టీడిసిప్లినరీ కోర్సులు, ఇంటర్న్‌షిప్‌తో కూడిన కోర్సులపై డిగ్రీ విద్యార్థులు ఆధారపడాల్సిన అవసరం ఎంతైనా ఉందని, వీటి వలన విషయ పరిజ్ఞానంతో పాటు ఉపాధి అవకాశాలు కూడా మెరుగుపడతాయని అన్నారు. తెలంగాణ రాష్ట్రంలో విద్యార్థులు, వారి తల్లిదండ్రులు, కళాశాలలకు మార్గదర్శకంగా విశ్వవిద్యాలయాలు పనిచేస్తాయని, వీటికి అనువైన ప్రణాళికలను అందించడమే ఉన్నత విద్యా మండలి కృషి అని ఆయన తెలిపారు. కళాశాలలు తమ పిల్లలకు కొత్త కోర్సులు, కొత్త పాఠ్యాంశాలు నేర్పించడానికి ముందుకు రావాలని, తద్వారా ఉపాధి అవకాశాలు మెరుగుపడటంతో పాటు అభివృద్ధి చెందిన సమాజ రూపకల్పనకు బాటలు వేసినవారవుతామని చెప్పారు. కొత్త కోర్సుల రూపకల్పనకు, అమలుకు తాము ఎల్లప్పుడూ సిద్ధంగా ఉన్నామని ఆయన హామీ ఇచ్చారు. గౌరవ అతిథి, వీసీ ఓఎస్‌డీ డాక్టర్ హరికాంత్ మాట్లాడుతూ, రిటైల్, వాణిజ్య రంగాలలో అనేక కొత్త ఉద్యోగాలు వస్తున్నాయని, వాటికి అనుగుణంగా విద్యార్థులు నూతన కోర్సులను, సాంకేతికతను అధ్యయనం చేయాలని, కళాశాలలు సమాజానికి అనుగుణంగా కొత్త కోర్సులను ప్రారంభించడానికి ముందుకు రావాలని పిలుపునిచ్చారు. కార్యక్రమ కన్వీనర్, అకాడమిక్ ఆడిట్ సంచాలకులు డాక్టర్ సరసిజ మాట్లాడుతూ, సైన్స్, ఆర్ట్స్, కామర్స్ కోర్సులలో సాంకేతిక కోర్సులు లేదా వాల్యూ యాడెడ్ కోర్సులను ప్రవేశపెట్టాల్సిన అవసరం ఉందని, వాటి వల్ల విద్యార్థులకు అదనపు ప్రయోజనంతో పాటు సాంకేతికత సహాయంతో కొత్త ఉద్యోగాలు పొందవచ్చని, దీని కోసం పాత పాఠ్యాంశాలను నవీకరించుకోవాలని సూచించారు. ఈ అవగాహన కార్యక్రమంలో కరీంనగర్ జిల్లా డిగ్రీ కళాశాలల అధ్యాపకుల సంఘం బాధ్యులు, వివిధ కళాశాలల ప్రిన్సిపాల్‌లు, అధ్యాపకులు, సోషల్, ట్రైబల్, బిసి, మైనారిటీ వెల్ఫేర్ రెసిడెన్షియల్ అధ్యాపకులు పాల్గొన్నారు. శాతవాహన విశ్వవిద్యాలయ పరీక్షల నియంత్రణ అధికారి డాక్టర్ సురేష్ కుమార్, డీన్ సిడిసి డాక్టర్ జాఫర్, సైన్స్ కళాశాల ప్రిన్సిపల్ డాక్టర్ ఎస్. రమాకాంత్, ఆర్ట్స్ కళాశాల ప్రిన్సిపల్ డాక్టర్ పద్మావతి సహా పలు కళాశాలల అధ్యాపకులు ఈ అవగాహన కార్యక్రమంపై విస్తృతమైన చర్చలో పాలుపంచుకున్నారు.

