छत्रपती संभाजीनगर जिल्ह्यातील वैजापूर तहसील कार्यालयात जोरदार राडा झाल्याची घटना घडली आहे. एका शेतकऱ्याने कार्यालयात व्हिडिओ काढल्याने कर्मचारी आणि शेतकरी यांच्यात हाणामारी झाली. या घटनेमुळे तहसील कार्यालय परिसरात काही काळ तणावपूर्ण परिस्थिती निर्माण झाली होती.

जालना पोलिसांनी वाळू माफियांवर मोठी कारवाई करत एक महत्त्वपूर्ण दणका दिला आहे. खरपुडी शिवारात केलेल्या कारवाईत पोलिसांनी तब्बल ३५० ब्रास अवैध वाळू साठा जप्त केला.

बुलडाणा येथून मिळालेल्या माहितीनुसार, केंद्रीय राज्यमंत्री प्रतापराव जाधव यांनी एक महत्त्वपूर्ण वक्तव्य केले आहे. त्यांच्या म्हणण्यानुसार, 'ऑपरेशन टायगर' हे लवकरच पूर्णत्वास येणार आहे.

यवतमाळ जिल्ह्यातील आर्णी तालुक्यात, विशेषतः सेलू परिसरात, सध्या भीषण पाणीटंचाई निर्माण झाली आहे. पिण्याच्या पाण्यासाठी ग्रामस्थांना मोठ्या अडचणींचा सामना करावा लागत असून, अनेक ठिकाणी पाण्याचे स्रोत पूर्णपणे आटले असल्याने नागरिकांची गैरसोय वाढली आहे. या गंभीर परिस्थितीत सामाजिक कार्यकर्ते नंदकिशोर अमृत पानोडे यांनी स्वतः पुढाकार घेतला आहे. त्यांनी स्वखर्चाने टँकरद्वारे पाणीपुरवठा सुरू केला असून, त्यांच्या या कार्यामुळे अनेक गावांतील नागरिकांना दिलासा मिळाला आहे. पानोडे यांच्या या सामाजिक उपक्रमाचे सर्व स्तरातून कौतुक होत आहे. दरम्यान, या परिस्थितीकडे प्रशासनाने गांभीर्याने लक्ष देऊन पाणीटंचाईवर कायमस्वरूपी उपाययोजना करावी, अशी मागणी ग्रामस्थांकडून केली जात आहे.

क्रांतिकारी शेतकरी संघटनेचे संस्थापक अध्यक्ष रविकांत तुपकर यांच्या नेतृत्वाखाली १६ जून रोजी बुलढाणा येथे सुरू झालेल्या बेमुदत अन्नत्याग आंदोलनाने आता राज्यव्यापी जनआंदोलनाचे रूप घेतले आहे. शासनाच्या फसव्या, दिशाभूल करणाऱ्या आणि जाचक अटींनी भरलेल्या कर्जमाफीच्या जी.आर. विरोधात शेतकऱ्यांचा संताप अनावर झाला असून, गावागावात जी.आर.च्या होळ्या पेटवल्या जात आहेत. बुलढाणा, वाशीम आणि हिंगोली जिल्ह्यांतील विविध गावांमध्ये शेतकऱ्यांनी रस्त्यावर उतरून सरकारविरोधात तीव्र घोषणाबाजी करत आपला निषेध नोंदवला. बुलढाणा जिल्ह्यातील डोमरूळ, दहिद बु., तांदूळवाडी, अटकळ, अंभोडा आणि मेहकर येथे शेकडो शेतकऱ्यांनी एकत्र येऊन शासनाच्या कर्जमाफीच्या जी.आर.ची जाहीर होळी केली. मेहकर तहसील कार्यालयासमोर क्रांतिकारी शेतकरी संघटनेचे जिल्हाध्यक्ष डॉ. ज्ञानेश्वर टाले यांच्या नेतृत्वाखाली शेतकऱ्यांनी आक्रमक आंदोलन करत सरकारच्या शेतकरीविरोधी धोरणांचा निषेध केला. वाशीम जिल्ह्यातील अडोळी येथे एका शेतकऱ्याने आंदोलनाला पाठिंबा देत स्वतःची दुचाकी पेटवून सरकारविरोधात तीव्र रोष व्यक्त केला, तर हिंगोली जिल्ह्यातील सेनगाव तालुक्यातील धनगरवाडी येथे शेतकऱ्यांनी फसव्या जी.आर.ची होळी करत सरसकट कर्जमुक्तीची मागणी केली. या आंदोलनात सरपंच विनोद विरकर, तंटामुक्ती अध्यक्ष सुरेश खडसे यांच्यासह अनेक शेतकरी सहभागी झाले होते, जिथे "कर्जमाफी नाही तर सरकारला माफी नाही" आणि "शेतकरी वाचवा, शेती वाचवा" अशा घोषणांनी परिसर दणाणून सोडण्यात आला. यावेळी बोलताना रविकांत तुपकर यांनी सांगितले की, शासनाने जाहीर केलेली कर्जमाफी ही शेतकऱ्यांची क्रूर थट्टा असून, लाखो शेतकऱ्यांना लाभापासून वंचित ठेवणारा हा जी.आर. स्वीकारला जाणार नाही. ते म्हणाले की, आज गावागावात जी.आर.च्या होळ्या पेटल्या आहेत, उद्या महाराष्ट्रभर सरकारविरोधात संघर्षाची ज्वाला भडकणार आहे. सरसकट कर्जमुक्ती, हक्काचा पीकविमा आणि शेतकऱ्यांना न्याय मिळेपर्यंत हा लढा थांबणार नाही, अशी ठाम भूमिका त्यांनी मांडली. तुपकर यांनी पुढे म्हटले की, शेतकरी आता जागा झाला असून, आत्महत्या, कर्जबाजारीपणा आणि दुष्काळाच्या संकटात होरपळणाऱ्या शेतकऱ्यांच्या जखमांवर मीठ चोळण्याचे काम सरकार करत आहे. जर शासनाने तातडीने निर्णय घेतला नाही, तर महाराष्ट्रातील प्रत्येक गाव संघर्षाचे केंद्र बनेल आणि सरकारला शेतकऱ्यांच्या तीव्र रोषाला सामोरे जावे लागेल, असा इशारा त्यांनी दिला. या अन्नत्याग आंदोलनाला राज्यभरातून शेतकरी, सामाजिक संघटना, युवक आणि विविध क्षेत्रातील नागरिकांचा मोठ्या संख्येने पाठिंबा मिळत आहे. गावागावात पेटलेली ही ठिणगी आता व्यापक जनआक्रोशात रूपांतरित होत असून, सरकारने वेळीच शेतकऱ्यांच्या मागण्या मान्य केल्या नाहीत तर आंदोलन अधिक तीव्र करण्याचा इशारा देण्यात आला आहे. "ही फक्त सुरुवात आहे," असे सांगत सरसकट कर्जमुक्ती, हक्काचा पीकविमा, कर्जबाजारी शेतकऱ्यांना न्याय आणि शेतीला जगण्याची हमी मिळेपर्यंत संघर्ष सुरूच ठेवण्याचा निर्धार व्यक्त करण्यात आला आहे. शेतकरी आता मागे हटणार नसून, हक्क मिळेपर्यंत लढा देणार असल्याची घोषणा यावेळी करण्यात आली.

Post by Sakshi Sahtosh

जालना शहरात दामिनी पथक सक्रिय झाले असून त्यांनी बसस्थानक परिसरात टवाळखोरांना ताब्यात घेतले आहे. या पथकाने कारवाई करत अशा घटकांवर वचक निर्माण केला आहे. नागरिकांसाठी ९८२२१७१९१८ हा हेल्पलाइन क्रमांकही उपलब्ध करून देण्यात आला आहे.

जाफ्राबाद तालुक्यात अवैध वाळू उपशावर आतापर्यंतची सर्वात मोठी कारवाई करण्यात आली आहे. या कारवाईमध्ये ८ हायवा ट्रक आणि १ जेसीबीसह कोटींचा मुद्देमाल जप्त करण्यात आला आहे.

बुलडाणा येथे सुरू असलेल्या बेमुदत अन्नत्याग आंदोलनाचा आज तिसरा दिवस आहे. या आंदोलनाचे नेतृत्व करत असलेले रविकांत तुपकर यांची प्रकृती खालावली असली तरी, ते आपल्या भूमिकेवर ठाम आहेत.

शाळा शिकण्यासाठी मुलाखतीची आवश्यकता का, असा प्रश्न आता सामाजिक कार्यकर्त्यांकडून विचारला जात आहे. शिक्षण घेण्यापूर्वी मुलाखत घेण्याच्या पद्धतीवर अनेक सामाजिक कार्यकर्त्यांनी प्रश्नचिन्ह उपस्थित केले आहे.