సీనియర్ బీజేపీ నాయకుడు, మాజీ గవర్నర్ సిహెచ్ విద్యాసాగర్ రావు మాట్లాడుతూ, బండి సంజయ్ కరీంనగర్‌ను బీజేపీ అడ్డాగా నిలబెట్టారని, ఇలాంటి ఫలితం కోసం తెలంగాణ వ్యాప్తంగా బీజేపీ నాయకులు, కార్యకర్తలు ఎదురుచూస్తున్నారని తెలిపారు. ఇటీవల జరిగిన మున్సిపల్ కార్పొరేషన్ ఎన్నికల్లో బీజేపీ విజయం సాధించడంలో బండి సంజయ్ పట్టుదల, కరీంనగర్ బీజేపీ శ్రేణుల కసితోనే బల్దియాపై కాషాయ జెండా ఎగిరిందని ఆయన స్పష్టం చేశారు. రెండు రోజులపాటు జరిగిన బీజేపీ శిక్షణ తరగతుల ముగింపు కార్యక్రమానికి హాజరై ఆయన ప్రసంగించారు. కార్యకర్తల కృషితో రాబోయే రోజుల్లో తెలంగాణలో బీజేపీ ప్రభుత్వమే అధికారంలోకి వస్తుందని విశ్వాసం వ్యక్తం చేశారు. మోదీ ప్రభుత్వ తీరుపై దేశ ప్రజలకు ఎనలేని విశ్వాసం, నమ్మకం ఏర్పడిందని, దేశవ్యాప్తంగా బీజేపీ, ఎన్డీఏకు వస్తున్న ఫలితాలే దీనికి నిదర్శనమని ఆయన పేర్కొన్నారు. శిక్షణ కార్యక్రమాలు నాయకత్వ లక్షణాలు మెరుగుపరచుకోవడానికి, పార్టీని మరింత బలోపేతం చేయడానికి ఎంతో దోహదం చేస్తాయన్నారు. స్వావలంబన, స్వాభిమానం దిశగా ఆలోచనలు జరగాలని, యువత భవిష్యత్తును దృష్టిలో ఉంచుకొని రాష్ట్ర ప్రభుత్వం ముందుకు కొనసాగాలని విద్యాసాగర్ రావు సూచించారు. ముఖ్యమంత్రి రేవంత్ రెడ్డి గతంలో స్కిల్ డెవలప్‌మెంట్‌ను ప్రోత్సహిస్తానని చెప్పారని, అయితే నేడు ఆ దిశగా ఆయన ఆలోచన చేయడం లేదని ఆయన విమర్శించారు. యువతను ఆదుకోవడానికి, ఉపాధి అవకాశాలు కల్పించడానికి ప్రతి మండలానికి ఒక స్కిల్ డెవలప్‌మెంట్ సెంటర్‌ను ప్రారంభించాలని రాష్ట్ర ప్రభుత్వాన్ని కోరారు. ముఖ్యంగా మారుమూల ప్రాంతాల్లోని యువత స్కిల్ డెవలప్‌మెంట్ సెంటర్ల కోసం ఎంతగానో ఎదురుచూస్తున్నారని ఆయన గుర్తుచేశారు. రాష్ట్రంలో జి.ఎం.ఆర్ లాంటి సంస్థ మూడు ప్రాంతాలలో స్వచ్ఛందంగా స్కిల్ డెవలప్‌మెంట్ సెంటర్లను నడుపుతూ చాలా మందికి ఉపాధి కల్పిస్తోందని ఆయన ఈ సందర్భంగా ప్రస్తావించారు. పంపకవి విగ్రహాన్ని ట్యాంక్ బండ్ పై ఆవిష్కరించడానికి రాష్ట్ర ప్రభుత్వం చర్యలు తీసుకోవాలని కూడా విజ్ఞప్తి చేశారు.

సదాశివనగర్ మండలం ధర్మారావుపేట జిల్లా పరిషత్ ఉన్నత పాఠశాలలో చదువుకున్న కారంకంటి అలేఖ్య, పదవ తరగతిలో 566 మార్కులు సాధించి ఐఐఐటీ బాసరలో సీటు పొందింది. పాఠశాల ఉపాధ్యాయులు ఈ విషయాన్ని తెలిపారు. వ్యవసాయం చేస్తూ తమ కూతురును చదివించిన తల్లిదండ్రులు వరకుమార్, రేణుకలు తమ కుమార్తె విజయం పట్ల ఎంతో సంతోషం వ్యక్తం చేశారు. ఐఐఐటీకి ఎంపికవడం పట్ల అలేఖ్య కూడా తన ఆనందాన్ని వ్యక్తం చేసింది. ఆమె సాధించిన ఈ విజయం పట్ల కుటుంబసభ్యులు, తల్లిదండ్రులు, గ్రామస్థులు ఆనందం వ్యక్తం చేశారు.